1, 2. (a) Man kai taneh si ipisahken e? (Nen gambar bas sampul buku.) (b) Arah pengenehenen enda, jaminen kai si idat kalak si itaban e?

BAS pengenehenen Esekiel si terakhir, ikataken man bana maka lit taneh si arus ipisahken guna tujun si khusus. Taneh e ipisahken jadi sumbangen man Jahwe, labo jadi warisen man salah sada suku Israel. Ikataken ka man Esekiel maka lit sada kota si luar biasa si gelarna la lit bagi gelar kota si deban. Arah pengenehenen enda, idat kalak si itaban e jaminen si penting eme Jahwe tetap lit ras kalak e janah itegu-teguNa kalak e sanga mulih kalak e ku kutana.

² Ikataken Esekiel keterangen si jelas kerna taneh sumbangen e. Keterangen e lit hubungenna ras kita perban kita umat Jahwe. Mari sibahas kerna si e gelah banci sidat kai pelajarenna man banta.

3. Jelasken lima bagin taneh si ipisahken Jahwe janah kai tujunna tiap bagin. (Nen kotak “Taneh Sumbangen si ‘Arus Ipisahken’.”)

³ Bas taneh si ipisahken e, lit taneh si ikhususken janah bentukna segi empat. Utara nari ku selatan janah timur nari ku barat gedangna 25.000 hasta (13 kilometer). Taneh si  ikhususken enda igelari “kerina taneh si isumbangken” janah taneh e ibagi jadi telu. Si arah datas ibereken man kalak Lewi, janah si arah tengah ibereken jadi ingan rumah pertoton ras imam-imam. Duana bagin taneh e igelari “sumbangen si badia.” Si arah teruh, bagin taneh si terkitiken, eme “daerah si sisa” si iban jadi “ingan penduduk kota” ntah pe ingan enterem jelma.​—Esek. 48:15, 20.

4. Kai si banci sipelajari arah cara Jahwe misahken taneh sumbangen e?

⁴ Kai si banci sipelajari arah cara Jahwe misahken taneh sumbangen? SuruhNa gelah taneh sumbangen e leben ipisahken, dung e maka ibagiken taneh man suku-suku Israel. E mbuktiken maka taneh si ipisahken e eme bagin si pentingna. (Esek. 45:1) Emaka, arah uruten pembagin taneh e, pasti melala pelajaren si banci idat kalak si itaban e. Si arus ipelebe kalak e bas geluhna eme nembah Jahwe. Gundari pe perlu sipelebe kegiaten rohani, bagi erlajar Pustaka, perpulungen, ras erberita. Adi siusih Jahwe, siban me nembah Jahwe si pentingna bas geluhta tiap wari.

5, 6. (a) Jang ise kota e? (b) Kai saja si labo igambarken kota e janah engkai?

⁵ Baca Esekiel 48:15. Kai ertina “kota” e ras daerah si lit i sekelilingna? (Esek. 48:16-18) Ikatakan Jahwe man Esekiel, ‘Daerah kota jadi jang kerina kalak Israel.’ (Esek. 45:6, 7) Emaka kota ras daerah si lit i sekelilingna labo termasuk “sumbangen si badia” si arus ‘ipisahken man Jahwe.’ (Esek. 48:9) Janahta nginget kerna si e, mari sibahas kai pelajarenna man banta arah pengaturen kota e.

⁶ Tangtangna arus siteh lebe kai si labo igambarken kota enda. Pertama, kota enda labo kota Jerusalem si ibangun mulihi si lit i je rumah pertoton. Engkai? Perban labo lit rumah pertoton bas kota si idah Esekiel enda. Si peduaken, kota enda labo salah sada kota bas negri Israel si enggo ipekena ras si iban mejile mulihi. Engkai? Perban kalak si itaban si mulih e ntah pe keturunenna la pernah bangunna kota si mirip ras kota enda. Si peteluken, kota enda inganna labo i surga. Engkai? Perban kota enda ibangun bas ingan si igelari “ingan enterem jelma” labo bas daerah si ikhususken guna nembah Jahwe.​—Esek. 42:20.

7. Kota kai nge si idah Esekiel e? Janah banci saja kai si igambarken kota e? (Nen gambar bas awal pasal.)

⁷ Adi bage, kota kai nge si idah Esekiel e? Perlu siinget maka bas pengenehenen e pe idahna ka sada negri. (Esek. 40:2; 45:1, 6) Banci siteh arah Pustaka maka negri e eme negri rohani. Jadi kota e pe pasti kota rohani ka, labo tuhu-tuhu lit. Kai nge si bayangkenndu sanga begindu kerna sada  “kota”? Biasana mis sibayangken enterem kalak si tading i je janah lit peraturen bas kota e. Emaka, kota si bentukna segi empat si empatna sisina seri gedangna, nggambarken organisasi si tertip ras teratur.

8. Ngayak ja nge pengaruhna dahin organisasi e? Janah engkai maka banci ikataken bage?

⁸ Ngayak ja nge pengaruhna organisasi e? Pengenehenen Esekiel ncidahken maka kota e lit bas negri rohani. Emaka, organisasi e erpengaruh man kegiaten umat Dibata bas pardis rohani. Janah perban kota e lit bas ingan enterem jelma, labo bas daerah si badia, enda ngingetken kita maka organisasi e lit bas doni, labo i surga. Seh ngasa gundari, organisasi e tetap mereken manpaat man kerina penduduk bas pardis rohani.

9. (a) Bas jamanta, ise nge si lit bas organisasi e? (b) Kai pagi si ilakoken Jesus bas Pemerentahen Seribu Tahun?

⁹ Ise nge si lit bas organisasi e? Bas pengenehenen Esekiel, lit si jadi “peminpin” bas kota e. (Esek. 45:7) Peminpin e eme pengawas umat Dibata, tapi ia labo imam ntah pe kalak Lewi. Peminpin e ngingetken kita man permakan-permakan rohani bas jamanta, khususna si arapenna labo ku surga. Permakan-permakan si perkeleng enda bagin arah “biri-biri si deban” janah alu meteruk ukur, patuh kalak e man pemerentahen Kristus si lit i surga. (Joh. 10:16) Bas Pemerentahen Seribu Tahun pagi, ilantik Jesus pertua-pertua ntah pe ‘peminpin-peminpin’ “i belang-belang doni.” (Ms. 45:16) Ikutken kalak e pagi petunjuk arah Kerajan surga guna ngurus umat Dibata sedekah seribu tahun e.

10. Kai gelar kota e, janah gelar e mereken jaminen kai?

¹⁰ Baca Esekiel 48:35. Gelar kota e eme “Jahwe Lit i Je.” Gelar e jadi jaminen maka Jahwe lit ras penduduk kota e ntah pe itegu-teguNa kalak e. Sanga cidahken Jahwe kota si lit i tengah-tengah negri e man Esekiel, tempa-tempa nina Jahwe man kalak e, ‘Mulihi nge pagi Aku ras kena.’ Kata-kata e pasti erban meriah ukur kalak e!

11. Pelajaren kai si banci sidat arah kota e ras gelar kota e?

¹¹ Pelajaren kai si banci sidat arah nubuat Esekiel enda? Gelar kota e erban kita reh tekna maka tegu-tegu Jahwe umatNa si lit i doni, gundari seh rasa lalap. Gelar kota e pe njelasken kebenaren si penting: Kota e iban labo guna mereken kuasa man manusia tapi guna ngikutken pengaturen si iban Jahwe si perkeleng ras masuk akal. Contohna, la pediat Jahwe organisasi e rate-ate mbagiken negri e, arus ikutkenna pengaturen Jahwe. Gundari bas pardis rohani, bereken Jahwe tugas man kerina umatNa termasuk man kalak si tempa-tempa kurang penting. Emaka, arus ergai  organisasi e kai si enggo tetapken Jahwe, arus ergaina tugas kai pe si ilakoken kerina umat Jahwe.​—Esek. 46:18; 48:29.

12. (a) Kai si menarik arah kota e, janah kai maksudna e? (b) Pelajaren kai si banci dat pengawas-pengawas Kristen?

¹² Kai ka si menarik arah kota e? Bas jaman si mbarenda, sada kota ikelilingi tembok janah la melala gerbangna. Tapi kota si gelarna “Jahwe Lit i Je” lit 12 gerbangna, telu gerbangna bas tiap sisi kota e. (Esek. 48:30-34) Jumlah gerbang e ncidahken maka kalak si ertugas bas organisasi si lit bas kota e nukah ijumpai kerina umat Dibata. Sepulu dua gerbang e pe ncidahken maka “kerina kalak Israel” banci masuk ku kota e. (Esek. 45:6) Enda jadi pelajaren man pengawas-pengawas Kristen. Ate Jahwe ula min kalak mbiar man pengawas-pengawas e janah ula min kalak segan ngerana ras kalak e. Nggit min pengawas-pengawas e nampati kerina kalak si tading bas pardis rohani e.

13. Kai erbage-bage tugas si ilakoken umat Dibata bas kota e?

¹³ Mari siperdiateken mulihi bas jaman Esekiel janah sinen ka kai deba nari si itulisna kerna pengenehenen si luar biasa e. Enggo ikataken Jahwe maka erbage-bage tugas si ilakoken umatNa. Contohna, lit si “ngelayani bas ingan si badia” eme imam-imam ras kalak Lewi. Dahin imam-imam eme mpersembahken korban ras ngelayani i lebe-lebe Jahwe. Dahin kalak Lewi ‘ngelakoken tugas-tugas bas rumah pertoton ras kerina si ilakoken i je.’ (Esek. 44:14-16; 45:4, 5) Selain si e, lit ka kalak si deban si erdahin guna nampati bas kota e. Ise kalak e?

14. Kalak si erdahin guna nampati bas kota e, ngingetken kita kerna kai?

¹⁴ Kalak si erdahin guna nampati bas kota e reh arah “kerina suku Israel.” Dahin kalak e nuan-nuan gelah lit si banci “jadi pangan man kalak si erdahin bas kota.” (Esek. 48:18, 19) Pengaturen enda ngingetken kita kerna dahin si banci silakoken bas pardis rohani. Kerina kita banci nampati senina-senina Kristus si ipilih ku surga bage pe dilaki-dilaki si lit bas “kelompok jelma si enterem” si ilantik Jahwe guna minpin umatNa. (Ket. 7:9, 10) Carata ndukung kalak e eme ngikutken petunjuk arah budak si setia ras pentar janah e me si pentingna.

15, 16. (a) Kai ka si banci sipelajari arah pengenehenen Esekiel? (b) Kesempaten kai si lit man banta gundari?

¹⁵ Lit ka sada nari si banci sipelajari arah pengenehenen Esekiel. Kai e? Ikataken Jahwe selain kalak Lewi, kerina kalak Israel si 12 suku erdahin bas dua ingan: (1) Bas halamen rumah pertoton, (2) bas mbalmbal kota e. Kai si ilakoken kalak e i je? Bas halamen rumah pertoton, kerina kalak  Israel “nembah Jahwe,” persembahken kalak e korban man baNa. (Esek. 46:9, 24) Kalak Israel e pe ikut nampati kota e alu mperjumai mbalmbal si lit bas kota e. Kai si banci sipelajari?

¹⁶ Gundari, lit kesempaten man kelompok jelma si enterem guna ngelakoken dahin bagi si igambarken bas pengenehenen Esekiel. Sembah kalak e Jahwe “bas rumah pertotonNa.” Uga carana? Bereken kalak e korban pujin man baNa. (Heb. 13:15; Ket. 7:9-15) Erberita kalak e, rende, ras mereken komentar bas perpulungen. Si e ndai kerina penting kel akap kalak e, perban e bagin i bas nembah Jahwe. (1 Kro. 16:29) Selain si e, melala si banci ilakoken umat Dibata guna nampati organisasi Dibata. Lit si ikut mbangun ras si ngurus Bale Kerajan ntah pe fasilitas kantor cabang. Lit ka si erdahin bas proyek-proyek si deban bas organisasi Jahwe, si debanna ikut mereken sumbangen. Kerina kalak e tempa-tempa mperjumai taneh e “guna kemulian Dibata.” (1 Kor. 10:31) Meriah ukur kalak e janah semangat kalak e ngelakoken dahinna perban tehna “ngena ate Dibata  korban-korban si bage.” (Heb. 13:16) Tutus nge atendu ngelakoken si e ndai kerina?

17. (a) Uga pengenehenen Esekiel terjadi ka pagi sekali nari? (b) Bas Pemerentahen Seribu Tahun, ise pagi si dat manpaat arah kai si ilakoken organisasi e?

¹⁷ Terjadi ka nge pagi pengenehenen Esekiel kerna taneh sumbangen? Ue, janah pengaruhna ndauh belinen. Taneh si igelari “sumbangen si badia” si i je lit ingan si badia Jahwe, lit i tengah-tengah negri e. (Esek. 48:10) Emaka kenca Harmagedon pagi, i japa pe kita tading, Jahwe lit ras kita. (Ket. 21:3) Bas Pemerentahen Seribu Tahun, lit pagi i je organisasi, janah kalak si lit bas organisasi e eme kalak si ilantik guna ngurus umat Dibata. Hasil pendahin organisasi e seh ku belang-belang doni. Isampati organisasi e pagi kerina kalak si nggit jadi rakyat “doni si mbaru” eme kalak si ngena ate Dibata.​—2 Pet. 3:13.

18. (a) Engkai banci kita tek maka kai si ilakoken organisasi e sesuai pagi ras pemerentahen Dibata? (b) Gelar kota e erban kita tek nandangi kai?

¹⁸ Engkai banci kita tek maka kai si ilakoken organisasi e lalap pagi sesuai ras pemerentahen Dibata? Perban ikataken bas Pustaka maka kota si lit bas pengenehenen Esekiel e si inganna bas doni lit 12 gerbangna. Enda seri ras kota si lit i surga si 12 ka gerbangna eme Jerusalem si Mbaru (144.000 teman Jesus merentah). (Ket. 21:2, 12, 21-27) Enda mbuktiken maka kai pe si ilakoken organisasi si lit i doni, sesuai pagi ras pengaturen si iban Dibata i surga. Idalanken organisasi e ka pagi kerina pengaturen si iban Kerajan Dibata janah gelar kota e, “Jahwe Lit i Je,” erban kita tek maka Jahwe pasti pagi isembah alu cara si benar seh rasa lalap bas Pardis. Lanai terturiken uga riahna masa depanta!