1, 2. Menurut Esekiel 47:1-12, kai si idah Esekiel ras si itehna? (Nen gambar bas awal pasal.)

BAS pengenehenen kerna rumah pertoton e perdiateken Esekiel lit ka si menarik. Lit lau maler si bersih kel arah rumah pertoton. (Baca Esekiel 47:1-12.) Manjar-anjar maler lau e arah teruh pintu masuk ingan si badia, kenca si e ndarat arah deher gerbang sebelah timur rumah pertoton. Ibabai malekat e Esekiel ndarat arah rumah pertoton janah ukur malekat e asa gedangna lau si maler e. Piga-piga kali lewati Esekiel lau e bagi si isuruh malekat e janah idah Esekiel meter kel lau e reh bagesna janah reh derasna. Emaka, adi lewatina atena lau e arus ia erlangi.

² Ikataken man Esekiel maka lau e maler ku Laut Mati. Masin kel laut e emaka la lit kai pe si banci nggeluh i je. Tapi, kerina si ipaleri lau e jadi segar mulihi janah melala kel ikan i je. Gedang-gedang tepi lau maler e, idah Esekiel erbage-bage batang kayu. Tiap bulan batang kayu e erbuah, buahna banci ipan janah bulungna banci jadi tambar. Ngidah kerina  e meriah ukur Esekiel janah arapenna pe reh paguhna. Tapi, kai ertina pengenehenen e man Esekiel ras kalak si itaban? Janah kai ertina man banta?

3. Engkai maka iteh kalak Jahudi maka lau maler si lit bas pengenehenen Esekiel labo tuhu-tuhu lit?

³ Pasti teh kalak Jahudi maka lau maler e labo tuhu-tuhu lit. Pengenehenen e banci saja ngingetken kalak e man nubuat si deban si banci saja itulis Nabi Joel lebih 200 tahun si lewat. (Baca Joel 3:18.) Sanga kalak Jahudi si itaban mbaca nubuat Joel e, labo arapken kalak e maka lit ‘naktaken lau anggur si entebu’ i gunung-gunung ntah pe ‘melala kel susu’ i bukit-bukit ntah lit ‘mata lau i rumah Jahwe.’ Emaka tek kita, kalak e pe tehna maka lau maler si lit bas pengenehenen Esekiel e, labo tuhu-tuhu lit. * Adi bage, kai nge ate Jahwe si ipesehNa? Isampati Pustaka kita guna ngangkai erti arah piga-piga bagin bas pengenehenen e. Banci ikataken, lit telu nubuat bas pengenehenen e si mbuktiken maka keleng ate Dibata umatNa janah pegegehiNa teNa kalak e.

4. (a) Kai pasu-pasu si iarapken kalak Jahudi? (b) Uga Pustaka make istilah “lau maler” ntah pe “lau” gelah tek kita maka ipasu-pasu Jahwe umatNa? (Nen kotak “Lau Maler si Mereken Pasu-Pasu Jahwe.”)

⁴ Lau maler si mereken pasu-pasu. Rusur ipake Pustaka istilah lau maler ras lau guna nggambarken pasu-pasu Jahwe si mereken kegeluhen. Emaka, lau si maler arah rumah pertoton banci saja nampati umat Dibata meteh kerna si enda: Adi sembah kalak e Jahwe alu cara si benar, aloken kalak e pasu-pasu rohani si la tanggung buena. Kai saja pasu-pasu e? Banci kalak e mulihi iajari imam-imam, janah perban korban-korban mulihi ipersembahken bas rumah pertoton, tek kalak e maka dosa-dosana banci iampuni. (Esek. 44:15, 23; 45:17) Emaka, lau si maler arah rumah pertoton tempa-tempa mbersihken kalak e.

5. Engkai maka tek kalak Jahudi maka pasu-pasu Jahwe bias man kalak e kerina?

⁵ Bias kin pasu-pasu Jahwe e man kerina umatNa? Bias. Perban kira-kira bas jarak dua kilometer saja pe, lau si kitik bas pengenehenen Esekiel e rempet jadi lau si deras! (Esek. 47:3-5) Bicara reh teremna pe kalak Jahudi si mulih ku kutana, pasu-pasu Jahwe pasti reh buena guna ncukupi keperlun kalak e bali bagi lau si maler bas pengenehenen e si lalap reh derasna.

6. (a) Janji kai si lit bas pengenehenen e? (b) Persinget kai si lit bas pengenehenen e? (Nen ka cataten i teruh.)

⁶ Lau kegeluhen. Bas pengenehenen Esekiel, lau e maler ku Laut Mati janah segar banna mulihi laut e. Emaka, melala ikan si nggeluh bas laut e bali bagi bas Laut Tengah si ikataken ka Laut Besar. Gedang-gedang tepi laut e, maju kel bisnis perikanen, ingan e lit i antara dua kota si ndauh jarakna. Nina malekat e, “Ku ja pe lau e maler lit kegeluhen i je.”  Gambaren enda mereken jaminen maka lit pagi masana Jahwe saja ngenca si isembah mulihi, janah e mereken pasu-pasu man manusia. Tapi kerina nge laut e ipaleri lau si reh arah rumah pertoton e? Lang. Ikataken malekat e lit bagin arah laut e si erkubang si la ipaleri lau e janah tetap “ipediat jadi sira.” * (Esek. 47:8-11) Emaka, bas pengenehenen e pe lit persinget man umat Dibata: Labo pagi kerina kalak ipepalem ntah pe ngaloken pasu-pasu Jahwe.

7. Batang kayu si lit bas pengenehenen e erban kalak si itaban tek kerna kai?

⁷ Batang kayu si mereken pangan ras tambar. Pasti reh jilena daerah e perban lit batang kayu i tepi lau maler e. Tapi kai ertina batang kayu e? Pasti meriah ukur Esekiel ras kalak si itaban e sanga bayangkenna batang kayu e erbuah tiap bulan. Batang kayu e pe erban kalak e reh tekna maka bereken Jahwe nge pagi pangan rohani man kalak e. Selain si e, bulung batang kayu e pe banci “jadi tambar.” (Esek. 47:12) Iteh Jahwe kai si perluna akap kalak si itaban si enggo mulih e eme ipepalem secara rohani, janah erjanji Jahwe guna ngelakoken si e. Uga carana? Jawapenna lit bas nubuat-nubuat si deban bagi si ibahas bas Pasal 9 buku enda.

8. Ja nari banci siteh maka pengenehenen Esekiel e terjadi ka pagi janah pengaruhna ndauh belinen?

⁸ Bas Pasal 9 buku enda, enggo sipelajari maka kalak si itaban si mulih e sitik denga ngenca idahna nubuat e terjadi. Engkai? Perban kalak e la setia janah lanai sembahna Jahwe alu cara si benar. Pasti kecewa kel kalak si itaban si setia ngidah teman-temanna la patuh. Tapi, umat Jahwe si setia tek maka kerina janji Jahwe pasti itepatiNa. (Baca Josua 23:14.) Jadi, pengenehenen Esekiel pasti terjadi ka mulihi janah pengaruhna ndauh belinen. Ndigan e terjadi?

9. Ndigan pengenehenen Esekiel kerna rumah pertoton e terjadi ka sekali nari?

⁹ Bagi si enggo sibahas bas Pasal 14 buku enda, pengenehenen Esekiel enggo terjadi janah pengaruhna ndauh belinen “bas wari-wari pendungi.” Paksa si e me cara si benar i bas nembah Jahwe ipeganjang. (Jes. 2:2) Uga pengenehenen kerna lau si maler si idah Esekiel e terjadi gundari?

10, 11. (a) Gundari, kai pasu-pasu si bali bagi lau si maler? (b) Uga pasu-pasu Jahwe reh derasna perpalerna guna ncukupi keperlun rohani bas wari-wari pendungi?

¹⁰ Lau maler si mereken pasu-pasu. Lau si maler arah rumah Jahwe e ngingetken kita nandangi kai? Lau e ngingetken kita nandangi kerina pasu-pasu si erban kita tetap sehat secara rohani gundari. Pasu-pasu si mbelinna eme korban tebusen Kristus si erban dosata banci iampuni, emaka bersih kita i lebe-lebe Dibata. Selain si e, kebenaren si lit bas Kata Dibata bali bagi lau meciho si mereken kegeluhen. (Ep. 5:25-27) Uga Jahwe mereken pasu-pasu e man banta gundari?

 ¹¹ Bas tahun 1919, jumlah umat Jahwe ribun kalak ngenca janah meriah kel ukur kalak e ngaloken pangan rohani si iperlukenna. Puluhen tahun kenca si e, jumlah kalak e lalap reh buena. Gundari, lit lebih waluh juta kalak umat Jahwe. Tetap denga nge deras perpalerna lau kebenaren e? Ue. La tanggung buena pangan rohani si ibereken Jahwe. Bas seratus tahun enda, lit puluhen miliar Pustaka, buku, majalah, brosur, ras risalah si enggo ialoken umat Dibata. Bali bagi lau maler bas pengenehenen Esekiel e, lau kebenaren pe terus reh derasna perpalerna guna ncukupi keperlun kalak si muas secara rohani i belang-belang doni. Selain bacan si tercetak, isediaken organisasi Jahwe ka publikasi bas bentuk elektronik i situs jw.org. Gundari, situs jw.org enggo lit bas lebih 1.000 bahasa. Kai gunana e man kalak si meteruk ukur?

12. (a) Kai gunana lau kebenaren e? (b) Kai persinget si lit bas pengenehenen e? (Nen ka cataten i teruh.)

¹² Lau kegeluhen. Ikataken man Esekiel, “Ku ja pe lau e maler, lit kegeluhen i je.” Lau kebenaren si ibereken Jahwe melala kel gunana man enterem kalak. Jutan kalak si enggo muat lau e lanai mate secara rohani. Tapi kalak e tempa-tempa nggeluh mulihi perban enggo tandaina Jahwe janah erkiniteken kalak e man baNa. Tapi bas pengenehenen e pe lit persinget man banta gundari: Lit pagi kalak si dungna lanai ngergai kebenaren Pustaka janah tadingkenna Jahwe. Kalak e ipeseri ras paya-paya bage pe kubang si lit bas Laut Mati. * Mbera-mbera ndigan pe ula kita bage!​—Baca Ulangen 10:16-18.

13. Kai si banci sipelajari arah batang kayu si lit i tepi lau e?

¹³ Batang kayu si mereken pangan ras tambar. Bas nubuat Esekiel, batang kayu si lit i tepi lau e erbuah tiap bulan janah buahna entabeh, bulung-bulungna pe banci jadi tambar. (Esek. 47:12) Arah je nari kai si banci sipelajari? Gundari, bereken Jahwe pangan rohani si la tanggung buena man banta gelah tetap kita sehat secara rohani. Beda kel keadanta ras kalak si lit bas doni enda, kalak e kelihen ras sakit secara rohani. Uga nge perasanndu sanga bacandu majalahta, sanga tontonndu video-video arah organisasi, janah sanga endekenndu lagu pendungi bas kebaktin? La kin kapndu e kerina pasu-pasu si mbelin? Payo. La pernah kita kurang pangan rohani. (Jes. 65:13, 14) Pangan rohani e erban kita sehat secara rohani. Nasehat arah Kata Dibata nampati kita gelah la sakit secara rohani. Contohna, la silakoken perbahanen seks si salah, la kita merangap, ntah pe la kurang kinitekenta. Aturken Jahwe ka gelah kalak Kristen si ngelakoken dosa si serius banci ipepalem. (Baca Jakup 5:14.) Luar biasa kel  pasu-pasu si banci sidat bali bagi pengenehenen Esekiel kerna batang kayu e.

14, 15. (a) Kai si banci sipelajari arah bagin laut si erkubang bas pengenehenen Esekiel? (b) Kai si arus silakoken gelah banci sidat manpaat arah lau maler bas pengenehenen Esekiel e?

¹⁴ Kai pelajaren si banci sidat arah bagin laut si erkubang e? La kita nggit seri ras kalak si lit bas doni enda si la nggit ipepalem secara rohani, ntah pe la sipediat kai pe si erban pasu-pasu Jahwe la seh man banta. (Mat. 13:15) Tapi tetap ateta ndatken pasu-pasu Jahwe si la tanggung buena. Uga carana? Semangatlah kita nginem lau kebenaren arah Kata Dibata janah sibagiken ka man kalak si deban alu erberita. Nggit ka kita megiken petunjuk, ngaloken pengapul ras penampat si perkeleng arah pertua-pertua si enggo dat pelatihen arah budak si setia ras pentar. Sanga silakoken kerina e, banci saja siinget lau maler si lit bas pengenehenen Esekiel. Ku japa pe lau e maler banci mereken kegeluhen janah banci mpepalem.

¹⁵ Terjadi ka nge pagi pengenehenen e bas masa depan? Ue. Bas Pardis pagi, lau maler e mereken pasu-pasu si ndauh belinen man manusia. Mari sipelajari terdauhen kerna si e.

16, 17. Pasu-pasu kai pagi si banci sidat bas Pardis? Ban contohna.

¹⁶ Banci nge bayangkenndu kam radu ras keluargandu ras teman-teman kompakndu sangana bas Pardis? Gelah reh jelasna arapen e man bandu, mari sipelajari telu gambaren bas pengenehenen e si mbuktiken kekelengen Dibata.

¹⁷ Lau maler si mereken pasu-pasu. Bas Pardis pagi, labo ngenca pasu-pasu rohani si idat manusia tapi pasu-pasu jasmani pe. Bas Pemerentahen Jesus si Seribu Tahun e, isampati Kerajan Dibata pagi kalak si setia guna ndatken manpaat si terbelinen arah tebusen. Alu manjar-anjar kalak e jadi sempurna, lanai lit penakit, lanai lit dokter, perawat, ntah pe asuransi kesehaten. Lau kegeluhen e maler man jutan kalak si selamat arah Harmagedon eme “kelompok jelma si enterem” si ngelewati “kiniseran si mbelin.” (Ket. 7:9, 14) Paksa si e, enggo deras kel pasu-pasu e maler, tapi e bali bagi tak-tak lau ngenca adi ibandingken ras pasu-pasu si nandangi reh. Bagi pengenehenen Esekiel, lau e terus reh derasna guna ncukupi keperlun umat Dibata.

18. Uga pagi “lau maler eme lau kegeluhen” reh derasna bas Pemerentahen Seribu Tahun?

¹⁸ Lau kegeluhen. Cuba bayangken, bas Pemerentahen Seribu Tahun, “lau maler eme lau kegeluhen” reh derasna pagi i doni. (Ket. 22:1) La terkira uga buena kalak si enggo mate si ipegeluh pagi mulihi janah ibereken kesempaten man kalak e guna nggeluh si rasa lalap bas Pardis! Enda me salah  sada pasu-pasu si bereken Jahwe arah KerajanNa. Enterem kalak si enggo mate si enggo ndekah ipediat jadi abu si la ergegeh, ipegeluh pagi mulihi. (Jes. 26:19) Tapi, kerina kin kalak si ipegeluh mulihi e banci nggeluh si rasa lalap?

19. (a) Ja nari siteh maka lau kegeluhen e tetap denga pagi maler bas Pardis? (b) Uga kerna bagin si “ipediat jadi sira” terjadi pagi bas masa depan?

¹⁹ Tiap kalak arus erban pilihen, nggeluh si rasa lalap atena ntah lang. Bas Pemerentahen Seribu Tahun e, ibuka me gulungen-gulungen si mbaru. Lau kegeluhen tetap denga pagi maler perban ijelasken Jahwe pagi kebenaren si mbaru ntah pe petunjuk si mbaru. Pasti luar biasa siakap mbayangkenca! Tapi sayang kel, lit pagi kalak si la nggit ngaloken pasu-pasu e janah la patuhina Jahwe. Amin pe lit si mberontak bas Pemerentahen Seribu Tahun e, kalak e la pagi ipediat ncedai Pardis. (Jes. 65:20) Banci saja teringet kita nandangi pengenehenen Esekiel kerna bagin-bagin si erkubang si “ipediat jadi sira,” si erban la lit kegeluhen i je. Seh kel motuna kalak si keras kepala si la nggit minem lau kegeluhen si merga e. Kenca seribu tahun, lit kalak si mberontak si erpihak man Setan. Kerina kalak si la matuhi pemerentahen Jahwe  si adil, seri pagi kedungenna eme kematen si rasa lalap.​—Ket. 20:7-12.

20. Bas Pemerentahen Seribu Tahun Kristus, kai pengaturen si ipeseri ras batang kayu si idah Esekiel?

²⁰ Batang kayu si mereken pangan ras tambar. Ate Jahwe kerina min kita dat kesempaten si luar biasa guna nggeluh si rasa lalap. Emaka, sekali nari pastikenNa gelah lit pengaturen si banci nampati kita nggeluh si rasa lalap. Pengaturen enda erguna bali bagi batang kayu si lit bas pengenehenen Esekiel. Tapi bas Pardis, labo pasu-pasu rohani ngenca si ibereken Jahwe, tapi pasu-pasu jasmani pe. Seribu tahun dekahna, Jesus Kristus ras 144.000 temanna, merentah pagi selaku raja. Janah selaku imam, si 144.000 e nampati kalak si setia gelah ndatken kerina manpaat arah korban tebusen Kristus janah dungna sempurna. (Ket. 20:6) Pengenehenen Esekiel kerna batang kayu e si buahna banci ipan janah bulungna banci jadi tambar, mirip ras nubuat si deban si itulis Rasul Johanes. (Baca Ketangkasen 22:1, 2.) Bulung-bulung batang kayu si idah Johanes banci ipake guna “mpepalem bangsa-bangsa.” Emaka, kalak si setia si la terkira buena ndatken manpaat arah kai si ilakoken imam-imam si 144.000 e.

21. (a) Uga nge perasanndu sanga ukurindu pengenehenen Esekiel kerna lau si maler e? (Nen kotak “Lau si Kitik Jadi Lau Maler si Deras!”) (b) Kai kari sibahas bas pasal seterusna?

²¹ Sanga ukurindu alu mbages pengenehenen Esekiel kerna lau si maler e, la kin meriah ukurndu janah arapenndu pe reh paguhna? Luar biasa kel masa depanta! Cuba ukurindu, mbarenda nari enggo melala bereken Jahwe nubuat gelah banci sibayangken uga kin pagi Pardis e. Ribun tahun dekahna sabar Jahwe ngundang kalak gelah banci nggeluh bas Pardis si ijanjikenNa. Ikut nge pagi kam nggeluh i je? Banci saja tersungkun-sungkun kam, ‘Lit kin pagi inganku bas Pardis?’ Mari sibahas bagin penutup arah nubuat Esekiel, bagin e banci kari erban kam lanai ragu.