1, 2. (a) Erkai Esekiel isuruh Jahwe? (b) Penungkunen kai saja kari sibahas?

BAS tahun 593 SM, bereken Jahwe ka pengenehenen man Esekiel. Kai si idah Esekiel banci saja erban ia nginget peristiwa si terjadi kira-kira 900 tahun si enggo lewat bas jaman Musa ras Josua. Paksa si e, kataken Jahwe man Musa batas-batas Negri si Ijanjiken. Kenca si e, katakenNa ka man Josua uga cara mbagiken negri e man suku-suku Israel. (Bil. 34:1-15; Jos. 13:7; 22:4, 9) Gundari bas pengenehenen Esekiel e, isuruh Jahwe ka gelah Negri si Ijanjiken e ibagi-bagiken man suku-suku Israel.​—Esek. 45:1; 47:14; 48:29.

² Pelajaren kai nge si dat Esekiel ras kalak si itaban arah pengenehenen e? Uga pengenehenen e mpegegehi umat Dibata gundari? Terjadi ka nge pagi pengenehenen e bas masa depan?

3, 4. (a) Arah pengenehenen Esekiel si terakhir, empat jaminen kai si ibereken man kalak si itaban? (b) Jaminen kai kari sibahas bas pasal enda?

³ Pengenehenen si terakhir si idat Esekiel, itulis bas siwah pasal buku Esekiel. (Esek. 40:1–48:35) Pengenehenen e  mpepalem pusuh kalak si itaban, perban isina kerna empat jaminen man kalak Israel. Jaminen si pertama, mulihi pagi Jahwe isembah alu cara si benar bas rumah pertoton. Si peduaken, kalak Israel ipinpin imam-imam ras permakan-permakan si mehuli pagi. Si peteluken, kerina kalak si mulih ku Israel datna pagi taneh warisen. Si peempatken, Jahwe tetap lit ras kalak e janah itegu-teguNa kalak e.

⁴ Bas Pasal 13 ras 14 buku enda, enggo sibahas kerna dua jaminen eme mulihi isembah kalak Jahwe alu cara si benar janah umat Dibata ipinpin permakan-permakan si mehuli. Bas pasal enda, sibahas kari jaminen si peteluken eme janji kerna taneh warisen. Bas pasal seterusna, sibahas kari janji Jahwe guna negu-negu umatNa.​—Esek. 47:13-21; 48:1-7, 23-29.

5, 6. (a) Bas pengenehenen Esekiel, daerah kai si arus ibagiken? (Nen gambar bas awal pasal.) (b) Kai ertina pengenehenen kerna pembagin taneh e?

⁵ Baca Esekiel 47:14. Bas pengenehenen e, isuruh Jahwe gelah perdiateken Esekiel sada negri si ntisik nari bali “bagi Taman Eden.” (Esek. 36:35) Kenca si e, nina Jahwe, “Enda daerah si ibereken jadi taneh warisen man 12 suku Israel.” (Esek. 47:13) “Daerah” kai e? Daerah e eme negri Israel si enggo iban mejile mulihi janah i je pagi tading kalak Israel si enggo mulih e. Bagi si itulis bas Esekiel 47:15-21, ikataken Jahwe keterangen si jelas kerna batas-batas negri e.

⁶ Kai ertina pengenehenen kerna pembagin taneh e? Bas pengenehenen e, batas-batas taneh si nandangi ibagiken enggo itetapken. Enda erban Esekiel ras kalak si itaban e tek maka kuta kemulihen kalak e iban pagi mulihi bagi si mbarenda. Pasti la tanggung riahna ukur kalak e sanga begina keterangen si jelas e arah Jahwe. Tuhu kin paksa si e dat kalak e taneh warisen? Ue, tuhu.

7. (a) Kai si terjadi bas tahun 537 SM? Janah kejadin e ngingetken kita nandangi kai? (b) Penungkunen kai si arus sibahas lebe?

⁷ Bas tahun 537 SM, kira-kira 56 tahun kenca dat Esekiel pengenehenen e, mulih me ribun kalak si itaban ku negri Israel janah tading kalak e i je. Kejadin e ngingetken kita nandangi kai si terjadi man umat Dibata bas jaman gundari. Kalak e pe tempa-tempa dat taneh warisen. Kai maksudna? Bereken Jahwe kesempaten man umatNa guna masuk ku negri rohani janah tading kalak e i je. Mbarenda, Negri si Ijanjiken iban Jahwe mejile mulihi, arah je nari banci melala sipelajari kerna uga Jahwe erban negri rohani umatNa mejile mulihi. Tapi sope sibahas kai pelajarenna,  sijawap lebe penungkunen enda: Kai buktina negri rohani e tuhu-tuhu lit bas jamanta?

8. (a) Bangsa Israel jasmani igantiken ras bangsa kai? (b) Kai pardis rohani e? (c) Ndigan pardis rohani e mulai lit janah ise si tading i je?

⁸ Bas salah sada pengenehenen Esekiel sebelumna, cidahken Jahwe maka nubuat kerna negri Israel si iban mejile mulihi, terjadi ka pagi sekali nari. Enda terjadi kenca Jesus Kristus si ikataken Jahwe “pelayanKu Daud” jadi Raja bas tahun 1914. (Esek. 37:24) Paksa si e, bangsa Israel jasmani enggo ndekah lanai ianggap Dibata jadi umatNa janah kalak e enggo igantiken Israel rohani eme kalak Kristen si ipilih ku surga. (Baca Matius 21:43; 1 Petrus 2:9.) Labo saja Israel jasmani si iganti Jahwe jadi Israel rohani, tapi negri Israel pe iganti jadi negri rohani ntah pe pardis rohani. (Jes. 66:8) Bas Pasal 17 buku enda, enggo sipelajari maka pardis rohani eme lingkungen rohani si aman. Mulai tahun 1919, kalak si ipilih ku surga enggo nembah Jahwe  bas pardis rohani enda. (Nen kotak 9B, “Tahun 1919.”) Kenca si e, “biri-biri si deban” si arapenna nggeluh i doni pe tading bas pardis rohani enda. (Joh. 10:16) Gundari, kita enggo tading bas pardis rohani, tapi kerina pasu-pasu Dibata banci sigejapken pagi kenca Harmagedon.

9. Keterangen kai si bereken Jahwe kerna pembagin negri e?

⁹ Baca Esekiel 48:1, 28. Kenca itetapken Jahwe batas-batas negri e, berekenNa keterangen si jelas kerna pembaginna. SuruhNa gelah warisen 12 suku Israel ibagi rata arah utara nari seh ku selatan, mulai arah suku Dan i ujung utara seh ku suku Gat i ujung selatan. Tiap suku dat taneh warisen si ipisahken alu garis-garis lurus. Garis e imulai arah perbatasen timur seh ku Laut Tengah ntah pe Laut Besar i sebelah barat.​—Esek. 47:20.

10. Uga kira-kira perasan kalak si itaban e sanga begina keterangen kerna pembagin negri e?

¹⁰ Sanga kataken Esekiel keterangen kerna pembagin negri e, uga nge kira-kira perasan kalak si itaban e? Pasti tek kalak e maka pembagin e teratur kel pagi. Taneh si enggo ibagi man 12 suku e pe mbuktiken maka kerina kalak si mulih ku kutana dat warisen pagi, warisen e lit bas negri si enggo iban mejile mulihi. Kerina pagi kalak e lit rumahna.

11. Kai si banci sipelajari arah pengenehenen kerna pembagin taneh? (Nen kotak “Pembagin Negri si Ijanjiken.”)

¹¹ Kai si banci sipelajari arah pengenehenen e? Kenca Negri si Ijanjiken e iban mejile mulihi, negri e labo saja ibereken man imam-imam, man kalak Lewi, ntah pe man peminpin-peminpin, tapi ibereken ka man kerina kalak Israel si 12 suku e. (Esek. 45:4, 5, 7, 8) Bage ka pe, kalak si tading bas pardis rohani labo saja kalak si ipilih ku surga ras peminpin-peminpin arah “kelompok jelma si enterem,” tapi kerina turang senina arah kelompok jelma si enterem pe tading bas pardis rohani e. * (Ket. 7:9) Emaka, kai pe tugasta bas organisasi Jahwe, amin pe kurang penting siakap, kerina kita lit inganta si aman ras tugasta si merga bas pardis rohani. La kin luar biasa akapndu e?

12, 13. Petunjuk kai si bereken Jahwe kerna pembagin taneh e?

¹² Banci saja bingung Esekiel perban piga-piga petunjuk si bereken Jahwe man bana kerna pembagin taneh e la seri ras petunjuk si bereken Jahwe mbarenda man Musa. Mari siperdiateken dua perbedanna, eme taneh ras pendudukna.

¹³ Si pertama, tanehna. Musa isuruh guna mbagiken taneh e sesuai ras asa teremna jumlah tiap suku. (Bil. 26:52-54) Tapi bas pengenehenen Esekiel, bereken Jahwe  petunjuk si jelas gelah tiap suku ‘seri pagi bagin si alokenna.’ (Esek. 47:14) Emaka, seri jarak arah batas utara seh ku batas selatan man tiap suku. Alu bage, kerina kalak Israel la soal suku kai pe ia, seri taneh si datna janah subur kerina taneh bas negri e.

14. Kai bedana petunjuk Jahwe man Esekiel ras petunjuk Jahwe bas Undang-Undang Musa?

¹⁴ Si peduaken, pendudukna. Bas Undang-Undang Musa, kalak asing ilindungi janah banci kalak e nembah Jahwe. Tapi la ibereken taneh warisen man kalak e. (Im. 19:33, 34) Petunjuk Jahwe si berekenNa man Esekiel la seri ras petunjuk bas Undang-Undang Musa. Ikataken Jahwe man Esekiel, “Arus bereken kena warisen man penduduk asing i daerah suku ingan kalak e tading.” Alu bage, lanai lit perbedan antara “kalak Israel” ras penduduk asing si tading ras kalak e. (Esek. 47:22, 23) Kalak Israel ras penduduk asing seri i lebe-lebe Jahwe janah banci kalak e ersada nembah Ia.​—Im. 25:23.

15. Arah petunjuk si bereken Jahwe man Esekiel, reh tekna kita nandangi kebenaren kai?

¹⁵ Luar biasa kel duana petunjuk si aloken Esekiel kerna taneh ras penduduk negri e. Enda pasti erban kalak si itaban  e reh tekna maka seri pagi taneh si ibagiken Jahwe man kalak e, la soal kalak e kalak Israel ntah pe penduduk asing si nembah Jahwe. (Esa. 8:20; Neh. 3:26; 7:6, 25; Jes. 56:3, 8) Arah petunjuk si aloken Esekiel e banci ka kita reh tekna nandangi kebenaren si mpepalem pusuh enda: Merga akap Jahwe kerina umatNa janah seri kerina kalak e i lebe-lebeNa. (Baca Hagai 2:7.) Pasti ngata bujur kel kita perban keleng ate Jahwe kerina umatNa, la soal arapenta nggeluh i surga ntah pe i doni.

16, 17. (a) Pelajaren kai si banci sidat arah petunjuk kerna taneh ras penduduk negri e? (b) Kai kari sibahas bas pasal seterusna?

¹⁶ Kai pelajaren si banci sidat arah petunjuk kerna taneh ras penduduk negri e? Iingetken kita gelah jelas teridah bas perkade-kadenta sebelang doni maka kita ersada janah la mbeda-mbedaken kalak. Jahwe la mbeda-mbedaken kalak. Emaka perlu siukuri penungkunen enda: ‘Enggo nge kuusih Jahwe? Kuergai nge kerina umat Jahwe la soal kai pe sukuna ntah pe pendahinna?’ (Rom. 12:10) Meriah ukurta perban la soal ise pe kita, seri kesempaten si bereken Jahwe man banta guna tading bas pardis rohani. I je banci silayani Bapakta Jahwe alu bulat ukur janah sigejapken pasu-pasuNa.​—Gal. 3:26-29; Ket. 7:9.

¹⁷ Bas pasal seterusna, sipelajari kari jaminen si peempatken bas pengenehenen Esekiel si terakhir, eme erjanji Jahwe maka tetap Ia lit ras kalak si itaban e. Kai pelajaren si banci sidat arah janji e? Jawapenna lit bas pasal seterusna.