1, 2. (a) Pilihen kai si arus siban? (b) Kai si ilakoken malekat si setia sanga sembah Johanes ia?

KERINA kita arus erban pilihen si seh kel pentingna eme milih ise ateta sisembah. Banci saja enterem kalak ngataken Dibata atena sembahna. Tapi labo bias arah ranan saja, arus sicidahken arah perbahanenta maka tuhu-tuhu sisembah Dibata Jahwe labo Setan si Iblis.

² Ate Setan gelah sisembah ia. Enda jelas teridah sanga igodana Jesus. Bagi si enggo sipelajari bas Pasal 1 buku enda, tawarken Setan hadiah si luar biasa man Jesus eme kuasa nandangi kerina kerajan si lit i doni. Kenca tawarken Setan si e kerina, kai si pindona? Pindona gelah ‘sujud Jesus nembah ia sekali saja.’ (Mat. 4:9) Tapi perbahanen malekat si mereken pengenehenen man Rasul Johanes la seri ras Setan. Malekat enda la nggit isembah. (Baca Ketangkasen 22:8, 9.) Sanga sujud Johanes nembah malekat e, nina malekat e, “Ula bage!” La ia nggit isembah tapi alu meteruk ukur nina ngaloi, “Sembahlah Dibata.”

3. (a) Kai tujunna buku Nembah Jahwe enda? (b) Kai si nandangi sibahas?

 ³ Tujun buku enda gelah reh belinna sura-surata guna nembah Jahwe saja bagi si iperentahken malekat e. (Ul. 10:20; Mat. 4:10) Gundari, mari sibahas mulihi kai si enggo sipelajari kerna cara si benar i bas nembah Jahwe si lit bas nubuat ras pengenehenen Esekiel. Selain si e, sipelajari ka kai nina Pustaka kerna ujin si terakhir si iadapi kerina manusia pagi. Kalak si setia ngenca pagi si banci ngidah sanga kerina kalak nembah Jahwe saja seh rasa lalap.

4. Kai telu topik utama si lit bas buku Esekiel?

⁴ Arah buku Esekiel, banci sipelajari maka nembah Jahwe labo bias terjeng ngelakoken kegiaten rohani saja. Tapi arus (1) Jahwe saja ngenca sisembah, (2) tetap kita ersada nembah Jahwe bagi si ngena ateNa, janah (3) sikeleng-kelengenlah kita. Perdiateken uga nubuat ras pengenehenen si ibahas bas buku Nembah Jahwe njelasken uga pentingna kerna si telu e.

5-9. Kai si enggo sipelajari kerna nembah Jahwe saja?

⁵ Pasal 3: * Arah pengenehenen si luar biasa kerna gereta Jahwe, tahta Jahwe igambarken lit i datas mahluk-mahluk roh si megegeh, janah lit pelangi i sekeliling tahtaNa. Arah je nari banci sipelajari sada kebenaren si penting: Dibata Si Madakuasa ngenca si metunggung sisembah.​—Esek. 1:4, 15-28.

⁶ Pasal 5: Ceda kel ukur Jahwe ngidah rumah pertotonNa lanai badia perban sembah umatNa berhala i je. Arah je nari banci sipelajari maka la lit si banci ibuniken arah Jahwe. IdahNa kerina perbahanen manusia amin pe la idah kalak. Sedih Ia ngidah kalak si la setia janah hukumNa kalak e.​—Esek. 8:1-18.

⁷ Pasal 7: Enggo ipeseh Esekiel berita penghakimen man bangsa-bangsa si “nokoh” man kalak Israel. (Esek. 25:6) Enda mbuktiken maka ihukum Jahwe ise pe si jahat perbahanenna man umatNa. Selain si e, arah hubungen kalak Israel ras bangsa-bangsa e, banci sipelajari maka kai pe si terjadi arus tetap kita setia man Jahwe. Ndigan pe ula silanggar patoken Jahwe guna erban meriah ukur keluargata si la nembah Jahwe, ula erta siakap si pentingna, janah ula kita tek man pemerentahen manusia. Tapi tetap kita netral janah sisembah Jahwe alu bulat ukur sebap Ia ngenca si metunggung isembah.

⁸ Pasal 13 ras 14: Pengenehenen kerna rumah pertoton si lit bas gunung si seh kel ganjangna ncidahken maka arus  siikutken patoken Jahwe si meganjang. Arus siakui maka ganjangen Ia asangken dibata-dibata si deban.​—Esek. 40:1–48:35.

⁹ Pasal 15: Bas nubuat Esekiel, Israel ras Juda ipeseri ras pelacur. Enda ngingetken kita maka ciga kel ate Jahwe ngidah kalak si jadi pelacur secara rohani.​—Esek., psl. 16, 23.

10-14. Ja nari banci siteh maka ate Jahwe tetap kita badia janah ersada kita nembah Ia?

¹⁰ Pasal 8: Inubuatken Jahwe maka pilihNa pagi “sekalak permakan” guna ngurus umatNa. Enda mbuktiken maka kerina kita pengikut Jesus. Jadi perlu kita kerja sama, ersada, janah tetap erdame.​—Esek. 34:23, 24; 37:24-28.

¹¹ Pasal 9: Inubuatken Esekiel maka umat Dibata ibebasken pagi arah kalak Babilon janah mulih kalak e ku kutana si enggo ipekena ras iban mejile mulihi. Kalak si atena erban meriah ukur Jahwe banci dat pelajaren arah nubuat e. Ula kita terpengaruh agama palsu si banci erban kita lanai badia. Amin pe la seri latar belakangta, pendahinta, ntah pe sukuta, kerina kita arus tetap ersada. Persadan e mbuktiken maka kita umat Dibata.​—Esek. 11:17, 18; 12:24; Joh. 17:20-23.

¹² Pasal 10: Mulihi ka ijelasken kerna persadan bas pengenehenen kerna tulan-tulan si kerah si ipegeluh mulihi. Meriah kel ukurta perban banci ikut jadi bagin umat Jahwe si enggo bebas arah ajaren palsu. Bangga kel kita banci kerja sama ras umat Jahwe jadi pasuken si mbelin.​—Esek. 37:1-14.

¹³ Pasal 12: Nubuat kerna tongkat si ipersada pe nggambarken kerna persadan. Gundari, bali bagi si inubuatken, ersada me kalak si ipilih ku surga ras biri-biri si deban. Enda pasti mpepaguh kinitekenta! Amin pe doni enda terbagi-bagi perban perbedan agama ras politik, kita tetap ersada perban sikeleng-kelengen ras setia.​—Esek. 37:15-23.

¹⁴ Pasal 16: Bas pengenehenen kerna dilaki si maba ingan alat tulis ras enem dilaki si maba senjata guna ngancurken, lit persinget si penting: Kalak si nembah Jahwe alu cara si benar ngenca pagi si ibereken tanda guna iselamatken bas “kiniseran si mbelin.”​—Mat. 24:21; Esek. 9:1-11.

15-18. Engkai maka arus sikelengi kalak si deban, janah uga carana?

¹⁵ Pasal 4: Arah pengenehenen kerna empat mahluk si nggeluh, enggo sipelajari kerna sipat-sipat Jahwe, khususna  kekelengen. Adi kekelengenta teridah arah ranan ras perbahanenta, e buktina Jahwe Dibatata.​—Esek. 1:5-14; 1 Joh. 4:8.

¹⁶ Pasal 6 ras 11: Perban keleng ate Dibata manusia, ipilihNa penjaga-penjaga, contohna Esekiel. Perban Dibata e kekelengen, ateNa ula min lit si mate sanga kernepkenNa doni si jahat enda si ikuasai Setan. (2 Pet. 3:9) Banci siusih kekelengen Dibata adi sidalanken tugasta eme ndukung penjaga-penjaga bas jamanta.​—Esek. 33:1-9.

¹⁷ Pasal 17 ras 18: Teh Jahwe maka enterem pagi kalak la nggit ngaloken perkuah ateNa janah usahaken kalak e engkernepken umatNa si setia. Perban keleng ate Jahwe umatNa, ibelaNa pagi kalak e sanga “Gog arah negri Magog” nyerang kalak e. Janah perban keleng ateta kalak si deban, nggit kita mpersingeti kalak e maka kernepken Jahwe pagi kerina kalak si kejam man umatNa.​—Esek. 38:1–39:20; 2 Tes. 1:6, 7.

¹⁸ Pasal 19, 20, ras 21: Kekelengen Jahwe man umatNa jelas teridah bas pengenehenen kerna lau maler eme lau kegeluhen ras pembagin taneh. Perban enggo korbanken Jahwe AnakNa, banci dat manusia pasu-pasu si igambarken bas pengenehenen e. Tebusen Jesus eme bukti kekelengen Dibata si mbelinna. Hasilna, dosata banci iampuni janah banci kita sempurna. Banci sibuktiken kekelengenta man kalak si deban adi siceritaken man kalak e masa depan si luar biasa e.​—Esek. 45:1-7; 47:1–48:35; Ket. 21:1-4; 22:17.

19. Kai saja si ilakoken Jesus bas Pemerentahen Seribu Tahun? (Nen ka kotak “Ngadapi Ujin si Terakhir.”)

¹⁹ Bas Pemerentahen Seribu Tahun, ipegeluh Jesus pagi miliaren kalak si enggo mate janah lanai pagi lit kalak si erceda ate perban ‘musuhta eme kematen.’ (1 Kor. 15:26; Mrk. 5:38-42; Perb. 24:15) Enggo ndekah kel manusia nggeluh bas kesusahen, rate ceda, ras rate mesui. Tapi kalak si ipekeke Jesus lit pagi kesempatenna mbenai cerita si mbaru bas geluhna si la terturiken uga riahna. Arah korban tebusen Jesus, imasapken Jesus pagi kerina akibat penakit, perang, ras kelihen. Labo e saja ngenca si imasapkenna, tapi si erban kita susah pe ikut imasapkenna eme dosa warisen arah Adam. (Rom. 5:18, 19) ‘Ikernepken Jesus pagi kerina pendahin Iblis.’ (1 Joh. 3:8) Kai si terjadi kenca si e?

20. Uga Jesus ras 144.000 temanna merentah ncidahken sipat meteruk ukur si luar biasa? Jelasken. (Nen gambar bas awal pasal.)

²⁰ Baca 1 Korinti 15:24-28. Kenca dung Pemerentahen Seribu Tahun, kerina manusia enggo sempurna, doni pe dungna  enggo jadi Pardis bali bagi sura-sura Jahwe si tangtangna. Paksa si e, Jesus ras 144.000 temanna merentah, ncidahken sipat meteruk ukur si luar biasa. Serahken kalak e pagi Kerajan e man Jahwe janah serahken kalak e pagi kuasa si lit bas kalak e sedekah seribu tahun, la lit si maksasa ras si nuruhsa. Kerina pasu-pasu si ibereken Kerajan e lit pagi seh rasa lalap.

21, 22. (a) Uga pagi keadan doni enda kenca dung Pemerentahen Seribu Tahun? (b) Engkai maka lepasken Jahwe pagi Setan ras malekat-malekat jahat?

²¹ Kenca si e, buktiken Jahwe pagi maka tek kel Ia man umatNa. IsuruhNa gelah Setan ras malekat-malekat jahat ilepasken arah lubang si seh kel bagesna eme inganna ikurung sedekah seribu tahun. (Baca Ketangkasen 20:1-3.) Idah Setan ras malekat-malekatna pagi maka doni enggo berubah kel. Sope Harmagedon, buen kalak itipu Setan, simusuhen  kalak e, la siteken, janah dungna la ersada. (Ket. 12:9) Tapi kenca dung Pemerentahen Seribu Tahun, kerina kalak ersada nembah Jahwe jadi sada keluarga janah sikeleng-kelengen, doni pe jadi Pardis si dem kedamen.

²² Engkai maka lepasken Jahwe penjahat si kejam bagi Setan ras malekat-malekatna e? Perban buen kalak si nembah Jahwe paksa si e lenga pernah iuji kesetianna. Buen arah kalak e eme kalak si ipekeke si mbarenda mate tapi lenga tandaina Jahwe. Mulai kin kalak e ipekeke, bereken Jahwe kerina keperlun kalak e eme keperlun jasmani ras rohani. Kalak e nggeluh radu ras kalak si engkelengi ras si ngelayani Jahwe. Emaka, sedekah enda si mehuli saja ngenca si inanami kalak e. Perban si e, banci saja kataken Setan man kalak e bagi si katakenna mbarenda man Jop, eme nggit kalak e ngelayani  Dibata perban lindungi Dibata kalak e janah pasu-pasuNa. (Jop 1:9, 10) Jadi, sope tulis Jahwe gelarta bas buku kegeluhen seh rasa lalap, berekenNa kesempaten man banta guna mbuktiken setia nge kita janah siakui nge Ia selaku Bapakta ras Penguasata.​—Ket. 20:12, 15.

23. Pilihen kai pagi si ibereken man kerina kalak?

²³ Ibereken pagi ntisik waktu man Setan nggoda manusia gelah lanai sembah kalak e Dibata. Ujin kai si iadapi manusia? Ibereken pagi pilihen man kerina kalak bagi man Adam ras Hawa mbarenda. Pilihenna eme (1) ngikutken patoken Jahwe, ndukung pemerentahenNa, ras nembah Ia, ntah (2) mberontak man Jahwe janah ndukung Setan.

24. Engkai maka kalak si mberontak bas akhir seribu tahun e igelari Gog ras Magog?

²⁴ Baca Ketangkasen 20:7-10. Kalak si mberontak si ngelawan bas akhir seribu tahun e igelari Gog ras Magog. Engkai? Mirip kalak e ras Gog arah negri Magog si ikataken bas nubuat Esekiel. “Gog arah negri Magog” si nyerang umat Dibata bas kiniseran si mbelin eme bangsa-bangsa si mberontak man pemerentahen Jahwe. (Esek. 38:2) Kalak si mberontak  bas akhir seribu tahun pe igelari “bangsa-bangsa.” Penggelaren e menarik, perban bas Pemerentahen Seribu Tahun pagi kerina kita enggo jadi sada bangsa eme bangsa rohani janah rakyat arah sada pemerentahen eme Kerajan Dibata. Emaka, arah penggelaren “bangsa-bangsa” bage pe Gog ras Magog bas nubuat e, banci sisimpulken maka berhasil pagi Setan nggoda umat Dibata. Lit pagi umat Dibata si lanai ersada ras mberontak. Tapi, labo pagi lit si ipaksa guna ndukung Setan. Kerina manusia si sempurna bebas erban pilihen ise atena si idukungna, Jahwe ntah Setan.

25, 26. Uga pagi teremna kalak si ndukung Setan? Janah kai pagi si terjadi man kalak e?

²⁵ Uga pagi teremna kalak si ndukung Setan? Jumlah kalak e bali pagi buena “bagi kersik i tepi laut.” Tapi enda labo ertina teremen pagi si ndukung Setan. Ja nari banci siteh? Mbarenda erjanji Jahwe man Abraham, maka keturunenna pagi bali buena ras “kersik i tepi laut.” (Kej. 22:17, 18) Tapi kepeken jumlah keturunenna eme 144.001. (Gal. 3:16, 29) Amin pe jumlah e melala, tapi sitik ngenca adi ibandingken  ras jumlah penduduk doni. Emaka, amin pe mbue pagi kalak si ndukung Setan, tapi jumlahna labo mbuesa, emaka kalak e labo banci mbahayaken umat Dibata si setia.

²⁶ Kalak si mberontak e la pagi ipediat ndekah nggeluh. Ikernepken pagi kalak e radu ras Setan bage pe malekat-malekat jahat seh rasa lalap. Kai si lakoken kalak e ras hukumen si ialoken kalak e ngenca si jadi ingeten pagi.​—Ket. 20:10.

27-29. Uga pagi masa depan kalak si selamat ngelewati ujin si terakhir?

²⁷ Uga kerna kalak si selamat ngelewati ujin si terakhir? Gelar kalak e itulis pagi bas “buku kegeluhen” seh rasa lalap. (Ket. 20:15) Kerina anak-anak Jahwe si setia jadi sada keluarga pagi janah Jahwe ngenca si isembah kalak e.

²⁸ Cuba bayangken masa depanndu pagi. Medak kenca kam pagi-pagi, meriah kapndu ndahiken dahinndu janah enterem ka temanndu meriah. Kam ras keluargandu lanai pagi susah, sempurna pagi kam, lanai perlu korban tebusen Jesus gelah banci kam erteman ras Jahwe. Kerina kalak banci erteman ras Jahwe janah la lit si ngambatisa. Si pentingna, kerina ciptan si lit i surga ras i doni banci nembah Jahwe. Dungna kerinana nembah Jahwe saja!

 ²⁹ Ikut nge pagi kam ngidah janji-janji e terjadi? Pasti kam ikut adi terus lakokenndu telu pelajaren arah buku Esekiel eme nembah Jahwe saja, tetap ersada nembah Ia bagi si ngena ateNa, janah sikeleng-kelengen. Gundari mari sibahas pelajaren si terakhir si seh kel pentingna arah nubuat Esekiel. Kai e?

30, 31. Kai ertina kata-kata “teh kalak e pagi maka Aku kap Jahwe” man (a) musuh Dibata? (b) umat Dibata?

³⁰ Kata-kata “teh kalak e pagi maka Aku kap Jahwe” rusur ipake bas buku Esekiel. (Esek. 6:10; 39:28) Kata-kata e ertina hukumen ras kematen man musuh-musuh Dibata, perban paksa si e pagi la banci lang akui kalak e maka Jahwe e lit. Dungna teh kalak e pagi erti gelar Dibata eme “Ia si Erbanca Jadi.” “Jahwe penguasa malekat” jadi “pejuang si megegeh” pagi guna ngelawan kalak e. (1 Sam. 17:45; Kel. 15:3) Paksa si e teh kalak e pagi maka la lit si banci erban sura-sura Jahwe gagal, tapi sayang kel kalak e enggo terlambat.

³¹ Adi man umat Jahwe, kata-kata “teh kalak e pagi maka Aku kap Jahwe” ertina kedamen ras kegeluhen. Iban Jahwe pagi kita jadi anak-anakNa si banci ngusih sipat-sipatNa alu sempurna bagi sura-suraNa si tangtangna. (Kej. 1:26) Gundari, Jahwe enggo jadi Bapakta si perkeleng ras Permakan si ngelindungi kita. Ntisik nari Ia jadi Rajata seh rasa lalap. Janahta nimai si e terjadi, ukurilah pelajaren arah buku Esekiel. Sibuktikenlah arah ranan ras perbahanenta tiap wari maka siteh ise kin Jahwe e janah tuhu-tuhu Ia sitandai. Alu bage, sanga terjadi pagi kiniseran si mbelin, la kita mbiar, tapi jurgak kita perban siteh pembebasenta enggo ndeher. (Luk. 21:28) Sope e terjadi, sisampatilah kalak si deban i japa pe ia tading, gelah tandaina ras kelengina Dibata Jahwe. Sebap Ia ngenca Dibata si metunggungna isembah.​—Esek. 28:26.