Ringkasen arah Pemahamen si Isesuaiken
Piga-piga tahun enda, pemahamenta kerna piga-piga bagin arah nubuat Esekiel enggo isesuaiken, janah pemahamen si isesuaiken e iban bas Menara Pengawal. Tapi lit piga-piga pemahamen si isesuaiken si itambahken bas buku Dungna Kerina Kalak Nembah Jahwe Saja! Banci nge jawapndu penungkunen-penungkunen enda?
Kai si igambarken empat ayo mahluk si nggeluh e?
Pemahamenta si mbarenda: Tiap ayo mahluk si nggeluh ntah pe kerubim nggambarken salah sada arah empat sipat Jahwe si utama.
Pemahamenta si mbaru: Tiap ayo mahluk si nggeluh memang nggambarken salah sada arah empat sipat Jahwe si utama. Tapi, adi inen sekali kerina empatna ayo kerubim e, e nggambarken kerina sipat Jahwe. Empat ayo e pe ncidahken kuasa ras kemulian Jahwe si luar biasa.
Alasenna isesuaiken: Kata Dibata rusur make angka empat guna nggambarken kai si lengkap ntah pe ngertiken kerinana. Emaka, adi inen sekali kerina empatna ayo kerubim e, enda labo nggambarken empat sipat Jahwe saja, tapi empatna sipat e jadi dasar sipat-sipat Jahwe si luar biasa. Tiap ayo kerubim e ncidahken sipat-sipat ciptanNa eme hebat, megegeh, ras kuasa. Amin pe luar biasa kel sipat si igambarken ayo kerubim e, tapi kerubim e lit i teruh tahta Jahwe. Enda ncidahken maka Jahwe me Penguasa Si Meganjangna.
Ise nge dilaki si maba ingan alat tulis sekertaris e?
Pemahamenta si mbarenda: Dilaki si maba ingan alat tulis sekertaris e nggambarken kalak si ipilih ku surga si nggeluh denga i doni. Sanga kalak e erberita ras erban murid, tempa-tempa bereken kalak e tanda man kalak si dungna jadi bagin arah “kelompok jelma si enterem.”—Ket. 7:9.
Pemahamenta si mbaru: Dilaki si maba ingan alat tulis sekertaris e nggambarken Jesus Kristus. Bas “kiniseran si mbelin” ihakimina pagi kerina jelma, berekenna pagi tanda man biri-birina eme kelompok jelma si enterem.—Mat. 24:21.
Alasenna isesuaiken: Enggo bereken Jahwe kuasa man AnakNa guna ngakimi. (Joh. 5:22, 23) Menurut Matius 25:31-33, Jesus pagi si nentukenca ise kin si jadi “biri-biri” ntah pe “kambing.”
Tuhu kin Ohola ras Oholiba eme kakak adek si jadi pelacur, nggambarken Gereja si terbagi jadi Katolik ras Protestan?
Pemahamenta si mbarenda: Ohola eme kakakna (Samaria, ibu kota Israel) nggambarken Gereja Katolik. Oholiba eme adekna (Jerusalem, ibu kota Juda) nggambarken Gereja Protestan.
Pemahamenta si mbaru: Kakak ras adekna si jadi pelacur enda labo nggambarken Gereja si apai pe. Tapi cerita kerna kalak e ncidahken uga perasan Jahwe sanga umatNa la setia ras sanga kalak e jadi pelacur secara rohani, bage ka me perasan Jahwe nandangi kerina agama palsu.
Alasenna isesuaiken: La lit ikataken Pustaka maka Ohola ras Oholiba nggambarken Gereja. Israel ras Juda pernah jadi ndehara Jahwe si setia, tapi Gereja la pernah jadi ndehara Jahwe. Selain si e, gambaren bas Esekiel pasal 16 ras 23 ncidahken maka pelacur e eme umat Dibata si la setia, lit arapenna guna ertobat ras ialoken mulihi. Tapi Gereja si jadi bagin arah Babilon si Mbelin, asa ndigan pe labo ialoken Jahwe.
Payo kin Jerusalem si murtad bas jaman si mbarenda nggambarken Gereja?
Pemahamenta si mbarenda: Jerusalem si la setia nggambarken Gereja. Emaka uga mbarenda Jerusalem ikernepken, bage ka me pagi Gereja ikernepken.
Pemahamenta si mbaru: Kenca murtad Jerusalem, enterem kalak nembah berhala ras ngelakoken kai si jahat. Enda ngingetken kita nandangi situasi Gereja, tapi Jerusalem si murtad e labo nggambarken Gereja.
Alasenna isesuaiken: La lit bukti si jelas arah Pustaka si ncidahken maka Jerusalem si murtad e nggambarken Gereja. Adi Jerusalem si mbarenda, pernah isembahna Jahwe alu cara si benar, tapi Gereja la pernah. Selain si e, Jerusalem pernah iampuni Jahwe, tapi Gereja ndigan pe la pernah iampuni Jahwe.
Uga pengenehenen kerna lembah si dem i je tulan-tulan si kerah terjadi?
Pemahamenta si mbarenda: Bas tahun 1918, kalak si ipilih ku surga isiksa janah itaban Babilon si Mbelin. Kalak e banci ikataken mate perban dahin kalak e menam ngadi. Tapi bas tahun 1919, kalak e ibebasken arah Babilon si Mbelin, tempa-tempa ipegeluh Jahwe kalak e mulihi jadi perberita Kerajan.
Pemahamenta si mbaru: Umat Dibata enggo itaban Babilon si Mbelin ndauh sope tahun 1918. Emaka, enggo ndekah kalak e tempa-tempa mate secara rohani. E terjadi mulai abad si peduaken seh ku tahun 1919. Dekahna kalak e itaban seri ras dekahna page ras sesa si ipediat turah ras-ras bagi si iceritaken bas perumpaman Jesus.
Alasenna isesuaiken: Kalak Israel bas jaman si mbarenda ndekah itaban, mulai tahun 740 SM seh ngasa tahun 537 SM. Tulan-tulan bas nubuat Esekiel ikataken “kerah” ras “kerah kel.” Enda ertina kalak si igambarken tulan-tulan e enggo ndekah kel mate janah tulan-tulan e ipegeluh mulihi alu manjar-anjar, emaka perlu waktu.
Kai ertina kerna dua tongkat si ipersada?
Pemahamenta si mbarenda: Bas Perang Doni I, kalak si ipilih ku surga lanai ersada. Tapi bas tahun 1919, kalak si ipilih ku surga si setia ersada mulihi.
Pemahamenta si mbaru: Nubuat enda ncidahken maka ipersada Jahwe me umatNa. Kenca tahun 1919, alu manjar-anjar reh teremna kalak si arapenna nggeluh i doni ersada ras kalak si ipilih ku surga si lit denga i doni. Duana kelompok e ersada nembah Jahwe.
Alasenna isesuaiken: Nubuat enda labo nggambarken sada tongkat si ipenggelken nce ipersada mulihi. Emaka, nubuat enda labo kerna sada kelompok si terbagi nce ipersada mulihi, tapi kerna dua kelompok si ipersada.
Ise kin Gog arah Magog e?
Pemahamenta si mbarenda: Gog arah Magog eme penggelaren man Setan kenca ia ipelawes arah surga nari.
Pemahamenta si mbaru: Gog arah Magog eme bangsa-bangsa si ersada si nyerang umat Jahwe bas kiniseran si mbelin.
Alasenna isesuaiken: Menurut nubuat Pustaka, iban pagi Gog jadi pangan perik pemangsa janah ikuburken i doni. E ertina Gog labo mahluk roh. Selain si e, serangen Gog seri ras serangen bangsa-bangsa man umat Dibata si itulis bas buku Daniel ras Ketangkasen.—Dan. 11:40, 44, 45; Ket. 17:14; 19:19.
Seri nge rumah pertoton si idah Esekiel ras rumah pertoton rohani si ibahas Rasul Paulus?
Pemahamenta si mbarenda: Rumah pertoton si idah Esekiel seri ras rumah pertoton rohani si ibahas Rasul Paulus.
Pemahamenta si mbaru: Si idah Esekiel e labo rumah pertoton rohani si lit mulai tahun 29 M. Tapi, datna pengenehenen kerna uga kalak Jahudi si itaban e arus nembah Jahwe alu cara si benar si sesuai ras Undang-Undang Musa. Pembahasen Paulus kerna rumah pertoton rohani, khususna kerna pendahin Jesus mulai tahun 29 seh ku tahun 33 M selaku Imam si Mbelin si Mulia. Tapi bas pengenehenen Esekiel la lit imam si mbelin, janah si ibahas eme uga umat Jahwe mulai nembah Jahwe alu cara si benar bas tahun 1919. Emaka, la perlu sidarami kai si igambarken arah tiap bagin ntah pe ukuren arah rumah pertoton si lit bas pengenehenen Esekiel e. Si perlu siperdiateken eme kai si banci sipelajari kerna patoken Jahwe i bas nembah Ia alu cara si benar.
Alasenna isesuaiken: Lit piga-piga si la seri arah rumah pertoton si idah Esekiel ras rumah pertoton rohani. Contohna, bas rumah pertoton si idah Esekiel, melala korban binatang i je, tapi bas rumah pertoton rohani sada ngenca korban si ipersembahken “sekali seh rasa lalap.” (Heb. 9:11, 12) Pengenehenen e dat Esekiel ratusen tahun sope reh Kristus ku doni, janah paksa si e lenga cocok akap Jahwe waktuna guna njelasken kebenaren kerna rumah pertoton rohani e.
