Turang Senina si Engkelengi Jahwe,

Bas tahun 1971, kalak si reh ku Kebaktin Distrik “Nama Ilahi” bas bahasa Inggris meriah kel ukurna ngaloken piga-piga buku si mbaru. Ning kalak e kerna buku e, “Seh kel jilena buku enda, ise pe la lit ngarapsa bage jilena.” Kerna salah sada buku e, nina sekalak turang seninata si dilaki, “Mantap kel sidat gambaren kerna masa depan, lenga pernah sidat gambaren si bagenda!” Buku si apai maksudna e? Buku e eme “Teh Bangsa-Bangsa Pagi maka Aku kap Jahwe—Uga Carana?” (“The Nations Shall Know That I Am Jehovah”—How?) Kai si erbanca mejile kel buku enda? Perban bas buku enda lit penjelasen si enggo iperbarui kerna nubuat Esekiel, janah nubuat e lit pengaruhna man masa depan kerina manusia.

Puluhen tahun kenca buku e iterbitken, enggo reh teremna umat Dibata, arah 1,5 juta jadi 8 juta lebih. (Jes. 60:22) Lit lebih 900 bahasa si ipake kalak e. (Sak. 8:23) Melala arah kalak e lenga pernah pelajarina buku si khusus njelasken kerna nubuat Esekiel.

Mulai tahun 1971 seh asa gundari, melala kebenaren Pustaka si reh jelasna bali bagi terang erpagi-pagi si terus reh terangna. (Kua. 4:18) Bas tahun 1985, mulai jelas siangkai kerna ‘biri-biri si deban’ si ikataken benar selaku teman Dibata. (Joh. 10:16; Rom. 5:18; Jak. 2:23) Kenca si e, bas tahun 1995 siangkai maka “biri-biri” ras “kambing” ihakimi pagi bas “kiniseran si mbelin.” (Mat. 24:21; 25:31, 32) Kerina pemahamenta si enggo isesuaiken enda lit pengaruhna man pemahamenta kerna buku Esekiel.

Piga-piga tahun terakhir enda, pemahamenta lalap denga iperjelas. Contohna kerna perumpaman Jesus. Gundari melala pelajaren arah perumpaman Jesus si enggo reh jelasna siakap janah kena kel ku pusuhta. Piga-piga perumpaman e nggambarken kai saja pagi si terjadi bas kiniseran si mbelin si enggo ndeher kel. Enggo ka reh jelasna siangkai piga-piga nubuat Esekiel. Misalna, nubuat kerna Gog arah Magog (pasal 38 ras 39), sekalak dilaki si lit ingan alat tulis sekertaris bas ia (pasal 9), bage pe tulan-tulan si kerah bas lembah ras kerna dua tongkat si ipersada (pasal 37). Kerina penjelasen si terbaru enda erbanca keterangen si lit bas buku si iterbitken bas tahun 1971 perlu iperbarui.

Emaka, la ateta mamang enterem umat Jahwe tersungkun-sungkun, “Ndigan banci sidat buku si isina penjelasen si terbaru kerna nubuat Esekiel?” Enda me buku si itima-timai e, judulna: Dungna Kerina Kalak Nembah Jahwe Saja! Sanga bacandu 22 pasal si lit bas buku e janah ukurindu gambar-gambarna si mejile, pasti luar biasa akapndu riset si enggo iban guna nikapken buku enda. Rusur kel kami ertoto gelah angkai kami kai alasen Jahwe erban Kitap Esekiel si luar biasa enda. Ukuri kami kel penungkunen-penungkunen enda: Kai pelajarenna man kalak si lit bas jaman Esekiel bage pe man kita gundari? Nubuat si apai si terjadi bas masa depan? Perlu nge sidarami gambarenna ras padanenna? Kerina jawapen man penungkunen e ndai erban reh jelasna siangkai kitap Esekiel lebihen asangken si enggo-enggona janah reh belinna ka pengerganta man buku e.

 Sanga bacandu buku Esekiel mulai tangtangna nari seh ngasa dung, pasti luar biasa kel kapndu bagin organisasi Jahwe si lit i surga. Pasti luar biasa ka kapndu patoken Jahwe si meganjang si itetapkenNa man si nembah Ia, i surga bage pe i doni. Buku Nembah Jahwe pasti erban reh bagesna pengerganndu nandangi kai si enggo ilakoken Jahwe bage pe nandangi kai si ntisik nari ilakokenNa man umatNa. Idahndu kari bas buku enda lit dua bagin si lalap iulih-ulihi. Si pertama, gelah meriah ukur Jahwe, arus sitandai Ia janah siakui Ia selaku Penguasa Alam Semesta. Si peduaken, arus sisembah Jahwe bagi si ngena ateNa, janah arus kita nggeluh sesuai ras patokenNa si meganjang.

Ngarap kel kami gelah buku enda banci erban reh belinna sura-surandu nembah Jahwe alu cara si benar, alu bage gelar Dibata si badia imuliaken. Mbera-mbera buku enda pe banci nampati kam gelah terus nimai waktuna sanga kerina bangsa meteh ise kin Jahwe e.​—Esek. 36:23; 38:23.

Mbera-mbera Bapakta Jahwe si perkeleng, mereken pasu-pasu si simpar man bandu perban enggo usahakenndu ngangkai buku si itulis nabiNa eme Esekiel.