Ngkai maka kalak enda teridah meriah kal ukurna? Kalak enda sangana pulung i bas salah sada kebaktin kami. Bagi umat Dibata marenda, si niperintahken pulung telu kali setahun, kami pe ertima-tima lako pulung i bas kebaktin si mbelin. (Ulangen 16:16) Tep-tep tahun kami erban telu kebaktin si mbelin: dua kebaktin wilayah si tep-tep kebaktin dekahna sada wari ras kebaktin regional si dekahna telu wari. Kai gunana man kami kebaktin-kebaktin e?

Perkade-kaden kami selaku kalak Kristen ipegegeh. Bali bagi bangsa Israel marenda si ermeriah ukur muji Jahwe ”i bas perpulungen bangsaNa”, kami pe ermeriah ukur paksa ngelakoken ibadat man BaNa i bas acara-acara si istimewa. (Masmur 26:12; 111:1) Kami banci jumpa guna siiah-iahen ras Saksi-Saksi Jahwe arah runggun ntah pe bangsa sideban nari. Ciger warina, kami ras-ras man i bas ingan kebaktin, alu bage acara rohani e muat riahna akap kami. (Perbahanen Rasul-Rasul 2:42) I je, kami ngidah kekelengen si mpersadaken ’teman si sada kiniteken’ i belang-belang doni.​—1 Petrus 2:17.

Nampati Kami Guna Erban Kemajun Rohani. Mbelin kal gunana man kalak Israel kenca ”angkana kai si enggo iogeken man bana” i bas Pustaka si Badia nari. (Nehemia 8:8, 12) Bagi kalak Israel ndube, meherga kal iakap kami pengajaren kerna Pustaka si Badia si ialoken kami i kebaktin. Lit tema erpalasken Pustaka si Badia i bas tep-tep acara. Arah kotbah, simposium, ras arah pertunjuken si menarik, kami erlajar uga carana ngelakoken peraten Dibata i bas kegeluhen kami. Meriah ukur kami sanga megi pengalamen piga-piga teman si dungna banci menang i bas perbeben geluh selaku kalak Kristen i bas masa si sulit enda. I bas kebaktin regional, kejadin-kejadin si lit i bas Pustaka si Badia ipentasken i bas sada drama si mereken pelajaren si cocok i bas kegeluhenta. I tep-tep kebaktin, lit ka acara peridin man kalak si atena iperidiken lako petangkasken pembaktinna man Dibata.

• Ngkai makana kebaktin jadi sada acara si maba keriahen?

• Kai gunana man bandu adi reh ku kebaktin?