Pustaka si Badia ernubuat, kenca kematen Kristus pagi reh me guru-guru perguak i bas kalak Kristen si pemena nari si ncedai ajaren kebenaren Pustaka si Badia. (Perbahanen Rasul-Rasul 20:29, 30) La ndekah kenca e, enda tuhu-tuhu terjadi. Kalak enda ncampurken ajaren Jesus ras kiniteken agama palsu, emaka Kekristenen si palsu pe erbuena. (2 Timotius 4:3, 4) Uga maka kita banci tek maka gundari enggo sidat pemeteh si tangkas dingen jelas kerna kai kin situhuna si niajarken Pustaka si Badia?

Enggo seh waktuna Dibata Jahwe mpetangkas kebenaren. InubuatkenNa maka i bas paksa pendungi, ”kalak pentar ngenca pagi ngerti”. (Daniel 12:9, 10) I bas tahun 1870, lit sada terpuk kitik si ndarami kebenaren si isedarina maka melala kepe ajaren gereja si la sentudu ras Pustaka si Badia. Emaka, kalak enda mulai erusaha ngantusi uga kin situhuna ajaren Pustaka si Badia, janah Dibata Jahwe masu-masu kalak enda alu mereken pengantusen rohani.

Kerina kalak si tutus mpelajari Pustaka si Badia alu megermet. Ajar-Ajar Pustaka si Badia si rajin e, si leben asangken kami, nggunaken cara erlajar si ipake kami denga genduari. Kalak enda mbahas Pustaka si Badia topik per topik. Adi lit ayat si mesera iangkai, idaramina ayat-ayat si deban si banci nerangkenca. Kenca idatna sada kesimpulen si sentudu ras kerina bagin i bas Pustaka si Badia, itulisken kalak enda. Jadi, ipediat kalak enda Pustaka si Badia nerangken erti ayat-ayat si lit i bas Pustaka. Alu bage, banci idatken mulihi kebenaren kerna gelar Dibata ras KinirajanNa, peratenNa nandangi umat manusia ras doni, keadan kalak mate, ras arapen kerna kinikeken. Kalak enda pe imerdekaken arah erbage kiniteken ntah pe kebiasan si la sentudu ras kebenaren.​—Johanes 8:31, 32.

I bas tahun 1879, Ajar-Ajar Pustaka si Badia ngantusi maka nggo seh masana lako pembarken kebenaren. Jadi, i bas tahun e, kalak enda mulai ncetak majalah si iterbitken kami denga seh genduari, Sora Ermomo Mberitaken Kinirajan Dibata Jahwe. Genduari, kebenaren kerna Pustaka si Badia enggo ipeseh kami i bas 240 negeri ras i bas kira-kira 750 erbage cakap. Pemeteh si benar seh kal simparna!

• Kenca kematen Kristus, kai si terjadi nandangi kebenaren Pustaka si Badia?

• Uga carana kebenaren Kata Dibata idat kami mulihi?