La ndekah kenca kematenna, erkata Jesus, ”Berita si meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e.” (Matius 24:14) Uga carana dahin mberitaken Kinirajan i belang-belang doni enda idalanken? Alu ngikutken usihen si itetapken Jesus sanga ia i doni.​—Lukas 8:1.

Usahaken kami ndahi kerina kalak i rumahna. Jesus ngajari ajar-ajarna cara mberitaken berita si meriah ku rumah-rumah. (Matius 10:11-13; Perbahanen Rasul-Rasul 5:42; 20:20) Perberita si meriah bas abad si pemena e itugasken erberita si meriah i daerah si enggo itentuken. (Matius 10:5, 6; 2 Korinti 10:13) Genduari, dahin kami lako mberitaken berita si meriah enggo sikap iaturken, ras tep-tep runggun ibere daerah si enggo itentuken si banci idahi. Alu bage, kami banci ndalanken perentah Jesus, guna ”meritaken man jelma si nterem dingen naksiken” berita e.​—Perbahanen Rasul-Rasul 10:42.

Usahaken kami njumpai kerina kalak ijapa pe. Jesus pe mere contoh alu erberita i bas ingan si nterem, misalna i tepi lawit ntah pe deher ulu lau. (Markus 4:1; Johanes 4:5-15) Kami pe ercakap-cakap ras kerina kalak kerna Pustaka si Badia ijapa pe​—i dalan, i tiga-tiga, i toko-toko, i taman, ntah pe nggunaken telepon. Selain si e, kami mereken kesaksin kempak teman sada kesain, sada dahin, sada kelas, ras kade-kade kami adi lit waktu si cocok. Kerina si ilakoken kami enda mereken kesempaten man jutan kalak i belang-belang doni guna megiken ”berita si mehuli kerna keselamaten”.​—Masmur 96:2.

Nggit nge kam mberitaken berita si meriah kerna Kinirajan Dibata ras kai gunana man banta pagi? Berita kerna arapen enda labo man banta saja. Gundari nari turikenlah berita enda kempak kerina jelma!

• ”Berita Si Meriah” kai nge si arus siberitaken?

• Uga Saksi-Saksi Jahwe ngusih cara Jesus mberitaken berita si meriah?