Paksa lit mara, Saksi-Saksi Jahwe mis erbahan pengaturen guna nampati teman-teman sada kiniteken si kena mara. Enda ncidahken maka kami kerina radu sikelengen. (Johanes 13:34, 35; 1 Johanes 3:17, 18) Alu cara kai saja kami mereken penampat?

Mereken sumbangen sen. Paksa lit kelihen si mekelek i Judea, kalak Kristen si pemena i Antiokhia ngirimken duit guna nampati teman-teman sada kinitekenna. (Perbahanen Rasul-Rasul 11:27-30) Bage ka pe, adi ieteh kami lit teman-teman sada kiniteken kami si ngenanami kiniseran, ikiremken kami sumbangen arah runggun gelah banci ibereken man teman si merlukenca.​—2 Korinti 8:13-15.

Mere penampat si erguna. Pertua-pertua i daerah si kena mara ndarami tep-tep anggota runggun guna mastiken keselamaten kalak e. Panitia penampat guna kemanusian banci ngaturken pembagin pangan, inemen, uis, ingan sementara, ras tambar ntah pe dokter. Melala Saksi si beluh reh alu biaya sendiri ras ikut mereken penampat guna kemanusian ntah pe mpesikap rumah ras Bale Kinirajan si ceda. Ulih persadan i bas organisasi kami janah perbahan nggo biasa erdahin ras-ras, banci kami meter mereken penampat. Amin gia penampat e khususna ibereken kami kempak ”teman-teman [kami] si sada kiniteken”, kami pe erusaha nampati kalak si deban, kai pe agamana.​—Galati 6:10.

Mereken dukungen rohani ras emosi. Kalak si kena mara e perlu kal kata pengapul. Paksa si bage me, kami ndatken gegeh arah Jahwe nari, ”Dibata sumbul kerina pengapul”. (2 Korinti 1:3, 4) Meriah ukur kami nuriken janji-janji i bas Pustaka si Badia kempak kalak si paksa erndele ate, janah nampati kalak e gelah reh tekna maka pasti isasapken Kinirajan Dibata nge pagi kerina mara si erbahan kiniseran ras ate ceda.​—Ketangkasen 21:4.

• Engkai maka Saksi-Saksi banci pedas mereken penampat paksa lit mara?

• Penampat rohani kai nge si ibereken kami kempak kalak si kena mara?