PELAJAREN 6
Kai nge Gunana Pergaulen ras Teman-Teman Sada Kiniteken?
Amin gia arus mbentasi kerangen ntah pe cuaca si la mejile, kami tetap reh ku perpulungen Kristen alu ratur. Engkai maka terus iusahaken Saksi-Saksi Jahwe pulung ras teman-teman sada kiniteken i bas runggun, aminna mbue perbeben si man adapen janah latih erdahin sada warin?
Erguna man kesangapen rohani kami. Paulus ngiahken kerina kalak i bas runggun gelah ”sisampat-sampaten”. (Heber 10:24) Kata ”sisampat-sampaten” i bas cakap Junani aslina ertina ”ngukuri alu mbages”, ntah pe nandai sada ras sidebanna. Emaka, kata-kata Paulus enda ngiahken kita guna mperdiateken kalak sideban. Adi terbagesen itandai kami keluarga-keluarga Kristen, ieteh kami maka piga-piga kalak e banci ndungi tantangen si bali ras si iadapi kami janah isampatina ka kami ndungisa.
Mpegegeh pertemanen si rasa lalap. I perpulungen, kami pulung labo ras teman-teman biasa, tapi ras teman meriah. Selain jumpa i bas perpulungen, kami pe ras gawah-gawah, olahraga, ntah pe man-man. Kai gunana si e kerina? Ije kami erlajar uga carana siergan janah mpeteguh kekelengen sapih-sapih kami. Adi lit teman meriah kami ngadapi perbeben, isampati kami alu meriah ukur, perbahan pertemanen kami enggo nteguh. (Kuan-kuanen 17:17) Alu erteman ras kerina anggota runggun, kami ncidahken maka kami ”radu seri mperdiateken”.—1 Korinti 12:25, 26.
Iahken kami kam gelah milih teman meriah si ndalanken peraten Dibata. Enda banci idatndu i bas runggun Saksi-Saksi Jahwe. Ula kam sangsi erteman ras kami.
-
Engkai maka pergaulen i perpulungen mbelin gunana?
-
Ndigan atendu reh lako nandai runggun kami terdeheren?