Kalak Kristen i bas abad pertama biasana rende, ertoto, janah ngoge ras mbahas Kitap si Badia i bas perpulungenna; labo lit upacara kai pe. (1 Korinti 14:26) Kira-kira bage me perpulungen kami.

Pengajarenna erpalasken Pustaka si Badia janah banci idalanken. Wari Sabtu ntah pe Minggu, tep-tep runggun pulung guna ndengkehken kotbah erpalasken Pustaka si Badia si dekahna 30 menit. Kotbah e nuriken kai hubungen Pustaka si Badia ku kegeluhenta ras jamanta genduari. Pengerana ngiahken kerina si pulung gelah mbuka ayat-ayat si man ogen. Kenca dung kotbah, lit Pelajaren ”Sora Ermomo”, eme pembahasen artikel Sora Ermomo terbiten si man pelajaren, janah kerina si reh banci ikut i bas pembahasen. Pembahasen e nampati kami ndalanken ajaren Pustaka si Badia i bas kegeluhen kami. Artikel si seri ipelajari i lebih 110.000 runggun i belang-belang doni.

Kami isampati gelah erbeluhna ngajar. Ras-ras kami pulung bas pertengahen minggu, guna ngikuti telu bagin i bas acara Pelayanen ras Kegeluhen Kristen, bahanna lit i bas Agenda Perpulungen Pelayanen ras Kegeluhen Kristen si terbit tep-tep bulan. Bagin si pemena bas perpulungen enda, Erta i bas Kata Dibata, nampati kami guna meteh terbagasen piga-piga bagin i bas Pustaka si Badia si nggo leben ioge kami. Kenca si e, bagin Ergiah-giahlah i bas Pelayanen, i je lit pertunjuken kerna uga carana mbahas Pustaka si Badia ras kalak si deban. Janah lit sekalak penasehat si mperdiateken cara kami ngoge ras ngerana, kenca e iberekenna pedah. (1 Timotius 4:13) Bagin si pendungi, Kegeluhen Kristen, mbahas kerna uga ndalanken ajaren-ajaren Pustaka si Badia bas kegeluhen tep-tep wari. Termasuk pembahasen nungkun-jabap si erban reh bagesna pengantusen kami nandangi Pustaka si Badia.

Bicara reh Kam ku perpulungen kami, jadi me atendu ngidah pengajaren kerna Pustaka si Badia si seh kal jilena.​—Jesaya 54:13.

• Acara kai saja nge si banci niikutindu i bas perpulungen Saksi-Saksi Jahwe?

• Perpulungen minggun si apai nge si dahindu atendu?