Nggit nge kam ngelakoken riset guna nambahi pemetehndu kerna Pustaka si Badia? Merhat nge kam meteh kerna sada ayat, jelma, ntah pe barang si itulisken bas Pustaka si Badia? Ntah pe, pernah nge ukurindu kerna uga Kata Dibata banci nampati kam ndungi perbebenndu? Adi pernah, gunakenlah perpustakan Bale Kinirajan.

Nyediaken bahan riset si erguna. Mungkin saja, la kerina publikasi kerna Pustaka si Badia si icetak Saksi-Saksi Jahwe si tersedia i bas cakap si ipakendu lit bas kam. Tapi, i perpustakan Bale Kinirajan melala publikasi terbiten simbaruna. Mungkin lit ka erbage terjemahen Pustaka si Badia, kamus si lengkap, ras buku-buku petunjuk sideban si erguna. Kam banci nggunaken perpustakan e sope perpulungen ntah pe kenca dung perpulungen. Adi lit komputer, banci saja lit Watchtower Library ije. Enda sada program komputer si risiken seh lalana publikasi kami janah lit fitur sindarami si menukah nggunakenca guna ndatken keterangen kerna sada topik, kata, ntah pe ayat.

Erguna man murid Perpulungen Pelayanen ras Kegeluhen. Banci igunakenndu perpustakan Bale Kinirajan paksa nikapken tugasndu. Si ertanggung jawap bas perpustakan e eme pengawas Perpulungen Pelayanen ras Kegeluhen. Ia mastiken publikasi si mbaru nggo tersedia ras ngaturken gelah sikap inganna. Ia ntah pe guru Pustakandu banci ncidahken uga carana ndatken keterangen si iperlukenndu. Tapi, buku-buku e la banci ibaba ndarat arah Bale Kinirajan nari. Tentu saja, nggit ka nge kita njaga kiniraturen buku-buku e janah la si coreng-corengi.

Pustaka si Badia nuriken man banta, guna ndatken ”pemeteh kerna Dibata”, kita arus nggit ndaramisa ”desken erta terbuni”. (Kuan-kuanen 2:1-5) Perpustakan Bale Kinirajan banci nampati kam guna mulai ndaramisa.

• Bahan riset kai saja si lit i perpustakan Bale Kinirajan?

• Ise si banci nampati kam nggunaken perpustakan enda?