Kitap-Kitap Junani Kristen megati nuriken kerna Barnabas ras rasul Paulus. Kalak e duana ngelayani jadi pertua keliling si ndahi runggun-runggun i abad pemena. Engkai? Sabap kalak e tuhu-tuhu mperdiateken teman-teman sada kiniteken janah merincuh gelah kerina i bas ketuahen. Nina Paulus man Barnabas ”ota sidahi mulihi senina-seninanta” guna ngenehen uga keadan ras perkembangenna. Alu ukur meriah idalanina ratusen kilometer guna ndahi ras mpegegehi kalak e. (Perbahanen Rasul-Rasul 15:36) Genduari, pertua-pertua keliling kami pe ngelakoken si bage rupana.

Kalak e reh lako mpeteguh kiniteken kami. Tep-tep pertua keliling ndahi kira-kira 20 runggun, ras tading sada minggu dekahna i tep-tep runggun dua kali setahun. Kami banci ndatken mbue pelajaren arah pengalamen kalak e nari bage pe ndeharana adi ia enggo erjabu. Usahaken kalak e nandai tep-tep anggota runggun, si metua ras si nguda, janah alu semangat nemani kami erberita si meriah dingen ngajarken Pustaka si Badia. Pertua-pertua keliling enda ras pertua-pertua runggun mereken waktuna guna reh lako mpermakani. Guna mpegegehi kami, kalak e mpeseh kotbah-kotbah si mpeteguh kiniteken i bas perpulungen ras i kebaktin.​—Perbahanen Rasul-Rasul 15:35.

Kalak e ncidahken maka iperdiatekenna kami kerina. Pertua-pertua keliling alu tutus mperdiateken kerohanin runggun-runggun. Kalak e pulung ras pertua-pertua bage pe sinampati perpulungen, lako meriksa alu megermet kemajun si enggo ibahan ras mereken pedah-pedah si perlu guna ndalanken tanggung jawab i bas runggun. Kalak e nampati perintis-perintis gelah banci ndalanken pelayanenna alu mehuli. Kalak e pe merincuh sitandan ras kalak si mbaru ergabung janah megi kemajun rohanina. Senina-seninanta enda alu ukur meriah mereken dirina jadi ’teman sada dahin guna kami’. (2 Korinti 8:23) Kinitekenna ras cara ia ndalanken perentah Dibata patut man usihen.​—Heber 13:7.

• Kai tujun pertua-pertua keliling ndahi runggun-runggun?

• Kai gunana man bandu kerehen kalak e?