I bas organisasi kami, la lit pendeta si igaji. Sebalikna, bagi i bas runggun Kristen si pemena, pertua-pertua si cukup sarat itetapken guna ”mpermakani perpulungen Tuhan”. (Perbahanen Rasul-Rasul 20:28) Pertua-pertua enda, eme dilaki-dilaki si nteguh kerohaninna si ertanggung jawab i bas runggun ras mpermakani rarasen. Kalak e ndatken pedah: ”kep-kepndulah e alu ukur meriah bagi si ngena ate Dibata, ola alu ukur mberat. Ula erkiteken mata duiten maka idalankenndu, tapi lakokenlah e erkiteken ukurndu ersuruh guna ngelayani”. (1 Petrus 5:1-3) Kai nge si nilakokenna man kami?

Ngurus ras njaga kami. Pertua-pertua mbimbing ras ngkelini kerohanin runggun. Perbahan isedarina dahin si penting enda i bas Dibata nari, pertua-pertua e labo atena erkuasa nandangi umat Dibata; sebalikna, kalak enda ngupayaken keriahen ukur ras mpegegeh kiniteken kami. (2 Korinti 1:24) Bagi permakan si tutus atena ngurus tep-tep biri-birina, pertua pe usahakenna nandai tep-tep anggota runggun.​—Kuan-kuanen 27:23.

Ngajari kami uga carana ndalanken peraten Dibata. Tep-tep minggu, pertua ngajar i perpulungen guna mpegegeh kiniteken kami. (Perbahanen Rasul-Rasul 15:32) Dilaki-dilaki si setia enda jadi usihen i bas dahin meritaken berita si meriah, erdahin ras kami janah ngelatih kami bas kerina curak pelayanen.

Mereken penampat ras pengapul man kami sekalak-sekalak. Guna mereken keperlun rohani kami sekalak-sekalak, maun-maun pertua enda njumpai kami i rumah ntah pe i Bale Kinirajan guna mereken penampat ras kata pengapul i bas Pustaka si Badia nari.​—Jakup 5:14, 15.

Selain tugas i bas runggun, enterem pertua enda melala ka nge dahinna si deban ras arus ndalanken tanggung jawab keluarga si nuntut waktu ras perhatinna. Pertua-pertua si la erlatih-latih enda patut sihamati.​—1 Tesalonika 5:12, 13.

• Kai nge tugas-tugas pertua runggun?

• Alu cara kai saja pertua mperdiateken kami?