Menurut Pustaka si Badia, lit dua terpuk kalak Kristen si dilaki si ndalanken erbage-bage tanggung jawab i bas runggun, eme ”peminpin-peminpin ras si nampati i bas perpulungen”. (Pilipi 1:1) I bas tep-tep runggun, biasana lit piga-piga pertua ras sinampati perpulungen. Pendahin kai nge si ilakoken sinampati perpulungen?

Nampati badan pertua. Kerina sinampati perpulungen, si metua ntah pe si nguda, eme kalak Kristen si dilaki si perukurenna ernalem ku Kata Dibata, tutus janah banci ndalanken dahinna alu mehuli. Kalak enda ndalanken erbage dahin penting si alu ratur ilakoken guna keperlun runggun bage pe i Bale Kinirajan. Alu bage, pertua-pertua banci mbulatken ukurna guna ndalanken tanggung jawabna eme ngajar ras mpermakani rarasen.

Ngelakoken erbage dahin. Piga-piga sinampati perpulungen ibere dahin lako ngalo-ngalo kerina si reh ku perpulungen. Si debanna ngurus peralaten si ngatur sora (tata suara), perduiten runggun, pembagin lektur ras daerah erberita man tep-tep anggota runggun. Kalak e pe nampati ngerawat Bale Kinirajan. Pertua-pertua pe banci mindo kalak e nampati si enggo metua. Patut nge kerina mehamat kempak kerina sinampati perpulungen si alu meriah ukur ngelakoken tanggung jawab kai pe si ibereken bana.​—1 Timotius 3:13.

Mereken usihen selaku kalak Kristen si mehuli. Sinampati perpulungen ipilih perban biak-biak rohanina si mehuli. Paksa mpeseh tugas i bas perpulungen, kalak e mpegegehi kiniteken kami. Usihen si ibereken kalak e bas dahin erberita, erbahan kami lebih ergiah-giah mberitaken berita si meriah. Janah, perbahan sinampati perpulungen e mesukah erdahin ras kalak sideban, enda nambahi keriahen ras mpegegeh persadan kami. (Epesus 4:16) I bas masana pagi, kalak e pe banci ncukupi sarat guna ngelayani jadi pertua.

• Dilaki-dilaki si uga nge sinampati perpulungen e?

• Uga kalak e ikut erbahan erbage dahin i bas runggun erdalan alu sikap?