Jesus ngatakenca man ajar-ajarna, ”Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.” (Matius 5:16) Guna ngelakoken tujun e, kami nggunaken teknologi modern, termasuk internet. Situs web kami, jw.org, eme ingan ndatken keterangen si resmi kerna kiniteken kami ras pendahin Saksi-Saksi Jahwe. Kai nge si banci idatndu ije?

Jabapen arah Pustaka si Badia kerna penungkunen si rusur isungkun kalak. Kam banci ndatken jabapen kerna piga-piga penungkunen si penting si usur kal isungkun kalak. Contohna, Banci kin Kerina Kiniseran Masap? ras Banci kin Kalak Mate Nggeluh Mulihi? risalah enda lit bas situs kami lebih i bas 600 cakap. Banci ka iogendu Pustaka si Badia Terjemahan Dunia Baru i bas lebih 130 cakap ras piga-piga alat si nampati erlajar Pustaka si Badia, misalna buku Kai Nina Pustaka si Badia? janah terbiten Sora Ermomo ras Sadarlah! si mbaruna. Mbue publikasi enda banci iogendu ntah pe ibegikenndu i bas Internet janah banci ka idownload-ndu i bas bentuk MP3, PDF, EPUB, ras si debanna. Kam pe banci ncetak piga-piga alamen guna ibereken kempak kalak si merincuh meteh isina, sue ras cakap si igunakenna! Publikasi i bas piga-piga cakap isarat tersedia i bas bentuk video. Kam banci muat Pustaka si Badia si ioge i bas bentuk drama, kejadin bas Pustaka si Badia si idramaken, ras musik si mejile si banci ibegikenndu paksa ngadi-ngadi.

Keterangen si benar kerna Saksi-Saksi Jahwe. Lit ka berita si mbaruna ras video si gendek kerna pendahin kami i belang-belang doni, kejadin si ialami Saksi-Saksi Jahwe, ras usaha kami i bas mereken penampat guna kemanusian. Kam pe banci ndatken keterangen kerna kebaktin si reh ras alamat kantor-kantor cabang kami.

Alu nggunaken situs web enda, terang kebenaren kami ersinalsal ku belang-belang doni. Mbue gunana man kalak i bas tep-tep benua, termasuk ka Antartika. Kami ertoto gelah ”Kata Tuhan (Jahwe) pedas min reh mbarna” ku belang-belang doni, guna mereken kemulian man Dibata.​—2 Tesalonika 3:1.

• Uga carana jw.org nampati reh buena kalak meteh kebenaren Pustaka si Badia?

• Kai nge si atendu idaramindu i bas situs web kami?