Adi kam sangana erlajar ras sekalak Saksi Jahwe, mbelin kemungkinenna iogendu nge lebe bahan pelajaren e sope ibahas. Lit ka nge ulina adi enda pe ilakokenndu sope reh ku perpulungen gelah melala ndatken kegunanna. Asil si mehuli banci sidat adi tutus ras teratur kita erlajar.

Tentuken waktu ras ingan erlajar. Katawari kam si bancina kal mbulatken ukur guna erlajar? Pagi-pagi sope erdahin nge, ntah berngi kenca anak-anak nggo tunduh? Amin gia kam la banci ndekah erlajar, tentuken asa kai dekahna waktu si banci ipakendu guna erlajar, janah ula pediat kai pe ngganggu kam. Darami ingan si tenang, pedauh kerina si banci ngganggu alu mpemate radio, televisi, ras ponsel. Ertoto sope erlajar banci nampati Kam gelah ula lebe ngukuri dahin si deban gelah banci musatken ukur guna erlajar Kata Dibata.​—Pilipi 4:6, 7.

Bere tanda i bas bahan pelajaren, janah banndu persikapen guna ikut i bas pembahasen. Si pemena, cuba datken kai gambaren bas kerina topikna. Ukuri judul artikel ntah pe pasal, janah kai nge hubungen tep-tep subjudul ras temana, kenca si e nehenlah gambar-gambar ras penungkunen si ncidahken pokok si pentingna. Kenca e, ogelah tep-tep paragrap, janah darami jabapen kerna penungkunen si tercetak. Buka ras ogelah ayat-ayat si itulis, janah ukuri kai hubungen ayat-ayat e ras bahan pelajaren. (Perbahanen Rasul-Rasul 17:11) Kenca datndu jabapenna, tandai piga-piga kata ntah pe kalimat kunci i paragrap e gelah banci nampati kam nginget jabapenna. Emaka, banci angkatndu tanndu i perpulungen adi atendu mereken jabapen ntah pe komentar alu kata-katandu sendiri.

Alu mpelajari erbage topik i perpulungen tiap minggu, banci erlalana ras erbagesna pemetehndu kerna Pustaka si Badia.​—Matius 13:51, 52.

• Kebiasan kai nge si banci ikembangkenndu guna nikapken bahan si man pelajaren i perpulungen?

• Uga nge carana kam banci nikapken komentar si ipesehndu atendu i perpulungen?