Idahndu nge gambar Saksi-Saksi Jahwe i brosur enda? Sikap kal peruis kalak e paksa pulung i bas runggun. Ngkai maka bage kal kami mediatena kempak paken ras peruis kami?

Guna ncidahken kehamaten man Dibata kami. Payo, Dibata labo ipernehenNa penampilen arah darat saja. (1 Samuel 16:7) Aminna bage, paksa kami pulung guna nembah Dibata, merhat kal kami ncidahken kehamaten man Dibata ras teman-teman kami. Bicarana arus kita ngadap ku hakim i pengadilen, enggo pasti maka siperdiateken nge penampilenta guna ngergai keduduken hakim e. Bage ka pe, penampilen kami i perpulungen ncidahken pengergan kami kempak ”Hakim kerina doni”, Dibata Jahwe, ras ingan ibadat kami.​—Kejadin 18:25.

Guna ncidahken prinsip geluh kami. Pustaka si Badia ngajarken kalak Kristen gelah ”mehamat dingen mehuli min peruisna . . . sederhana saja”. (1 Timotius 2:9, 10) Peruis ntah pe penampilen si ”mehamat” ertina la make paken si nggandili, terbuka kal, janah si la sikap man tatapen. Bage pe, ”mehuli . . . sederhana” ertina paken si ipilih kami sikap dingen mehuli man nehenen, ras la ngelebihi. Aminna kami paguh ncikep aturen enda, mbue denga nge pilihen paken si banci ipake kami. Peruis kami mehuli ras sikap gelah ”tama ulina man pengajaren kerna Dibata si Engkelini kita” ras ngerehken kepujin man Dibata. (Titus 2:10; 1 Petrus 2:12) Alu peruis kami si sikap ku perpulungen, kami mereken pengaruh si mehuli kempak perukuren kalak kerna ibadat kami man Jahwe.

Bicarana lenga pe lit pakenndu si resmi, ula mbiar ntah pe mela kam reh ku Bale Kinirajan. Pakenta la perlu merga ntah pe mewah guna teridah metunggung, bersih ras sikap.

• Terjeng uga nge pentingna peruista paksa pulung lako nembah Dibata?

• Prinsip kai saja si banci nampati kita i bas milih paken ras penampilenta?