PENUNGKUNEN 9
Harus Nge Aku Tek Man Ajaren Evolusi?
KAI SI ILAKOKENNDU?
Bayangken cerita enda: Mamang ate Alek. Kitik-kitikna nari, ia tek man Dibata ras penciptan. Tapi guru biologina ngataken ajaren evolusi e benar janah enda idukung alu riset ilmiah si banci iteki. Alek la nggit teridah motu. Nina i bas ukurna, ’adi ilmuwan saja pe enggo mbuktiken maka ajaren evolusi e benar, ise kin aku enda, maka aku la tek?’
Adi kam jadi Alek, tek nge kam man ajaren evolusi gara-gara lit buku si ngataken ajaren e benar?
UKURI LEBE!
Kalak si tek nandangi penciptan ntah pe ajaren evolusi biasana sekedar ngataken aku tek, tapi situhuna la ietehna engkai maka ia tek man ajaran e.
-
Piga-piga kalak tek man ajaren penciptan erkiteken iajarken i bas gereja.
-
Piga-piga kalak tek man ajaren evolusi perban iajarken i sekolah.
PERTIMBANGKEN ENEM PENUNGKUNEN ENDA
Nina Pustaka, ”Tuhu kerina rumah lit si majekkenca, tapi Dibata nge njadiken kerina si nasa lit.” (Heber 3:4) Masuk akal nge enda?
Ngakui lit kegeluhen tapi la tek lit si nciptakenca, enda la masuk akal, bali bagi ngakui lit rumah si pajek tapi la lit si mbangunca
NINA: ’Alam semesta ras kerina isina eme kap hasil arah ledaken si galang.’
1. Ise janah kai si erban ledakan si galang e?
2. Apai si lebih masuk akal—kerina si nasa lit rehna arah pencipta?
NINA: ’Manusia berevolusi arah binatang.’
3. Adi manusia rehna arah binatang—contohna kera, engkai maka lit perbedan si jelas antara kepentaren manusia ras kepentaren kera?
4. Engkai maka bentuk kegeluhen si paling ”sederhana” pe seh kal rumitna?
NINA: Evolusi tuhu-tuhu nggo teruji.
5. Payo nge kalak si ngataken e enggo nyelediki buktina?
6. Piga kalak nge si tek man ajaren evolusi erkiteken ipebetehken man bana maka kerina kalak si meganjang sekolahna tek ajaren evolusi?
”Adi kam sangana dalan-dalan i tengah kerangen janah idahndu rumah si mejile, bage nge i bas ukurndu, ’Andiko! Mejile nari rumah ah! Enda pasti terjadi bage saja arah batang kayu si ndabuhen.’ Tentu lang! Enda la masuk akal. Jadi engkai maka kita arus tek maka alam semesta bage pe kerina isina terjadi bage-bage saja?”
—Julia.
”Bayangken, lit si ngataken maka lit ledakan i bas sada percetakan. Tintana mistak ku dingding bage pe ku asbes, janah hasilna jadilah sada kamus si lengkap. Tek nge kam?”
—Rikki.
ENGKAI MAKA TEK MAN DIBATA?
Pustaka mpersingeti kita gelah nggunaken kengasupen ”rukur”. (Roma 12:1) Emaka, kinitekenndu man Dibata labo saja idasarken arah
-
PERASAN (Menurutku pasti lit si tergegehen)
-
PENGARUH KALAK SI DEBAN (Aku tading deher kalak si eragama)
-
TEKANAN KALAK SI DEBAN (Aku tek man Dibata—erkiteken orang tuaku)
Situhuna, kam sendirilah si arus tek janah lit alasenndu si masuk akal engkai maka kam tek Dibata e lit.
”Penjelasen guruku kerna cara kerja tubuh erban aku reh tekna maka Dibata e tuhu-tuhu lit. Tep-tep bagin arah tubuh lit gunana masing-masing, termasuk i bas hal-hal si seh kal sederhanana, ras enda biasana terjadi alu la sisadari. Tubuh manusia tuhu-tuhu luar biasa!”
—Tesa.
”Sanga kuidah rumah si meganjang, kapal si galang, bage pe motor, enda erban aku tersungkun-sungkun, ’Ise nge si erbahanca?’ Misalna motor. Pasti kalak si erbahanca seh kal jagona perban melala komponen si seh kal kitikna si irancang gelah motor e banci berfungsi. Adi motor saja lit si erbahanca tentu tubuhta pe lit si erbahanca.”
—Roy.
”Reh usurna kupelajari ilmu pengetahuan, ajaren evolusi reh lanai masuk akalna kuakap. . . . Menurutku lebih iperluken kiniteken si galang gelah banci tek man ajaren evolusi asangken man ajaren penciptan.”
—Toni.
SI MAN UKUREN
Amin gia enggo ngelakoken riset puluhen tahun, piga-piga ilmuwan lenga ndatken sada kesimpulen si banci isepakatina. Adi ilmuwan saja pe lenga sepakat soal ajaren evolusi—padahal kalak e enggo ahli i bas bidang e—salah nge aku adi la tek man ajaren e?
Mungkin Menarik Ka Kapndu
KAI NINA TEMAN-TEMANNDU
Banci nge Kita Tek maka Pencipta e Lit?
Lit dua anak muda si lanai ragu janah si kinitekenna pe reh paguhna.
