Bayangken cerita enda: Tomas la nggit sekolah wari enda, pagi, bage pe seterusna. Enda kerina erkiteken telu bulan si lewat sanga teman sekolahna rusur nokohi janah ngganggu ia. Maun-maun lit si nendeng Tomas seh ngasa ndabuhen kerina buku si lit i bas tanna ras kejadin e tempa-tempa kecelakan, janah lit ka si ndorong ia pudi nari, paksa itulihkenna ku pudi la ietehna ise si ngelakokenca. Si parahna, nderbih Tomas ndatken ancamen arah jejaring sosial . . .

Adi kam jadi Tomas, kai si ilakokenndu?

Kam labo lemah! Situhuna, kam labo perlu rubati guna ngadapi kalak si nokohi kam. Uga carana?

•   ULA TANGGAPI. Nina Pustaka si Badia, ’Adi kalak lenge nembeh, icidahkenna kal ukurna, tapi kalak si beluh rukur saber ia lalap.’ (Kuan-kuanen 29:11) Adi la kita ngelawan, dungna kalak si nokohi e pe bosan.

• ULA BALAS. Nina Pustaka si Badia, ”Adi lit kalak erban kejahaten, ola balas alu kejahaten.” (Roma 12:17) Pembalasen labo ndungi masalah, tapi mpebelin masalah.

• ULA DEHERI KALAK SI GUTUL. Nina Pustaka si Badia, ”Kalak pantas idahna kiniseran, nilah ia.” (Kuan-kuanen 22:3) Adi banci ula deheri kalak si nggit nokohi bage pe ingan si biasana kita itokohi.

• BEREKEN TANGGAPEN SI LA ISANGKANA. Nina Pustaka si Badia, ’Jabap si melias mpengadi rawa si gara.’ (Kuan-kuanen 15:1) Bahan jadi pertawan. Misalna, adi si nokohi kam ngataken kam mbursa, banci ikatakenndu, ”Ue me, kari banci kuperkertangi sitik yah!”

• LAWES I BAS INGANNA NARI. ”Adi kita sinik e ncidahken kita dewasa ntah pe gegehen kita asangken ia,” nina Nora 19 tahun. ”Alu sinik enda ncidahken kita beluh ngendaliken diri—e sifat si la lit i bas kalak si nggit nokohi.”—2 Timotius 2:24.

• TETAPLAH PERCAYA DIRI. Kalak si gutul banci ietehna adi negatif perukurenndu kerna dirindu, janah ia pe banci meteh adi kam la ngasup ngelawan ia. Sebalikna enterem kalak si gutul lanai nggit nokohi adi ietehna la lit kesempatenna nokohi kam.

• KATAKEN MAN KALAK SI DEBAN. Mantan guru sekolah ngataken, ”Ise saja pe si usur itokohi banci ngelapor. Enda langkah si tepat gelah kalak si deban ula itokohi.”