Bayangken cerita enda: Dua teman sekolah Brian reh ndeheri ia, janah beltek Brian rempet mesui. Enggo dua kali i bas minggu enda temanna nuruh ia ngisap. Enda petelukaliken.

Temanna si pemena ngataken:

Tandaskenna nadana ngerana ngataken ’teman’ janah main mata ras mpedarat sebungkus isap ras iberekenna man Brian.

Idah Brian lit isap bas jari tan temanna e. Beltek Brian pe reh suina.

Adi kam jadi Brian, kai nge si ilakokenndu?

Iukuri teman-teman Brian nge kai si paksana ilakokenna? Keputusenna sisada nge enda? Lang. Usuren kalak tergoda perban pengaruh kalak si deban. Ate kalak enda gelah lit temanna, emaka ilakokenna kai si isuruh kalak.

Adi kam ngadapi situasi si seri, uga carandu erban keputusen si berbeda janah nulak tekanen teman?

1.  

   Nina Pustaka si Badia: ”Kalak pantas idahna kiniseran, nilah ia, tapi kalak si la rukur iteruskenna e maka mesui atena.”—Kuan-kuanen 22:3.

   Megati banci sieteh ugapa pe nandangi terjadi masalah e ateta. Misalna, idahndu sekelompok temanndu sekolah sangana ngisap. Alu nikapken diri nandangi masalah e, kam banci siap ngatasisa.

2.  

   Nina Pustaka si Badia: ”Jagalah maka pusuh peratenndu tetap bersih.”—1 Petrus 3:16.

   Banci ukurindu, ’Uga nge pagi perasanku adi aku ikut-ikuten? Mungkin kentisik meriah akap teman-temanndu ras kam. Tapi uga nge pagi perasanndu? Nggit nge kam ngorbanken kedudukenndu si bersih gelah erban teman-teman sekelasndu senang?—Keluaren 23:2.

3.  

   Nina Pustaka si Badia: ’Kalak si pentar nilahken si jahat.’—Kuan-kuanen 14:16.

   Kerina umat Dibata arus erban pilihen ras ngenanami akibat pilihenna. Pustaka si Badia mpebetehken man banta kerna Jusup, Jop, bage pe Jesus si erban pilihen si tepat. Tapi Kain, Esau, ras Judas erban pilihen si salah. Kai si ilakokenndu?

Nina Pustaka si Badia: ”Lakokenlah si mehuli.” (Masmur 37:3) Adi enggo iukurindu kai akibatna janah erban keputusen, nuriken pendirindu ernukahna ras hasilna pe mehuli.

Ula mbiar—kam la perlu ngkhotbahi teman-temanndu. Nulak alu sederhana tapi tegas mungkin enggo bias. Ntah pe guna negasken maka pendirindu lanai banci itawar-tawar, kam banci ngataken:

• ”Lang Bujur!”

• ”Aku la nggit si bagena!”

• ”Me enggo tehndu, aku la nggit si bagena!”

Kuncina, arus ijabapndu alu yakin. Adi lakokenndu si e, kam banci sengget perban mis kalak e ngadi mpengaruhi kam!

Uga adi lit kalak si nokohi kam? Reh nina, ”Engkai maka la kam pang?” Anggaplah kata-kata e, contoh tekanen. Uga carandu ngatasisa? Lit dua pilihen.

• Kam banci njabap kata-katana e. (”Memang mbiar aku!” Alu singkat turiken alasenndu.)

• Banci balasndu tekanen e. Turiken alasenndu nulak, janah singgung kerna intelektualitas teman-temanndu e. (”Kuakap kena la nggit ngelakoken perbahanen si motu!”)

Adina terus kam itokohina, laweslah jenari! Ingetlah reh dekahna kam i je, reh belinna tekanen e. Adi kam lawes, icidahkenndu maka kam la mpediat teman-temanndu ngubah dirindu.

Kenyatanna, arus iadapindu tekanen temanndu. Tapi kam banci nentuken pilihen, nuriken pendirinndu, janah ngendalikenca. Kedungenna, kamlah si arus erban pilihen!—Josua 24:15.