PENUNGKUNEN 7
Uga Carana Ngatasi Adi Ipaksa Ngelakoken Hubungen Seks?
KAI SI ILAKOKENNDU?
Bayangken cerita enda: Dua bulan denga Martin nandai Corah. Tapi bagi enggo ndekah kal kalak enda sitandan. Kalak enda lalap SMS-en, ngerana erjam-jam i bas telepon, janah kalak e dungna si ngenan! Tapi gundari Martin mindo gelah la terjeng ngerana saja.
I bas dua bulan terakhir, Martin ras Corah terjeng sitagangen tan ras ciumen saja. Corah la nggit lebih asangken si e. Erkiteken Martin beluh muat ukurna emaka Corah mbiar iputusken Martin. Janah, nina i bas pusuhna, ’kami me singenan . . . ’
Adi enggo seh umurndu ngerondong, janah kam i bas situasi Corah, kai si ilakokenndu?
UKURI LEBE!
Hubungen seks eme hadiah i bas Dibata nari man kalak si enggo erjabu. Ngelakoken hubungen seks sope erjabu bali bagi nalahgunaken hadiah. Bagi uis mejile si ibereken kalak, ijadikenndu jadi elap-elap
Adi kam nentang hukum alam, misalna hukum gravitasi, kam banci ndatken resiko. Bage ka pe adi kam nentang hukum moral, misalna si ngataken ”nggeluh la erlua-lua”.
Kai akibatna adi silanggar perentah Dibata? Nina Pustaka, ”Kalak si erlua-lua erdosa ia nandangi kulana.” (1 Korinti 6:18) Engkai maka bage?
Para peneliti ngataken enterem kalak ngenanami kiniseran perban ngelakoken hubungen seks sope erjabu, misalna bagi si lit iteruh enda.
-
PERASAN STRES. Teremen remaja si erhubungen seks sope erjabu ngataken maka kalak enda erkadiola kenca ngelakokenca.
-
PERASAN CURIGA. Kenca erhubungen seks, masing-masing mulai rukur, ’ras ise ka ia enggo pernah ngelakoken hubungen seks?’
-
PERASAN KECEWA. I bas pusuh peratenna, sekalak diberu riahen ukurna adi sekalak dilaki mperdiateken ia labo memanfaatken ia. Janah enterem dilaki la tertarik man diberu si nukah irayu.
-
Penting ietehndu: Adi kam nerah man hubungen seks sope erjabu, kam ngerendahken dirindu alu mereken sada hal si seh kal mehergana. (Roma 1:24) Harga dirindu seh kal mehergana, jadi ula bereken bage saja!
Tuduhken maka lit pendirinndu guna mpedauh perbahanen ”erlua-lua”. (1 Tesalonika 4:3) Adi enggo kam pagi erjabu, emaka kam enggo banci erhubungen seks. Janah kam banci ngenanami sepenuhna hubungenndu ras la lit perasan ersalah, erkadiola, biar-biaren si usur reh kenca ngelakoken hubungen seks sope erjabu.
UGA MENURUTNDU?
-
Adi kalak si tuhu-tuhu ngena atena kam, nggit nge ia mbahayaken kesejahteran fisik ras emosindu?
-
Adi kalak si tuhu-tuhu peduli man bandu, nggit nge ia mbahayaken hubungenndu ras Dibata?
—Heber 13:4.
