PENUNGKUNEN 3
Uga Caraku Ngerana Ras Orang Tuaku?
KAI SI ILAKOKENNDU?
Bayangken cerita enda: I bas Rabu berngi. Jimmi, 17 tahun, enggo ndungi kerina dahinna i rumah, janah santai-santai atena! Ipegeluhna TV janahna tayang i bas kursi.
I bas paksa si e, reh Bapana, janah teridah ayona merawa.
”Jimmi! Engkai maka kam nonton TV, aturna me sampatindu agindu erban PR-na? La pernah dahikenndu kai si kusuruh!”
”Merawa lalap”, nina Jimmi agak megang.
Bapana ndeheri ia. ”Kai nindu ndai?”
”Labo kai pe Pa”, nina Jimmi, janahna jungut-jungut.
Gundari Bapana tuhu-tuhu merawa. ”Ula ko bagena ngerana man bangku, ya!”
Adi kam jadi Jimmi, kai si banci ilakokenndu gelah ula terjadi perubaten e?
UKURI LEBE!
Ngerana ras orang tua seri ras maba motor. Adi jumpa kam dalan buntu kam banci ndarami dalan si deban.
CONTOHNA:
”Mesera kal kuakap ngerana ras bapa”, nina singuda-nguda si ergelar Lia. ”Maun-maun kenca aku enggo gedang ngerana, nina bapa ngaloi, ’ras aku kin kam ngerana e ?’”
LIT TELU PILIHEN LIA.
-
Nergang bapana.
Lia nergang, ”Penting kal enda! Begiken lebe!”
-
Lanai nggit ngerana ras bapana.
Lanai nggit Lia nuriken masalahna.
-
Timai lebe waktu si cocok, emaka iturikenna ka masalahna e.
Kari Lia banci ngerana ras bapana, ntah pe nuriken masalahna arah surat.
Menurutndu, pilihen si apai nge si mehulina ipilih Lia?
PERTIMBANGKEN SI ENDA: Lit paksana si man ukuren bapana janah la ia sadar adi Lia lit masalahna. Emaka adi Lia milih Pilihen A, banci jadi bapana la ngangkai engkai Lia nergangi. Pilihen e mbelin kemungkinenna erban bapana la nggit megiken ranan Lia ras si enda ncidahken maka ia la mehamat ntah pe la hormat man orang tuana. (Epesus 6:2) Pilihen enda la lit ulihna.
Amin gia lit si ngambati dalan, labo ertina la lit dalan si deban, kam banci ndarami dalan si deban gelah banci ersada arihndu ras orang tuandu
Amin gia Pilihen B si nukahna, tapi enda labo si mehulina. Engkai? Gelah banci berhasil ngatasi masalah, Lia perlu ngerana ras bapana janah gelah bapana banci nampati ia, perlu ietehna kai si paksana terjadi i bas Lia. Sinik la banci ndungi masalah.
I bas Pilihen C, Lia la mpediat situasi enda mpengadi ia guna ngerana ras bapana. Sebalikna, iupayakenna guna ncakapken masalah e i bas lain waktu. Ntah pe adi ipilihna erban surat man bapana, enda banci erban tenang ukur Lia.
Nulis surat banci nampati ia nusun kai saja si atena iturikenna. Sanga ngoge surat enda, bapa Lia banci meteh kai si ate Lia turikenna, ras si enda banci nampati ia guna ngangkai masalah Lia. Jadi, pilihen C erguna man Lia bage pe man bapana. Alu ngerana ntah nulis surat, pilihen enda sentudu ras isi Pustaka, ”sidaramilah kai si erbahanca maka kalak tetap nggeluh alu dame”.
Pilihen kai nari si mungkin lit i bas Lia?
Cuba ukuri, ras tulisken iteruh enda. Kenca e, ukuri kai kira-kira hasil akhirna.
PEDAUH RANAN SI ERBANCA LA SIANGKAN
Ingetlah, kai si ikatakenndu lenga tentu seri ras kai si iangkai orang tuandu.
CONTOHNA:
Orang tuandu nungkun engkai maka kam berjut. Jabapndu, ”Kisat aku ncakapken si ena.”
Tapi iakap orang tuandu arah rananndu e, kam ngataken, ”Aku la tek man bandu. Pangen kuakap nuriken masalahku man teman-temanku asangken man bandu.”
Bayangken kam sangana i bas kesuliten janah orang tuandu nampati kam atena. Reh nindu, ”Ula kam mbiar. Banci nge kudungi sisada.”
-
Tapi, kai si banci lit i bas ukur orang tuandu?
-
Uga nge nindu si mehulina?
Mungkin Menarik Ka Kapndu
ANIMASI PAPAN TULIS
Uga Carana gelah Iangkai Orang Tuaku Perasanku?
Uga carandu ngerana man orang tuandu adi sangana la tendu ngerana?
