Adi kam merincuh jadi teman Dibata, Kam arus nggeluh sentudu ras agama si ngena ate Dibata. Jesus ngataken maka aruslah ”manusia ersembah man Dibata alu payo.” (Johanes 4:23, 24) Sada ngenca cara si payo i bas nembah Dibata. (Epesus 4:4-6) Agama si payo maba ku kegeluhen si rasa lalap, agama palsu nuju ku kematen.​—Matius 7:13, 14.

Kam banci nandai agama si payo alu mperdiateken kalak si ndalankenca. Perban Jahwe mehuli, si nembah Ia pe pasti jadi kalak si mehuli. Bagi batang rimo si mehuli erbuahken rimo si mehuli, agama si payo erbahan kalak jadi mehuli.​—Matius 7:15-20.

Teman-teman Jahwe tuhu-tuhu ngergai Pustaka si Badia. Ieteh kalak enda maka Pustaka si Badia rehna i bas Dibata nari. Janah, ibahan kalak e Pustaka si Badia si negu-negu ia i bas kegeluhenna, ndungi perbebenna, ras nampati ia erlajar kerna Dibata. (2 Timotius 3:16) Iusahaken kalak e nggeluh sentudu ras kai si iberitakenna.

 Teman-teman Jahwe ncidahken kekelengen kempak sada ras si debanna. Jesus ncidahken kekelengen kempak kalak si deban alu ngajari kalak e kerna Dibata, ras mpepalem kalak si sakit. Kerina kalak si nggeluh sue ras agama si payo pe ncidahken kekelengen kempak kalak si deban. Bali bagi Jesus, kalak e la megombang man kalak si musil ntah pe man kalak arah bangsa si deban. Jesus ngataken maka ajar-ajarna itandai kalak arah kekelengen si icidahkenna kempak sada ras si debanna.​—Johanes 13:35.

Teman-teman Dibata ngergai gelar Dibata, Jahwe. Adi lit sekalak jelma la nggit nggunaken gelarndu, banci kin ia jadi temanndu? Lang! Adi lit temanta, tentu sipake gelarna ras situriken kai si mehuli kerna ia kempak kalak si deban. Jadi, ise pe si merhat jadi teman Dibata aruslah make gelarNa ras nuriken kebenaren kerna Ia kempak kalak si deban. Jahwe merincuh gelah kita ndalankenca.​—Matius 6:9; Roma 10:13, 14.

Bali bagi Jesus, teman-teman Dibata ngajari kalak kerna Kinirajan Dibata. Kinirajan Dibata eme sada pemerentahen i surga si nandangi erban doni enda jadi pardis. Teman-teman Dibata mberitaken berita si meriah kerna Kinirajan e kempak kalak si deban.​—Matius 24:14.

Saksi-Saksi Jahwe iusahakenna gelah banci jadi teman Dibata. Kalak e ngergai Pustaka si Badia janah sikeleng-kelengen. Kalak e nggunaken ras ngergai gelar Dibata janah ngajari kalak si deban kerna Kinirajan Dibata. Saksi-Saksi Jahwe ngenca si ndalanken agama si payo i doni enda gundari.