Kam banci erlajar kerna Jahwe alu ngoge Pustaka si Badia. Ribun tahun si enggo lewat, Dibata milih piga-piga kalak guna nuratken perukurenNa. Tulisen-tulisen enda igelari Pustaka si Badia. Genduari, kita erlajar kerna Dibata alu ngoge Pustaka si Badia. Perbahan Pustaka si Badia risiken kata, ntah pe berita, arah Jahwe nari, Pustaka si Badia pe igelari Kata Dibata. Kita banci tek kerna kai si ikataken Pustaka si Badia perbahan Jahwe la pernah erbual. ”Dibata labo erbual.” (Heber 6:18) Kata Dibata risiken kebenaren.​—Johanes 17:17.

Pustaka si Badia eme salah sada pemere Dibata si seh kal mehergana man banta. Pustaka si Badia bali bagi surat sekalak bapa si perkeleng man anak-anakna. Pustaka si Badia mpebetehken man banta janji Dibata guna erbahan doni jadi sada ingan tading si seh kal jilena—e me pardis. Pustaka si Badia mpebetehken man banta kai si enggo, paksana, ras si nandangi ilakokenNa i bas wari si pepagi man anak-anakNa si setia. Pustaka si Badia pe nampati kita ndungi perbeben-perbebenta janah ndatken keriahen ukur.​—2 Timotius 3:16, 17.

 Saksi-Saksi Jahwe eme teman-teman Dibata; kalak e banci nampati kam ngantusi kai si niajarken Pustaka si Badia. Ula kam mbiar-mbiar mpebetehkenca man kalak e adi kam merhat erlajar Pustaka si Badia. Kalak e labo mindo penggalaren guna dahin e. (Matius 10:8) Selain si e, kam banci reh ku perpulungen Kristen. Enda ibahan i bas ingan perpulungen si igelari Bale Kinirajan. Alu reh ku perpulungen Kristen, pemetehndu kerna Dibata banci reh mbagesna.

Kam banci erlajar kerna Dibata arah tinepaNa. Misalna, Pustaka si Badia ngataken, ”Ijadiken Dibata langit ras doni.” (Kejadin 1:1) Paksa Jahwe nepa ”langit”, Ia erbahan matawari. Jadi, si e ncidahken kai kerna Dibata? Enda mpebetehken banta maka kuasa Jahwe seh kal belinna. Ia ngenca ngasup erbahan tinepa si bagi matawari gegehna. Enda pe mpebetehken man banta maka Jahwe e pentar, perban iperluken kepentaren erban matawari, si mereken las ras nalsalken terang, janah la pernah keri.

Tinepa Jahwe ncidahken maka Ia engkelengi kita. Ukuri kerna erbage-bage buah si lit i doni. Banci saja, Jahwe erban sada macam buah ngenca man banta—ntah sada pe la lit. Tapi, Jahwe mereken man banta erbage buah i bas erbage bentuk, ukuren, rupa ras nanamna. Enda ncidahken maka selain perkeleng, Jahwe pe Dibata si seh kal melumbarna, mediate, ras bujur.​—Masmur 104:24.