Jadi teman Dibata eme si mehulina kal man bandu. Dibata banci ngajari kam carana gelah ermeriah ukur ras ndatken kedamen; Ia banci mulahi kam arah melala ajaren si salah ras perbahanen si banci erban kam cilaka. Ia megiken kerina pertotonndu. Ia banci erbahan kam nggejapken kedamen bas pusuh ras ketetapen ukur. (Masmur 71:5; 73:28) Dibata banci nampati kam i bas masa kesusahen. (Masmur 18:18) Janah, Dibata nikapken sada pemereNa man bandu e me kegeluhen si rasa lalap.​—Roma 6:23.

Asum kam reh deherna ku Dibata, kam pe reh deherna ras teman-teman Dibata. Kalak enda banci jadi temanndu. Janah, kalak enda banci bali bagi sembuyakndu. Meriah ukur kalak enda ngajari kam kerna Dibata ras nampati kam i bas ndalanken peratenNa.

Kita la seri ras Dibata. Asum iupayakenndu erbahan hubungen si rembak ras Dibata, lit sada si arus ietehndu. Hubungen si rembak ras Dibata labo bagi pertemanen dua kalak si seri kedudukenna. Ia ndauh tuan, pentaren, ras gegehen asangken kita. Ia Penguasanta si erdolat. Jadi, adi merhat kita jadi temanNa arus sibegiken Ia ras silakoken kai si ipindoNa. Enda kerina guna kiniulinta.​—Jesaya 48:18.