Musuh Dibata si utamana kal eme Setan si Iblis. Ia sada mahluk roh si mberontak ngelawan Jahwe. Setan terus erjuang ngelawan Jahwe janah ngerehken melala kesuliten man manusia. Setan e seh kal jahatna. Ia perguak ras pemunuh.​—Johanes 8:44.

Mahluk-mahluk roh si deban ersada ras Setan i bas pemberontakenna ngelawan Dibata. Pustaka si Badia nggelari kalak e begu-begu Setan. Bali bagi Setan, begu-begu enda musuh manusia. Meriah ukurna erbahan manusia cilaka. (Matius 9:32, 33; 12:22) Jahwe nandangi ngkernepken Setan ras begu-beguna seh rasa lalap. Kentisik nari ngenca kesempaten kalak enda ngerehken kesuliten-kesuliten man manusia.​—Ketangkasen 12:12.

Adi jadi teman Dibata atendu, ula lakokenndu peraten Setan. Segat kal ate Setan ras begu-beguna nandangi Jahwe. Kalak enda musuh Dibata, janah atena kam pe jadi musuh Dibata. Kam arus erbahan pilihen, ise atendu si isenangkenNdu—Setan ntah Jahwe. Adi nggeluh si rasa lalap atendu, arus ipilihndu ngelakoken peraten Dibata. Mbue kal taktik ras cara Setan guna nipu manusia. Teremen kalak paksa itipuna gundari.​—Ketangkasen 12:9.