Ate Dibata gelah kam jadi temanNa. Pernah nge bayangkenndu kam banci jadi teman Dibata si Mbelin i bas alam semesta? Abraham, si nggeluh i bas jaman si adi, igelari teman Dibata. (Jakobus 2:23) Melala kalak si deban si ituriken i bas Pustaka si Badia ngenanami hubungen si rembak ras Dibata janah ndatken pasu-pasu si simpar. Genduari, melala kalak arah erbage penjuru doni enggo jadi teman Dibata. Kam pe banci jadi teman Dibata.

Ulin jadi teman Dibata asangken jadi teman manusia si apai pe. Dibata la pernah erbahan kecewa temanNa si bujur janah si setia man BaNa. (Masmur 18:25) Ulin jadi teman Dibata asangken ndatken kinibayaken. Paksa kalak bayak mate, ertana ibuat kalak sideban, tapi kalak si rembak ras Dibata ngaloken erta si ise pe la banci ngerampassa.​—Matius 6:19.

Piga-piga kalak banci saja usahakenna ngambati kam gelah ula erlajar kerna Dibata. Enda banci ilakoken piga-piga temanndu ras kalak si lit i bas jabundu. (Matius 10:36, 37) Bicara lit si nawai ntah pe ngancam kam, banci sungkunndu bandu, ’Ise nge ateku si kusenangken—manusia ntah Dibata?’ Cuba ukurkenndu enda: Adi lit si nuruh kam gelah ngadi man, nggit nge kam ngikutkenca? Pasti lang! Kam merluken pangan gelah banci nggeluh. Tapi, Dibata banci erbahan kam nggeluh seh rasa lalap! Jadi, ula pediat ise pe erbahan kam ngadi mpelajari uga carana banci jadi teman Dibata.​—Johanes 17:3.