Perlu upaya i bas mpegegeh pertemanen; perlu upaya guna mpertahankennca. Upaya si ibahanndu guna jadi teman Dibata ras mpertahankenca ipasu-pasu nge pagi. Nina Jesus kempak kalak si tek nandangi ia, ”[Kebenaran] jine si mbebasken kam.” (Johanes 8:32) Kai ertina e?

Kam banci ndatken kemerdekan gundari. Kam banci ibebasken arah ajaren palsu ras guak si ipembarken Setan. Kam banci ibebasken arah keadan si la erpengarapen si erbahan ukur jutan kalak si la nandai Jahwe la tenang. (Roma 8:22) Teman-teman Dibata pe imerdekaken arah ”kebiaren nandangi kematen”.​—Heber 2:14, 15.

Kam banci ngenanami kemerdekan i bas doni si mbaru si rehna i bas Dibata nari. Seh kal luar biasana kemerdekan si banci inanamindu i bas wari si pepagi! I bas Pardis si lit i doni pagi, lit kemerdekan arah perang, pinakit, ras kejahaten. Kemerdekan arah kemusilen ras kelihen. Lanai lit si metua ras kematen. Ibebasken arah penindasen, kinilaadilen ras lanai lit si man kebiaren. Pustaka si Badia nuriken kerna Dibata, ”IdadakenNdu tanNdu iperiahkenndu pusuh kerina si nggeluh.”​—Masmur 145:16.

 Kerina teman Dibata banci nggeluh si rasa lalap. Kegeluhen si rasa lalap eme sada pemere Dibata si meherga si iberekenNa pagi man kerina kalak si erupaya erteman ras Ia. (Roma 6:23) Banci ukurindu kai ertina kegeluhen si la erkeri-kerin e man bandu!

Melala si banci ilakokenndu perbahan mbue waktundu. Banci saja kam merincuh mpelajari sada alat musik. Erlajar ngelukis ntah jadi tukang kayu. Banci saja atendu mpelajari kerna rubia-rubia ntah sinuan-sinuan. Ntah pe, mungkin gawah-gawah ras ndahi erbage negeri janah jumpa ras erbage suku. Kerina enda banci terjadi adi kam nggeluh si rasa lalap!

Lit waktundu guna ndatken melala teman. Perbahan nggeluh si rasa lalap, kam banci nandai melala kalak si enggo jadi teman Dibata. Kam banci meteh kiningasupen ras biak-biakna si mehuli, janah kalak e pe banci jadi temanndu. Ikelengindu kalak e, janah ia pe engkelengi kam. (1 Korinti 13:8) Alu ndatken kegeluhen si la erkeri-kerin, lit waktundu guna erteman ras kerina manusia i doni! Si pentingna kal, asum idalanindu abad tep-tep abad pertemanenndu ras Jahwe reh teguhna. Mbera-mbera kam jadi teman Dibata seh rasa lalap!