Kematen eme kebaliken kegeluhen. Kalak mate bali bagi kalak tunduh. (Johanes 11:11-14) Kalak mate la banci mbegi, ngidah, ngerana ntah pe rukur. (Pengerana 9:5, 10) Agama palsu ngajarken maka kalak si nggo mate lawes ku sada ingan si deban guna nggeluh ras nini-ninina. Enda labo ajaren Pustaka si Badia.

Kalak mate la banci nampati ntah pe erbahan kita cilaka. Enggo sada kebiasan gundari kalak erbahan upacara agama ntah pe acara man kalak mate, misalna ngadati kalak mate, ngembahken bunga, ras ncibalken isap ntah pe belo, si iakapna banci pesenang kalak si nggo mate. Dibata la senang, sabap si e kerina asalna arah guak Setan. Kalak si nggo mate la banci isenangken sabap ia lanai nggeluh. Lanai kita perlu mbiar ntah pe nembah man kalak mate. Dibata saja si arus sisembah.​—Matius 4:10.

Kalak mate banci nggeluh mulihi. I bas doni si jadi pardis, Jahwe mpekeke kalak si nggo mate guna nggeluh mulihi. Tapi, si enda terjadi i bas wari si pepagi. (Johanes 5:28, 29; Perbahanen 24:15) Dibata ngasup mpekeke kalak si nggo mate, bali bagi kam pe banci ngingeti kalak si paksana medem.​—Markus 5:22, 23, 41, 42.

Ajaren maka kita la banci mate eme sada guak si ipembarken Setan si Iblis. Setan ras begu-beguna erbahan nterem kalak erpengakap maka tendi kalak mate nggeluh denga janah banci ngerehken penakit ras erbage persoalen. Setan nipu manusia, maun-maun igunakenna nipi ras pengenehenen. Jahwe numpahi kalak si erupaya ngerana ras kalak si nggo mate.​—Ulangen 18:10-12.