Pardis lanai bagi doni inganta tading si gundari. Labo pernah ate Dibata doni enda idemi perbeben ras ceda ate, ukur gulut ras kiniseran. I bas wari si pepagi, Dibata erbahan doni enda jadi pardis mulihi. Uga kin Pardis e pagi? Mari sipegermetken kai si ikataken Pustaka si Badia:

Kerina kalakna bujur. Pardis jadi rumah man teman-teman Dibata. Kalak e erbahan kai si mehuli kempak sada ras sidebanna. Kalak e nggeluh rikutken si ngena ate Dibata.​—Kuan-kuanen 2:21.

Lit mbue pangan. I Pardis, lanai pagi lit kelihen. Nina Pustaka si Badia, ”Mbuahlah page [ntah pe, pangan] i belang-belang negeri.”​—Masmur 72:16.

Rumah si mejile ras pendahin si erban ukur senang. I bas Pardis, tiap keluarga lit rumahna sendiri. Tiap kalak ngelakoken pendahin si mereken keriahen ukur si tuhu-tuhu.​—Jesaya 65:21-23.

 Dame i belang-belang doni. Lanai lit kalak si erperang ras kalak si mate i bas perang. Pustaka si Badia nuratken maka, ’Ipengadi Dibata perang.’​—Masmur 46:9, 10.

Kesehaten si serta. Pustaka si Badia erjanji, ”Lanai pagi lit si sakit ringan i bas negerinta [Pardis].” (Jesaya 33:24) Bage pe, lanai pagi lit kalak si cempang, pentang, pasek, ntah pe si la beluh ngerana.​—Jesaya 35:5, 6.

Lanai lit kiniseran, ceda ate, ras kematen. Pustaka si Badia nuratken, ”Lanai pagi lit kematen, ceda ate, tangis ntah pe si mesui, sabap si pemena enggo lepas.”​—Ketangkasen 21:4.

Lanai lit kalak jahat. Jahwe erjanji, ”Kalak jahat dingen perdosa [ikernepken] . . . i bas negeri enda nari.”​—Kuan-kuanen 2:22.

Kerina kalakna sikeleng-kelengen ras sihamat-hamaten. Lanai pagi lit kinilaadilen, penindasen, merangap ras segat ate. Kerina kalak ersada dingen nggeluh sentudu ras peraten Dibata.​—Jesaya 26:9.