Kerina si la mehuli si terjadi gundari i doni ncidahken maka Pardis enggo ndeher. Pustaka si Badia nuriken maka pas sope Pardis reh si idah kari masa si seh kal ngerina. Gundari kita nggeluh i bas masa si e! Enda me nina Pustaka si Badia si arus terjadi:

Perang-perang si mbelin. ”Bangsa pagi ngelawan bangsa, kerajan ngelawan kerajan.” (Matius 24:7) Nubuat enda tuhu-tuhu enggo terjadi. Mulai tahun 1914, enggo terjadi dua perang si mbelin i doni ras melala perang si deban si terkitiken. Jutan manusia mate.

Reh buena penakit. ”Ijapa pe terjadi . . . penakit cacar [sampar].” (Lukas 21:11) Tuhu kin enda enggo terjadi? Tuhu. Kanker, penakit jantung, TBC (tuberkolosis), malaria, AIDS, ras penakit si deban enggo munuh jutan manusia.

Kelihen. I belang-belang doni, melala kalak mesera akapna ndarami nakanna. Tiap tahun, jutan kalak mate perban kelihen. Enda tanda si deban si ncidahken maka Pardis enggo nandangi reh. Nina Pustaka si Badia, ”I jah i je jadi . . . paksa kelihen.”​—Markus 13:8.

 Linur. ”I jah i je . . . taneh pe linuren.” (Matius 24:7) Si enda pe tuhu-tuhu enggo terjadi i bas jamanta. Mulai tahun 1914, lebih sada juta kalak mate perban linur.

Kalak jahat. Melala kalak jadi ”merangap” ras ”ngukurken dirina saja”. Kalak e ”lanai diatena Dibata, tapi kesenangen saja idaramina”. Anak-anak ”la ibegikenna kata nande bapana”. (2 Timotius 3:1-5) La kin kam setuju maka melala nge kalak si bage genduari? Kalak enda megombang man Dibata, janah ipersulitna ka kalak si erupaya erlajar kerna Dibata.

Kejahaten. ”Reh buena kejahaten”. (Matius 24:12) Banci saja kam setuju maka keleken kejahaten si gundari asangken i bas tahun-tahun si enggo lewat. Ijapa pe, melala kalak terancam irampok, itipu, ntah pe isakiti.

Kerina enda ncidahken maka Kinirajan Dibata enggo ndeher. Nina Pustaka si Badia, ”Adi idahndu pagi jadi kerina si kukataken ndai, ingetlah maka Kinirajan Dibata enggo ndeher.” (Lukas 21:31) Kai kin Kinirajan Dibata e? E me sada pemerentahen surga arah Dibata nari si nandangi njadiken Pardis i doni enda. Kinirajan Dibata e pagi si nggantiken pemerentah-pemerentah manusia.​—Daniel 2:44.