PASAL 13
“Terjadi Perjengilen”
Ibahas badan pinpinen arus ntah lang kalak Kristen isunat
Arah Perbahanen Rasul-Rasul 15:1-12
1-3. (a) Kai si erban runggun Kristen bas abad pertama menam lanai ersada? (b) Kai gunana adi sipelajari kerna masalah e bas buku Perbahanen Rasul-Rasul?
MERIAH kel ukur Paulus ras Barnabas. Edenga kel kalak e mulih ku Antiokia i Siria arah perdalanen utusen injilna si pertama. Meriah kel ukur kalak e perban Jahwe enggo “mbuka dalan gelah bangsa si deban erkiniteken.” (Perb. 14:26, 27) Berita si meriah enggo seh ku sebelang Antiokia, janah “reh buena” kalak si labo Jahudi si jadi kalak Kristen.—Perb. 11:20-26.
2 Berita si meriah kerna pertambahen e mis seh ku Judea. Tapi labo kerina kalak ermeriah ukur. Lit si erpengakap maka kerina kalak Kristen arus isunat, tapi lit ka nge si la bage pengakapna. Uga nge arusna hubungen antara kalak Jahudi ras si labo Jahudi? Arus nge kalak Kristen si labo Jahudi patuh man Undang-Undang Musa? Mbelin kel masalah si terjadi, piah dungna runggun Kristen menam lanai ersada. Uga nge masalah e idungi?
3 Sanga sibahas kerna masalah e bas buku Perbahanen Rasul-Rasul, sidat kari mbue pelajaren si penting. Isampati ka kita erban keputusen si pentar adi lit masalah si banci erban runggun lanai ersada.
“Adi La kin Kena Isunat” (Perb. 15:1)
4. Kai nge si iajarken piga-piga kalak Kristen Jahudi, janah penungkunen kai si turah?
4 Bagenda itulis Lukas, “Lit piga-piga kalak reh Judea nari [ku Antiokia], janah mulai ajarina turang senina, nina, ‘Kena la banci selamat adi la kin kena isunat bagi si kataken Undang-Undang Musa.’” (Perb. 15:1) La lit ituriken maka ‘piga-piga kalak arah Judea’ e mbarenda termasuk kalak Parisi sope kalak e jadi kalak Kristen. Tapi, mbelin kemungkinenna cara rukur kalak e bali bagi kalak Parisi, si kaku bas ndalanken Undang-Undang Musa. Selain si e, banci saja kataken kalak e maka kai si iajarkenna e rehna arah rasul-rasul ras pertua-pertua i Jerusalem. (Perb. 15:23, 24) Enggo lit kira-kira 13 tahun dekahna kenca iperentahken Dibata Rasul Petrus ngaloken kalak si labo Jahudi ku bas runggun Kristen. Tapi, engkai maka tetap penting kel iakap kalak Jahudi ngelakoken sunat? a—Perb. 10:24-29, 44-48.
5, 6. (a) Engkai maka piga-piga kalak Jahudi tetap atena sunat e idalanken? (b) Termasuk nge perjanjin sunat bas perjanjin Abraham? Jelasken. (Nen cataten i teruh.)
5 Banci saja mbue alasenna ipermasalahken kalak Jahudi denga kerna sunat. Salah sadana, Jahwe me si netapken gelah dilaki isunat. Sunat e tanda hubungen si istimewa ras Jahwe. Sunat e enggo ndekah kel lit. Iperentahken Jahwe gelah Abraham bage pe kerina dilaki si tading ras ia isunat. b Bas pudi wari, berekenNa ka perentah si bage man kalak Israel. (Im. 12:2, 3) Menurut Undang-Undang Musa, kalak asing arus isunat gelah banci ia ikut bas sada perayan. Contohna, gelah banci panna pangan Paskah. (Kel. 12:43, 44, 48, 49) Emaka menurut kalak Jahudi, dilaki si la isunat e najis janah la banci nembah Dibata.—Jes. 52:1.
6 Emaka, kalak Kristen Jahudi perlu kiniteken ras sipat meteruk ukur gelah banci ikutkenna cara rukur Jahwe. Perjanjin Undang-Undang Musa enggo iganti alu perjanjin si mbaru. Emaka kalak Jahudi lanai otomatis jadi umat Dibata. Mbue kalak Kristen Jahudi si tading bas daerah kalak Jahudi. Emaka perlu kalak e sipat si perpang guna ngakui Kristus bage pe guna nembah Dibata radu ras kalak si la isunat.—Jer. 31:31-33; Luk. 22:20.
7. Kai si la iangkai ‘piga-piga kalak arah Judea’ e?
7 Siteh maka patoken Dibata labo berubah. Buktina, prinsip bas Undang-Undang Musa ipake ka nge bas perjanjin si mbaru. (Mat. 22:36-40) Contohna, kerna sunat, bas pudi wari itulis Paulus, “Ia jadi kalak Jahudi situhu-tuhu perban kai si lit bas pusuhna, janah sunat si lakokenna eme sunat bas pusuh, si itegu-tegu kesah si badia, labo perban ikutkenna Undang-Undang Musa.” (Rom. 2:29; Ul. 10:16) ‘Piga-piga kalak arah Judea’ si maksaken kerna sunat e la angkana kerna si e. Paksakenna maka labo pernah cabut Dibata undang-undang kerna sunat. Banci nge iubah kalak e cara rukurna?
“Perjengilen ras Perbedan Pendapat” (Perb. 15:2)
8. Engkai maka masalah sunat isungkun ku badan pinpinen i Jerusalem?
8 Nina Lukas, “Terjadi perjengilen ras perbedan pendapat antara kalak e [kalak si “reh Judea nari”] ras Paulus bage pe Barnabas. Emaka iaturken me gelah Paulus ras Barnabas bage pe piga-piga senina lawes ku Jerusalem ndahi rasul-rasul ras pertua-pertua guna ncakapken masalah e.” c (Perb. 15:2) Arah kata-kata “perjengilen ras perbedan pendapat” banci siteh maka duana pihak e la nggit mengalah. Pendapatna kapna si pasna. Runggun i Antiokia la banci ndungi masalah e. Emaka gelah runggun tetap dame ras ersada, iban me keputusen guna nungkun masalah e man “rasul-rasul ras pertua-pertua” i Jerusalem, ntah pe badan pinpinen. Kai si banci sipelajari arah pertua-pertua i Antiokia?
Piga-piga kalak maksaken pendapatna. Nina, “Kalak e [si labo Jahudi] perlu isunat ras isuruh ndalanken Undang-Undang Musa.”
9, 10. Kai nge si banci siusih arah turang senina i Antiokia bage pe arah Paulus ras Barnabas?
9 Salah sada pelajaren penting si banci sidat eme perlu kel kita tek man organisasi Dibata. Cuba siukuri enda: Teh turang senina i Antiokia maka kerina anggota badan pinpinen eme kalak Jahudi. Tapi tek kalak e pasti idungi badan pinpinen e masalah sunat sesuai ras Kitap-Kitap si Badia. Engkai maka bage? Perban tek kalak e maka bereken Jahwe petunjuk arah kesah si badiaNa bage pe arah Jesus Kristus, Kepala runggun Kristen. (Mat. 28:18, 20; Ep. 1:22, 23) Gundari pe, adi lit masalah si mbelin, siusihlah kalak Kristen bas Antiokia. Teklah kita man organisasi Dibata bage pe man Badan Pinpinen, si anggotana eme kalak si ilantik kesah si badia.
10 Pelajaren penting si deban si banci sidat arah kejadin e eme perlu kita meteruk ukur ras sabar. Paulus ras Barnabas langsung ilantik kesah si badia guna lawes ku bangsa-bangsa si deban. Tapi, la gunaken kalak e kuasana e guna mis ndungi masalah sunat paksa si e i Antiokia. (Perb. 13:2, 3) Selain si e, bas pudi wari itulis Paulus, “Lawes aku ku je [Jerusalem] perban kataken Tuan maka arus aku lawes.” Enda ncidahken maka isuruh kesah si badia kalak e lawes ku Jerusalem. (Gal. 2:2) Pertua-pertua si gundari pe rusaha gelah meteruk ukur janah sabar sanga lit masalah si banci erban runggun lanai ersada. La kalak e nggit erjengil guna mpertahanken pendapatna, darami kalak e petunjuk Jahwe. Emaka ipereksa kalak e Pustaka bage pe petunjuk arah budak si setia.—Pil. 2:2, 3.
11, 12. Engkai maka penting sitimai Jahwe?
11 Bas piga-piga kasus, banci saja arus sitimai seh ngasa ibereken Jahwe petunjuk si lebih jelas. Contohna, mulai Kornelius ipilih kesah si badia, lit 13 tahun dekahna sope jelas iteh kalak e perukuren Jahwe maka kalak si labo Jahudi la perlu isunat. Engkai maka bage kel dekahna? Banci saja, bereken Dibata ateNa waktu man kalak Jahudi gelah banci isesuaiken kalak e cara rukurna. Perjanjin sunat enggo 1.900 tahun idalanken, mulai arah nini bulang kalak e, Abraham. Emaka, sanga perjanjin sunat e lanai berlaku, enda perubahen si mbelin man kalak e!—Joh. 16:12.
12 Sada kehamaten kel siakap banci iajari ras ibentuk Jahwe si sabar ras mehuli. SampatiNa gelah cara rukurta reh miripna ras cara rukurNa. PengajarenNa lalap erguna man banta. (Jes. 48:17, 18; 64:8) Emaka ula kita sombong, ula sipaksaken pendapatta, janah ula negatip tanggapenta man perubahen bas organisasi ntah pe perubahen pengangkanta bas piga-piga ayat. (Peng. 7:8) Adi gejapkenndu lit bas kam sitik saja lah gia cara rukur si negatip, ukurilah kai si banci pelajarindu arah Perbahanen Rasul-Rasul pasal 15 janah pindolah penampat Jahwe guna ndalankenca. d
13. Uga carana ncidahken maka sabar kita bali bagi Jahwe bas pelayanenta?
13 Perlu kita sabar bagi Jahwe sanga kalak si erlajar Pustaka ras kita mesera kapna nadingken kinitekenna bage pe kebiasanna si salah. Man kalak si bage, perlu sibereken waktu si masuk akal gelah kesah si badia banci nampati ia berubah. (1 Kor. 3:6, 7) Selain si e, sitotokenlah ia. Bas waktuna pagi, pasti sampati Jahwe kita meteh cara si tepat guna nampati ia.—1 Joh. 5:14.
Ceritaken Kalak e Pengalamenna si Mpegegehi (Perb. 15:3-5)
14, 15. (a) Kai buktina turang senina i Antiokia ngergai Paulus, Barnabas, ras turang senina si deban? (b) Uga kalak e jadi pasu-pasu man turang seninana?
14 Lanjutken Lukas ceritana, nina, “Kenca temani runggun ntisik kalak e bas perdalanenna, terusken kalak e perdalanenna arah Punike ras Samaria. I je ceritaken kalak e uga teremna jelma arah bangsa si deban nari enggo erban perubahen guna nembah Dibata. Meriah kel akap turang senina megi si e.” (Perb. 15:3) Cidahken runggun e kekelengenna ras pengerganna man Paulus, Barnabas, ras teman-temanna. Arapken runggun e gelah Paulus ras teman-temanna ipasu-pasu Dibata. Bas si enda pe, turang senina i Antiokia jadi usihen man banta. Ergaindu nge turang seninandu “terutama [pertua-pertua] si kerja keras bas mpeseh ras ngajarken kata Dibata”?—1 Tim. 5:17.
15 Segedang perdalanen ku Jerusalem, Paulus ras teman-temanna mpegegehi turang senina i Punike ras Samaria. Iceritaken kalak e pengalamen-pengalamen kerna pendahin erberita bas ingan kalak si labo Jahudi. Arah kalak si megiken e, banci saja lit kalak Kristen Jahudi si melariken diri ku ingan e kenca Stepanus ibunuh perban kinitekenna. Gundari pe, laporen kerna pasu-pasu Jahwe ras dahin erban murid banci mpegegehi kita, khususna sanga siadapi tentangen. Emaka usahakenlah asa bancina gelah la kam ketadingen laporen si mpegegehi e arah perpulungen, pertemuan, bage pe pengalamen geluh bas majalah ntah pe bas jw.org.
16. Ja nari siteh masalah sunat e enggo jadi masalah si mbelin?
16 Kenca rombongen arah Antiokia e erdalan ku arah selatan kira-kira 550 kilometer dauhna, seh me dungna kalak e ku tujunna. Nina Lukas, “Seh kenca i Jerusalem, kalak e ialo-alo runggun, ialo-alo rasul-rasul ras pertua-pertua alu mehuli. Ceritaken kalak e kai saja si enggo lakoken Dibata arah kalak e.” (Perb. 15:4) “Tapi tedis piga-piga kalak bas sekte kalak Parisi nari si enggo erkiniteken janah nina, ‘Kalak e perlu isunat ras isuruh ndalanken Undang-Undang Musa.’” (Perb. 15:5) Jelas me, masalah sunat enggo jadi masalah si mbelin, janah e arus idungi.
“Pulung Rasul-Rasul ras Pertua-Pertua” (Perb. 15:6-12)
17. Ise saja nge anggota badan pinpinen i Jerusalem, janah banci saja kai nge alasenna “pertua-pertua” ikut jadi badan pinpinen?
17 Bas Kuan-kuanen 13:10 ikataken, “Kepentaren jang kalak si mindo nasehat kap.” Sesuai ras prinsip si mehuli e, “pulung rasul-rasul ras pertua-pertua ncakapken masalah [sunat].” (Perb. 15:6) “Rasul-rasul ras pertua-pertua” e erban keputusen guna kepentingen kerina runggun Kristen, bali bagi Badan Pinpinen si gundari. Engkai maka perlu “pertua-pertua” e ikut ngelayani ras rasul-rasul? Perlu siinget maka Rasul Jakup enggo ihukum mate, janah Rasul Petrus ipenjaraken bas piga-piga waktu. Banci saja bas pudi wari, rasul-rasul si deban pe ngadapi kai si adapi kalak e. Adi si e terjadi, banci tetap lit pengawasen si tertip bas kerina runggun perban pertua-pertua e enggo terlatih.
18, 19. Kai nina Petrus, janah kesimpulen kai si arusna iban kalak si megiken ia?
18 Bagenda ka nina Lukas, “Kenca enggo ndekah ngerana ras sijawapen, tedis Petrus, nina, ‘O senina-senina, teh kena maka tangtangna nari aku enggo pilih Dibata arah tengah-tengah kena, gelah arah aku, kalak arah bangsa si deban banci megiken ajaren kerna berita si meriah janah tek. Dibata, si meteh isi pusuh, enggo ngaloken kalak e alu mereken kesah si badia, bagi si enggo berekenNa man banta. Sitik pe la bedakenNa kita ras kalak e. Tapi bersihkenNa pusuh kalak e perban enggo erkiniteken.’” (Perb. 15:7-9) Menurut sada karya referensi, kata Junani si iterjemahken jadi “ngerana ras sijawapen,” si ituriken bas ayat 7, banci ka maksudna pertua-pertua e erban penungkunen janah pereksana masalah e alu megermet. Banci saja beda-beda pendapat kalak e, tapi nggit kalak e nuriken pendapatna ras perasanna alu terus terang.
19 Kata-kata Petrus si tegas e ngingetken kerina kalak kerna kai si terjadi bas tahun 36 M. Paksa si e, langsung idah Petrus kalak si labo Jahudi si la isunat si tangtangna ilantik kesah si badia. Ise e? Kornelius ras keluargana. Emaka, adi Jahwe pe lanai bedakenna kalak Jahudi ras si labo Jahudi, kai hak jelma mbeda-mbedakenca? Selain si e, arah kata-kata Petrus teridah maka si erban sekalak jelma ikataken benar eme kinitekenna man Kristus, labo perban patuh ia man Undang-Undang Musa.—Gal. 2:16.
20. Engkai maka kalak si ndukung sunat situhuna ‘cubaina Dibata’?
20 Kesaksin si iban Petrus e la tertogan perban rehna arah Dibata bage pe kesah si badia. Iban Petrus me kesimpulen, “Adi bage, engkai maka gundari cubai kena Dibata alu mereken baban si mberat man murid-murid e, adi kita ras nini bulangta pe labo ngasup mabasa? Erkiniteken kita maka kita iselamatken perban kiniulin Tuanta Jesus si luar biasa. Kalak e pe bage ka nge.” (Perb. 15:10, 11) Ikataken Paulus maka kalak si ndukung sunat e situhuna ‘cubaina Dibata,’ ntah pe ujina kesabaren Dibata. Usahaken kalak e erban kalak si labo Jahudi ndalanken Undang-Undang Musa. Padahal kalak e sendiri pe labo ngasup, emaka patut nge kalak e ihukum mate. (Gal. 3:10) Arusna, kalak Jahudi e labo ndukung sunat tapi ngata bujur perban lit kiniulin Dibata si luar biasa si cidahkenna arah Jesus.
21. Kai nge penampat Barnabas ras Paulus bas pembahasen e?
21 Kepeken, pas kel akap kalak e penjelasen Petrus e. Emaka, “sinik kerina kalak e.” Kenca si e, iceritaken Barnabas ras Paulus me “melala tanda si luar biasa ras mukjizat si enggo ban Dibata i tengah bangsa-bangsa arah kalak e.” (Perb. 15:12) Gundari, kenca dung ibahas rasul-rasul ras pertua-pertua kerina bukti, enggo banci ban kalak e keputusen kerna sunat si sesuai ras sura-sura Dibata.
22-24. (a) Uga carana Badan Pinpinen si gundari ngikutken usihen badan pinpinen bas abad pertama? (b) Uga carana kerina pertua ncidahken maka nggit ia ngikutken pengaturen si iban organisasi?
22 Gundari pe, sanga rapat anggota Badan Pinpinen, pereksa kalak e Kata Dibata gelah banci datna petunjuk janah tutus kalak e ertoto mindo kesah si badia. (Ms. 119:105; Mat. 7:7-11) Sope rapat, enggom ndekah aloken tiap anggota Badan Pinpinen bahan si nandangi ibahas. Tujunna eme gelah banci ukuri ras totoken kalak e bahan e. Alu bage, banci ban kalak e keputusen si sesuai ras peraten Dibata. (Kua. 15:28) Sanga rapat, Badan Pinpinen la ragu nuriken pendapatna. Tapi, mehamat ia nurikenca. Rusur ka buka kalak e Pustaka.
23 Pertua-pertua bas runggun pe perlu ngusih kalak e. Adi lit masalah si mbelin si la banci idungi amin pe enggo ibahas bas rapat pertua, banci sungkun kalak e man kantor cabang ntah man wakil kantor cabang, bagi pertua keliling. Kenca si e, adi perlu, banci ka isungkun kantor cabang man Badan Pinpinen.
24 Jelas me ipasu-pasu Jahwe kalak si ngikutken pengaturen organisasi i bas ndungi masalah si lit bas runggun. Ipasu-pasu Jahwe ka kalak si meteruk ukur, si setia, ras si sabar. Bagi si nandangi sibahas bas pasal berikutna, iban Jahwe me umatNa erdame, ersada, janah bereNa ka melala kel pangan rohani.
a Nen kotak “ Ajaren Turang Senina si Palsu.”
b Perjanjin sunat labo bagin arah perjanjin Abraham. Perjanjin Abraham mulai berlaku bas tahun 1943 SM sanga umur Abraham 75 tahun. Paksa si e, Abraham (gelarna Abram denga) nyebrangi Lau Eprat bas perdalanen ku Kanaan. Perjanjin Abraham e berlaku denga ngayak gundari. Tapi, perjanjin sunat iban bas tahun 1919 SM, sanga umur Abraham 99 tahun.—Kej. 12:1-8; 17:1, 9-14; Gal. 3:17.
c Salah sada arah kalak e eme Titus. Ia kalak Kristen Junani si bas pudi wari jadi teman Paulus bage pe jadi kalak si iutus Paulus. (Gal. 2:1; Titus 1:4) Titus la isunat, tapi bereken Dibata kesah si badia man bana janah ia sekalak turang senina si jadi usihen.—Gal. 2:3.
d Nen kotak “ Pustaka me si Jadi Dasar Kiniteken Saksi-Saksi Jahwe.”