PASAL 9
“Dibata La Erpilihen”
Kalak Kristen mulai erberita man kalak arah erbage bangsa
Arah Perbahanen Rasul-Rasul 10:1–11:30
1-3. Pengenehenen kai nge si dat Petrus, janah engkai maka perlu siteh erti pengenehenen e?
BAS tahun 36 M, Petrus sangana bas Jope. I je, tading ia piga-piga wari bas rumah Simon. Simon tading i deher laut, janah dahinna erban barang-barang arah kulit binatang. Negatip perukuren kalak Jahudi man kalak si bage pendahinna, janah la kalak e nggit tading ras. a Memang Petrus la bage. Tapi, perlu denga akap Jahwe ipelajari Petrus kerna sipat Jahwe si la erpilihen. Emaka sanga ertoto Petrus bas atap, lit pelajaren penting si ajarken Jahwe man bana.
2 Sanga Petrus ertoto, iban Jahwe idahna uis si mbelang nusur arah surga nari. Bas uis e lit erbage-bage binatang si la banci ipan kalak Jahudi. Ngidah binatang e saja pe enggo ciga kel ate kalak e. Sanga Petrus isuruh nggeleh binatang e ras manca, nina Petrus, “La pernah kupan kai si najis ras si ipantangken.” Tapi telu kali ia iperentahken, “Ula nai katakenndu najis kai si enggo kataken Dibata bersih.” (Perb. 10:14-16) Pasti mamang ate Petrus ngidah pengenehenen e, tapi isampati Jahwe ia ngangkaisa.
3 Kai nge erti pengenehenen e? Perlu siteh kai erti pengenehenen e, sebap e banci nampati kita meteh uga cara Jahwe ngenen kalak. Adi la siusih cara Dibata ngenen kalak, la banci sibereken kesaksin kerna Kerajan Dibata man kerina kalak. Gelah siteh erti pengenehenen e, sibahas kari kai si terjadi sope ras kenca dat Petrus pengenehenen e.
“Terus Ia Ertoto man Dibata” (Perb. 10:1-8)
4, 5. Ise nge Kornelius e, janah kai si terjadi sanga ia ertoto?
4 La teh Petrus kepeken sada wari sope datna pengenehenen e, lit ka sekalak dilaki si dat pengenehenen arah Dibata. Dat dilaki e pengenehenen e i Kesarea, kira-kira 50 kilometer arah Jope nari. Gelar dilaki e eme Kornelius. b Kornelius eme sekalak perwira bas tentera Roma. Ia sekalak dilaki si “mbiar man Dibata.” Ia pe kepala keluarga si man usihen sebap perdiatekenna keperlun keluargana janah “kerina keluargana mbiar man Dibata.” Kornelius labo kalak Jahudi, janah labo ikutkenna agama Jahudi. Tapi, mekuah atena man kalak Jahudi si mesera pergeluhna, janah sampatina kalak e. Kornelius tulus kalakna, “terus ia ertoto man Dibata.”—Perb. 10:2.
5 Kira-kira jam telu karaben, sanga Kornelius ertoto, datna sada pengenehenen. Bas pengenehenen e nina malekat man bana, “Totondu ras kai si banndu man kalak mesera enggo perdiateken Dibata janah ingetNa kam.” (Perb. 10:4) Bali bagi si perentahken malekat e, iutus Kornelius me piga-piga kalak ngelegi Rasul Petrus. Selaku kalak si labo Jahudi si la isunat, nandangi imasuki Kornelius me pintu si sedekah enda la ibuka man bana. Ntisik nari datna me berita keselamaten.
6, 7. (a) Ceritaken pengalamen si lit bas paragrap enda termasuk pengalamen si ingetndu, si mbuktiken maka jawap Dibata toto kalak si tutus ndarami Ia. (b) Kai si banci sisimpulken arah pengalamen si bage?
6 Gundari, jawap Dibata nge toto kalak si merhat kel meteh kebenaren kerna Ia? Ue. Contohna, lit sekalak diberu i Albania si ngaloken majalah Menara Pengawal. Bas majalah e lit artikel kerna cara mpebelin anak. c Bagenda nina diberu e man Saksi Jahwe si reh ku rumahna, “La kel kusangka! Edenga kel aku mindo penampat man Dibata guna mpebelin anak-anakku. Nce mis utusNa kena, janah bere kena kai si kuperluken!” Diberu e ras anak-anakna mulai erlajar Pustaka, janah bas pudi wari perbulangenna pe ikut ka erlajar.
7 Enda ndai nge ngenca contohna? Lang! Mbue kel pengalamen si bage i sebelang doni. Emaka la banci sianggap si e kebetulen saja. Jadi, kai si banci sisimpulken? Si pertama, jawap Jahwe toto kalak si tutus ndarami Ia. (1 Raj. 8:41-43; Ms. 65:2) Si peduaken, idukung malekat kita bas erberita.—Ket. 14:6, 7.
“Mamang Denga Ate Petrus” (Perb. 10:9-23a)
8, 9. Kai nina kesah si badia man Petrus, janah uga tanggapenna?
8 Sanga reh utusen Kornelius, Petrus i atap denga. “Mamang . . . ate Petrus” ngukuri kai nge erti pengenehenen e. (Perb. 10:17) Enggo telu kali kataken Petrus la ia nggit man pangan si ipantangken Undang-Undang Musa. Nggit nge ia ikut ras dilaki-dilaki e janah masuk ku rumah kalak si labo Jahudi? Ituriken Dibata me sura-suraNa arah kesah si badia man Petrus. Nina, “Nenlah! Lit telu kalak si ndarami kam. Emaka ersikaplah, jenari ku teruh kam. Ula kam sangsi lawes ras kalak e sebap Aku kap si nuruhsa.” (Perb. 10:19, 20) Jelas me pengenehenen si dat Petrus kerna binatang-binatang si ipantangken e erban reh nukahna kapna ngikutken petunjuk kesah si badia.
9 Iteh Petrus me maka idat Kornelius petunjuk arah Dibata guna ngelebuh ia. Emaka undang Petrus utusen-utusen Kornelius e, eme kalak si labo Jahudi e guna masuk ku rumah e “janah erberngi i rumah e.” (Perb. 10:23a) Kenca teh Petrus terbuen kerna sura-sura Dibata, mis sesuaikenna cara rukurna.
10. Uga Jahwe negu-negu umatNa, janah penungkunen kai saja si perlu siukuri?
10 Seh asa gundari, terus denga tegu-tegu Jahwe umatNa guna ngangkai sura-suraNa secara bertahap. (Kua. 4:18) Alu kesah si badiaNa, tegu-teguna “budak si setia ras pentar.” (Mat. 24:45) Mon-mon, pengangkanta kerna Kata Dibata isesuaiken, ntah pe lit perubahen petunjuk arah organisasi. Emaka, perlu sisungkuni banta, ‘Uga nge tanggapenku adi lit perubahen si bage? Patuh nge aku man arahen kesah si badia?’
“Perentahken [Petrus] gelah Kalak e Iperidiken” (Perb. 10:23b-48)
11, 12. Kai si ilakoken Petrus kenca seh ia i Kesarea, ras kai si dungna tehna?
11 Paginna, lawes Petrus ras siwah kalak si debanna arah Jope nari ku Kesarea. Si siwah kalak e eme “enemna murid-murid [kalak Jahudi]” bage pe telu utusen Kornelius. (Perb. 11:12) Perban enggo timai Kornelius kerehen Petrus, enggo pepulungna “kade-kadena bage pe teman-temanna.” Mbelin kemungkinenna kerina kalak e labo kalak Jahudi. (Perb. 10:24) Seh kenca Petrus i Kesarea, lakokenna me kai si la pernah bayangkenna. Masuk ia ku rumah kalak si labo Jahudi si la isunat! Nina Petrus, “Pasti enggo teh kena maka kalak Jahudi la banci erteman ntah pe ndeher ras kalak arah bangsa si deban. Tapi enggo cidahken Dibata man bangku maka ise pe la banci kukataken najis ntah pe la bersih.” (Perb. 10:28) Dungna teh Petrus maka erti pengenehenen si idahna e labo kerna pangan si banci ipan saja. Tapi tehna ka maka ‘ise pe [termasuk kalak si labo Jahudi] la banci katakenna najis.’
“Kornelius ras kade-kadena bage pe teman-temanna si enggo undangna sangana nimai kalak e.”—Perbahanen Rasul-Rasul 10:24
12 Kalak si pulung e enggo ersikap guna megiken Petrus. Nina Kornelius, “Kerina kami pulung i lebe-lebe Dibata guna megiken kai si enggo perentahken Jahwe man bandu guna ipeseh.” (Perb. 10:33) Bayangkenlah uga perasanndu adi bage nina sekalak peminat man bandu! Ngerana me Petrus. Benakenna alu kata-kata si penting enda, “Gundari tuhu-tuhu enggo kuangka maka Dibata la erpilihen. Kerina kalak arah bangsa si apai pe, adi mbiar man Dibata janah ngelakoken kai si benar, pasti alokenNa.” (Perb. 10:34, 35) Gundari enggo teh Petrus maka Dibata labo mbeda-mbedaken kalak arah suku, bangsa, ntah pe kai si teridah saja. Kenca si e, beritaken Petrus man kalak e kerna pelayanen Jesus, kematenna, ras kekekenna.
13, 14. (a) Arah pertobaten Kornelius bage pe kalak arah bangsa si deban, kai nge si banci siteh? (b) Engkai maka la banci sihakimi kalak arah kai si teridah saja?
13 Kenca si e, terjadi me kai si lenga pernah terjadi. “Sanga ngerana denga Petrus,” kesah si badia icurcurken ku “kalak arah bangsa si deban nari.” (Perb. 10:44, 45) Bas Pustaka, enda ngenca lit ituriken maka kalak si lenga iperidiken banci ndatken kesah si badia. Iteh Petrus si e mbuktiken maka aloken Dibata kalak e jadi umatNa. Emaka “perentahkenna gelah kalak e [kalak si labo Jahudi] iperidiken.” (Perb. 10:48) Pertobaten kalak si labo Jahudi e jadi tanda maka kalak Jahudi lanai jadi bangsa si istimewa iakap Jahwe. (Dan. 9:24-27) Perban Petrus si minpin dahin erberita bas kejadin e, gunaken Petrus me “kunci Kerajan” si peteluken, eme kunci si terakhir. (Mat. 16:19) Kunci e mbuka pintu man kalak si labo Jahudi si la isunat jadi kalak Kristen si erpengarapen nggeluh i surga.
14 Gundari, sanga kita erberita, siteh maka “kerina manusia seri kap i lebe-lebe Dibata.” (Rom. 2:11) Sura-sura Dibata eme gelah “erbage-bage kalak iselamatken.” (1 Tim. 2:4) Emaka ula pernah sihakimi kalak arah kai si teridah saja. Tugasta eme mereken kesaksin kerna Kerajan Dibata man kerina kalak, la soal sukuna, bangsana, penampilenna, ntah pe agamana.
“Lanai Kalak e Keberaten janah Muliakenna Dibata” (Perb. 11:1-18)
15, 16. Engkai maka piga-piga kalak Kristen Jahudi mandangi Petrus, janah kai alasen si ibereken Petrus man kalak e?
15 Semangat kel Petrus lawes ku Jerusalem guna nceritaken kai si mbaru terjadi. Tapi sope ceritakenna, enggo leben ibegi turang senina i Jerusalem berita maka kalak arah bangsa-bangsa enggo “ngaloken kata Dibata.” La ndekah kenca Petrus seh i je, “kalak si ndukung sunat mulai mandangi ia.” La kalak e senang perban Petrus masuk ku ‘rumah kalak si la isunat janah man ka ras kalak e.’ (Perb. 11:1-3) Situhuna, labo masalah akap kalak Kristen Jahudi adi kalak arah bangsa-bangsa jadi murid Kristus. Tapi ate kalak e arus min kalak arah bangsa-bangsa e ndalanken Undang-Undang Musa janah isunat, gelah banci nembah Jahwe alu cara si ngena ateNa. Jadi jelas me, mesera akap kalak Kristen Jahudi e ngangkai maka lanai kalak e perlu patuh man Undang-Undang Musa.
16 Turiken Petrus me engkai maka iperidikenna kalak si labo Jahudi. Menurut Perbahanen Rasul-Rasul 11:4-16, turikenna empat alasen si erban ia tek maka si lakokenna e sura-sura Dibata. Enda me alasenna: (1) pengenehenen si datna arah Dibata (Ayat 4-10); (2) perentah kesah si badia (Ayat 11, 12); (3) dahi malekat Kornelius (Ayat 13, 14); ras (4) nusur kesah si badia man kalak si labo Jahudi. (Ayat 15, 16) Idungi Petrus me penjelasenna alu penungkunen si erban kalak e lanai ragu. Nina, “Emaka, adi seri nge pemere Dibata [kesah si badia] man kalak e [kalak si labo Jahudi si jadi kalak Kristen] ras man banta [kalak Jahudi] si tek man Tuan Jesus Kristus, ise kin aku maka banci kuhalangi Dibata?”—Perb. 11:17.
17, 18. (a) Keputusen kai si arus iban kalak Kristen Jahudi kenca begina penjelasen Petrus? (b) Engkai maka gundari la menukah njaga persadan bas runggun, janah penungkunen kai saja si perlu siukuri?
17 Penjelasen Petrus e erban kalak Kristen Jahudi arus erban keputusen. Nggit nge kalak e ngubah cara rukurna kerna kalak arah bangsa si deban? Nggit nge kalak e ngalo-ngalo kalak si labo Jahudi si mbaru iperidiken e jadi turang seninana? Bas Pustaka ikataken, “Megi si e, lanai kalak e [rasul-rasul ras kalak Kristen Jahudi si debanna] keberaten janah muliakenna Dibata, nina, ‘Enggo bere Dibata kesempaten man bangsa-bangsa si deban gelah ertobat guna ndatken kegeluhen.’” (Perb. 11:18) Perban nggit kalak e ngubah perukurenna, runggun banci tetap ersada.
18 Gundari pe labo menukah njaga persadan, perban kalak Kristen situhu-tuhu rehna “arah kerina bangsa, suku, umat, ras bahasa.” (Ket. 7:9) Bas melala runggun, lit erbage-bage suku, budaya, ras latar belakang. Emaka perlu siukuri penungkunen enda: ‘Mis nge kuhakimi kalak si beda ras aku? Arah perbahanenku man turang senina, tuhu-tuhu nge la aku terpengaruh perukuren doni enda si hebaten kapna bangsana, bahasana, budayana, ras sukuna?’ Ingetlah kesalahen Petrus piga-piga tahun kenca kalak si labo Jahudi tangtangna jadi kalak Kristen. Perban terpengaruh ia man cara rukur doni enda, “lanai ia nggit ergaul” ras turang senina si labo Jahudi, emaka arus ia ipersingeti Paulus. (Gal. 2:11-14) Siusahakenlah lalap njaga cara rukurta gelah la ipengaruhi sipat doni enda si banci erban perpecahen.
“Reh Buena Kalak si Tek” (Perb. 11:19-26a)
19. Man ise nge kalak Kristen Jahudi i Antiokia mulai erberita, janah kai hasilna?
19 Kenca angkai kalak Kristen petunjuk Dibata, mis nge kalak e erberita man kalak arah bangsa-bangsa? Mari siperdiateken kai si dungna terjadi i Antiokia Siria. d Bas kota e enterem kalak Jahudi, janah mehuli hubungen antara kalak Jahudi ras si la Jahudi. Emaka, bas Antiokia cocok kel erberita man kalak si la Jahudi. Bas kota e me piga-piga kalak Kristen Jahudi mulai erberita “man kalak si make bahasa Junani.” (Perb. 11:20) Kalak e erberita labo man kalak Jahudi si make bahasa Junani saja. Erberita ka kalak e man kalak si labo Jahudi si la isunat. Ipasu-pasu Jahwe dahin erberita e, janah “reh buena kalak si tek.”—Perb. 11:21.
20, 21. Kai buktina Barnabas meteh bana? Uga kita banci ngusih ia bas pelayanenta?
20 Kota e bali bagi juma si enggo banci iperani. Emaka, iutus runggun i Jerusalem me Barnabas ku Antiokia. Perban teremna kalak si nggit ngaloken berita si meriah i je, lanai akap Barnabas ngasup ia sisada ngajarisa. Pindo Barnabas me Saul nemani ia erberita perban Saul nandangi jadi rasul man bangsa-bangsa. (Perb. 9:15; Rom. 1:5) Anggap Barnabas nge Saul saingenna? Lang. Malahen, pindona penampat Saul perban tehna labo ia ngasup ndahikenca sisada. Barnabas e meteh bana. Emaka lawes ia ku Tarsus, daramina Saul, janah babana ku Antiokia guna nampati ia. Lit setahun dekahna ras-ras kalak e mpegegehi murid-murid bas runggun e.—Perb. 11:22-26a.
21 Uga kita ngusih sipat Barnabas si meteh bana bas pelayanenta? Kerina kita lit kelebihenta janah beda-beda kengasupenta. Contohna, piga-piga turang senina mungkin beluh erberita alu la resmi ntah pe erberita arah rumah ku rumah, tapi mesera kapna ndahi mulihi ntah pe erban kalak nggit erlajar Pustaka. Adi reh beluhna atendu bas piga-piga bagin bas pelayanen, pindolah penampat kalak si deban. Alu bage, reh beluhna kam janah reh riahna ukurndu bas pelayanen.—1 Kor. 9:26.
“Ngirim Penampat man Turang Senina” (Perb. 11:26b-30)
22, 23. Uga turang senina i Antiokia mbuktiken maka keleng atena turang seninana? Uga umat Dibata si gundari ngusih kalak e?
22 Bas Antiokia me tangtangna “murid-murid igelari Kristen.” (Perb. 11:26b) Gelar e cocok kel nggambarken pengikut Kristus. Kenca reh teremna kalak arah bangsa-bangsa si jadi kalak Kristen, reh kompakna nge kalak Kristen Jahudi ras si labo Jahudi? Mari siperdiateken kai si terjadi sanga lit kelaparen si mbelin kira-kira tahun 46 M. e Mbarenda, sanga terjadi kelaparen, parah kel akibatna man kalak si mesera pergeluhna perban la lit tabungen ntah pe cadangen pangan kalak e. Enterem kalak Kristen Jahudi si tading i Judea eme kalak si mesera. Emaka, sanga terjadi kelaparen e, perlu kalak e pangan ras keperlun si debanna. Kenca teh turang senina i Antiokia kerna si e, kerina kalak e, termasuk kalak Kristen si labo Jahudi “ngirim penampat man turang senina i Judea.” (Perb. 11:29) Mbelin kel kekelengen kalak e man turang seninana!
23 Umat Dibata si gundari pe bage. Sanga siteh maka lit turang seninata bas daerahta ntah pe bas negri si deban si merluken penampat, mis kita nggit nampati kalak e. Contohna, sanga lit bencana alam bagi badai, gempa, ras tsunami, ibentuk Panitia Cabang me Panitia Penanggulangen Bencana guna nampati turang seninata. Kerina penampat e mbuktiken maka kita umat Dibata.—Joh. 13:34, 35; 1 Joh. 3:17.
24. Uga carata mbuktiken maka penting siakap erti pengenehenen sidat Petrus?
24 Bas abad pertama, dat Petrus pengenehenen i atap rumah i Jope. Selaku kalak Kristen, perlu denga siukuri erti pengenehenen e. Kita nembah Dibata si la erpilihen. Sura-suraNa eme gelah siberitaken berita si meriah kerna KerajanNa man kerina kalak, la soal kai sukuna, bangsana, ntah pe status sosialna. Emaka ertekadlah kita erberita si meriah man kerina kalak si nggit megiken gelah datna kesempaten guna ngelayani Jahwe.—Rom. 10:11-13.
Sanga lit turang seninata merluken penampat, nggit kita nampatisa
a Enterem kalak Jahudi si rendah akapna kalak si dahinna erban barang-barang arah kulit binatang. Engkai? Perban kalak si bage dahinna arus jemakna bangke binatang. Si e ciga kel ate kalak Jahudi. Emaka la ate kalak Jahudi kalak si bage pendahinna reh ku rumah pertoton. Janah ingan kalak e erdahin, silang-langna arus lit 20 meter arah kota nari. Banci jadi eme salah sada alasenna rumah Simon lit i “deher laut.”—Perb. 10:6.
b Nen kotak “ Kornelius ras Pasuken Tentera Romawi.”
c Artikel e judulna “Nasihat yang Andal untuk Membesarkan Anak,” si lit bas Menara Pengawal 1 November 2006, halamen 4 seh 7.
d Nen kotak “ Antiokia Siria.”
e Sekalak ahli sejarah Jahudi si gelarna Yosefus ngataken maka kelaparen e ntah pe “kelihen si mekelek” e terjadi bas masa pemerentahen Kaisar Klaudius (41-54 M).