PASAL 10
“Reh Teremna Kalak si Meteh Kata Jahwe”
Petrus ibebasken arah penjara, janah kalak Kristen tetap erberita amin pe lit penindasen
Arah Perbahanen Rasul-Rasul 12:1-25
1-4. Situasi sulit kai nge si adapi Petrus, janah uga nge perasanndu adi kam arah ia?
SANGA itutup prajurit pintu penjara i pudi Petrus, megang kel sora pintu e erdenging. Ikawal me Petrus ku selna, janah irante me tanna ku dua penjaga Roma si lit i kiri ras kananna. Arus timaina piga-piga jam, banci ka piga-piga wari, guna meteh kai nge kari si terjadi man bana. Ku ja pe tulihkenna la lit kai pe si idahna selain dingding, jeruji penjara, rantena, bage pe penjagana.
2 Kepeken, kejam kel keputusen si nandangi aloken Petrus. Raja Herodes Agripa I ersura-sura gelah Petrus ihukum mate. a Rencana Herodes Agripa, babana Petrus ku lebe-lebe jelma si enterem kenca Paskah. Berekenna tena hadiah gelah meriah ukur jelma si enterem e. Hadiahna eme kematen Petrus. Rencana enda labo main-main. La ndekah sope si e, berekenna hukumen mate man rasul si deban, eme Jakup.
3 Petrus nandangi ihukum mate. Bas sada berngi rukur ia bas selna si gelap. Kai nge si ukurina? Banci saja ingetna kai si kataken Jesus piga-piga tahun sope si e. Ikataken Jesus maka iiket pagi Petrus janah ibaba ku ingan si la tena bage, dung e ihukum mate. (Joh. 21:18, 19) Banci saja akap Petrus enda me waktuna si e terjadi.
4 Bicara kam arah Petrus e, uga nge perasanndu? Enterem kalak pasti putus asa janah lanai kapna lit arapenna. Tapi pengikut Jesus Kristus situhu-tuhu, lalap lit arapenna uga pe situasina. Kai nge si banci sipelajari arah cara Petrus bage pe turang senina bas abad pertama ngadapi penindasen? Mari siperdiateken.
“Terus Totoken Runggun Ia alu Bulat Ukur” (Perb. 12:1-5)
5, 6. (a) Kai si lakoken Raja Herodes Agripa I guna nindas runggun Kristen, janah engkai maka lakokenna bage? (b) Engkai maka kematen Jakup e sada percuban man runggun?
5 Bagi si enggo sipelajari bas pasal sebelumna buku enda, pertobaten Kornelius ras keluargana eme kejadin si penting man runggun Kristen perban kalak e labo kalak Jahudi. Tapi kalak Jahudi si la tek man Jesus pasti sengget kel sanga tehna kalak Kristen Jahudi bage pe si la Jahudi ras-ras nembah Jahwe.
6 Herodes Agripa eme pejabat politik si licik. Guna muat ukur kalak Jahudi, mulai tindasna kalak Kristen. Mungkin pernah begina maka Rasul Jakup rembak kel ras Jesus Kristus, emaka “bunuhna Jakup senina Johanes alu pedang.” (Perb. 12:2) Enda tuhu-tuhu percuban si mberat kel man runggun! Jakup eme salah sada arah telu rasul si ngidah berubah rupa Jesus, bage pe ngidah mukjizat si deban si la cidahken Jesus man rasul si deban. (Mat. 17:1, 2; Mrk. 5:37-42) Igelari Jesus me Jakup ras seninana Johanes “Anak-Anak Lenggur” perban gara kel semangat kalak e. (Mrk. 3:17) Emaka, kebenen kel runggun sanga mate Jakup. Jakup e saksi si perpang, setia, bage pe rasul si ikelengi.
7, 8. Kai si ilakoken turang senina bas runggun sanga Petrus ipenjaraken?
7 Bagi si arapken Herodes Agripa, meriah kel ukur kalak Jahudi sanga Jakup ihukum mate. Emaka reh semangatna ia. Gundari bunuhna ka atena Petrus. Bagi si iceritaken bas awal pasal enda, tangkapna me Petrus. Tapi banci saja inget Herodes Agripa maka rasul-rasul pernah ibebasken arah penjara alu mukjizat, bagi si iceritaken bas Pasal 5 buku enda. Emaka ipastikenna gelah rencanana enda ula sempat gagal. Suruhna gelah Petrus irante i antara 2 penjaga, janah lit 16 penjaga si giliren suari ras berngi guna mastiken Petrus la banci kiam. Adi sempat ia kiam, hukumen si arusna ibereken man Petrus, ibereken me man penjaga e. Bas situasi si sulit e, uga turang senina nampati Petrus?
8 Turang senina bas runggun tehna kai si arus ilakokenna. Perbahanen Rasul-Rasul 12:5 ngataken, “Sanga Petrus bas penjara, terus totoken runggun ia alu bulat ukur.” Tutus kel ate kalak e ertoto guna Petrus. Kematen Jakup la erban kalak e putus asa. Tetap kalak e tek maka begiken Jahwe nge toto kalak e. Meherga kel akap Jahwe toto umatNa. Adi toto e sesuai ras sura-suraNa, pasti jawapNa. (Heb. 13:18, 19; Jak. 5:16) Enda pelajaren si penting man kalak Kristen si gundari.
9. Kai si banci sipelajari arah turang senina si ertoto guna Petrus?
9 Lit nge tehndu turang senina si sangana ngadapi melala percuban? Banci saja adapina penindasen, larangen pemerentah, ntah pe bencana alam. Totokenlah kalak e alu bulat ukur. Banci saja lit ka turang senina si ngadapi tentangen si deban. Misalna, itentang keluargana ia, kitik ukurna, ntah pe lit tentangen si nguji kinitekenna. Adi siukuri lebe kerna turang seninata sope ertoto, banci sibelasken gelar kalak e man Jahwe “Si Megiken toto.” (Ms. 65:2) Adi kita si sangana ngadapi situasi si sulit, pasti ka nge siarapken turang seninata pe notoken kita.
Sitotoken turang seninata si ipenjaraken perban kinitekenna
“Ikutken Aku” (Perb. 12:6-11)
10, 11. Ceritakenlah uga carana malekat Jahwe mbebasken Petrus arah penjara.
10 Kuatir nge Petrus ngadapi bahaya si nandangi terjadi? La siteh kerna si e. Tapi bas berngi si terakhir ia bas penjara, entabeh kel perpedemna i antara dua penjaga si sangana erjaga. Paguh kiniteken Petrus man Jahwe, emaka tek ia la soal kai pe si terjadi, pasti inget Jahwe ia. (Rom. 14:7, 8) Banci saja sitik pe la isangka Petrus nandangi terjadi sada kejadin si luar biasa. Rempet lit cahaya si seh kel terangna nerangi selna. Lit sada malekat cinder i je. Suruhna Petrus gelah mis medak. Tapi penjaga-penjaga e la idahna kerna si e. Selain si e, rante si ngiket tan Petrus, si tempa-tempa la terpenggelken, rempet lepas!
“Seh kalak e bas gerbang besi dalan ku kota. Talang sisada gerbang e.”—Perbahanen Rasul-Rasul 12:10
11 Bereken malekat e piga-piga perentah si jelas man Petrus, “Iah medakken! . . . Ersikap kam, pake selopndu. . . . Pake jubahndu.” Mis patuhi Petrus si e kerina. Dungna, nina malekat e, “Ikutken aku.” Si e pe mis ka patuhi Petrus. Tadingken kalak e me sel e. Manjar-anjar kalak e erdalan ngelewati penjaga-penjaga si erjaga i darat sel, janah erdalan kalak e ku gerbang besi si seh kel paguhna. Tapi uga carana kalak e ngelewati gerbang e? Bicara sempat Petrus tersungkun-sungkun kerna si e, mis tehna jawapenna. Kenca reh deherna kalak e ku gerbang e, rempet gerbang e “talang sisada.” La gejap, kalak e enggo ndarat arah gerbang e nari janah enggo bas dalan. Kenca si e, malekat e lanai teridah. Tadingkenna Petrus i je. Sadar me Petrus maka si e kerina tuhu-tuhu terjadi. Enda labo pengenehenen. Ia enggo bebas!—Perb. 12:7-11.
12. Engkai maka terpegegehi kel kita adi siukuri cara Jahwe nelamatken Petrus?
12 Pasti terpegegehi kel kita adi siukuri kuasa Jahwe si la erbatas guna nelamatken umatNa. Si menjaraken Petrus eme raja si idukung pemerentahen si hebatna paksa si e. Tapi Petrus banci ndarat bage saja arah penjara. Memang, labo ban Jahwe mukjizat si bage man kerina umatNa. Labo lindungiNa Jakup gelah la ibunuh, janah bas pudi wari labo selamatkenNa Petrus, sanga terjadi kai si kataken Jesus kerna Petrus. Kalak Kristen si gundari pe, labo arapkenna ia ibebasken alu mukjizat. Tapi perlu siinget maka Jahwe e la berubah. (Mal. 3:6) Lanai ndekah gunakenNa AnakNa guna mbebasken jutan kalak arah penjara si ketatna kel, eme kematen. (Joh. 5:28, 29) Janji-janji si bage banci mpegegehi kita sanga ngadapi percuban.
“Idahna Petrus janah Sengget Kel Kalak e” (Perb. 12:12-17)
13-15. (a) Uga nge tanggapen turang senina si pulung bas rumah Maria sanga reh Petrus? (b) Kai nge si selanjutna iceritaken bas buku Perbahanen Rasul-Rasul, tapi pengaruh kai nge si terus bereken Petrus man turang senina?
13 Petrus cinder bas dalan si gelap janahna rukur. Kenca si e putuskenna ku ja ia lawes. La ndauh je nari, lit rumah sekalak turang senina si gelarna Maria. Mbelin kemungkinenna Maria e sekalak janda si bayak. Rumahna galang, perban banci siat turang senina sada runggun i je. Ia me mamak Johanes Markus. Bas buku Perbahanen Rasul-Rasul, enda me tangtangna isingetken kerna Johanes Markus. Markus e dungna ianggap Petrus bagi anakna. (1 Pet. 5:13) Bas berngi e, enterem turang senina si tading denga bas rumah Maria amin pe enggo tengah berngi. Sangana tutus kel ate kalak e ertoto. Pasti totoken kalak e gelah Petrus ibebasken. Tapi la arap kalak e bage kel terna jawap Jahwe toto kalak e!
14 Tuktuk Petrus me pintu gerbang si lit i lebe-lebe halamen rumah e. Lit sekalak pelayan diberu si nguda denga, gelarna Rode, reh ia guna mbuka gerbang. Rode eme gelar Junani si ertina “Mawar.” Seh kel senggetna Rode sanga begina sora Petrus arah balik gerbang e. Ban riahna ukurna, la bukana gerbang e. Pediatna Petrus cinder i dalan, janah kiam ia mulihken ku rumah. Katakenna man turang senina maka Petrus enggo reh. Kataken kalak e me ia adon. Tapi la ia mis nyerah. Lalap katakenna kerna kai si enggo begina. Lit piga-piga kalak si tek maka tuhu cerita Rode e. Akap kalak e si iceritakenna e eme malekat si rupana bagi Petrus. (Perb. 12:12-15) Petrus terus denga nuktuki i darat gerbang. Dungna reh me kalak e mbuka gerbang.
15 Sanga seh kalak e i gerbang, “idahna Petrus janah sengget kel kalak e.” (Perb. 12:16) Gejek kalak e ban riahna ukurna. Emaka arus petenang Petrus kalak e gelah banci ceritakenna kai si enggo terjadi. Selain si e, suruhna gelah kai si iceritakenna e ipeseh man Jakup sekalak murid, bage pe man senina-senina bas runggun. Kenca si e mis ia lawes, gelah la banci dat prajurit-prajurit Herodes Agripa ia. Lawes Petrus guna nerusken pelayanenna bas ingan si deban si lebih aman. Bas buku Perbahanen Rasul-Rasul pasal 15, lit iceritaken kerna Petrus si ikut ndungi masalah sunat. Kenca si e lanai lit iceritaken kerna ia. Si selanjutna iceritaken bas buku Perbahanen Rasul-Rasul eme kerna uga Rasul Paulus erberita, bage pe perdalanen utusen injilna. Tapi tek kita, ku ja pe Petrus lawes pasti pegegehina kiniteken turang senina. Sanga lawes ia arah rumah Maria nari, pasti enggo meriah banna ukur turang senina.
16. Engkai maka bas masa depan lalap pagi meriah ukurta?
16 Mon-mon, bereken Jahwe pasu-pasu man umatNa si ndauh belinen asangken si arapken kalak e. Emaka, ban riahna ukurna, mesera kapna tek. Bage me perasan turang senina kerna Petrus bas berngi e. Banci saja bage ka me perasanta sanga sialoken mbue pasu-pasu arah Jahwe. (Kua. 10:22) Bas masa depan, siidah pagi kerina janji Jahwe terjadi i sebelang doni. Enda pasti ndauh ulin asangken si banci sibayangken gundari. Emaka teruslah kita setia, gelah bas masa depan pagi lalap meriah ukurta.
“Ban Malekat Jahwe Ia Sakit” (Perb. 12:18-25)
17, 18. Engkai maka Herodes Agripa ipuji-puji jelma si enterem?
17 Sengget kel Herodes Agripa sanga tehna Petrus lanai lit bas penjara. Emaka, merawa kel ia. Mis perentahkenna gelah Petrus idarami. Perentahkenna ka gelah penjaga-penjaga si ngawasi Petrus isungkuni. Selain si e, perentahkenna gelah penjaga e “ibaba guna ihukum,” mbelin kemungkinenna ihukum mate. (Perb. 12:19) Sitik pe la lit perkuah ate Herodes Agripa e. Ngasa ndigan nge kalak si bage kejamna lolos arah hukumen?
18 Banci saja mela kel akap Herodes Agripa perban gagal ia ngukum mate Petrus. Lanai kapna lit harga dirina, tapi mis ka lit kesempaten si erban ia sombong. Lit musuh-musuhna si merhat erdame ras ia. Emaka lanai ia sabar guna ngerana i lebe-lebe jelma si enterem. Laporken Lukas me kai saja si ilakokenna sope ia erpidato, nina, “Pake Herodes baju kerajanna.” Ahli sejarah Jahudi si gelarna Yosefus ngataken maka paken Herodes e iban arah pirak. Adi kena cahaya, ersinar me ia. Emaka akap kalak ia mirip bagi Dibata. Kenca si e, mulai me pejabat politik si sombong e erpidato. Enterem kalak si muji-muji ia alu ngataken, “Enda sora dibata, labo sora manusia!”—Perb. 12:20-22.
19, 20. (a) Engkai maka Herodes Agripa ihukum Jahwe? (b) Sanga sibaca kerna kematen Herodes, engkai maka banci kita terpegegehi?
19 Dibata ngenca si metunggung ngaloken pujin si bage. Situhuna lit nge kesempaten Herodes Agripa gelah la ia kena bencana. Banci saja persingetina jelma si enterem e, ntah pe silang-langna la ia setuju man kalak e. Tapi la lakokenna bage. Emaka terjadi me man bana kuan-kuan si ngataken, “Sipat sombong erban hancur.” (Kua. 16:18) “Mis ban malekat Jahwe ia sakit.” Dungna ngeri kel perpate Herodes, kalak si mentingken bana ras sombong e. Herodes ‘ipan cacing-cacing, janah dungna mate.’ (Perb. 12:23) Selain si e, menurut Yosefus, Herodes rempet-rempet sakit, janah simpulken Herodes e ia sakit perban alokenna pujin jelma si enterem. Itulis Yosefus ka maka lit lima wari dekahna Herodes sakit sope ia mate. b
20 Mon-mon kalak si la nembah Dibata tempa-tempa banci ngelakoken kejahaten tapi la ihukum. La ateta mamang kerna si e perban “kerina doni enda lit bas kuasa si jahat.” (1 Joh. 5:19) Tapi, banci saja lit umat Dibata si latih akapna ngidah kalak jahat tempa-tempa la ihukum. Kematen Herodes mbuktiken maka kalak jahat pasti ihakimi Jahwe. Kejadin e pe ngingetken kerina umat Jahwe maka keleng ate Jahwe keadilen. (Ms. 33:5) Amin gia mon-mon keadilen la mis teridah, tapi keadilen pasti nge menang.
21. Pelajaren penting kai nge si lit bas Perbahanen Rasul-Rasul pasal 12, janah engkai maka e banci mpegegehi kita gundari?
21 Cerita e itutup alu pelajaren si erban kita lebih terpegegehi. Nina, “Reh teremna kalak si meteh kata Jahwe janah reh teremna ka si jadi murid.” (Perb. 12:24) Laporen e ncidahken maka dahin erberita terus reh belangna. Laporen e pe ngingetken kita maka dahin erberita tetap ipasu-pasu Jahwe seh asa gundari. Jelas me, Perbahanen Rasul-Rasul pasal 12 labo saja nceritaken maka lit rasul si mate janah lit rasul si ibebasken arah penjara. I je ituriken kerna uga sipat Jahwe bage pe kai si lakokenNa gelah Setan la banci erban runggun Kristen hancur bage pe mpengadi pendahin erberita. Serangen-serangen Setan enggo gagal. Kalak si rusaha mpengadi dahin erberita pe pasti nge gagal. (Jes. 54:17) Tapi kalak si erpihak ku Jahwe ras Jesus Kristus ikut bas dahin si la pernah gagal. Pasti terpegegehi kel kita. Sada kehamaten kel man banta ikut mpebelang “kata Jahwe” gundari!
a Nen kotak “ Raja Herodes Agripa I.”
b Lit sekalak dokter sekaligus pengarang buku si nulis maka gejala si iceritaken Yosefus bage pe Lukas banci saja terjadi perban tersumbat ususna iban cacing-cacing gilik si nggumpal. Si e parah kel akibatna. Cacing-cacing e mon-mon iutahken ntah pe ndaraten arah daging pasien nari sanga mate pasien e. Lit sada buku si ngataken, “Perban Lukas e dokter, pas kel carana njelasken uga ngerina permate [Herodes] e.”