1-3. Uga nge sange perpisahen Jesus ras rasul-rasulna, janah penungkunen kai saja nge si merhat kita meteh jawapenna?

 SANGA Jesus mate, getem kel pusuh rasul-rasulna. Tapi sanga Jesus ipekeke, lanai tanggung riahna akap kalak e. Sedekah 40 wari, mulih-ulih cidahken Jesus dirina man rasul-rasulna. Ajarina janah pegegehina kalak e. Meriah kel akap kalak e ras Jesus, emaka tetap ate kalak e ras ia. Tapi seh me warina, wari si terakhir Jesus ncidahken dirina man kalak e.

² Kerina rasul-rasul cinder i Gunung Saitun. Tutus kel ate kalak e megiken tiap kata si belasken Jesus. La erbosan-bosan kalak e megiken Jesus, tapi rempet ngadi Jesus ngerana. Dung e angkatna tanna janah pasu-pasuna kalak e. Mulai me Jesus terangkat arah taneh! Sanga Jesus terangkat ku langit, leket itatap pengikutna ia. Dungna  Jesus lanai teridah perban itutupi awan, tapi terus denga tatap kalak e ku langit.​—Luk. 24:50; Perb. 1:9, 10.

³ Kejadin si penting e ngubah kegeluhen rasul-rasul Jesus. Kenca Tuan kalak e, Jesus Kristus, nangkih ku surga, kai nge si lakoken kalak e? Pasti enggo sikapken Jesus kalak e guna nerusken pendahin si enggo imulaina. Uga cara Jesus nikapken kalak e, janah uga nge tanggapen kalak e? Kai si banci ipelajari kalak Kristen si gundari arah kejadin enda? Jawapenna lit bas pasal sada buku Perbahanen Rasul-Rasul.

4. Bas awal buku Perbahanen Rasul-Rasul, uga nge Lukas mbenaken catatenna?

⁴ Bas awal buku Perbahanen Rasul-Rasul, ngerana Lukas man Teopilus. Bas Injil Lukas si enggo leben tulisna pe ngerana ia man Teopilus. a Bas awal buku Perbahanen Rasul-Rasul, itulisken Lukas ringkasen kejadin-kejadin si lit bas akhir Injil Lukas. Labo seri kata-kata si pakena, janah lit keterangen si mbaru si itambahkenna. Alu bage, iteh pembaca me maka isi buku Perbahanen Rasul-Rasul eme kejadin-kejadin si terjadi kenca Jesus mate.

5, 6. (a) Kai si erban paguh kiniteken pengikut Jesus si mbarenda? (b) Engkai maka banci sikataken maka kiniteken kalak Kristen si gundari pe ‘melala buktina’?

⁵ Kai si erban paguh kiniteken pengikut Jesus si mbarenda? Bas Perbahanen Rasul-Rasul 1:3, sibaca kerna Jesus, “Kenca dalanina kiniseran, berekenna melala bukti gelah tek kalak e maka ia enggo nggeluh. Lit 40 wari dekahna rusur cidahkenna bana man kalak e.” Mon-mon cidahken Jesus bana man sekalak jelma, mon-mon man dua kalak, mon-mon man kerina rasul, janah bas sada kesempaten man lebih 500 kalak si erkiniteken. (1 Kor. 15:3-6) Bukti enda kerina erban kiniteken pengikut Jesus reh paguhna!

⁶ Kalak Kristen si gundari pe, banci paguh kinitekenna perban “melala bukti” si banci erban ia tek. Contohna, lit nge buktina Jesus pernah nggeluh i doni, mate guna dosa-dosata, janah ipekeke? Lit! Bas Pustaka si Badia ituriken maka melala kalak si ngidah kejadin e. Enda kerina jadi bukti man banta. Adi tutus ateta mpelajari bukti-bukti e janah sitotoken gelah sampati Jahwe kita ngangkaisa, kinitekenta banci reh paguhna. Perlu siinget, arus sidarami bukti si jelas gelah kinitekenta jadi kiniteken situhu-tuhu. Kiniteken situhu-tuhu ngenca si banci erban kita ndatken kegeluhen seh rasa lalap.​—Joh. 3:16.

7. Usihen kai si bereken Jesus man pengikutna i bas erberita ras ngajar?

 ⁷ Jesus pe “ceritakenna ka kerna Kerajan Dibata.” Contohna, jelaskenna nubuat si ngataken maka Mesias arus ngenanami kiniseran ras mate. (Luk. 24:13-32, 46, 47) Sanga jelasken Jesus tugasna selaku Mesias, itandaskenna tema Kerajan Dibata perban ia kap calon Rajana. Tiap Jesus erberita, temana lalap Kerajan Dibata. Pengikutna si gundari pe bage.​—Mat. 24:14; Luk. 4:43.

8, 9. (a) Kai nge dua pengangkan rasul-rasul Jesus si salah? (b) Uga Jesus nampati rasul-rasulna gelah benar carana rukur, janah kai pelajarenna man kalak Kristen si gundari?

⁸ Bas Gunung Saitun e me terakhir Jesus jumpa ras rasul-rasulna i doni. Nungkun kalak e man Jesus alu semangat, “O Tuan, gundari kin atendu majekken kerajan Israel mulihi?” (Perb. 1:6) Arah sada penungkunen e, teridah dua pengangkan kalak e si salah. Si pertama, akap kalak e Kerajan Dibata merentah mulihi guna kalak Israel jasmani. Si peduaken, tek kalak e Kerajan Dibata mis merentah paksa si e. Uga nge cara Jesus nampati kalak e gelah benar cara rukurna?

⁹ Banci saja iteh Jesus maka lanai ndekah iteh rasul-rasulna maka salah pengangkanna kalak e si pertama. Sepuluh wari kenca kejadin e, idah pengikut Jesus me lahir sada bangsa si mbaru eme Israel rohani. Kenca si e, putusken Dibata hubungen si istimewa ras Israel jasmani. Adi kerna pengangkan si peduaken, alu lembut persingeti Jesus kalak e, “Labo lit hak kena meteh kerna si e. Bapak ngenca si lit hakNa nentuken waktu ras masana.” (Perb. 1:7) Jahwe me si nentuken jadwalna. Sope Jesus mate, katakenna maka Anak pe labo tehna “wari ras jamna.” “Bapak ngenca” si metehsa. (Mat. 24:36) Gundari pe, adi kalak Kristen mulai kuatir kerna ndigan reh kedungen e, situhuna urusi kalak e kai si labo urusenna.

10. Kai si banci siusih arah rasul-rasul Jesus, janah engkai?

¹⁰ Amin pe lit pengangkan rasul-rasul Jesus si salah, tapi ula min sihakimi kalak e perban situhuna mbelin kel kiniteken kalak e. Nggit kalak e ngaloken persinget alu meteruk ukur. Selain si e, arah penungkunen kalak e, teridah maka enggo dalanken kalak e nasehat si rusur kataken Jesus, “Tetaplah erjaga-jaga.” (Mat. 24:42; 25:13; 26:41) Kalak e erjaga-jaga secara rohani. Semangat kalak e nimai bukti maka lanai ndekah pasti Jahwe ertindak. Kita pe perlu ka nge bage perban “wari-wari pendungi” enda enggo nandangi seh ku puncakna.​—2 Tim. 3:1-5.

11, 12. (a) Tugas kai si bereken Jesus man kerina pengikutna? (b) Engkai kataken Jesus maka pasti berena kesah si badia sope suruhna pengikutna erberita?

¹¹ Kataken Jesus man rasul-rasulna kerna kai si arus inget kalak e. Nina, “Aloken kena pagi kuasa sanga nusur kesah si badia ku kena, janah kena  pagi jadi saksiku i Jerusalem, i belang-belang Judea ras Samaria, seh ku ujung doni.” (Perb. 1:8) Tangtangna arus iberitaken kalak e bas Jerusalem maka Jesus enggo ipekeke, perban i je Jesus ibunuh. Je nari arus ka beritaken kalak e ku belang-belang Judea, kenca si e ku Samaria, dungna ku ingan-ingan si terdauhen ka.

¹² Sope suruh Jesus pengikutna erberita, erjanji ia maka pasti berekenna kesah si badia guna nampati kalak e. Bas buku Perbahanen Rasul-Rasul bahasa aslina, istilah “kesah si badia” lit lebih 40 kali icatat, janah bas ayat ndai me salah sadana. Perban rusur kata e igunaken, e ncidahken maka labo kita ngasup ndalanken peraten Jahwe adi la kin sampati kesah si badia. Emaka penting kel terus kita ertoto mindo kesah si badia. (Luk. 11:13) Khususna gundari siperluken kel e lebih asangken si enggo-enggona.

13. Seh ja nge berita si meriah enggo iberitaken gundari, janah engkai maka arus semangat kita ngelakoken tugas e?

¹³ Gundari, berita si meriah enggo “seh ku ujung doni.” Bagi si enggo ikataken bas pasal sebelumna, semangat kel Saksi-Saksi Jahwe erberita perban teh kalak e ate Dibata erbage-bage kalak banci megi berita si meriah kerna Kerajan Dibata. (1 Tim. 2:3, 4) Terus nge kam sibuk ngelakoken pendahin si nelamatken kegeluhen enda? Enda me pendahin si banci mereken keriahen ukur situhu-tuhu. Bere Jahwe ka kam gegeh si perlukenndu. Bas buku Perbahanen Rasul-Rasul, melala kel keterangen kerna cara si benar ras sipat si perlu sipebelin gelah banci kita berhasil ngelakoken pendahin enda.

14, 15. (a) Kai nge nina malekat e kerna kerehen Kristus mulihi, janah kai ertina? (Nen ka cataten i teruh.) (b) Tuhu nge bagi perlawesna “bage ka me pagi carana” Jesus reh mulihi?

¹⁴ Bagi si enggo ikataken bas awal pasal enda, terangkat Jesus arah taneh janah lanai teridah. Tapi, 11 rasul e tetap denga cinder i je janahna natap ku langit. Dungna, reh dua malekat janah nina alu lembut man kalak e, “O kalak Galilea, engkai maka kena tedis natap ku langit? Enggo idah kena Jesus iangkat ku langit, bage ka me pagi carana ia reh mulihi.” (Perb. 1:11) Kai nge maksud malekat e? Tuhu nge maksudna mulihi ka pagi reh Jesus alu tubuh si seri bagi si iajarken piga-piga agama? Lang. Engkai?

¹⁵ Nina malekat-malekat e, “Bage ka me pagi carana [Jesus] reh mulihi.” b Labo nina, ‘Bage ka me pagi bentuk Jesus reh mulihi.’ Uga kin carana Jesus lawes? Sanga malekat e ngerana, Jesus enggo lanai teridah. Rasul-rasulna ngenca si ngidah janah meteh maka Jesus enggo lawes ku surga ndahi Bapakna. Sitik ngenca kalak e. Bage ka me carana Jesus reh mulihi. Gundari, kalak si erpengangka secara rohani ngenca si meteh maka Jesus enggo jadi Raja. (Luk. 17:20) Perlu sipelajari bukti maka Jesus enggo jadi Raja, janah sisampatilah kalak si deban gelah nembah Dibata gundari.

16-18. (a) Arah Perbahanen Rasul-Rasul 1:13, 14, kai si banci sipelajari kerna perpulungen kalak Kristen? (b) Pelajaren kai si banci sidat arah usihen Maria, mamak Jesus? (c) Engkai maka perpulungen Kristen penting kel gundari?

¹⁶ Labo ateta mamang sanga rasul-rasul ‘mulih ku Jerusalem alu dem keriahen ukur.’ (Luk. 24:52) Tapi uga nge tanggapen kalak e nandangi petunjuk Kristus? Bas Perbahanen Rasul-Rasul pasal 1 ayat 13 ras 14, iceritaken maka kalak e pulung i bas sada ruangen i “loteng.” Lit piga-piga keterangen si menarik kerna perpulungen si bage. Mbarenda, melala rumah bas Palestina si lit lotengna, janah banci kalak nangkih ku loteng e arah tangga si lit i darat rumah. Banci saja kalak e pulung i “loteng” rumah mamak Markus bagi si iceritaken bas Perbahanen Rasul-Rasul 12:12. Tapi la soal ise punana, mbelin kemungkinenna ruangen e sederhana saja, tapi banci igunaken pengikut Kristus guna pulung. Ise saja nge si reh? Kai saja nge si lakoken kalak e?

¹⁷ Perlu siperdiateken maka si reh ku je labo rasul-rasul saja janah labo dilaki saja. Lit ka reh “piga-piga diberu,” termasuk Maria, mamak Jesus. Bas Pustaka, e me si terakhir iceritaken kerna Maria. Banci sibayangken, alu meteruk ukur reh Maria pulung guna nembah Jahwe radu ras turang senina, labo guna erban kalak erpengakap maka ia kalak si penting. Pasti malem kel atena perban empat anakna si dilaki selain Jesus, ikut ras ia. Sange, sanga nggeluh denga Jesus i doni, kalak enda lenga erkiniteken man Jesus. (Mat. 13:55; Joh. 7:5) Tapi kenca abang tirina eme Jesus, mate janah ipekeke, berubah kalak e.​—1 Kor. 15:7.

¹⁸ Alasen murid-murid e pulung eme, “Seperukuren kalak e guna terus ertoto.” (Perb. 1:14) Perpulungen lalap jadi bagin si penting man kalak Kristen. Kita pulung guna mpegegehi sada ras si debanna, guna ngaloken pengajaren ras nasehat, janah si pentingna guna nembah Jahwe, Bapakta si i surga. Bas perpulungen, totota bage pe ende-endenta ngena kel ate Jahwe, janah e penting man banta. Ula pernah sitadingken perpulungen si badia ras si mpegegehi enda!​—Heb. 10:24, 25.

19-21. (a) Kai nge si banci sipelajari kerna Jahwe perban tetap gunakenNa Petrus amin pe pernah lakokenna kesalahen? (b) Engkai maka Judas perlu igantiken, janah kai si banci sipelajari arah carana masalah e idungi?

¹⁹ Gundari lit masalah si penting si perlu idungi pengikut Kristus, eme carana kalak e iorganisasi. Tapi mis usahaken Rasul Petrus ndungisa. (Ayat 15-26) Pasti meriah ukurta perban igunaken Jahwe denga Petrus amin pe enggo telu kali persokenna Jesus. (Mrk. 14:72) Kita kerina rusur salah janah perlu rusur isingetken maka Jahwe e ‘mehuli janah nggit ngampuni’ kalak si tuhu-tuhu robah.​—Ms. 86:5.

²⁰ Iteh Petrus maka Judas arus igantiken perban enggo hianatina Jesus. Tapi ise si nggantikenca? Rasul si nggantiken e arus kalak si enggo  ngikutken Jesus segedang pelayanenna janah idahna Jesus ipekeke. (Perb. 1:21, 22) Enda sesuai ras janji Jesus sanga katakenna, “Kena si enggo ngikutken aku, kundul pagi bas 12 tahta janah ngadili 12 suku Israel.” (Mat. 19:28) Mbelin kemungkinenna ate Jahwe gelah 12 rasul si ngikuti Jesus me si jadi ‘12 batu pondasi’ Jerusalem si Mbaru. (Ket. 21:2, 14) E me sebapna sampati Dibata Petrus ngangkai nubuat, “mbera-mbera buat kalak si deban jabatenna selaku pengawas,” terjadi man Judas.​—Ms. 109:8.

²¹ Uga nge carana milih rasul si mbaru e? Alu mbenterken undi. Kebiasan e enggo umum bas jaman Pustaka. (Kua. 16:33) Tapi, bas kejadin e me terakhir iceritaken bas Pustaka undi ipake guna meteh sura-sura Jahwe. Mbelin kemungkinenna kenca kesah si badia icurcurken, cara enda lanai ipake. Tapi, engkai maka bas kesempaten e ipake undi? Perban, ate kalak e Jahwe si milihsa. Ertoto rasul-rasul, nina, “O Jahwe, Kam si meteh isi pusuh kerina kalak. Emaka tuduhkenlah si apai arah si dua enda si pilihNdu.” (Perb. 1:23, 24) Matias me si terpilih. Sanga suruh Jesus 70 muridna erberita, mbelin kemungkinenna Matias me salah sada murid si ikut erberita. Bage me carana Matias jadi salah sada arah “12 rasul-rasul e.” c—Perb. 6:2.

22, 23. Engkai maka arus sipatuhi ras siikutken dilaki-dilaki si ertanggung jawap bas runggun gundari?

²² Kejadin enda ngingetken kita maka seh kel pentingna gelah umat Dibata iorganisasi. Seh ngasa gundari, dilaki-dilaki si ertanggung jawap ipilih guna ngelayani jadi pengawas bas runggun. Enggo ukuri pertua-pertua alu mbages kai saja syarat bas Pustaka guna jadi pengawas janah ertoto kalak e mindo kesah si badia. Alu bage ianggap turang senina maka dilaki-dilaki e ilantik kesah si badia. Adi siikutken pengaturen si iban pertua, enggo ikut kita erban runggun jadi ersada.​—Heb. 13:17.

²³ Terpegegehi kel murid-murid Jesus sanga idah kalak e Jesus enggo ipekeke janah idah kalak e ka enggo reh sikapna cara runggun iorganisasi. Alu bage, enggo siap kalak e ngadapi kai si nandangi terjadi. Bas pasal seterusna sibahas kari kai kin kejadin si penting e.