PASAL 5
“Arus Kami Patuhen man Dibata Selaku Penguasa”
Rasul-rasul jadi usihen man kerina kalak Kristen
Arah Perbahanen Rasul-Rasul 5:12–6:7
1-3. (a) Engkai maka rasul-rasul ibaba ku Pengadilen Agama Jahudi, tapi kai nge situhuna masalahna? (b) Engkai maka merhat kel kita meteh kai si lakoken rasul-rasul sanga lit tentangen?
ANGGOTA hakim Pengadilen Agama Jahudi seh kel rawana, naik darehna, gara pusuhna! Sangana adili kalak e rasul-rasul Jesus. Sergangi Jusup Kayapas rasul-rasul Jesus. Jusup Kayapas e imam si mbelin, janah ia ka si jadi ketua pengadilen e. Nina, “Enggo jelas-jelas larang kami kena ngajar bas gelar dilaki e.” Ban rawana ia, lanai ia ngasup mbelasken gelar Jesus. Nina ka, “Enggo dem ban kena Jerusalem enda alu pengajaren kena, janah tuduh kena kami si erban dilaki e mate.” (Perb. 5:28) Perentahna jelas: Ngadi erberita ntah ihukum!
2 Uga tanggapen rasul-rasul e? Ngadi nge kalak e erberita perban mbiar? Sinik saja nge kalak e dungna? Ntah, tetap kalak e pang janah terus erberita? Dahin erberita eme perentah arah Jesus. Banci berena perentah e perban enggo datna kuasa arah Dibata. (Mat. 28:18-20) Emaka, enda me situhuna masalahna: Ise si patuhi kalak e, Dibata ntah jelma? Ngerana me Rasul Petrus ngewakili kerina rasul. Sitik pe la ia ragu. Kata-katana tegas ras jelas.
3 Kita kalak Kristen situhu-tuhu, merhat kel kita meteh uga tanggapen rasul-rasul man ancamen pengadilen e. Kita pe arus erberita bali bagi rasul-rasul. Sanga kita erberita, lit ka siadapi tentangen. (Mat. 10:22) Kalak si nentang banci saja usahakenna gelah lanai kita bebas erberita ntah pe larangna pendahin erberita. Kai nge si banci silakoken? Mari siperdiateken kai si erban rasul-rasul banci perpang, janah kai nge si lakoken kalak e sanga iadili i Pengadilen Agama Jahudi. a
“Talangi Malekat Jahwe Pintu” (Perb. 5:12-21a)
4, 5. Engkai maka “cian kel ate” Kayapas ras kalak Jahudi man rasul-rasul?
4 Ingetndu denga nge sanga tangtangna Petrus ras Johanes iperentahken gelah ngadi erberita? Ning kalak e, “La terngadiken kami ngerana kerna kai si enggo idah kami ras si begi kami.” (Perb. 4:20) Kenca dung iadili, Petrus ras Johanes bage pe kerina rasul si deban terus erberita i rumah pertoton. Ban rasul-rasul tanda-tanda si hebat. Contohna, banci pepalemna kalak sakit janah pelawesna begu-begu. Si e ilakoken kalak e “i Serambi Salomo,” eme halamen si lit atapna bas sebelah timur rumah pertoton. I je enterem kalak Jahudi pulung. Bayangen Petrus pe banci mpepalem kalak! Enterem kalak si ipepalem e nggit megiken berita si meriah. Hasilna, “reh teremna kalak si tek man Tuan, lit dilaki ras diberu.”—Perb. 5:12-15.
5 “Cian kel ate” Kayapas bage pe anggota sekte Saduki si debanna man rasul-rasul. Emaka suruhna gelah kalak e ipenjaraken. (Perb. 5:17, 18) Engkai maka merawa kel kalak Saduki? Rasul-rasul e ngajarken maka Jesus enggo ipekeke, padahal kalak Saduki la tek maka kalak mate banci nggeluh mulihi. Ikataken rasul-rasul maka kalak si tek man Jesus ngenca si banci selamat, tapi mbiar kalak Saduki ihukum pemerentah Roma adi masyarakat njadiken Jesus Peminpinna. (Joh. 11:48) Emaka wajar nge erusaha kel kalak Saduki gelah rasul-rasul lanai erberita!
6. Gundari, ise nge si rusurna ngajuk-ngajuk kalak gelah umat Jahwe itindas, janah engkai maka la teta mamang kerna si e?
6 Gundari pe, si rusurna kel ngajuk-ngajuk kalak gelah umat Jahwe itindas eme peminpin agama. Rusur gunaken kalak e pengaruhna bas pemerentahen bage pe bas media berita guna mpengadi pendahin erberita. Mamang nge ateta kerna si e? Lang. Beritata ncidahken kesalahen agama palsu. Adi lit kalak si pusuhna ngaloken kebenaren Pustaka, bebas me ia arah ajaren bage pe kebiasan si la sesuai ras Pustaka. (Joh. 8:32) Dungna, tadingkenna agama palsu. Emaka wajar saja beritata e erban segat kel ate peminpin agama ngidah kita janah cian atena kita.
7, 8. Kai pengaruh perentah malekat e man rasul-rasul, janah penungkunen kai si perlu siukuri?
7 Kundul me rasul-rasul e bas penjara nimai isidang. Taren nimai, mungkin akap kalak e kentisik nari ibunuh me kalak e perban kinitekenna. (Mat. 24:9) Tapi bas berngi e lit kejadin si la isangka-sangka. “Talangi malekat Jahwe pintu penjara e.” b (Perb. 5:19) Kenca si e nina malekat e, “Tedislah bas rumah pertoton. Teruslah ceritaken.” (Perb. 5:20) Perentah e pasti erban reh tekna rasul-rasul maka benar nge si lakoken kalak e. Banci saja kata-kata malekat e pe mpegegehi kalak e gelah tetap paguh la soal kai pe si terjadi. Emaka, “pepagina masuk kalak e ku rumah pertoton janah mulai ngajar i je.” Pang kel kalak e janah mbelin kel kinitekenna.—Perb. 5:21.
8 Kerina kita perlu ngukuri penungkunen enda: ‘Adi kuadapi tentangen bagi siadapi kalak e, pang denga nge aku erberita janah erkiniteken nge aku?’ Banci kita terpegegehi guna terus ‘njelasken kerna Kerajan Dibata’ adi siinget maka pendahin enda idukung ras iarahken malekat.—Perb. 28:23; Ket. 14:6, 7.
“Arus Kami Patuhen man Dibata Selaku Penguasa Asangken man Manusia” (Perb. 5:21b-33)
“Emaka babana rasul-rasul e janah suruhna tedis i lebe-lebe Pengadilen Agama Jahudi.”—Perbahanen Rasul-Rasul 5:27
9-11. Uga nge tanggapen rasul-rasul sanga suruh anggota pengadilen kalak e ngadi erberita? Contoh kai nge si iban rasul-rasul e man kerina kalak Kristen situhu-tuhu?
9 Kayapas ras hakim si debanna enggo siap guna ngukum rasul-rasul. La teh kalak e kai si enggo terjadi bas penjara. Emaka kirimkenna piga-piga petugas guna ngelegi tahanen e. Bayangken uga senggetna petugas e sanga dapetina rasul-rasul lanai lit i je, padahal penjara e ikunci janah “kerina si erjaga lit i lebe pintu.” (Perb. 5:23) La ndekah kenca si e, iteh kepala penjaga rumah pertoton maka rasul-rasul enggo mulihken ka ku rumah pertoton. I je erberita kalak e kerna Jesus Kristus, padahal perban si e me kalak e ipenjaraken. Kepala penjaga e ras anggotana minter lawes ku rumah pertoton guna nangkap rasul-rasul e, janah kawalna kalak e ku Pengadilen Agama Jahudi.
10 Bagi si iceritaken bas awal pasal enda, merawa kel peminpin agama e, janah suruhna rasul-rasul ngadi erberita. Uga nge tanggapen rasul-rasul? Petrus me si jadi juru bicara janah aloina kalak e alu ngataken, “Arus kami patuhen man Dibata selaku penguasa asangken man manusia.” (Perb. 5:29) Rasul-rasul e jadi contoh man kerina kalak Kristen situhu-tuhu. Memang isuruh Dibata kita patuh man pemerentah, tapi labo lit hak kalak e mpengadi kita ngelakoken sura-sura Dibata. Emaka, adi ilarang “pemerentah” kita erberita, la kita nggit. (Rom. 13:1) Sidaramilah cara-cara si bijaksana guna terus mberitaken Kerajan Dibata.
11 Merawa kel hakim-hakim e perban jawapen rasul-rasul si perpang. Emaka “bunuhna” tena kalak e. (Perb. 5:33) Iakap rasul-rasul e pasti nge kalak e mate, tapi kepeken sampati Jahwe kalak e alu cara si la isangka-sangka!
Perb. 5:34-42)
“Labo Banci Kernepken Kena” (12, 13. (a) Nasehat kai si bereken Gamaliel man teman-temanna, janah uga tanggapen kalak e? (b) Uga Jahwe nampati umatNa gundari, janah kai si perlu siinget adi ijinken Jahwe kita ‘ngadapi kiniseran perban kai si benar’?
12 Ngerana me Gamaliel. c Ia “guru Undang-Undang Musa si ihamati kerina kalak.” Emaka sanga “perentahkenna gelah rasul-rasul e ibaba ku darat ntisik,” begiken kalak e ia. (Perb. 5:34) Turikenna piga-piga contoh pemberontaken si pernah terjadi. Katakenna maka la ndekah kenca mate peminpinna, pemberontaken e pe bene. Emaka, kataken Gamaliel man anggota pengadilen gelahna sabar janah pediatna saja lebe rasul-rasul e, perban Jesus, Peminpin kalak e, mbaru denga mate. Pas kel akap kalak e pendapat Gamaliel sanga katakenna, “Ula campuri urusen kalak e janah pediat sajalah. Sebap adi rencana ras pendahinna e arah manusia nari, kernep nge pagi. Tapi adi arah Dibata nari, labo banci kernepken kena. Sebalikna, ula kari Dibata nge si lawan kena.” (Perb. 5:38, 39) Ikutken hakim-hakim e nasehat Gamaliel. Tapi tetap denga perentahken kalak e gelah rasul-rasul icambuk janah “larangna ngerana bas gelar Jesus.”—Perb. 5:40.
13 Gundari pe, banci gunaken Jahwe kalak si terpandang bagi Gamaliel guna nampati umatNa. (Kua. 21:1) Banci gunaken Jahwe kesah si badiaNa gelah kalak si erpengaruh bagi penguasa, hakim, ntah pe pejabat si erban undang-undang, ngelakoken sura-suraNa. (Neh. 2:4-8) Tapi, bicara ijinken Dibata pe kita ‘ngadapi kiniseran perban kai si benar,’ lit dua si perlu siinget. (1 Pet. 3:14) Si pertama, banci ibereken Dibata kita gegeh gelah ngasup ertahan. (1 Kor. 10:13) Si peduaken, kalak si nentang e ‘labo banci engkernepken’ pendahin Dibata.—Jes. 54:17.
14, 15. (a) Uga nge perasan rasul-rasul kenca icambuk, janah engkai? (b) Ceritaken sada pengalamen si ncidahken maka umat Jahwe banci megenggeng janah ermeriah ukur.
14 Kenca icambuk, kitik nge ukur rasul-rasul janah ngadi nge kalak e erberita? Lang! “Lawes rasul-rasul e arah Pengadilen Agama Jahudi nari. Meriah ukur kalak e.” (Perb. 5:41) Uga maka banci “meriah ukur kalak e”? Memang mesui nge kapna perban icambuk. Tapi meriah ukurna sebap tehna ia isiksa perban setia man Jahwe janah ikutkenna Jesus.—Mat. 5:11, 12.
15 Bali bagi turang seninata bas abad pertama, kita pe megenggeng janah meriah ukurta sanga ngadapi kiniseran perban berita si meriah. (1 Pet. 4:12-14) Memang labo kita merhat iancam, isiksa, ntah pe ipenjaraken. Tapi puas siakap perban banci kita tetap setia. Contohna, Henryk Dornik. Ertahun-tahun dekahna kejam kel perbahanen pemerentah man bana. Tapi tetap ia setia man Dibata. Ingetna bas bulan Agustus 1944, iputusken pemerentah gelah ia ras abangna ikirim ku kamp konsentrasi. Nina kalak si nentang e, “Labo lit gunana kalak e iendik-endik. Mate pe ia adi pertahankenna kinitekenna meriah nge ukurna.” Nina Turang Seninata Dornik, “Situhuna labo ateku mate, tapi meriah ukurku perban amin pe isiksa banci aku tetap setia man Jahwe.”—Jak. 1:2-4.
Bagi rasul-rasul, erberita kita “arah rumah ku rumah”
16. Kai si lakoken rasul-rasul si ncidahken maka usahaken kalak e kel serser erberita, janah uga kita banci ngusih kalak e?
16 Rasul-rasul e la buang-buang waktu. Mis kalak e mulihken erberita, la kalak e mbiar. “Tiap wari kalak e terus ngajar ras mberitaken berita si meriah kerna Kristus eme Jesus, bas rumah pertoton bage pe arah rumah ku rumah.” d (Perb. 5:42) Perberita si semangat enda la nggit nyerah, terus kalak e erberita alu serser. Erberita kalak e arah rumah ku rumah sesuai ras petunjuk Jesus Kristus. (Mat. 10:7, 11-14) E me sebapna berhasil kalak e ndemi Jerusalem alu ajarenna. Gundari pe, Saksi-Saksi Jahwe itandai perban ikutken kalak e cara rasul-rasul erberita. Serser sidahi tiap rumah si lit bas daerahta. Sibereken ateta kesempaten man tiap kalak gelah banci begina berita si meriah. Ipasu-pasu Jahwe nge pelayanenta arah rumah ku rumah e? Ue! Enggo lit jutan kalak si ngaloken berita Kerajan bas pendungi jaman enda, janah enterem kalak si ndatken kebenaren perban lit Saksi Jahwe si erberita ku rumahna.
Dilaki-Dilaki si Memenuhi Syarat guna “Dahin si Penting” (Perb. 6:1-6)
17-19. Masalah kai nge si lit bas runggun si mbaru denga ibentuk e? Petunjuk kai nge si ibereken rasul-rasul guna ndungisa?
17 Lit bahaya si deban si iadapi runggun si mbaru ibentuk e. Kai kin e? Enterem murid si iperidiken bas Jerusalem situhuna kalak pertandang, janah erlajar ate kalak e terbuen sope mulih ku negrina. Murid-murid si tading bas Jerusalem nggit nyumbangken sen guna nukur pangan kalak e bage pe keperlun si debanna. (Perb. 2:44-46; 4:34-37) Tapi bas situasi e ka me turah sada masalah si perlu idungi alu hati-hati. Janda-janda si make bahasa Junani “la datna baginna tiap wari.” (Perb. 6:1) Tapi janda-janda si make bahasa Heber datna baginna tiap wari. Jadi masalahna eme perbahanen si la adil. Masalah si bage biasana banci erban perpecahen.
18 Selaku badan pinpinen arah runggun si sangana berkembang, angkai rasul-rasul e maka la bijaksana adi ‘tadingken kalak e dahin mberitaken kata Dibata perban mbagiken pangan.’ (Perb. 6:2) Guna ndungi masalah e, suruhna murid-murid gelah ndarami pitu dilaki “si dem alu kesah si badia ras pentar.” Lantik rasul-rasul kari kalak e guna ngurus “dahin si penting e.” (Perb. 6:3) Banci saja dahin kalak e labo saja mbagiken pangan, tapi ngurus sen, nukur barang, ras ncatat kerinana alu teliti. Emaka dilaki-dilaki si ipilih e arus memenuhi syarat. Kerina dilaki si ipilih e enggo lit gelar Junanina, banci saja gelah reh nukahna iakap janda-janda ndai tek man kalak e. Kenca ukuri rasul-rasul janah totokenna persoalen e, ilantik rasul-rasul me pitu dilaki ndai guna ngurus “dahin si penting e.” e
19 Amin pe dilaki si ilantik ndai enggo sibuk ngurus pembagin pangan, tapi tetap denga nge kalak e perlu erberita. Contohna eme Stepanus. Ia sekalak perberita si perpang janah semangat. (Perb. 6:8-10) Pilipus pe termasuk ka nge arah pitu dilaki ndai, janah ia igelari “sekalak perberita.” (Perb. 21:8) Jelas me, pituna dilaki ndai terus semangat erberita.
20. Uga umat Jahwe si gundari ngikutken usihen si iban rasul-rasul?
20 Umat Jahwe si gundari pe ngikutken usihen si enggo iban rasul-rasul. Dilaki-dilaki si ipilih guna ndatken tanggung jawap bas runggun arus ngikutken cara rukur Jahwe, janah cidahkenna ka sipat-sipat si ihasilken kesah si badia. Alu ngikutken petunjuk arah Badan Pinpinen, dilaki-dilaki si memenuhi syarat ilantik jadi pertua bage pe sinampati runggun. f (1 Tim. 3:1-9, 12, 13) Perban syarat-syarat si lit bas Pustaka itulis alu penegu-negu kesah si badia, banci sikataken kalak e ilantik kesah si badia. Dilaki-dilaki si nggit kerja keras enda ngurus melala “dahin si penting.” Misalna, ngaturken penampat man turang senina si enggo metua. (Jak. 1:27) Piga-piga pertua sibuk bas pendahin mbangun Bale Kerajan, ngaturken acara pertemuan, ntah pe ikut jadi anggota Panitia Penghubung Rumah Sakit. Sinampati runggun pe ngelakoken melala tugas si deban, tapi si ertanggung jawap bas dahin mpermakani ntah pe ngajar eme pertua. Amin pe pertua ras sinampati runggun mbue tanggung jawapna bas runggun bage pe bas organisasi, tapi kalak e arus tetap erberita.—1 Kor. 9:16.
“Kata Dibata Terus Tersebar” (Perb. 6:7)
21, 22. Kai buktina ipasu-pasu Jahwe runggun si mbaru denga ibentuk e?
21 Runggun si mbaru denga ibentuk e ngadapi tentangen arah darat nari bage pe arah bas nari. Arah darat nari lit penindasen, janah arah bas nari lit masalah si banci erban kalak e lanai ersada. Tapi alu penampat Jahwe kalak e banci tetap setia ras ndungi masalah e alu mehuli. Jelas kel siidah pasu-pasu Jahwe, sebap ikataken man banta, “Kata Dibata terus tersebar, janah seh kel buena murid-murid si tambah i Jerusalem. Imam-imam pe enterem si mulai ngaloken kiniteken e.” (Perb. 6:7) Enda me salah sada pengalamen si lit bas buku Perbahanen Rasul-Rasul kerna uga Jahwe masu-masu runggun. (Perb. 9:31; 12:24; 16:5; 19:20; 28:31) Gundari pe, pasti malem kel ateta sanga sibegi kerna perkembangen pendahin erberita i sebelang doni.
22 Bas abad pertama M, peminpin-peminpin agama si seh kel rawana e la nggit nyerah. Reh kelekna me penindasen si iadapi pengikut Jesus. Kentisik nari, lanai tanggung kejamna perbahanen kalak e man Stepanus. Sibahas kari e bas pasal selanjutna.
a Nen kotak “ Sanhedrin Eme Pengadilen Agama Jahudi si Meganjangna.”
b Bas buku Perbahanen Rasul-Rasul, lit kira-kira 20 kali kata “malekat” itulisken secara langsung si maksudna malekat Jahwe, janah bas ayat enda me si pertama. Sebelumna, bas Perbahanen Rasul-Rasul 1:10, malekat Jahwe ikataken “kalak si ruis mbentar.”
c Nen kotak “ Gamaliel—Ihamati Guru Undang-Undang si Debanna.”
d Nen kotak “ Erberita ‘arah Rumah ku Rumah.’”
e “Dahin si penting e” eme tanggung jawap si serius. Emaka dilaki-dilaki e mungkin enggo memenuhi syarat jadi pertua. Tapi labo lit ikataken bas Pustaka ndigan dilaki-dilaki ndai mulai ilantik jadi pertua bas runggun Kristen.
f Bas abad pertama, dilaki-dilaki si memenuhi syarat ibereken kuasa guna ngelantik pertua-pertua. (Perb. 14:23; 1 Tim. 5:22; Tit. 1:5) Gundari, Badan Pinpinen ngelantik pertua keliling, janah pertua keliling ertanggung jawap guna ngelantik pertua-pertua ras sinampati runggun.