PASAL 4
“Rakyat Biasa si La Erpendidiken”
Perpang kel rasul-rasul janah pasu-pasu Jahwe kalak e
Arah Perbahanen Rasul-Rasul 3:1–5:11
1, 2. Mukjizat kai si iban Petrus ras Johanes i deher gerbang rumah pertoton?
MATAWARI ndabuh menda ku benna, tapi terangna ersinar denga nerangi jelma si enterem. Kalak Jahudi si patuh bage pe murid-murid Jesus mulai rehen ku rumah pertoton. Kentisik nari enggo seh “waktuna guna ertoto.” a (Perb. 3:1; 2:46) I tengah-tengah jelma si enterem e, Petrus ras Johanes erdalan ku arah gerbang rumah pertoton, si igelari Gerbang si Mejile. Ingan e seh kel gejekna. Lit kalak si erdalan janah lit ka kalak si ngeranai. I je lit sekalak pengemis si lumpuh lahirna nari. Umurna enggo lebih 40 tahun.—Perb. 3:2; 4:22.
2 Kenca reh deherna Petrus ras Johanes, ipindo dilaki e sen man kalak e. Ngadi duana rasul e, emaka tatap dilaki ndai kalak e janah arapkenna bereken kalak e sen. Tapi nina Petrus, “Pirak ras emas la lit bas aku, tapi kubereken ateku man bandu kai si lit bas aku. Bas gelar Jesus Kristus kalak Nasaret, erdalanlah!” Bayangkenlah uga senggetna jelma si enterem sanga idahna Petrus njemak tan dilaki si lumpuh e janah sampatina ia tedis. Enda me tangtangna bas segedang geluhna banci ia tedis! (Perb. 3:6, 7) Banci nge bayangkenndu itatap dilaki e duana nahena si enggo malem janah cubakenna erdalan? Mulai me ia lompat-lompat janah ersurak muji Dibata!
3. Hadiah si luar biasa kai si banci ialoken jelma si enterem bage pe dilaki si lumpuh ndai?
3 Kiamen kalak ndahi Petrus ras Johanes i Serambi Salomo. Kurang ter kap kalak e seh ku je. Bas ingan e me Jesus pernah cinder ras ngajar. I je, kataken Petrus kai situhuna erti kejadin si edenga terjadi e. (Joh. 10:23) Itawarken Petrus man jelma si enterem bage pe dilaki si lumpuh ndai sada hadiah si belinen nilaina asangken pirak ntah pe emas. Hadiah enda labo saja banci erban sehat mulihi, tapi enda kesempaten guna ertobat, iampuni, ras banci jadi pengikut Jesus, eme ‘Kalak si Ipilih Jahwe guna mere kegeluhen.’—Perb. 3:15.
4. (a) Kai nge si terjadi kenca dilaki si lumpuh ndai ipepalem secara mukjizat? (b) Dua penungkunen kai nge si nandangi sibahas?
4 Wari e luar biasa kel! Sekalak jelma enggo ipepalem secara jasmani janah enggo banci erdalan. Ribun kalak si debanna banci ipepalem secara rohani, janah banci erdalan i lebe-lebe Dibata alu cara si ngena ateNa. (Kol. 1:9, 10) Selain si e, kejadin bas wari e me dalan-dalanna segat ate peminpin-peminpin ngidah pengikut Kristus si setia. Lalap usahaken kalak e gelah pengikut Kristus la mberitaken berita Kerajan. (Perb. 1:8) Anggap kalak e Petrus ras Johanes “rakyat biasa si la erpendidiken.” b Tapi kai nge si banci sipelajari arah cara ras perbahanen kalak e sanga erberita man jelma si enterem? (Perb. 4:13) Janah uga nge carata ngusih Petrus, Johanes, bage pe murid-murid si deban si ngadapi tentangen?
Labo “Perban Kuasa Kami” (Perb. 3:11-26)
5. Kai si banci sipelajari arah cara Petrus ngerana man jelma si enterem?
5 Petrus ras Johanes cinder i lebe-lebe jelma si enterem e. Teh kalak e, banci saja piga-piga kalak si mindo gelah Jesus ihukum mate lit i je. (Mrk. 15:8-15; Perb. 3:13-15) Jelas me pang kel Petrus sanga katakenna maka dilaki si lumpuh ndai ipepalem alu gelar Jesus. La belasken Petrus kata si tengteng saja, tapi belaskenna kebenaren. Terus terang katakenna maka salah perbahanen kalak e sanga terlibat kalak e i bas pembunuhen Kristus. Tapi labo Petrus merawa, sebap tehna maka ‘la angka kalak e kai si enggo lakokenna.’ (Perb. 3:17) Emaka, iahkenna teman sada bangsana gelah fokus ku hal-hal positip arah berita Kerajan. Adi nggit kalak e robah ras erkiniteken man Kristus, dat kalak e me “kemalemen ate” arah Jahwe. (Perb. 3:19) Kita pe perlu perpang ras terus terang sanga siumumken penghakimen arah Dibata si nandangi terjadi. Tapi kita la banci kasar ntah pe sihakimi kalak. Sebalikna, sianggap kalak e calon turang seninata. Bali bagi Petrus, kita pe fokus ku hal-hal positip arah berita Kerajan.
6. Uga Petrus ras Johanes ncidahken sipat meteruk ukur?
6 Rasul-rasul e eme kalak si meteruk ukur. La kalak e nggit ianggap jadi sumber mukjizat e. Nina Petrus man jelma si enterem e, “Engkai maka tatap kena kami, tempa-tempa perban kuasa kami ntah pe perban kami kalak si tutus erdibata maka banci ia erdalan?” (Perb. 3:12) Petrus ras rasul-rasul si debanna meteh maka kai pe si banci lakoken kalak e bas pelayanen situhuna perban kuasa Dibata, labo perban kuasa kalak e. Emaka alu meteruk ukur kataken kalak e maka Jahwe ras Jesus me si patut ipuji.
7, 8. (a) Hadiah kai si banci sitawarken man kalak si deban? (b) Uga janji kerna “kerina iban mulihi bagi si mbarenda” sangana terjadi gundari?
7 Kita pe perlu meteruk ukur sanga erberita. Memang labo bereken Jahwe kuasa guna erban mukjizat man kalak Kristen si gundari. Tapi, banci sisampati kalak gelah reh belinna kinitekenna man Dibata bage pe man Kristus. Banci ka sisampati ia gelah datna hadiah bagi si itawarken Petrus, eme kesempaten guna iampuni ras iapuli Jahwe. Tiap tahun, lit ratusen ribu kalak si ngaloken tawaren e janah nggit kalak e iperidiken jadi murid Kristus.
8 Gundari, kita nggeluh bas jaman si ikataken Petrus eme jaman si “kerina iban mulihi bagi si mbarenda.” Kerajan Dibata ipajekken i surga bas tahun 1914. Enda sesuai bagi nubuat “si enggo kataken Dibata arah nabi-nabiNa si badia si lit bas jaman si nai.” (Perb. 3:21; Ms. 110:1-3; Dan. 4:16, 17) La ndekah kenca si e, ibadah si benar mulai ipulihken i doni janah Kristus si ngawasi pendahin e. Hasilna, jutan kalak enggo ibaba ku pardis rohani, jadi rakyat Kerajan Dibata. Enggo tadingken kalak e sipat-sipat si ndekah si la mehuli janah ‘pakena sipat-sipat si mbaru si iban menurut peraten Dibata.’ (Ep. 4:22-24) Dilaki si lumpuh ndai banci ipepalem labo perban usaha manusia, tapi perban kesah si badia Dibata. Bali ras Petrus, kita pe perlu perpang janah beluh nggunaken Kata Dibata guna ngajari kalak si deban. Adi berhasil kita nampati kalak si deban jadi murid Kristus, situhuna e labo perban kuasata tapi perban kuasa Dibata.
“La Terngadiken Kami Ngerana” (Perb. 4:1-22)
9-11. (a) Uga tanggapen peminpin Jahudi ngidah Petrus ras Johanes erberita? (b) Kai tekad rasul-rasul e?
9 Heboh kel jelma si enterem e kenca begina Petrus ngerana janah idah kalak e ka dilaki si lumpuh ndai lompat-lompat ras ersurak-surak. Emaka, mis reh kepala penjaga rumah pertoton bage imam-imam kepala guna mereksasa. c Kepala penjaga rumah pertoton eme kalak si ertanggung jawap guna ngawasi keamanen wilayah rumah pertoton. Mbelin kemungkinenna kalak e kerina kalak Saduki. Sekte Saduki eme sekte si bayak janah megegeh secara politik. Kalak e pe erusaha gelah banci dame ras kalak Romawi. La kalak e nggit ngaloken undang-undang si la tertulis si jadi kel ate kalak Parisi. La ka kalak e tek maka kalak mate banci ipekeke. Emaka seh kel ngilasna ate kalak e ngidah Petrus ras Johanes bas rumah pertoton alu pang ngajarken maka Jesus enggo ipekeke!
10 Merawa kel penentang-penentang e, janah penjarakenna Petrus ras Johanes. Kenca si e, paginna babana kalak e ku mahkamah agung Jahudi. Menurut penguasa-penguasa si hebat kapna bana e, Petrus ras Johanes eme “rakyat biasa si la erpendidiken.” Emaka la lit hak kalak e ngajar bas rumah pertoton. Rasul-rasul e la pernah erlajar bas sekolah agama si apai pe si iakui. Tapi, terus terang janah yakin kalak e mpeseh kai si man katankenna, emaka mamang kel ate anggota pengadilen e. Engkai maka banci bage kel beluhna Petrus ras Johanes? Salah sada alasenna perban “dilaki e duana radu ras Jesus mbarenda.” (Perb. 4:13) Tuan kalak e ngajar selaku kalak si lit kuasana, la bagi guru-guru agama.—Mat. 7:28, 29.
11 Perentahken anggota pengadilen e gelah rasul-rasul ngadi erberita. Bas kalak Jahudi, perentah pengadilen e mbelin kel pengaruhna. Piga-piga minggu sope si e, anggota pengadilen e ka nge si ngataken kerna Jesus, “Bunuh saja ia.” (Mat. 26:59-66) Tapi, Petrus ras Johanes la mbiar. Cinder kalak e i lebe-lebe dilaki si bayak, terpandang, ras meganjang sekolahna e. Petrus ras Johanes alu perpang tapi mehamat ngataken, “Cuba ukuri kena, apai nge akap Dibata ulin, patuh man kena ntah man Dibata? Tapi kami, la terngadiken kami ngerana kerna kai si enggo idah kami ras si begi kami.”—Perb. 4:19, 20.
12. Kai si banci nampati kita gelah reh pangna ras reh yakinna?
12 Banci nge kam perpang bagi kalak e? Uga nge perasanndu sanga erberita man kalak bayak, terpandang, ntah pe meganjang sekolahna? Uga adi lit anggota keluargandu, teman sekolahndu, ntah temanndu sada dahin nokohi kinitekenndu? Mbiar nge kam? Adi ue, situhuna banci nge atasindu perasanndu e. Sanga Jesus i doni, ajarina rasul-rasulna uga carana mbela kiniteken alu yakin ras mehamat. (Mat. 10:11-18) Kenca ipekeke, erjanji Jesus maka lalap pagi ia ras muridna “seh ku kedungen jaman enda.” (Mat. 28:20) Ajari Jesus kita arah “budak si setia ras pentar” uga cara mbela kinitekenta. (Mat. 24:45-47; 1 Pet. 3:15) Enda sidat arah petunjuk si lit bas perpulungen, misalna arah Pelayanen ras Kegeluhen Kristen. Sidat ka petunjuk arah publikasita si erpalasken Pustaka, misalna artikel jw.org bas bagin “Penungkunen si Ijawap Pustaka.” Reh nge kam ku perpulungen janah ikutkenndu nge kerina petunjuk e? Adi ue, pasti kam reh pangna ras reh yakinna. Selain si e, bagi rasul-rasul, pasti la pediatndu kai pe mpengadi kam ngerana kerna kebenaren si luar biasa si enggo idahndu ras begindu.
Ula pediat kai pe mpengadi kam ngerana kerna kebenaren si luar biasa si enggo pelajarindu
“Kalak e Ertoto man Dibata” (Perb. 4:23-31)
13, 14. Adi siadapi tentangen, kai nge si arus silakoken, janah engkai?
13 Kenca Petrus ras Johanes ibebasken, mis jumpai kalak e turang senina bas runggun. Ras-ras “kalak e ertoto man Dibata” janah pindo kalak e gelah sampati Dibata kalak e pang guna terus erberita. (Perb. 4:24) Jelas kel iteh Petrus maka labo banci siandalken gegehta sendiri guna ngelakoken sura-sura Dibata. Piga-piga minggu sebelumna, yakin kel ia sanga katakenna man Jesus, “Amin pe kerina kalak nadingken kam perban kai si terjadi man bandu, aku labo pagi nadingken kam!” Tapi, bagi si enggo nubuatken Jesus, minter Petrus mbiar man manusia janah persokenna Jesus, temanna bage pe guruna. Tapi, erlajar Petrus arah kesalahenna e.—Mat. 26:33, 34, 69-75.
14 Tekad saja labo bias bas ndalanken tugas selaku saksi Kristus. Sanga usahaken penentang gelah lanai kam ngelayani Jahwe ras gelah lanai kam erberita, ikutilah usihen si bereken Petrus ras Johanes. Ertotolah kam man Jahwe mindo gegeh. Pindolah penampat arah runggun. Ceritaken man pertua bage pe man kalak si deban si paguh kinitekenna kerna tentangen si sangana adapindu. Sanga lit kalak si notoken kam, begiken Jahwe toto kalak e janah pasti berekenNa gegeh man bandu.—Ep. 6:18; Jak. 5:16.
15. Contoh kai nge si banci mpegegehi kam adi pernah kam ngadi erberita?
15 Adi pernah kam nyerah perban tekanen janah lanai kam erberita piga-piga waktu dekahna, ula kitik ukurndu. Ingetlah, kerina rasul ngadi erberita bas piga-piga waktu kenca Jesus mate, tapi dungna mis ka kalak e erberita. (Mat. 26:56; 28:10, 16-20) Ula pediat kesalahenndu si mbarenda ngelatihi ukurndu. Erlajarlah kam arah pengalamenndu e, janah gunakenlah pelajaren si enggo idatndu e guna mpegegehi kalak si deban.
16, 17. Kai si banci sipelajari arah toto pengikut Kristus i Jerusalem?
16 Kai nge si arusna sitotoken sanga tindas pemerentah kita? Adi siperdiateken, labo pindo murid-murid gelah kalak e la ngadapi tentangen. Tapi, inget kalak e kata-kata Jesus, “Adi aku pe siksa kalak e, kena pe siksana ka nge.” (Joh. 15:20) Murid-murid si setia enda mindo gelah “perdiateken” Jahwe ancamen arah kalak si nentang. (Perb. 4:29) Jelas angkai murid-murid e maka penindasen si sangana adapina situhuna enggo inubuatken, janah e sangana terjadi. Tek kalak e maka bagi toto si enggo iajarken Jesus, peraten Dibata pasti ‘terjadi i doni’ la soal kai nina penguasa-penguasa e.—Mat. 6:9, 10.
17 Gelah banci lakoken murid-murid e sura-sura Dibata Jahwe, ertoto kalak e. Nina, “Ban min kami budak-budakNdu enda pang mberitaken kataNdu.” Mis nge jawap Jahwe toto kalak e? “Mugur-ugur inganna pulung e, kerina kalak e dem alu kesah si badia. Jenari, beritaken kalak e kata Dibata alu pang.” (Perb. 4:29-31) La lit si banci mpengadi sura-sura Dibata. (Jes. 55:11) Banci saja la siakap kita ngasup ngelakoken sura-sura Dibata janah musuhta pe seh kel gegehna. Tapi adi ertoto kita man Dibata, pasti bereNa kita gegeh gelah pang kita terus mberitaken KataNa.
Ertanggung Jawap, Labo man Manusia, Tapi man Dibata (Perb. 4:32–5:11)
18. Kai nge si lakoken anggota runggun bas Jerusalem guna nampati sada ras si debanna?
18 Anggota runggun si mbaru ibentuk bas Jerusalem e minter reh teremna, seh lebih 5.000 kalak. d Amin pe beda-beda latar belakangna, murid-murid e “ersada ukurna ras sepenggejapen.” Seperukuren kalak e ras sependapat. (Perb. 4:32; 1 Kor. 1:10) Totoken murid-murid e gelah ipasu-pasu Jahwe kai si enggo lakokenna. Selain si e, sisampat-sampaten kalak e secara rohani, janah adi perlu secara materi. (1 Joh. 3:16-18) Contohna, lit sekalak murid si gelarna Jusup, si ilebuh rasul-rasul ka Barnabas. Idayakenna tanehna janah berekenna senna man rasul-rasul. Gunaken rasul-rasul sen e nampati murid-murid si mbaru si reh arah negri-negri si ndauh. Alu bage, banci kalak e terdekahen tading i Jerusalem janah erlajar terbuen kerna kinitekenna si mbaru.
19. Engkai maka Ananias ras Sapira mate ihukum Jahwe?
19 Lit sekalak dilaki ras diberuna, gelarna Ananias ras Sapira. Kalak e pe dayakenna ertana janah sumbangkenna. Tempa-tempa, enggo berekenna kerinana. Tapi, situhuna ‘bunikenna deba hasil tukur taneh e.’ (Perb. 5:2) Mate kalak e perban ihukum Jahwe. Labo perban sitiksa si berekenna, tapi perban jahat alasen kalak e mereken sumbangen janah tipuna ka kalak. ‘Labo manusia si buali kalak e, tapi Dibata.’ (Perb. 5:4) Ananias ras Sapira bali bagi kalak munapik si isumpahi Jesus. Pentingen akap kalak e duana ndarami kemulian arah jelma asangken ndatken ngena ate Dibata.—Mat. 6:1-3.
20. Pelajaren kai saja nge si banci sidat kerna mere ku Jahwe?
20 Bali bagi murid-murid si setia bas Jerusalem abad pertama, jutan Saksi jaman gundari pe meriah ukurna ndukung pendahin sebelang doni alu mereken sumbangen sukarela. Labo lit ise pe si ipaksa guna mereken waktu ras senna guna ndukung pendahin enda. Jahwe la nggit adi kita ngelayani Ia alu terpaksa ntah pe mberat ukurta. (2 Kor. 9:7) Sanga kita mere, si iperdiateken Jahwe labo jumlahna, tapi alasenta merekenca. (Mrk. 12:41-44) La ateta bagi Ananias ras Sapira. La kita nggit ngelayani Dibata perban alasen si mentingken bana ntah pe ndarami kemulian. Tapi bagi Petrus, Johanes, ras Barnabas, mbera-mbera kekelengenta man Dibata Jahwe ras man kalak si deban me si ngiahken kita ngelakoken pelayanen man Jahwe.—Mat. 22:37-40.
a Waktu guna ertoto i rumah pertoton eme sanga korban erpagi-pagi bage pe korban si karaben ipersembahken. Korban si karaben ipersembahken bas “jam si pesiwahken,” eme kira-kira jam telu karaben.
b Nen kotak “ Petrus—Nelayan si Dungna Jadi Rasul si Semangat” ras “ Johanes—Murid si Ikelengi Jesus.”
c Nen kotak “ Imam si Mbelin ras Imam-Imam Kepala.”
d Bas tahun 33 M, jumlah kalak Parisi i Jerusalem kira-kira 6.000 kalak ngenca, janah kalak Saduki sitiken ka asa si e. Banci saja e me alasen si deban maka terancam akap duana kelompok e man ajaren Jesus.