1, 2. Kai nge bedana perdalanen Barnabas ras Saul adi ibandingken ras utusen injil si deban, janah uga pendahin kalak e erban reh terna nubuat bas Perbahanen Rasul-Rasul 1:8 terjadi?

 BAS wari e, meriah kel akap turang senina bas runggun Antiokia. Arah kerina nabi bage pe guru si lit i je, Barnabas ras Saul enggo ipilih kesah si badia guna mpeseh berita si meriah ku ingan-ingan si ndauh. a (Perb. 13:1, 2) Memang sebelumna, lit piga-piga dilaki si enggo iutus guna erberita si meriah. Tapi biasana kalak e iutus ku daerah-daerah si enggo ngaloken ajaren Kristen. (Perb. 8:14; 11:22) Adi enda beda. Barnabas ras Saul iutus ku negri-negri si teremen pendudukna lenga pernah megi berita si meriah. Johanes Markus pe ikut nampati kalak e.

² Kira-kira 14 tahun sebelumna, kataken Jesus man pengikutna, “Kena pagi jadi saksiku i Jerusalem, i belang-belang Judea ras Samaria, seh ku ujung doni.” (Perb. 1:8) Emaka, sanga Barnabas ras Saul iutus ku negri si deban, reh terna me nubuat si ikataken Jesus e terjadi. b

3. Kai nge tentangen kalak si lawes-lawes atena bas abad pertama?

³ Gundari, perban enggo lit motor bage pe pesawat, sada jam ntah dua jam saja pe enggo banci kita seh ku ingan si ndauh. Tapi, bas abad pertama M la bage. Sanga si e, biasana erdalan nge kalak adi lawes-lawes atena, janah mon-mon mesera ka dalan si man lewaten. Enggo pe erdalan sada warin, banci saja 30 kilometer ngenca terdahi, janah seh kel latihna. c Emaka, iteh Barnabas ras Saul maka perdalanen kalak e labo menukah. Amin pe kalak e arus erjuang ras nggit erkorban, enggo siap kalak e mbenakenca.​—Mat. 16:24.

4. (a) Engkai maka Barnabas ras Saul si ipilih, janah uga tanggapen senina-seninana si sada kiniteken? (b) Uga nge carata ndukung kalak si dat tugas bas organisasi?

 ⁴ Engkai maka Barnabas ras Saul si ipeserap kesah si badia ‘guna ndahiken dahin si enggo itetapken’ e? (Perb. 13:2) La lit ikataken Pustaka si Badia alasenna. Tapi si pasti, kesah si badia me si milih dilaki-dilaki e. Nabi-nabi bage pe guru-guru si lit bas Antiokia nggit ngelakoken asa bancina guna nampati kalak e. Bayangkenlah uga perasan Barnabas ras Saul. Senina-seninana si sada kiniteken labo rate cian man bana. Puasa kalak e ras ertoto, janah “tamaken kalak e tanna ku datas Barnabas ras Saul, jenari utusna kalak e.” (Perb. 13:3) Kita pe, sidukung min kalak si ndatken tugas bas organisasi, termasuk dilaki-dilaki si ilantik jadi pengawas bas runggun. Ula min cian ateta man kalak si ndatken tugas istimewa e. Tapi, ‘sibuktiken maka tuhu-tuhu sikelengi ras siergai pendahin kalak e.’​—1 Tes. 5:13.

5. Ceritakenlah uga pengalamen Barnabas ras Saul sanga erberita bas Pulau Kiprus.

⁵ Kenca Barnabas ras Saul erdalan ku Selukia, eme pelabuhen si ndeher ku Antiokia, erlayar kalak e ku Pulau Kiprus kira-kira 200 kilometer dauhna. d Perban Barnabas e penduduk asli Kiprus, pasti semangat kel ia mpeseh berita si meriah man kalak si lit bas daerah asalna. Seh kenca kalak e bas Salamis, sada kota si lit i tepi laut sebelah timur pulau e, mis “beritaken  kalak e kata Dibata bas ingan-ingan pulung kalak Jahudi.” e (Perb. 13:5) Dalani Barnabas ras Saul me Pulau Kiprus e arah ujung ku ujung. Mbelin kemungkinenna erberita kalak e bas kota-kota si penting segedang perdalanenna. Emaka banci saja lit kira-kira 160 kilometer dauhna kalak e erdalan!

6, 7. (a) Ise nge Sergius Paulus e, janah engkai maka iusahaken Baryesus gelah Sergius Paulus lanai merhat megiken berita si meriah? (b) Kai si ilakoken Saul gelah sura-sura Baryesus e la terjadi?

⁶ Bas abad pertama, melala kel kalak si nembah berhala i Kiprus. Enda terbukti sanga Barnabas ras Saul seh i Papos, si lit i pinggir pantai sebelah barat Pulau Kiprus. I je jumpa kalak e ras “kalak Jahudi gelarna Baryesus. Ia tukang sihir ras nabi palsu. Ia sierdahin Gubernur Sergius Paulus. Gubernur e kalak si pentar.” f Bas abad pertama, kalak Roma si meganjang sekolahna pe, enterem ka nge si rusur mindo petunjuk man tukang sihir sope erban keputusen si penting. Sergius Paulus pe bage, amin pe ia termasuk “kalak si pentar.” Tapi, tertarik kel ia man berita Kerajan, janah “merhat kel ia megiken kata Dibata.” Si e erban la meriah ukur Baryesus. Baryesus e igelari ka Elimas, sesuai ras pendahinna. Elimas e ertina “Tukang Sihir.”​—Perb. 13:6-8.

⁷ Segat ate Baryesus nandangi berita Kerajan. Tetap atena jadi penasehat Sergius Paulus. Emaka “usahakenna gelah gubernur e la erkiniteken.” (Perb. 13:8) Tapi la pediat Saul tukang sihir istana e erban Sergius Paulus lanai tertarik man berita si meriah. Emaka, kai si ilakoken Saul? Nina Pustaka, “Saul si igelari Paulus dem alu kesah si badia, tatapna tukang sihir e, nina, ‘O kam si terus ngelakoken erbage-bage kejahaten ras tipun, kam kap anak Iblis ras musuh kerina si benar, engkai  maka terus ubahndu dalan Jahwe si benar? Nenlah! Tan Jahwe nge si ngelawan kam. Pentang me kam, janah piga-piga waktu dekahna la kam ngidah terang.’ Rempet lanai ia erpengidah janah gelap akapna. Emaka mutar-mutar ia ndarami kalak gelah lit si negu ia.” g Uga tanggapen Sergius Paulus? “Ngidah kejadin e, takjup gubernur e man ajaren Jahwe, emaka jadi kalak si tek ia.”​—Perb. 13:9-12.

8. Gundari, uga carata ngusih Paulus si perpang?

⁸ Paulus la mbiar man Baryesus. Kita pe ula min mbiar. Sanga lit penentang si erusaha gelah kalak si berminat ragu man kai si ipelajarina, sibelalah kebenaren. Memang, arus siusahaken gelah ‘mehuli ras ngena ate kalak rananta bagi itama sira.’ (Kol. 4:6) Tapi, siusahaken asa bancina nampati kalak si berminat tetap erlajar kebenaren amin pe lit si merawa. Bagi Baryesus, agama palsu lalap ‘ngubah dalan Jahwe si benar.’ Emaka la perlu kita mbiar ncidahken kesalahen kalak e. (Perb. 13:10) Bagi Rasul Paulus, pang kita mberitaken kebenaren janah siusahaken nampati kalak si berminat. Gundari labo sampati Dibata kita erban mukjizat, bagi si ilakokenNa man Paulus. Tapi tek kita pasti gunaken Jahwe kesahNa si badia guna narik kalak si cocok ku kebenaren.​—Joh. 6:44.

9. Uga Paulus ras Barnabas jadi usihen man kalak si lit tanggung jawapna bas runggun gundari?

⁹ Lawes me kelompok e nadingken Papos janah erlayar ku Perge. Perge e lit i tepi laut Asia Kecil. Jarak Papos ku Perge eme kira-kira 250 kilometer adi perdalanen arah laut. Kenca si e, iubah penulis me carana nceritaken kerna kelompok e. Bas Perbahanen Rasul-Rasul 13:13, kelompok e ikataken “Paulus ras teman-temanna.” Enda banci saja ertina Paulus me si minpin kelompok  e. Tapi labo lit ikataken maka cian ate Barnabas man Paulus. Sebalikna, duana dilaki e terus kerja sama ngelakoken peraten Dibata. Paulus ras Barnabas jadi usihen si mejile man kalak si lit tanggung jawapna bas runggun gundari. Kita kalak Kristen, labo kita ersaing guna jadi kalak si penting. Tapi siinget kai nina Jesus sanga katakenna, “Kerina kena ersenina.” Nina ka, “Ise pe si peganjangna bana ipeteruk pagi, janah ise pe si peterukna bana ipeganjang pagi.”​—Mat. 23:8, 12.

10. Uga nge perdalanen Paulus ras Barnabas Perge nari ku Antiokia Pisidi?

¹⁰ Kenca seh kalak e i Perge, lawes me Johanes Markus nadingken Paulus ras Barnabas. Kenca si e mulih ia ku Jerusalem. La lit ijelasken bas Pustaka engkai maka rempet-rempet ia lawes. Tapi Paulus ras Barnabas ngelanjutken perdalanenna arah Perge nari ku Antiokia si lit i Pisidi. Kota enda lit bas propinsi Galati. Perdalanen enda labo menukah perban Antiokia Pisidi e daerah si meganjang, kira-kira 1.100 meter i datas permukaan laut. Gelah seh ku je, arus ilewati kalak e daerah pegunungen, i je pe bahaya janah biasana melala perampok. Si parahna ka, mbelin kemungkinenna sanga si e lit piga-piga penakit Paulus. h

11, 12. Sanga ngerana Paulus bas ingan pulung kalak Jahudi i Antiokia Pisidi, uga nge banna gelah tertarik kalak man beritana?

¹¹ Bas Antiokia Pisidi, sanga wari Sabat, masuk Paulus ras Barnabas ku ingan pulung kalak Jahudi. Ikataken bas Pustaka, “Kenca dung Undang-Undang Musa ras Ajaren Nabi-Nabi ibacaken i lebe-lebe jelma si enterem, kepala ingan pulung kalak Jahudi nuruh kalak si deban mpeseh kata man kalak e, ‘O turang senina, adi lit rananndu si banci mpegegehi si pulung, katakenlah.’” (Perb. 13:15) Cinder me Paulus guna ngerana.

 ¹² Ngerana me Paulus janah nina, “O kalak Israel bage pe kena kerina si mbiar man Dibata.” (Perb. 13:16) Kalak si megiken Paulus e eme kalak Jahudi bage pe kalak si ngikutken agama Jahudi. La akui kalak e maka Jesus eme Mesias. Jadi, uga cara Paulus erban kalak e tertarik? Tangtangna, jelasken Paulus kai si ilakoken Jahwe man bangsa Israel. Jelaskenna uga Jahwe ‘erban kalak e jadi bangsa si mbelin sanga kalak e jadi kalak asing bas taneh Mesir.’ Janah kenca kalak e ibebasken, “bas taneh mesawang, sabar Ia man kalak e” sedekah 40 tahun. Ceritaken Paulus ka uga Jahwe nampati kalak Israel ndatken Negri si Ijanjiken, janah uga Jahwe ‘mereken taneh e jadi warisen man nini bulang kalak e.’ (Perb. 13:17-19) Adi bas wari Sabat, biasana lit ibacaken ayat-ayat alu sora si megang. Lit si erpendapat maka isinggung Paulus ayat-ayat tertentu arah si enggo ibacaken ndai. Adi tuhu kin bage, enda contoh si deban si mbuktiken maka Paulus e nggit ‘ngelakoken kai pe guna erbage-bage jelma.’​—1 Kor. 9:22.

13. Uga carana gelah beritata menarik akap kalak?

¹³ Kita pe perlu erusaha gelah beritata menarik akap kalak. Misalna, adi siteh kai agama sekalak jelma, banci sibahas kai si penting akapna. Selain si e, banci ka sikutip piga-piga ayat Pustaka si mungkin itehna. Adi sipindoken ia mbacaken ayat arah Pustakana sendiri, mungkin lebih mejile hasilna. Perlu sidarami cara-cara gelah beritata menarik akap kalak.

14. (a) Uga nge Paulus mulai erberita kerna Jesus, janah persinget kai si iberekenna? (b) Uga tanggapen jelma si enterem e?

¹⁴ Kenca si e, ijelasken Paulus maka raja-raja Israel eme nini bulang Jesus. Ijelaskenna ka maka Johanes Peridiken nikapken kalak gelah banci ngaloken “sekalak juru selamat man kalak Israel eme Jesus.” Kenca si e, jelasken Paulus uga Jesus ibunuh ras ipekeke. (Perb. 13:20-37) Nina Paulus, “Emaka, kukataken man kena turang senina, arah ia ngenca dosa banci iampuni. Arah ia, kerina kalak si tek banci ikataken la ersalah.” Kenca si e, ipersingeti Rasul Paulus me kalak si megiken ia, “Hati-hatilah kena gelah kai si itulisken bas Ajaren Nabi-Nabi la terjadi man kena, nina, ‘Perdiatekenlah, o tukang hina. Senggetlah janah kerneplah, sebap Aku sangana ndahiken dahin bas jaman kena, pendahin si la iteki kena amin pe ijelasken alu jelas man kena.’” Banci saja sengget Paulus ngidah tanggapen kalak e. Nina Pustaka, “Pindoken kalak e kel gelah bahasna kerna si e mulihi bas wari Sabat si reh.” Selain si e, kenca mulih arah ingan pulung kalak Jahudi e, “enterem kalak Jahudi ras kalak si ngikutken agama Jahudi si nembah Dibata, ngikutken Paulus ras Barnabas.”​—Perb. 13:38-43.

15. Kai si terjadi bas wari Sabat berikutna?

¹⁵ Bas wari Sabat berikutna, “hampir kerina kalak bas kota e” pulung guna megiken Paulus. Piga-piga kalak Jahudi la senang kerna si e, janah “mulai hinana kai si kataken Paulus.” Tapi, Paulus ras Barnabas pang ngataken  man kalak e, “Tuhu, Kata Dibata arus lebe ipeseh man kena. Tapi perban tulak kena janah cidahken kena maka la kena cocok ngaloken kegeluhen si rasa lalap, lawes kami ku bangsa-bangsa. Sebap enggo perentahken Jahwe man kami alu kata-kata enda, ‘Enggo Kupilih kam jadi terang man bangsa-bangsa, gelah kam si maba keselamaten ku ujung-ujung doni.’”​—Perb. 13:44-47; Jes. 49:6.

16. Kai si ilakoken Paulus ras Barnabas sanga kalak e ipedarat arah kota e?

¹⁶ Meriah ukur kalak si labo Jahudi megi berita Paulus, janah “kerina kalak si pusuh ras perbahanenna ngaloken kebenaren guna kegeluhen si rasa lalap jadi kalak si tek.” (Perb. 13:48) Berita si meriah mis seh ku kerina daerah e. Tapi tanggapen kalak Jahudi beda kel. Enggo ikataken duana utusen injil e maka amin pe berita kerna Mesias leben ipeseh man kalak e, tulak kalak e Mesias. Emaka, ihukum Dibata me kalak e. Dungna, ipengaruhi kalak Jahudi me dilaki-dilaki si terpandang ras diberu-diberu si ihamati gelah Paulus ras Barnabas isiksa. Emaka, “Paulus ras Barnabas isiksa janah ipedarat arah kota e nari.” Kai si ilakoken Paulus ras Barnabas? “Agui Paulus ras Barnabas abu si lit bas nahena guna jadi tanda persinget man kalak e, jenari lawes kalak e ku Ikoni.” Lanai nge lit kalak Kristen i Antiokia Pisidi? Labo bage! Murid-murid si itadingken kalak e “terus dem alu keriahen ukur ras kesah si badia.”​—Perb. 13:50-52.

17-19. Uga kita banci ngusih Paulus ras Barnabas, janah uga si e erban kita tetap ermeriah ukur?

¹⁷ Lit pelajaren si penting si banci sidat arah cara Paulus ras Barnabas ngadapi tentangen. La kita nggit ngadi erberita amin pe kalak si lit wewenangna bas doni enda erusaha gelah lanai kita erberita. Sanga kalak Antiokia la nggit megiken beritana, ‘agui Paulus ras Barnabas abu si lit bas nahena.’ E labo ertina merawa kalak e, tapi e ertina lanai kalak e ertanggung jawap la soal kai pe pagi si terjadi. Teh kalak e maka labo banci paksana gelah kalak tek man Jesus. Si banci ilakokenna eme terus erberita. E me sebapna lawes kalak e ku Ikoni.

¹⁸ Uga nge keadan murid-murid si mbaru i Antiokia sanga Paulus ras Barnabas nadingken ingan e? Memang, enterem kalak bas daerah e si rate segat man kalak e. Tapi, tetap meriah ukur kalak e la soal nggit kalak megiken berita si meriah ntah lang. Nina Jesus, “Si ermeriah ukur eme kalak si megiken kata Dibata ras ndalankenca!” (Luk. 11:28) Janah memang e me tekad murid-murid si lit i Antiokia Pisidi.

¹⁹ Bagi Paulus ras Barnabas, teruslah siinget maka tanggung jawapta eme mberitaken berita si meriah. Si mutuskenca nggit kalak megiken beritata ntah lang, labo kita tapi kalak e. Adi la kalak nggit megiken beritata, banci kita erlajar arah murid-murid bas abad pertama. Amin pe kita isiksa, banci tetap meriah ukurta adi siinget maka meherga kel kebenaren janah nggit kita itegu-tegu kesah si badia.​—Gal. 5:18, 22.