PASAL 1
“Laweslah, Banlah Kalak . . . Jadi Murid-Muridku”
Informasi singkat kerna buku Perbahanen Rasul-Rasul ras kai hubungenna man banta gundari
1-6. Ceritaken pengalamen bas paragrap enda, termasuk pengalamen si ingetndu si ncidahken Saksi-Saksi Jahwe erberita bas erbage-bage situasi.
REBECCA, sekalak Saksi si nguda denga si tading bas Ghana, banna sekolahna jadi daerahna erberita. Lalap babana publikasita bas tas sekolahna. Sanga istrahat, daramina kesempaten guna erberita man teman-teman sekolahna. Piga-piga teman sekelasna enggo mulai erlajar Pustaka ras ia.
2 Bas Pulau Madagaskar, i deher pantai Afrika, lit dua perintis si rusur lawes ku sada kuta si terpencil. Jarakna kira-kira 25 kilometer. Erdalan kalak e amin gia melas kel wari. Bas kuta e, sampatina piga-piga kalak erlajar Pustaka.
3 Guna njumpai kalak si tading bas tepi Sungai Paraguay ras Sungai Paraná, Saksi Jahwe bas Paraguay bage pe turang senina arah 15 negri si deban erban kapal si agak galang si banci iingani 12 kalak. Kapal e me si igunaken perberita si semangat e mpeseh berita si meriah. Erberita kalak e ku daerah-daerah si la banci idahi alu transportasi si deban.
4 Bas Amerika Utara eme Alaska, Saksi-Saksi Jahwe erberita man turis sanga liburen musim panas. Kenca reh hangatna cuaca, rehen kapal-kapal si maba turis arah erbage bangsa. Emaka Saksi-Saksi Jahwe si lit bas daerah e enggo ersikap bas pelabuhen. Pajang kalak e erbage-bage publikasi si menarik bas erbage-bage bahasa. Bas daerah e pe, naik pesawat kalak e guna ndahi kuta-kuta bas daerah terpencil. Hasilna, berita si meriah banci ipeseh man kalak Aleut, Atabaskan, Simsian, ras Tlingit.
5 Larry, si tading bas panti jompo i Texas, AS, erberita bas inganna tading e. Amin pe lanai ia banci miser arah kursi rodana perban kecelakan, lalap ia sibuk. Ceritakenna Kerajan Dibata bage pe arapenna maka bas doni si mbaru pagi banci ka ia erdalan mulihi.—Jes. 35:5, 6.
6 Bas bagin utara Myanmar, lit iban acara pertemuanta. Piga-piga Saksi Jahwe naik kapal feri telu wari dekahna gelah seh ku je arah Mandalay nari. Perban semangat kalak e mberitaken berita si meriah, baba kalak e publikasita janah tawarkenna man penumpang si deban. Tiap ngadi kapal e bas sada kota ntah pe kuta, turang seninata si semangat e minter nusur janah tawarkenna publikasita man penduduk setempat. Kenca mulih kalak e ku kapal, enggo ka dat kalak e “daerah si mbaru” eme penumpang si mbaru denga nangkih ku kapal e.
7. Cara kai saja si ipake umat Jahwe guna erberita, janah kai tujunna?
7 Bagi piga-piga contoh si lit i datas, banci siidah umat Jahwe si semangat i sebelang doni sangana ‘njelasken kerna Kerajan Dibata.’ (Perb. 28:23) Erberita kalak e arah rumah ku rumah, bas dalan, arah surat, ntah pe arah telepon. La soal kalak e sangana naik bus, erdalan bas taman, ntah pe sanga istrahat bas inganna erdahin, lalap darami kalak e kesempaten guna erberita kerna Kerajan Dibata. Carana banci saja beda-beda, tapi tujunna seri, eme mberitaken berita si meriah i ja kin pe lit kalak.—Mat. 10:11.
8, 9. (a) Engkai maka pendahin erberita si enggo reh belangna banci ikataken mukjizat? (b) Penungkunen si menarik kai nge si perlu siukuri, janah kai nge si banci silakoken guna ndatken jawapenna?
8 Man bandu si mbaca buku enda si keleng ate kami, ikut nge kam bas dahin erberita si enggo ilakoken bas lebih 235 negri? Adi ue, e ertina ikut kam erban pendahin mberitaken berita Kerajan enda reh belangna. Pendahin enda luar biasa. Kai si enggo silakoken bas pendahin e banci ikataken mukjizat. Melala siadapi tentangen, termasuk larangen arah pemerentah bage pe penindasen si kejam. Tapi Saksi-Saksi Jahwe terus mberitaken berita si meriah kerna Kerajan Dibata man kalak arah kerina bangsa.
9 Cuba siukuri, amin pe melala siadapi tentangen janah usahaken Setan mpengadi kita, berita Kerajan banci terus iberitaken. Engkai? Guna njawap penungkunen e, mari siperdiateken kai si terjadi bas abad pertama M. Pendahin si ilakoken Saksi-Saksi Jahwe gundari situhuna nerusken pendahin si enggo imulai bas abad pertama.
Pendahin si Seh ku Sebelang Doni
10. Uga Jesus nggunaken kegeluhenna, janah kai nge si enggo itehna kerna pendahin e?
10 Dahin erberita eme dahin si pentingna si ilakoken Jesus sanga ia i doni. Ia me si mbentuk runggun Kristen si terus ngelakoken pendahin e seh ngasa gundari. Pernah kataken Jesus, “Arus ka kuberitaken berita si meriah kerna Kerajan Dibata ku kota-kota si deban, sebap aku isuruh guna si e.” (Luk. 4:43) Iteh Jesus, pendahin e labo banci idungina sisada. La ndekah sope kematenna, inubuatkenna maka berita si meriah kerna Kerajan iberitaken pagi “man kerina bangsa.” (Mrk. 13:10) Tapi, uga nge pendahin enda ilakoken ras ise si ndahikenca?
“Laweslah, banlah kalak arah kerina bangsa jadi murid-muridku.”—Matius 28:19
11. Tugas penting kai nge si bere Jesus man murid-muridna, janah dukungen kai si dat kalak e guna ndahiken tugas e?
11 Kenca Jesus mate janah ipekeke, icidahken Jesus dirina man murid-muridna, janah berena tugas si penting man kalak e. Nina, “Emaka, laweslah, banlah kalak arah kerina bangsa jadi murid-muridku, peridikenlah kalak e bas gelar Bapak ras Anak ras kesah si badia, ajarilah kalak e ngelakoken kerina si enggo kuperentahken man kena. Ingetlah! Lalap pagi aku ras kena seh ku kedungen jaman enda.” (Mat. 28:19, 20) Kata-kata “lalap pagi aku ras kena” ncidahken maka Jesus pasti nampati murid-muridna bas pendahin erberita ras erban murid. Kalak e perlu dukungen sebap enggo inubuatken Jesus maka pagi “segat ate kerina bangsa” man kalak e. (Mat. 24:9) Lit ka dukungen si deban si banci andalken murid-murid e. Muat Jesus nangkih ku surga, katakenna maka aloken kalak e pagi kuasa arah kesah si badia gelah kalak e banci jadi saksi-saksi Jesus “seh ku ujung doni.”—Perb. 1:8.
12. Penungkunen kai saja nge si lit jawapenna bas buku Perbahanen Rasul-Rasul, janah engkai maka arus siteh jawapenna?
12 Gundari, turah piga-piga penungkunen si penting enda: Serius nge tugas e iakap rasul-rasul Jesus bage pe murid-murid si deban? Bas abad pertama, nggit nge kalak Kristen si sitik e mberitaken Kerajan Dibata amin gia isiksa alu kejam? Tuhu nge dat kalak e dukungen arah Dibata Jahwe, Jesus, malekat-malekat, bage pe arah kesah si badia Jahwe guna erban murid? Jawapen arah penungkunen enda bage pe penungkunen si deban lit bas buku Perbahanen Rasul-Rasul. Arus siteh jawapenna. Engkai? Enggo erjanji Jesus maka pendahin si enggo itugaskenna enda terus pagi ilakoken “seh ku kedungen jaman enda.” Emaka, kerina kalak Kristen situhu-tuhu arus ndalanken tugas e, termasuk kita si nggeluh bas pendungi jaman enda. Jadi, meriah kel ukurta mpelajari cataten sejarah si lit bas buku Perbahanen Rasul-Rasul.
Informasi Singkat kerna Buku Perbahanen Rasul-Rasul
13, 14. (a) Ise penulis buku Perbahanen Rasul-Rasul, janah ja nari datna informasina? (b) Kai nge isi buku Perbahanen Rasul-Rasul?
13 Ise nge penulis buku Perbahanen Rasul-Rasul? Bas buku e labo lit ituriken ise penulisna. Tapi arah kata-kata pembuka bas buku e, jelas siteh penulis buku Perbahanen Rasul-Rasul seri ras penulis Injil Lukas. (Luk. 1:1-4; Perb. 1:1, 2) Emaka, mbarenda nari, Lukas me si ianggap penulis buku e. Ia sekalak ‘dokter si ikelengi’ bage pe ahli sejarah si teliti. (Kol. 4:14) Kejadin-kejadin si ibahas bas buku e terjadi bas jangka waktu kira-kira 28 tahun. Kejadin e imulai sanga Jesus terangkat ku surga bas tahun 33 M seh ngasa Rasul Paulus ipenjaraken i Roma kira-kira tahun 61 M. Bas melala kejadin si ceritaken Lukas, ubahna kata ganti “kalak e” jadi “kami.” Jenari siteh maka ikut ia bas kejadin e. (Perb. 16:8-10; 20:5; 27:1) Ate Lukas tepat min kai si itulisna. Emaka banci saja ngerana ia lebe man Paulus, Barnabas, Pilipus, ras kalak si deban sope itulisna buku Perbahanen Rasul-Rasul.
14 Kai nge isi buku Perbahanen Rasul-Rasul? Adi bas buku Injil Lukas, itulis Lukas kerna kata-kata Jesus bage pe perbahanenna. Tapi bas buku Perbahanen Rasul-Rasul iceritakenna kata-kata pengikut Jesus bage pe perbahanen kalak e. Isi buku e eme kerna kalak si ngelakoken pendahin si luar biasa amin pe kalak e ianggap “rakyat biasa si la erpendidiken.” (Perb. 4:13) Intina, bas buku e iceritaken man banta uga kin tangtangna runggun Kristen ibentuk janah uga e berkembang. Banci ka siteh arah buku e uga cara kalak Kristen bas abad pertama erberita ras uga perasan kalak e nandangi tugas e. (Perb. 4:31; 5:42) Bas buku e pe ituriken uga pentingna kesah si badia i bas mpebelang berita si meriah. (Perb. 8:29, 39, 40; 13:1-3; 16:6; 18:24, 25) Bali bagi buku-buku si deban bas Pustaka, bas buku Perbahanen Rasul-Rasul pe itonjolken kerna uga Kerajan si ipinpin Kristus mpebadia gelar Dibata. Iceritaken ka uga murid-murid banci tetap erberita amin pe melala tentangen.—Perb. 8:12; 19:8; 28:30, 31.
15. Kai saja nge gunana adi sipelajari buku Perbahanen Rasul-Rasul?
15 Adi manjar-anjar siukuri kerna murid-murid si semangat ras pang erberita, reh belinna me pengerganta man kalak e. Teriahken kita guna ngusih kiniteken kalak e. Hasilna, banci kita lebih siap ndalanken tugasta guna ‘lawes ras erban murid.’ Buku si sangana bacandu enda irancang guna nampati kam mpelajari terbagesen buku Perbahanen Rasul-Rasul.
Buku si Nampati Kita Erlajar Pustaka
16. Kai nge tujun buku enda?
16 Lit telu tujun buku enda: (1) gelah reh tekna kita maka gunaken Jahwe kesah si badiaNa ndukung pendahin erberita ras erban murid, (2) gelah reh semangatna kita bas pelayanen alu mpelajari usihen arah pengikut Jesus bas abad pertama, ras (3) gelah reh bagesna pengerganta man organisasi Jahwe janah reh bagesna pengerganta man kalak si ertanggung jawap bas runggun bage pe bas pendahin erberita.
17, 18. Uga nge susunen buku enda, ras fitur kai saja si erguna sanga kam erlajar pribadi?
17 Uga nge susunen buku enda? Buku enda ibagi jadi waluh bagin. Tiap bagin mbahas bagin tertentu arah buku Perbahanen Rasul-Rasul. Tujun buku enda labo mbahas buku Perbahanen Rasul-Rasul ayat per ayat, tapi guna nampati kita ndalanken pelajaren arah kejadin si iceritaken. Tiap pasal bas buku enda ibenai alu kalimat si jadi inti pasal e, janah itulisken ka ayat si apai bas buku Perbahanen Rasul-Rasul si nandangi ibahas.
18 Lit ka fitur-fitur si deban bas buku enda si erguna sanga kam erlajar pribadi. Bas buku enda lit gambar-gambar si mejile si nceritaken kejadin si luar biasa bas buku Perbahanen Rasul-Rasul. Gambar-gambar e banci nampati kam mbayangken uga kejadin situhuna. Bas melala pasal, lit kotak-kotak si isina keterangen tambahen si erguna. Lit kotak si njelasken sekalak tokoh Pustaka si kinitekenna perlu kel siusih. Bas kotak si deban, lit ka terbuen keterangen kerna ingan, kejadin, kebiasan, ntah pe kalak si deban si iceritaken bas buku Perbahanen Rasul-Rasul.
Dahikenlah daerah tugasndu janah ingetlah maka kentisik nari ngenca waktuna
19. Penungkunen kai nge si perlu rusur siukuri?
19 Buku enda banci nampati kam mereksa dirindu alu jujur. La soal asa dekahna kam enggo ngelayani jadi perberita Kerajan, perlu rusur ukurindu kai nge si pelebendu bas geluhndu janah uga nge perasanndu kerna pelayanen Kristen. (2 Kor. 13:5) Sungkunilah bandu, ‘Tetap denga nge kuanggap pendahin erberita e kentisik nari ngenca waktuna? (1 Kor. 7:29-31) Yakin nge aku mpeseh berita si meriah janah semangat nge aku mberitakenca? (1 Tes. 1:5, 6) Kulakoken nge asa ngasupku guna mereken terbuen bas pendahin erberita ras erban murid?’—Kol. 3:23.
20, 21. Engkai maka mendesak kel tugas si enggo ibereken man banta, janah kai arusna tekadta?
20 Teruslah siinget maka tugasta si pentingna eme erberita ras erban murid. Tambah warina, tugas e tambah mendesakna. Kedungen doni enda terus reh deherna. Seh kel buena kegeluhen si ipertaruhken. La siteh asa nari buena kalak si pusuh ras perbahanenna ngaloken kebenaren. (Perb. 13:48) Tapi kita ertanggung jawap guna nampati kalak si bage sope terlambat.—1 Tim. 4:16.
21 Emaka, seh kel pentingna siusih perberita Kerajan si semangat bas abad pertama. Sanga pelajarindu kari buku enda, ukurilah uga carana gelah reh semangatna janah reh pangna kam erberita. Mbera-mbera reh belinna tekadndu guna terus ‘njelasken kerna Kerajan Dibata.’—Perb. 28:23.