PASAL 7
Mpeseh “Berita si Meriah kerna Jesus”
Pilipus jadi usihen i bas erberita
Arah Perbahanen Rasul-Rasul 8:4-40
1, 2. Bas abad pertama, kai nge si terjadi sanga usahaken penentang mpengadi dahin erberita?
PENINDASEN si reh kejamna enggo imulai. “Itindas” Saul me kalak Kristen. Bas bahasa aslina, istilah “itindas” banci nggambarken perbahanen si seh kel kejamna. (Perb. 8:3) Kiam me murid-murid arah Jerusalem, emaka lit piga-piga kalak si erpengakap maka enggo berhasil Saul mpengadi dahin erberita. Tapi kepeken lit hasil si la isangka-sangka perban kalak Kristen enggo merap. Kai e?
2 Kalak Kristen si enggo merap ndai mulai “mberitaken berita si meriah kerna kata Dibata” bas negri-negri inganna ngungsi. (Perb. 8:4) Cuba bayangken! Penentang labo saja gagal mpengadi dahin erberita, tapi situhuna enggo sampati kalak e gelah berita si meriah reh belangna iberitaken. Perban enggo merap murid-murid iban penentang, dungna kalak arah daerah si ndauh banci megiken berita si meriah. Bage ka me si terjadi gundari. Sinen kari kerna si e.
“Kalak si Merap” (Perb. 8:4-8)
3. (a) Ise nge Pilipus e? (b) Engkai maka teremen penduduk Samaria lenga pernah megi berita si meriah, tapi kai si nubuatken Jesus kerna daerah e?
3 Salah sada arah “kalak si merap” e eme Pilipus. a (Perb. 8:4; nen kotak “ Pilipus ‘Sekalak Perberita.’”) Lawes ia ku Samaria. Teremen penduduk bas kota e lenga pernah megiken berita si meriah. Enda perban pernah bereken Jesus petunjuk man rasul-rasulna, nina, “Ula masuk ku kota kalak Samaria. Tapi laweslah kena ndahi kalak Israel saja si bagi biri-biri si enggo papak.” (Mat. 10:5, 6) Tapi, teh Jesus maka lit nge kari masana, pasti ibegi kalak Samaria berita si meriah. Sope Jesus terangkat ku surga, nina, “Kena pagi jadi saksiku i Jerusalem, i belang-belang Judea ras Samaria, seh ku ujung doni.”—Perb. 1:8.
4. Uga tanggapen kalak Samaria man berita si ipeseh Pilipus, janah kemungkinen engkai maka bage tanggapen kalak e?
4 Idah Pilipus maka Samaria “enggo megersing janah enggo banci iperani.” (Joh. 4:35) Berita si ipeseh Pilipus erban malem kel ate kalak si tading i je. Engkai? Perban sedekah enda kalak Jahudi la nggit erurusen ras kalak e. Rendah akap kalak Jahudi bage pe kalak Parisi ngidah kalak Samaria. Tapi meriah kel ukur kalak Samaria perban banci begi kalak e berita si meriah si mereken arapen man kerina kalak. Semangat kel Pilipus erberita man kalak Samaria. Enda ncidahken maka la ia terpengaruh man cara rukur kalak si deban si rendah kapna kalak Samaria. Emaka banci jadi, enda salah sada alasen engkai maka “tutus kel ate” kalak Samaria megiken Pilipus.—Perb. 8:6.
5-7. Turikenlah piga-piga contoh penyebaren berita si meriah kenca kalak Kristen enggo merap.
5 Bali bagi bas abad pertama, gundari pe penindasen labo banci erban umat Dibata ngadi erberita. Banci saja kalak Kristen ipaksa pindah ku ingan si deban, contohna ku penjara ntah pe ku negri si deban. Tapi situasi e banci erban reh teremna kalak megiken berita si meriah. Misalna bas Perang Doni II, Saksi-Saksi Jahwe banci erberita amin pe kalak e sangana bas kamp-kamp konsentrasi Nazi. Contohna, lit sekalak Jahudi si jumpa ras Saksi Jahwe i je. Nina, “Perban kuidah Saksi Jahwe tetap setia, tek aku maka kiniteken kalak e arah Pustaka. Dungna aku pe jadi Saksi Jahwe.”
6 Lit ka penentang si nggit megiken berita si meriah. Contohna, sanga sekalak Saksi si gelarna Franz Desch ipindahken ku kamp konsentrasi Gusen i Austria, banci sampatina sekalak perwira Nazi erlajar Pustaka. Bayangken uga riahna ukur kalak e sanga jumpa ka piga-piga tahun kenca si e. Jumpa kalak e bas acara pertemuan Saksi-Saksi Jahwe, janah duana kalak e enggo jadi perberita si meriah!
7 Pengalamen si bage pe terjadi sanga kalak Kristen arus kiam ku negri si deban perban itindas. Contohna, bas tahun 1970-en, enterem kalak bas Mozambik ndatken berita si meriah sanga Saksi-Saksi Jahwe arah Malawi terpaksa kiam ku ingan e. Amin pe bas pudi wari lit ka tentangen i Mozambik, berita si meriah terus iberitaken i je. Bagenda nina Francisco Coana, “Memang, lit si piga-piga kali itangkap ras itahan perban erberita. Tapi perban enterem kalak si nggit ngaloken berita si meriah, tek kami pasti kami sampati Dibata, bali bagi kalak Kristen bas abad pertama.”
8. Kai nge pengaruh perubahen politik ras ekonomi ku pendahin erberita?
8 Memang, labo penindasen saja si erban berita si meriah seh ku daerah-daerah si deban. Puluhen tahun enda, enterem kalak si arus pindah ku negri si deban perban terjadi perang ntah pe kesuliten ekonomi. Dungna banci begi kalak e berita si meriah ras erlajar Pustaka bas inganna si mbaru e. Biasana beda-beda bahasa si ipake kalak e, emaka berita si meriah perlu ipeseh bas bahasa si ipakena. Bas daerahndu, usahakenndu nge mberitaken berita si meriah man kalak “arah kerina bangsa, suku, umat, ras bahasa”?—Ket. 7:9.
“Bere Ka min man Bangku Kuasa si Bage” (Perb. 8:9-25)
“Idah Simon aloken kalak e kesah si badia sanga tama rasul-rasul tanna ku datas kalak e, janjikenna mere sen man rasul-rasul e.”—Perbahanen Rasul-Rasul 8:18
9. Ise nge Simon e? Kemungkinen, kai nge si erban hebat kel kapna ngidah Pilipus?
9 Melala kel mukjizat si ilakoken Pilipus i Samaria. Misalna, ipepalemna kalak si cacat janah banci ka ipelawesna malekat-malekat jahat. (Perb. 8:6-8) Lit sekalak dilaki si hebat kel kapna kengasupen Pilipus erban mukjizat. Gelar dilaki e eme Simon. Ia sekalak tukang sihir janah segan kel kalak man bana. Bagenda ning kalak kerna Simon, “Dilaki enda kap Kuasa Dibata.” Tapi gundari, idah Simon kuasa Dibata situhu-tuhu arah mukjizat si ilakoken Pilipus janah dungna Simon jadi kalak si erkiniteken. (Perb. 8:9-13) Tapi bas pudi wari, iuji me alasen Simon erkiniteken. Uga carana?
10. (a) Kai si ilakoken Petrus ras Johanes i Samaria? (b) Kai si ipindo Simon man Petrus ras Johanes kenca idahna murid-murid si mbaru ngaloken kesah si badia?
10 Sanga iteh rasul-rasul reh buena kalak Kristen i Samaria, iutus kalak e Petrus ras Johanes ku je. (Nen kotak “ Gunaken Petrus ‘Kunci-Kunci Kerajan.’”) Kenca seh i Samaria, itamaken rasul-rasul e tanna ku datas murid-murid si mbaru, emaka aloken kalak e me kesah si badia. b Tertarik kel Simon ngenen si e. Emaka katakenna man rasul-rasul, “Bere ka min man bangku kuasa si bage, gelah man ise pe kutamaken tanku banci alokenna kesah si badia.” Bereken Simon ka atena sen man kalak e, akapna banci tukurna kengasupen si rehna arah Dibata e!—Perb. 8:14-19.
11. Kai nge nina Petrus guna mpersingeti Simon, janah uga tanggapen Simon?
11 Tegas kel jawapen Petrus man Simon. Nina, “Kerneplah kam ras senndu ena, sebap akapndu banci tukurndu pemere Dibata alu sen. La lit baginndu bas si enda, sebap idah Dibata la mehuli ukurndu.” Isuruh Petrus me gelah Simon ertobat janah ertoto gelah ia iampuni. Nina Petrus, “Pindolah man Jahwe, mbera-mbera ampuniNa perukurenndu si jahat e.” Kepeken Simon e labo kalak si jahat, nggit ia ngelakoken kai si benar, tapi paksa si e lit sura-surana si salah. Emaka ipindokenna man rasul-rasul, “Totokenlah aku, pindolah man Jahwe gelah kai pe si kataken kena e la terjadi man bangku.”—Perb. 8:20-24.
12. Kai ertina “simoni,” janah kai buktina agama-agama Kristen si murtad lalap ngelakoken simoni?
12 Kai si kataken Petrus man Simon ndai jadi persinget man kalak Kristen si gundari. Arah kejadin e me turah istilah “simoni.” “Simoni” maksudna praktek jual beli jabaten, khususna bas bidang agama. Mbarenda nari, agama-agama Kristen si murtad, ngelakoken simoni. Contohna, lit sada buku bas tahun 1878 si ngataken maka tiap lit pemilihen Paus, pasti lit si mereken sen gelah ia ipilih jadi Paus. Lanai kalak e mela ngelakokenca, malahen lanai tutup-tutupina kerna si e.
13. Uga carana gelah kalak Kristen la ngelakoken simoni?
13 Kalak Kristen arus hati-hati gelah la lakokenna simoni. Misalna, la berekenna hadiah ntah pe puji-pujina kalak si banci mereken tugas tambahen man bana bas runggun. Sebalikna pe bage, kalak si banci mereken tugas tambahen arus hati-hati gelah la kelengen atena kalak si bayak asangken kalak si mesera. Duana situasi e termasuk simoni. Umat Dibata arus usahakenna jadi “kalak si kitikna.” Timaina Dibata si ngelantik ia ndatken tugas tambahen. (Luk. 9:48) Bas organisasi Jahwe, la lit ingan man kalak si “ndarami kemulian man diri sendiri.”—Kua. 25:27.
“O Pak, Angkandu nge Kai si Bacandu e?” (Perb. 8:26-40)
14, 15. (a) Ise nge “pejabat” arah Etiopia e, janah uga Pilipus banci jumpa ras ia? (b) Uga nge tanggapen pejabat Etiopia e man berita si ipeseh Pilipus, janah ja nari siteh maka labo merudu-rudu ia iperidiken? (Nen cataten i teruh.)
14 Isuruh malekat Jahwe Pilipus lawes ku dalan si turun-turunen arah Jerusalem nari ku Gasa. Mungkin tersungkun-sungkun Pilipus engkai maka arus ia lawes ku je. Tapi kenca jumpa ia ras sekalak pejabat Etiopia, mis tehna kai alasenna. Pejabat e sangana “mbaca kitap Nabi Jesaya alu ersora.” (Nen kotak “ ‘Sida-Sida’ ntah ‘Pejabat Istana’?”) Iahken kesah si badia Pilipus guna ndeheri gereta pejabat e. Sungkuni Pilipus pejabat e janahna kiam arah samping gereta e. Nina, “O Pak, angkandu nge kai si bacandu e?” Nina pejabat e, “Ja nge banci kuangka, adi la lit si ngajari aku?”—Perb. 8:26-31.
15 Iajak pejabat Etiopia e Pilipus nangkih ku geretana. Bayangken uga riahna pembahasen kalak e! Bali bagi enterem kalak, la iteh pejabat Etiopia e ise “biri-biri” ntah pe ‘pelayan’ si lit bas nubuat Jesaya. (Jes. 53:1-12) Tapi, bas gedang-gedang perdalanen, ijelasken Pilipus man pejabat Etiopia ndai maka biri-biri ntah pe pelayan e maksudna Jesus Kristus. Bali bagi kalak si iperidiken bas Pentakosta 33 M, pejabat e pe mis tehna kai si arus lakokenna, perban ia enggo ngikutken agama Jahudi. Emaka nina man Pilipus, “Nenlah, lit i je lau! Engkai maka la iperidiken saja aku?” Emaka mis iperidiken Pilipus pejabat Etiopia e! c (Nen kotak “ Iperidiken bas ‘Ingan si Mbue Launa.’”) Kenca si e, baba kesah si badia Jahwe me Pilipus ku Asdot, daerah tugasna si mbaru. I je terus beritakenna berita si meriah.—Perb. 8:32-40.
16, 17. Kai buktina malekat ikut nampati dahin erberita gundari?
16 Kalak Kristen si gundari pe ikut ngelakoken tugas istimewa bagi si ilakoken Pilipus. Biasana kalak e banci erberita si meriah alu la resmi, misalna bas perdalanen. Melala pengalamen si mbuktiken maka labo kebetulen kalak e jumpa ras kalak si nggit ngaloken kebenaren. Si e terjadi perban bas Pustaka ikataken maka malekat-malekat me si ngarahken gelah pendahin erberita banci seh man “tiap bangsa, suku, bahasa, ras umat.” (Ket. 14:6) Penampat malekat bas dahin erberita enggo inubuatken Jesus. Bas perumpaman Jesus kerna page ras sesa, ikataken Jesus maka bas masa peranin, eme pendungi jaman enda, “si rani eme malekat-malekat.” Ikatakenna ka maka “pedarat malekat e pagi bas Kerajanna nari kerina si erban kalak erdosa ras kalak si ngelanggar undang-undang.” (Mat. 13:37-41) Bas masa rani e ka, ipepulung malekat-malekat e kalak si jadi calon raja ras imam bas Kerajan Dibata. Kenca si e ipepulungna ka “sada kelompok jelma si enterem” arah ‘biri-biri si deban’ si itarik Jahwe ateNa ku organisasiNa.—Ket. 7:9; Joh. 6:44, 65; 10:16.
17 Si e sangana terjadi. Buktina, piga-piga kalak si jumpa ras kita sanga erberita ngataken maka enggo ertoto ia mindo penampat Dibata. Lit sada pengalamen kerna dua perberita si lawes erberita ras sekalak anak-anak. Sanga enggo nandangi ciger, mulih ate kalak e. Tapi anak si kitik ndai erberita denga atena ku rumah berikutna. Lawes ia sisada ku rumah e janah tuktukna pintu. Ndarat me sekalak diberu si nguda denga arah rumah e nari. Emaka erberita me dua Saksi ndai man bana. Kepeken ikataken diberu e maka edenga kel ia ertoto gelah lit si nampati ia ngangkai Pustaka. Dungna erlajar me ia!
“O Dibata, adi tuhu kin Kam lit, sampati min aku”
18. Engkai maka ula min sianggap dahin erberita e biasa-biasa saja?
18 Kita bagin runggun Kristen, emaka lit kesempatenta si istimewa guna kerja sama ras malekat-malekat bas pendahin erberita. Gundari, berita si meriah enggo ipeseh man enterem kalak, lebihen asangken si enggo-enggona. Ula pernah sianggap dahin e biasa-biasa saja. Adi terus siberitaken “berita si meriah kerna Jesus,” pasti sigejapken keriahen ukur si mbelin.—Perb. 8:35.
a Ia labo Rasul Pilipus. Tapi, ia eme salah sada arah ‘pitu dilaki si itandai mehuli’ si ibahas bas Pasal 5 buku enda. Kalak e ilantik guna ngaturken pembagin pangan tiap wari man janda-janda Kristen si nggunaken bahasa Junani ras si nggunaken bahasa Heber i Jerusalem.—Perb. 6:1-6.
b Memang paksa si e, biasana murid-murid si mbaru, ngaloken kesah si badia sanga kalak e iperidiken. Alu bage, dat kalak e arapen bas wari si pepagi guna merentah jadi raja bage pe imam ras Jesus i surga. (2 Kor. 1:21, 22; Ket. 5:9, 10; 20:6) Tapi kasus enda beda. Murid-murid si mbaru e la ngaloken kesah si badia sanga kalak e iperidiken. Tapi, kenca tamaken Petrus ras Johanes tanna ku datas kalak e, i je maka aloken kalak e kesah si badia bage pe kengasupen si luar biasa perban kesah si badia.
c Pejabat Etiopia e labo merudu-rudu iperidiken. Perban enggo ikutkenna agama Jahudi, enggo lit pemetehna kerna Kitap-Kitap si Badia, termasuk erbage-bage nubuat kerna Mesias. Kenca tehna kai tugas Jesus i bas erban sura-sura Dibata terjadi, banci ia mis iperidiken.