1, 2. Kai si nandangi lakoken Saul bas Damaskus?

 LIT sada rombongen kalak si sangana bas dalan muatna ku Damaskus guna ngelakoken rencanana si jahat. Darami kalak e atena murid-murid Jesus, sarenna atena ku darat rumah, iketna, ipermelakenna, jenari ibaba ku Jerusalem guna ihukum bas Pengadilen Agama Jahudi.

² Peminpin rombongen e gelarna Saul. a Ia enggo terlibat bas sada kasus pembunuhen. Mbaru-mbaru enda, Stepanus murid Jesus si setia ibenteri alu batu ngayak mate. Si mbenterisa eme teman-teman Saul. Setuju Saul kerna si e janah tontonna ka kejadin e. (Perb. 7:57–8:1) La ia puas nindas pengikut Jesus si tading bas Jerusalem saja. Emaka ajuk-ajukna ka kalak gelah bas ingan si deban pe gurlah api penindasen. Kernepkenna atena sada sekte si berbahaya, si itandai “Dalan Tuan.”​—Perb. 9:1, 2; nen kotak “ Kuasa Saul i Damaskus.”

3, 4. (a) Kai nge si terjadi man Saul? (b) Penungkunen kai si man bahasenta?

³ Rempet lit sinar arah langit si nerangi Saul. Kalak si ikut ras ia bas perdalanen e pe ngidah sinar e, tapi lanai terbelasken kalak e kai pe perban senggetna. Pentang me Saul janah ndabuh ia ku taneh. Tapi lit begina sora arah langit nari si ngataken, “Saul, Saul, engkai maka siksandu aku?” Kemamangen kel Saul janah nungkun ia, “Ise kin kam, Tuan?” Pasti lanai tanggung senggetna Saul sanga begina jawapenna, “Aku kap Jesus, si siksandu.”​—Perb. 9:3-5; 22:9.

⁴ Kai nge si banci sipelajari arah kata-kata si tangtangna belasken Jesus man Saul? Kai nge gunana man banta adi sipelajari kerna pertobaten Saul? Janah pelajaren kai nge si banci sidat arah cara runggun nggunaken masa dame kenca Saul ertobat?

5, 6. Kai si banci sipelajari arah kata-kata Jesus man Saul?

⁵ Sanga Saul bas perdalanen ku Damaskus, labo kataken Jesus, ‘Engkai maka siksandu murid-muridku?’ Tapi nina, “Engkai maka siksandu aku?” (Perb. 9:4) Jelas me, banci igejapken Jesus uga suina akap murid-muridna sanga isiksa.​—Mat. 25:34-40, 45.

⁶ Adi sangana kam itindas perban kinitekenndu man Kristus, teklah kam pasti idah Jahwe bage pe Jesus kai si adapindu e. (Mat. 10:22, 28-31) Gundari, banci saja tetap lit percuban si adapindu. Tapi perlu ingetndu, sanga Saul terlibat bas pembunuhen Stepanus, bage pe sanga saren Saul murid-murid si setia ku darat rumah kalak e bas Jerusalem, iperdiateken Jesus si e kerina. (Perb. 8:3) Memang, sange la mis pengadi Jesus penindasen e. Amin gia bage, bereken Jahwe gegeh arah Jesus man Stepanus bage pe murid-murid si deban gelah banci tetap setia.

7. Kai nge si arus lakokenndu gelah banci kam megenggeng ngadapi penindasen?

⁷ Kam pe banci tetap megenggeng ngadapi penindasen adi lakokenndu enda: (1) Ertekadlah kam tetap setia, kai pe si terjadi. (2) Pindolah penampat Jahwe. (Pil. 4:6, 7) (3) Pediatlah Jahwe si ngelakoken pembalasen. (Rom. 12:17-21) (4) Teklah kam pasti bereken Jahwe gegeh man bandu gelah banci kam terus megenggeng seh ngasa ikernepken Jahwe penindasen e.​—Pil. 4:12, 13.

8, 9. Uga nge kira-kira perasan Ananias sanga ibereken tugas man bana?

⁸ Kenca pebetehken Jesus ise ia man Saul, kataken Jesus man bana, “Tedislah janah masuklah ku kota, ikataken kari man bandu kai si arus lakokenndu.” (Perb. 9:6) Perban Saul enggo lanai erpengidah, itegu-tegu me ia ku inganna erberngi bas Damaskus, janah i je puasa  ia ras ertoto telu wari dekahna. Bas paksa si e ka me ngerana Jesus kerna Saul man Ananias, sekalak murid si tading bas Damaskus. “Kerina kalak Jahudi ngataken maka [Ananias] kalak si mehuli.”​—Perb. 22:12.

⁹ Pasti campur aduk perasan Ananias! Banci kin lang, Kepala runggun, eme Jesus Kristus si enggo ipekeke, langsung ngerana man bana. Janah khusus ia ipilih Jesus guna ngelakoken sada tugas si istimewa. Tugas enda memang sada kehamaten, tapi mberat ka ngelakokenca. Sanga iperentahken ia guna ngerana man Saul, nina Ananias, “O Tuan, enggo kubegi berita kerna ia arah kalak si enterem nari, bage pe kerna kerina kejahatenna man umatndu si badia i Jerusalem. Gundari enggo lit kuasana arah imam-imam kepala guna nangkapi kerina kalak si erlebuh man gelarndu.”​—Perb. 9:13, 14.

10. Kai nge si banci sipelajari arah cara Jesus ngaloi Ananias?

 ¹⁰ Sanga turiken Ananias kebiarenna, labo rawai Jesus ia. Bereken Jesus petunjuk si jelas, janah turiken Jesus engkai maka tugas si berekenna man Ananias e penting. Nina Jesus kerna Saul, “Enggo kupilih ia guna mberitaken gelarku man bangsa-bangsa si deban, raja-raja, bage pe man kalak Israel. Kucidahken kari man bana alu jelas uga buena kiniseran si arus adapina perban gelarku.” (Perb. 9:15, 16) Mis patuhi Ananias perentah Jesus e. Jumpaina Saul janah nina, “O Seninaku Saul, Tuan Jesus si enggo ncidahken dirina man bandu bas dalan sanga kam ku jenda, enggo suruhna aku gelah banci kam erpengidah mulihi janah dem alu kesah si badia.”​—Perb. 9:17.

11, 12. Kai si banci sipelajari arah pertobaten Saul?

¹¹ Lit piga-piga fakta si banci siangkai adi sipelajari kerna pertobaten Saul. Contohna, Jesus me si ngarahken pendahin erberita, bagi si enggo janjikenna. (Mat. 28:20) Memang gundari labo ia ngerana langsung man banta. Tapi arahkenna pendahin erberita arah budak si setia, si enggo angkatna guna ngurus pelayan-pelayan rumahna. (Mat. 24:45-47) Sesuai pengarahen Badan Pinpinen, ikirim me perberita ras perintis guna ndarami kalak si merhat nandai Kristus terbagesen. Enterem kalak si bage enggo ertoto mindo penampat Dibata. La ndekah kenca si e, idahi Saksi-Saksi Jahwe me kalak e. Piga-piga contohna enggo ibahas bas pasal sebelumna.​—Perb. 9:11.

¹² Patuh Ananias ndalanken tugasna, janah ipasu-pasu ia. Patuhindu nge perentah guna terus erberita amin pe tugas e banci erban kam mbiar? Memang, lit piga-piga si mbiar erberita arah rumah ku rumah guna njumpai kalak si la tandaina. Lit ka si mesera kapna erberita man kalak bas daerah bisnis, bas dalan, arah telepon, ntah pe arah surat. Ananias pe mbiar nge tangtangna, tapi tetap lakokenna tugasna. Emaka datna kehamaten guna nampati Saul ngaloken kesah si badia. b Banci Ananias berhasil perban tek ia man Jesus janah anggapna Saul e seninana. Bagi Ananias, kita pe banci lanai mbiar adi tek kita maka gundari pe Jesus si ngarahken pendahin erberita, sepenggejapen kita ras kalak si deban, janah kalak si merawana kin pe sianggap calon turang seninata.​—Mat. 9:36.

13, 14. Adi sangana kam erlajar Pustaka tapi lenga iperidiken, kai si banci pelajarindu arah Saul?

¹³ Mis dalanken Saul kai si pelajarina. Kenca ia malem, iperidiken ia janah  ergaul ia ras murid-murid si lit i Damaskus. Tapi labo e saja. “Mis ia lawes ku ingan-ingan pulung kalak Jahudi, beritakenna maka Jesus kap Anak Dibata.”​—Perb. 9:20.

¹⁴ Adi sangana kam erlajar Pustaka tapi lenga iperidiken, merhat nge kam bagi Saul, mis lakokenndu kai si pelajarindu? Memang, adi Saul langsung idahna mukjizat si lakoken Kristus, janah e pasti ngiahken ia erban keputusen si benar. Tapi, lit ka nge kalak si langsung ngidah mukjizat Jesus. Contohna, enterem kalak Parisi si ngidah Jesus mpepalem sekalak dilaki si tanna lumpuh. Enterem ka kalak Jahudi meteh maka Jesus mpekeke Lasarus si enggo mate. Tapi labo diate kalak e kerna si e, malahen segat ka atena Jesus. (Mrk. 3:1-6; Joh. 12:9, 10) Sebalikna, Saul nggit berubah. Engkai maka Saul la seri ras kalak si deban ndai? Perban biaren Saul man Dibata asangken man jelma, janah ergaina kel perkuah ate si enggo icidahken Kristus man bana. (Pil. 3:8) Adi usihndu Saul, pasti labo pediatndu kai pe mpengadi kam ikut bas dahin erberita, janah pasti usahakenndu gelah banci iperidiken.

15, 16. Kai si lakoken Saul bas ingan-ingan pulung kalak Jahudi, janah uga tanggapen kalak Jahudi si lit i Damaskus?

¹⁵ Mulai me beritaken Saul kerna Jesus bas ingan-ingan pulung kalak Jahudi. Banci nge bayangkenndu uga senggetna ras ngilasna ate jelma si enterem megi Saul erberita? Ning kalak e, “La kin ia si nyiksa kalak si tading i Jerusalem si erlebuh man gelar e?” (Perb. 9:21) Sanga jelasken Saul engkai maka dungna banci berubah perukurenna kerna Jesus, “buktikenna alu cara si masuk akal maka Jesus kap Kristus.” (Perb. 9:22) Tapi, penjelasen si masuk akal labo kunci si banci mbuka kerinana. Penjelasen si masuk akal lenga tentu banci mbuka pikiren si enggo ikunci tradisi, ntah pe mbuka pusuh si enggo ikunci kesombongen. Tapi Saul la nyerah.

¹⁶ Telu tahun kenca si e pe, segat denga ate kalak Jahudi si lit i Damaskus ngidah Saul. Dungna usahaken kalak e munuh ia. (Perb. 9:23; 2 Kor. 11:32, 33; Gal. 1:13-18) Sanga teh Saul rencana e, alu bijaksana putuskenna nadingken kota e. Ipenusur ia alu keranjang arah lubang si lit bas tembok kota. Menurut Lukas, si nampati Saul kiam bas berngi e eme ‘murid-murid Saul.’ (Perb. 9:25) Jenari banci siteh maka silang-langna lit piga-piga kalak si nggit megiken Saul bas Damaskus janah dungna jadi pengikut Kristus.

17. (a) Uga nge tanggapen kalak sanga begina kebenaren Pustaka? (b) Kai nge si perlu terus silakoken, janah engkai?

¹⁷ Sanga mulai ceritakenndu kebenaren man keluargandu, temanndu, ntah pe kalak si deban, banci saja akapndu pasti kalak e nggit ngalokenca perban kebenaren e masuk akal. Memang, banci saja lit piga-piga si nggit ngalokenca, tapi enterem ka nge si lang. Malahen, anggota keluargandu pe banci saja musuhina kam. (Mat. 10:32-38) Tapi, adi terus usahakenndu gelah reh beluhna kam tukar pikiren kerna Pustaka, janah mehuli  banndu perbahanenndu, kalak si nentang kam pe banci saja dungna berubah.​—Perb. 17:2; 1 Pet. 2:12; 3:1, 2, 7.

18, 19. (a) Sanga jelasken Barnabas maka Saul memang enggo jadi murid Jesus, kai hasilna? (b) Uga carata ngusih Barnabas ras Saul?

¹⁸ Kenca seh Saul bas Jerusalem, wajar saja nge murid-murid i je la tek maka ia enggo jadi murid Jesus. Tapi sanga jelasken Barnabas maka tuhu ia enggo jadi murid Jesus, rasul-rasul nggit ngaloken Saul, janah ras kalak e tading piga-piga waktu dekahna. (Perb. 9:26-28) Saul la mela mberitaken berita si meriah, tapi bijaksana ka ia sanga erberita. (Rom. 1:16) Pang ia erberita i Jerusalem amin pe pernah siksana murid Jesus alu kejam i je. Sengget kel kalak Jahudi si lit i Jerusalem perban dilaki si minpin kalak e nindas murid Jesus, dungna enggo jadi murid Jesus. Emaka bunuh kalak e atena ia. “Sanga teh turang senina si sada kiniteken kerna si e, babana [Saul] ku Kesarea, jenari suruhna ku Tarsus.” (Perb. 9:30) Ikutken Saul pengarahen si bereken Jesus arah runggun. Emaka dungna Saul bage pe runggun ndatken manpaatna.

¹⁹ Perlu siperdiateken maka mis turah ukur Barnabas guna nampati Saul. Pastilah duana umat Jahwe si semangat enda banci reh kompakna perban kiniulin Barnabas e. Bagi Barnabas, nggit nge kam nampati kalak si mbaru denga bas runggun? Contohna, nggit nge kam kerja sama bas pelayanen bage pe nampati kalak e gelah reh rembakna ras Jahwe? Adi lakokenndu e, pasti melala datndu pasu-pasu. Sebalikna, adi mbaru denga kam jadi perberita, nggit nge kam ngaloken penampat bagi Saul? Adi nggit kam kerja sama ras perberita si enggo lebih erpengalamen, banci reh beluhna kam bas pelayanen, reh riahna ukurndu, janah banci datndu teman. Pertemanen kena e banci gejapkenndu segedang geluhndu.

20, 21. Kai si ilakoken umat Dibata bas jaman si mbarenda bage pe si gundari sanga kalak e “ndatken kedamen”?

²⁰ Kenca ertobat Saul janah tadingkenna Jerusalem alu aman, “runggun si lit i belang-belang Judea, Galilea, ras Samaria ndatken kedamen.” (Perb. 9:31) Uga murid-murid e nggunaken waktu si senang? (2 Tim. 4:2) Bagi si iceritaken, kalak e “reh paguhna.” Rasul-rasul ras kalak si lit tanggung jawapna mpegegehi murid-murid janah minpin runggun. Emaka kalak e “mbiar man Jahwe janah ndatken pengapul arah kesah si badia.” Contohna Petrus, banna waktuna mpegegehi murid-murid bas kota Lida i Dataren Saron. Hasilna, enterem kalak si tading bas kota e dungna “jadi murid-murid Tuan.” (Perb. 9:32-35) Tutus ate murid-murid mperdiateken sada ras si debanna bage pe mberitaken berita si meriah, la kalak e nggit tersimpangken. Hasilna, jumlah kalak e “terus reh teremna.”

 ²¹ Bas pendungi abad pe-20-ken, Saksi-Saksi Jahwe bas melala negri pe “ndatken kedamen.” Pemerentahen si enggo puluhen tahun nindas umat Dibata rempet-rempet runtuh. Emaka, bas piga-piga negri, reh nukahna erberita, janah bas negri si deban, enggo tuhu-tuhu bebas erberita. Puluhen ribu Saksi Jahwe nggunaken kesempaten enda guna erberita man jelma si enterem alu la erbuni-buni janah hasilna luar biasa.

22. Uga nge cara si mehulina nggunaken kebebasen si lit bas kam gundari?

²² Gunakenndu nge kebebasen si lit gundari? Adi tading kam bas negri si bebas eragama, pasti usahaken Setan gelahna kam ngayaki kebayaken labo Kerajan. (Mat. 13:22) Emaka ula tersimpangken, gunakenlah masa dame si lit gundari. Anggaplah e kesempaten guna erberita bage pe mpegegehi turang senina. Ingetlah, situasita banci rempet berubah.

23, 24. (a) Pelajaren kai saja nge si banci sidat arah Tabita? (b) Kai nge arusna tekadta?

²³ Perdiateken kai si terjadi man sekalak murid si gelarna Tabita ntah pe Dorkas. c Ia tading bas Jope, sada kota si la ndauhsa arah Lida. Ia setia janah gunakenna waktuna bage pe ertana alu bijaksana. “Melala perbahanenna si mehuli janah sampatina kalak si mesera.” Tapi, rempet ia sakit janah dungna mate. Kematenna e erban ceda kel ate murid-murid i Jope, khususna janda-janda si pernah nggejapken kiniulinna. Seh me Petrus bas rumah ingan mayat Tabita sangana ipersiapken guna ikuburken. Lakoken Petrus me mukjizat si lenga pernah ilakoken rasul Jesus Kristus si debanna. Ertoto Petrus janah pegeluhna mulihi Tabita. Banci nge bayangkenndu uga riahna ukur janda-janda bage pe murid-murid si deban sanga lebuh Petrus kalak e ku kamar guna ngenen Tabita si enggo ipekeke? Kejadin enda pasti mpegegehi kalak e guna ngadapi percuban si nandangi terjadi! La teta mamang, mukjizat e “terberita i belang-belang Jope, enterem kalak si dungna tek man Tuan.”​—Perb. 9:36-42.

²⁴ Lit dua si banci sipelajari arah pengalamen Tabita. (1) Geluh enda kentisik ngenca. Emaka seh kel pentingna erban gelar si merim i lebe-lebe Dibata sanga banci denga silakoken! (Peng. 7:1) (2) Arapen kekeken e pasti. Perdiateken Jahwe kiniulin Tabita janah pasu-pasuNa ia. Emaka Dibata pe pasti ingetNa kerja kerasta janah pekekeNa kita bicara mate kita  sope reh Harmagedon. (Heb. 6:10) Jadi, la soal bas “waktu si susah” ntah pe sangana kita “ndatken kedamen,” teruslah kita mereken kesaksin kerna Kristus.​—2 Tim. 4:2.