1-3. (a) Situasi kai nge si adapi Stepanus, janah uga tanggapenna? (b) Penungkunen kai saja nge kari si man bahasenta?

 ANGGOTA Pengadilen Agama Jahudi enggo pulung. Kalak e lit 71 dilaki. Kundul kalak e kerina mbentuk setengah lingkaren si galang. Ingan e mbelang janah megah kel. Mbelin kemungkinenna lokasina ndeher ras rumah pertoton i Jerusalem. Pulung kalak e bas wari e guna ngadili Stepanus. Hakim-hakim bas pengadilen e eme kalak si terpandang janah lit kuasana. Teremen kalak e rate segat man Stepanus perban ia murid Jesus. Si ngelebuh kalak e pulung bas wari e eme imam si mbelin si gelarna Kayapas. Piga-piga bulan sope si e, ia ka me si jadi ketua sanga Jesus iadili. Hasil keputusen pengadilen e eme Jesus arus ihukum mate. Mbiar nge Stepanus?

² Luar biasa kel ayo Stepanus paksa si e. Sanga itatap hakim-hakim e ia, idah kalak e ayona “bagi ayo malekat.” (Perb. 6:15) Malekat dahinna maba berita arah Dibata Jahwe, emaka sitik pe labo ia mbiar janah tetap ia tenang. Bage ka me Stepanus. Hakim-hakim si rate segat man Stepanus pe banci idahna maka tenang kel Stepanus. Engkai maka banci bage kel tenangna Stepanus?

³ Kalak Kristen si gundari banci erlajar arah jawapen penungkunen e. Perlu siteh engkai maka Stepanus banci lit bas situasi si sulit e. Sope lit bas situasi e, uga nge Stepanus mbela kinitekenna ras kai saja si banci siusih arah ia nari?

4, 5. (a) Engkai maka Stepanus meherga kel akap runggun? (b) Kai ertina Stepanus “dem alu kuasa ras kiniulin Dibata”?

⁴ Bas pasal sebelumna bas buku enda, enggo siteh maka Stepanus me salah sada arah pitu dilaki si meteruk ukur si nggit nampati rasul-rasul. Emaka meherga kel Stepanus man runggun Kristen si mbaru ibentuk e. Reh belinna pengerganta man sipatna si meteruk  ukur e adi siinget kengasupen si bereken Dibata man bana. Bas Perbahanen Rasul-Rasul 6:8, ikataken maka Stepanus banci erban “melala mukjizat ras tanda si luar biasa,” bali bagi piga-piga rasul. I je pe lit ikataken maka ia “dem alu kuasa ras kiniulin Dibata.” Kai maksudna?

⁵ Bahasa Junani “kiniulin Dibata” banci ka iterjemahken jadi “melias.” Mbelin kemungkinenna Stepanus e kalakna mekacar, lembut, janah meriah akap kalak ras ia. Arah pengeranana, banci idah kalak maka ia kalak si tulus janah kai si iajarkenna erguna akap kalak. Stepanus nggit ngikutken petunjuk arah kesah si badia. Emaka, erdahin kesah si badia bas ia. E me sebapna ia dem alu kuasa. Amin pe lit kengasupen si bereken Dibata Jahwe man bana, la ia sombong. Kerina pujin berekenna man Jahwe janah tuhu-tuhu ia ermediate man kalak si ngerana ras ia. Emaka la teta mamang, ianggap penentangna ia ancamen si mbelin!

6-8. (a) Kai dua tuduhen si iban penentang man Stepanus, janah engkai? (b) Engkai maka usihen Stepanus erguna man kalak Kristen si gundari?

⁶ Lit piga-piga kalak si ngerana ngelawan Stepanus. a Tapi “la ngasup kalak e ngelawansa perban ia dem alu kepentaren ras ngerana alu penampat kesah si badia.” E me sebapna segat kel ate kalak e Stepanus. Emaka “alu erbuni-buni, pengaruhi kalak e” piga-piga dilaki guna nuduh Stepanus. “Pengaruhi kalak e jelma si enterem,” peminpin-peminpin, ras penulis-penulis guna nangkap Stepanus alu paksa janah babana ku Pengadilen Agama Jahudi. (Perb. 6:9-12) Enda me dua tuduhen penentang e man Stepanus: Hinana Dibata janah hinana ka Musa. Kai maksudna?

⁷ Ikataken penentang e ihina Stepanus Dibata perban la cocok akap kalak e kata-kata Stepanus kerna “ingan si badia,” eme rumah pertoton i Jerusalem. (Perb. 6:13) Tuduh kalak e ka hinana Musa. Ikataken kalak e itentangna Undang-Undang Musa perban ubahna kebiasan si iban Musa. Serius kel tuduhen e, sebap paksa si e, penting kel akap kalak Jahudi rumah pertoton, Undang-Undang Musa, bage pe kebiasan si la tertulis si tambahken kalak e ku Undang-Undang Musa. Emaka situhuna, ituduh kalak e Stepanus kalak si berbahaya janah patut mate!

⁸ Sayang kel, peminpin agama pe rusur nggunaken taktik si bage guna nentang umat Dibata. Ngasa gundari, mon-mon ajuk-ajuk peminpin agama pemerentah gelah Saksi-Saksi Jahwe ianiaya. Uga arusna tanggapenta adi iban penentang tuduhen palsu man banta? Melala si banci sipelajari arah Stepanus.

9, 10. Kai nina piga-piga kalak kerna pembelan Stepanus, ras kai si perlu siinget?

⁹ Bagi si enggo ituriken ndai, tenang kel Stepanus. Ayona bagi ayo malekat aminna pe sangana begina tuduhen kerna dirina. Tatap Kayapas ia janah nina, “Tuhu nge kerina e?” (Perb. 7:1) Gundari, giliren Stepanus ngerana. La sia-siakenna kesempaten e!

¹⁰ Lit piga-piga kalak si ngataken maka amin pe gedang pembelan Stepanus, si e la banci mbuktiken maka ia la ersalah. Tapi situhuna, enggo ban Stepanus usihen si mejile man banta kerna uga carana “njawap kerina kalak si nungkun” kerna berita si meriah. (1 Pet. 3:15) Perlu siinget maka Stepanus ituduh hinana Dibata perban rananna kerna rumah pertoton. Ituduh kalak e ka hinana Musa perban menurut kalak e enggo itentangna Undang-Undang Musa. Bas jawapen Stepanus, lit turikenna telu periode waktu bas sejarah Israel, janah lit piga-piga keterangen si itekankenna. Mari sibahas sada per sada.

11, 12. (a) Engkai maka cocok kel gunaken Stepanus contoh Abraham? (b) Engkai maka cocok kel turiken Stepanus kerna Jusup?

¹¹ Bas jaman nini bulang kalak Israel. (Perb. 7:1-16) Ngerana me Stepanus. Si tangtangna cakapkenna eme kerna Abraham, si iergai kalak Jahudi perban kinitekenna. Jadi, benaken Stepanus pembelanna alu mbahas keterangen si tehna pasti isetujui kalak e. Kataken Stepanus maka Jahwe, “Dibata si mulia,” tangtangna ncidahken baNa man Abraham i Mesopotami. (Perb. 7:2) Paksa si e, Abraham penduduk asing bas Negri si Ijanjiken. Sange lenga lit rumah pertoton bage pe Undang-Undang Musa. Tapi, Abraham tetap banci setia man Jahwe. Emaka, labo banci ikataken kalak e arus lit rumah pertoton bage pe Undang-Undang gelah banci setia man Dibata.

¹² Jusup, keturunen Abraham pe ihamati hakim-hakim e. Kataken Stepanus maka abang-abang Jusup, eme nini bulang suku-suku Israel, siksana Jusup janah dayakenna jadi budak. Tapi, gunaken Dibata Jusup nelamatken Israel sanga terjadi kelaparen. Pasti jelas iteh Stepanus maka mirip kel situasi Jusup ras Jesus Kristus. Tapi, la turikenna kerna si e gelah tetap begiken kalak e ia.

13. Engkai maka keterangen si turiken Stepanus kerna Musa banci njawap tuduhen kalak e, janah tema kai nge si ikembangken Stepanus?

 ¹³ Bas jaman Musa. (Perb. 7:17-43) Melala si kataken Stepanus kerna Musa. Enda cocok kel perban enterem anggota pengadilen e eme kalak Saduki. Kalak e la tek man buku-buku bas Pustaka selain si itulis Musa. Perlu ka siinget maka tuduhen man Stepanus eme hinana Musa. Ibuktiken Stepanus maka tuduhen e salah perban ergaina kel Musa bage pe Undang-Undang Musa. (Perb. 7:38) Ikatakenna ka maka itulak kalak Israel Musa padahal iselamatken Musa atena kalak e. E me si terjadi sanga umur Musa 40 tahun. Janah lebih 40 tahun kenca si e, lit piga-piga kali ilawan kalak Israel Musa. b Jadi alu manjar-anjar ijelasken Stepanus maka enda me si ilakoken umat Dibata: Mulih-ulih itulak umat Dibata kalak si ilantik Jahwe guna minpin kalak e.

14. Kai si ibuktiken Stepanus arah contoh Musa?

¹⁴ Singetken Stepanus man kalak e kerna nubuat Musa maka ilantik Dibata pagi nabi si bagi Musa bas Israel. Ise ia, ras uga pengalo-ngalo kalak man bana? La mis ijawap Stepanus penungkunen e. Si e ijawapna bas bagin pendungi pembelanna. Turikenna lebe keterangan penting si deban enda: Iteh Musa maka ingan si apai pe banci iban jadi badia. Contohna eme taneh i sekeliling peren duri si gara ingan Jahwe ngerana man bana. Emaka, bas sada bangunen saja nge kita banci nembah Jahwe, contohna bas rumah pertoton i Jerusalem? Mari sinen jawapenna.

15, 16. (a) Engkai maka ibahas Stepanus kerna kemah ingan ersembah? (b) Kai si turiken Stepanus kerna rumah pertoton Salomo?

¹⁵ Sanga lit kemah ingan ersembah ras rumah pertoton. (Perb. 7:44-50) Ingetken Stepanus man hakim-hakim e maka sope lit rumah pertoton i Jerusalem, suruh Dibata Musa erban kemah ingan ersembah si banci ipindah-pindahken. Adi Musa pe nembah Dibata bas kemah ingan ersembah, ise si pang ngatakenca rumah pertoton ulin asangken kemah e?

¹⁶ Bas pudi wari, ibangun Salomo me rumah pertoton Jahwe i Jerusalem. Sanga ertoto, peseh Salomo sada pelajaren si penting. Isinggung Stepanus kai si ikataken Salomo, nina, “Dibata Si Meganjangna labo tading bas rumah si ban manusia.” (Perb. 7:48; 2 Kro. 6:18) Memang, banci gunaken Jahwe rumah pertoton guna ndukung peratenNa, tapi la pe lit rumah pertoton, peratenNa banci tetap terjadi. Emaka, umat Jahwe labo perlu erpengakap maka arus kalak e nembah Jahwe bas bangunen si iban manusia, contohna bas rumah pertoton. Idungi Stepanus penjelasenna alu kata-kata si tegas si ikutipna arah buku Jesaya. Nina, “Surga kap tahtaKu, janah doni kap ingan naheKu. Rumah si uga kin ate kena bangun kena man bangKu? nina Jahwe. I ja kin inganKu tading? La kin tanKu nge si erban si e kerina?”​—Perb. 7:49, 50; Jes. 66:1, 2.

17. Uga pembelan Stepanus (a) ncidahken kesalahen kalak si nuduh ia ras (b) mbuktiken maka ia la ersalah?

 ¹⁷ Arah kai si enggo sibahas kerna pembelan Stepanus, pasti setuju kita maka beluh kel ia ncidahken sipat jahat kalak si nuduh ia. Enggo jelaskenna maka Jahwe labo kaku, janah banci gunaken Jahwe erbage-bage cara gelah seh sura-suraNa. Labo lit kai pe si banci ngambati Ia termasuk tradisi. Keleng kel ate kalak si nentang Stepanus man rumah pertoton bage pe man tradisi si itambahken ku Undang-Undang Musa. Tapi labo angkai kalak e kai tujun Jahwe mereken Undang-Undang Musa ras mbangun rumah pertoton. Emaka, amin pe la langsung kataken Stepanus, situhuna bagenda nge nina man kalak e: Adi memang ergai kena kel Undang-Undang Musa ras rumah pertoton, la kin arusna patuh kena man Jahwe? Pembelan Stepanus e mbuktiken maka ia labo ersalah perban enggo usahakenna asa bancina guna matuhi Jahwe.

18. Kai saja si banci siusih arah Stepanus?

¹⁸ Kai saja si banci siusih arah Stepanus? Iteh Stepanus kel isi Kitap-Kitap si Badia. Emaka, kita pe perlu rajin janah tutus ateta erlajar Kata Dibata gelah banci sigunaken “kata Dibata alu tepat.” (2 Tim. 2:15) Arah Stepanus pe banci ka kita erlajar kerna cara ngerana si mehuli ras la erban kalak tersinggung. Situhuna segat kel ate kalak e man bana. Tapi, perban bahasna kai si penting iakap kalak e ras si la ertentangen ras kiniteken kalak e, nggit kalak e ndekah megiken ia. Mehamat ka ia man kalak e, lebuhna kalak e “bapak-bapak.” (Perb. 7:2) Kita pe perlu mberitaken Kata Dibata “alu lembut ras mehamat.”​—1 Pet. 3:15.

19. Kai buktina perpang kel Stepanus mpeseh berita penghakimen Jahwe bas pengadilen e?

¹⁹ Tapi, labo perban mbiar kita erban kalak tersinggung, dungna la sipeseh kebenaren si lit bas Kata Dibata. Selain si e, la ka siubah berita penghakimen Jahwe gelah meriah kap kalak megi beritata. Stepanus usihen si mehuli kerna si e. Pasti idahna, sitik pe la erkusur ukur hakim-hakim si mekeng e amin pe enggo begi kalak e kerina bukti si turikenna. Emaka, dungina pembelanna. Isampati kesah si badia ia gelah la mbiar guna ncidahken maka kalak e pas kel bagi nini bulangna si nulak Jusup, Musa, ras kerina nabi. (Perb. 7:51-53) Hakim-hakim e pe enggo mbunuh Mesias. Padahal, kerehen Mesias e pe enggo inubuatken Musa bage pe kerina nabi. Emaka situhuna, kalak e me si nomor sadana bas ngelanggar Undang-Undang Musa!

20, 21. Uga tanggapen hakim-hakim e megi kata-kata Stepanus, janah uga Jahwe mpegegehi ia?

²⁰ La tertogan hakim-hakim e kai si ikataken Stepanus, emaka gara kel rawa kalak e. Lanai inget hakim-hakim e maka kalak e kalak si ihormati. Erderep ipen kalak e janahna natap Stepanus. Iteh Stepanus maka pasti ihukum kalak e ia bali bagi Tuanna, Jesus.

 ²¹ Perlu kel Stepanus sipat si perpang guna ngadapi kai si nandangi terjadi. Mehuli kel Jahwe man bana. Bereken Jahwe pengenehenen si mpegegehi ia. Idah Stepanus kemulian Dibata, janah idahna Jesus cinder i sebelah kanan Jahwe. Sanga ceritaken Stepanus pengenehenen e, tutup hakim-hakim e cupingna. Engkai maka bage? Perban sebelumna pernah kataken Jesus man hakim-hakim e maka ia me Mesias janah lanai ndekah cinder me ia i sebelah kanan Bapakna. (Mrk. 14:62) Pengenehenen Stepanus mbuktiken maka tuhu kai si ikataken Jesus e. Hakim-hakim e situhuna enggo erhianat man Mesias, janah bunuh kalak e Mesias! Radu kalak e kerina, mis baba kalak e Stepanus guna ibenteri alu batu seh ngasa mate. c

22, 23. Kai si seri bas kematen Stepanus ras Tuanna? Engkai maka kalak Kristen si gundari banci paguh kinitekenna bali bagi Stepanus?

²² Bali bagi Tuanna, dame pusuh Stepanus amin pe ia ihukum mate. Tek ia man Jahwe janah ampunina kalak si munuh ia. Nina, “O Tuan Jesus, alokenlah kesahku.” Banci saja bage nina perban idahna denga Anak Manusia ras Jahwe bas pengenehenen e. Pasti iteh Stepanus kata-kata Jesus si mpegegehi enda: “Aku kap kekeken ras kegeluhen.” (Joh. 11:25) Dungna, ertoto Stepanus langsung man Dibata alu sora si megang, nina, “O Jahwe, ula min hukum kalak e perban dosana e.” Kenca bage nina, mate ia.​—Perb. 7:59, 60.

²³ Stepanus me martir si pertama bas pengikut Kristus. (Nen kotak “ Stepanus—Sekalak Martir ntah Saksi?”) Tapi sayangna, labo ia martir si terakhir. Seh asa gundari, lit piga-piga umat Jahwe si setia si ibunuh kalak si fanatik arah kelompok agama ras politik bage pe penentang si debanna si kejam. Amin pe bage, banci kita tetap paguh bali bagi Stepanus. Gundari, Jesus enggo jadi Raja janah lit datna kuasa si mbelin arah Bapakna. Emaka labo lit si banci ngambati ia mpekeke pengikutna si setia.​—Joh. 5:28, 29.

24. Kai si ilakoken Saul sanga Stepanus ibunuh? Kai saja pengaruh kematen Stepanus dilaki si setia e?

²⁴ Lit sekalak dilaki si nguda denga si ngidah Stepanus ibunuh, gelarna Saul. Jagana uis kalak si mbenteri Stepanus alu batu. La ndekah kenca si e, ipinpin Saul me penganiayan si kejam man kalak Kristen. Tapi, mbelin kel pengaruh kematen Stepanus. Usihenna banci nampati kalak Kristen gelah tetap setia amin pe arus mate. Selain si e, Saul si dungna rusur ilebuh Paulus, nyesal kel perban terlibat ia bas pembunuhen Stepanus. (Perb. 22:20) Enggo sampatina pembunuhen Stepanus. Tapi, dungna sadar ia, nina, “Aku tukang hina, tukang nyiksa, ras sombong.” (1 Tim. 1:13) Jelas me, Paulus la pernah lupa kerna Stepanus bage pe pembelan si luar biasa si pesehna bas wari e. Malahen lit piga-piga pembelan Stepanus si imasukken Paulus ku khotbah ras tulisenna. (Perb. 7:48; 17:24; Heb. 9:24) Dungna, usih Paulus me Stepanus, kalak si “dem alu kuasa ras kiniulin Dibata.” Usihna kiniteken ras sipat Stepanus si perpang. Kita pe banci ngusih Stepanus!