PASAL 16
“Reh min Kam ku Makedoni”
Enterem si dat pasu-pasu perban Paulus ras teman-temanna nggit ngaloken tugas ras megenggeng
Arah Perbahanen Rasul-Rasul 16:6-40
1-3. (a) Uga kesah si badia ngarahken Paulus ras teman-temanna? (b) Kai kari si man bahasenta?
LIT sada kelompok diberu si berkat arah kota Pilipi i Makedoni. La ndekah kenca si e, seh kalak e bas sungai si kitik si gelarna Gangites. Ratur kalak e reh ku tepi sungai e. I je kundul kalak e guna ertoto man Dibata Israel. Iperdiateken Jahwe kalak e.—2 Kro. 16:9; Ms. 65:2.
2 Tapi, lebih 800 kilometer i sebelah timur Pilipi, lit sekelompok dilaki berkat arah kota Listera i selatan Galati. Piga-piga wari kenca si e, seh kalak e bas pasar galang. Pasar e eme dalan ku sebelah barat, ku daerah si padatna kel pendudukna bas Propinsi Asia. Si lit bas kelompok e eme Paulus, Silas, ras Timotius. Enggo lanai kalak e sabar ndalani dalan e guna ndahi Epesus ras kota-kota si deban. I je lit ribun kalak si perlu megiken berita kerna Kristus. Tapi, sope imulai kalak e perdalanen e, ilarang kesah si badia kalak e. Memang carana labo lit iceritaken bas Pustaka. La kalak e banci erberita i Asia. Engkai? Perban arah kesah si badia, ibabai Jesus atena kalak e ngelewati daerah Asia Kecil, nyebrangi Laut Aegea, janah terus ku tepi sungai Gangites.
3 Lit pelajaren penting si banci sidat arah cara Jesus ngarahken Paulus ras teman-temanna ku Makedoni. Perdalanen e luar biasa kel. Emaka, mari sibahas piga-piga kejadin si terjadi sedekah perdalanen utusen injil Paulus si peduaken. Perdalanen e imulai kira-kira tahun 49 M.
“Dibata si Nuruh Kami” (Perb. 16:6-15)
4, 5. (a) Kai si terjadi sanga Paulus ras teman-temanna nandangi seh ku Bitinia? (b) Kai keputusen kalak e, ras kai hasilna?
4 Perban Paulus ras teman-temanna la ipediat kesah si badia erberita i Asia, lawes kalak e ku utara guna erberita i kota-kota bas daerah Bitinia. Guna seh ku je, banci saja kalak e enggo erdalan piga-piga wari dekahna. Dalan si bentasi kalak e taneh, bentasi kalak e ka daerah si jarang pendudukna i Perigia ras Galati. Tapi sanga enggo ndeher kalak e ku Bitinia, gunaken Jesus ka kesah si badia ngambati kalak e. (Perb. 16:6, 7) Pasti bingung kel kalak e. Enggo teh kalak e kai si arus iberitaken, tehna ka uga cara mberitakenca, tapi la tehna i ja ia arus erberita. Tempa-tempa, ituktuk kalak e pintu ku Asia, tapi la kalak e banci masuk. Ituktuk kalak e ka pintu ku Bitinia, ku je pe la kalak e banci masuk. Tapi Paulus la nyerah. Terus tuktukna seh ngasa datna pintu si banci masukina. Kenca si e, iban kalak e me keputusen si tempa-tempa la masuk akal. Lawes kalak e ku barat janah erdalan 550 kilometer dauhna. La kalak e singgah i kota-kota. Dungna seh me kalak e bas pelabuhen Troas. Arah Troas banci kalak e erlayar ku Makedoni. (Perb. 16:8) I je me petelu kaliken tuktuk Paulus pintu, janah talang me pintu e.
5 I Troas, ikut me Lukas ras rombongen Paulus e. Ilaporken Lukas kai si terjadi. a Nina, “Bas berngi e, dat Paulus sada pengenehenen, idahna tedis sekalak dilaki arah Makedoni nari janah mindo kel man bana, nina, ‘Reh min kam ku Makedoni, sampati kami.’ Kenca datna pengenehenen e, mis usahaken kami lawes ku Makedoni. Sebap teh kami Dibata si nuruh kami mberitaken berita si meriah man kalak e.” (Perb. 16:9, 10) Dungna, iteh Paulus me i ja kalak e arus erberita. Pasti meriah kel ukur Paulus perban la ia nyerah. Emaka, empatna dilaki e mis erlayar ku Makedoni.
“Emaka, Troas nari mis kami erlayar.”—Perbahanen Rasul-Rasul 16:11
6, 7. (a) Pelajaren kai si banci sidat arah kai si terjadi bas perdalanen Paulus? (b) Arah pengalamen Paulus, tek kita kerna kai?
6 Pelajaren kai si banci sidat arah kejadin e? Cuba siperdiateken enda: Kenca berkat Paulus ku Asia emaka bereken kesah si badia petunjuk. Kenca erdalan Paulus ku Bitinia emaka bereken Jesus petunjuk, janah kenca seh Paulus i Troas emaka arahken Jesus ia ku Makedoni. Gundari pe, selaku Kepala runggun, banci saja bage me cara Jesus ngarahken kita. (Kol. 1:18) Contohna, banci saja lit sura-surata guna merintis ntah pe pindah ku daerah si lebih merluken terbuen perberita. Tapi, kenca siban tindaken guna ndatken sura-surata e maka bereken Jesus petunjuk arah kesah si badia. Engkai? Cuba siukuri contoh enda: Sekalak supir banci arahkenna ntah pe belokkenna motorna ku kiri ntah ku kanan adi motor e enggo erdalan. Bage ka pe, banci arahken Jesus kita ngelakoken terbuen bas pelayanen adi kita enggo erdalan, maksudna enggo lit tindakenta.
7 Tapi, uga adi upayata e la berhasil? Mis nge kita nyerah perban siakap la kita isampati kesah si badia? Lang, la kita nggit nyerah. Siingetlah, Paulus pe labo mis banci dalankenna sura-surana. Tapi, lalap daramina pintu si ibukaken man bana. Tek kita adi tetap sidarami pintu ntah pe ‘kesempaten si mbelin guna ngelayani’ pasti sidat pasu-pasu.—1 Kor. 16:9.
8. (a) Uga nge kota Pilipi e? (b) Kai nge hasilna sanga Paulus erberita bas “ingan ertoto”?
8 Seh kenca Paulus ras teman-temanna i Makedoni, lawes kalak e ku Pilipi. Penduduk kota e bangga kel jadi warna negara Roma. Kota Pilipi e mirip ras Roma, janah enterem pensiunen prajurit Roma si tading i je. I darat gerbang kota e lit sungai si kitik. Begi utusen-utusen injil e maka tepi sungai e “ingan ertoto.” b Emaka bas wari Sabat, lawes kalak e ku je janah jumpa kalak e ras piga-piga diberu si pulung guna nembah Dibata. Kundul me kalak e janah ngerana ras diberu-diberu e. Lit sekalak diberu si gelarna Lidia. c Sanga begikenna kalak e, “buka Jahwe ukurna.” Takjup kel Lidia man kai si pelajarina arah kalak e. Emaka, ia ras keluargana iperidiken. Kenca si e, pindokenna kel man Paulus ras teman-temanna gelah reh ku rumahna janah tading i je.—Perb. 16:13-15.
9. Uga turang senina si gundari ngusih Paulus, kai pasu-pasu si idat kalak e?
9 Bayangkenlah uga riahna ukur Paulus ras teman-temanna sanga Lidia iperidiken! Meriah kel ukur Paulus perban alokenna undangen guna ‘reh ku Makedoni.’ Meriah ka ukurna perban igunaken Jahwe ia ras teman-temanna njawap toto diberu-diberu si mbiar man Dibata e. Gundari pe, enterem turang senina si pindah ku daerah si merluken terbuen perberita. Kalak e lit si nguda denga, si enggo metua, si lenga erjabu, ras si enggo erjabu. Memang lit tentangen si adapi kalak e, tapi megenggeng kalak e perban meriah ukurna ndarami kalak si ngaloken kebenaren bagi Lidia. Banci nge banndu penyesuaien gelah banci kam “reh” ku daerah si merluken terbuen perberita? Melala pasu-pasu si enggo nimai kam. Contohna, Aaron, sekalak turang seninata si umurna 20-en, pindah ia ku sada negri i Amerika Tengah. Nina, “Ngelayani bas negri si deban erban reh paguhna kinitekenku janah reh deherna aku ras Jahwe. Meriah kel erberita i jenda, lit waluh si erlajar Pustaka ras aku!” Turang senina si ngelakoken terbuen bagi ia pe bage ka perasanna.
Gundari, uga kita banci ‘reh ku Makedoni’?
“Jelma si Enterem Pe Ikut Ngelawan Kalak e” (Perb. 16:16-24)
10. Kai si ilakoken malekat-malekat jahat gelah itentang kalak Paulus ras teman-temanna?
10 Pasti merawa kel Setan sanga lit si ngaloken berita si meriah bas daerah si teremen kalakna ngelakoken sura-sura Setan ras malekat-malekat jahat. Emaka, la teta mamang erusaha kel malekat-malekat jahat erban kalak nentang Paulus ras teman-temanna. I Pilipi, lit sekalak pelayan si diberu si irasuki malekat jahat. Ia beluh ngeramal, emaka melala dat tuanna keuntungen arah ia. Tuanna labo sada ngenca. Bas sada wari, sanga reh Paulus ras teman-temanna ku ingan ertoto, jumpa diberu e ras kalak e. Lalap ikut-ikutna kalak e, serko ia nina, “Kalak enda kap budak Dibata Si Meganjangna janah beritakenna dalan keselamaten.” Malekat-malekat jahat me si erban diberu e ngataken kata-kata e. Banci saja tujunna gelah akap kalak ramalen diberu e rehna arah Dibata, bali bagi ajaren Paulus. Alu bage, lanai diate kalak kai si ajarken pengikut Jesus. Tapi, ipelawes Paulus malekat jahat arah diberu e nari, dungna sinik diberu e.—Perb. 16:16-18.
11. Kenca malekat jahat ipedarat arah diberu e, kai si terjadi man Paulus ras Silas?
11 Sanga idah tuan diberu e maka lanai banci bereken diberu e keuntungen man kalak e, merawa kel kalak e. Saren kalak e Paulus ras Silas ku pajak, i je me ingan pejabat pengadilen pemerentah Roma ngadili kalak. Iteh tuan diberu e maka segat ate pejabat-pejabat e man kalak Jahudi, janah bangga kel kalak e jadi warga negara Roma. Emaka ikataken tuan diberu e man pejabat e maka Paulus ras Silas erban guntar perban ajarken kalak e kebiasan si la banci ialoken kalak Roma. Kenca bage ning kalak e, “jelma si enterem [si bas pajak e] pe ikut ngelawan kalak e [Paulus ras Silas].” Iperentahken pejabat pengadilen e me “gelah kalak e ipekpeki alu tongkat.” Kenca si e, Paulus ras Silas ibaba ku penjara. Imasukken penjaga penjara me duana dilaki si enggo babak belur e ku penjara si arah basna kel, jenari iketna nahe kalak e. (Perb. 16:19-24) Kenca tutup penjaga e pintu penjara, gelap kel bas penjara e. Paulus ras Silas pe menam lanai siidahen. Tapi idah Jahwe kalak e.—Ms. 139:12.
12. (a) Uga tanggapen murid-murid Kristus sanga lit tentangen, janah engkai? (b) Uga Setan ras pengikutna nentang kalak Kristen si gundari?
12 Piga-piga tahun sope si e, kataken Jesus man pengikutna, “Kena pe siksana ka nge.” (Joh. 15:20) Emaka, sanga reh Paulus ras teman-temanna ku Makedoni, enggo ersikap kalak e ngadapi tentangen. Anggap kalak e tentangen e lit perban merawa Setan man kalak e labo perban lanai meriah ukur Jahwe ngidah kalak e. Gundari pe, perbahanen pengikut Setan bali bagi kalak si nentang Paulus. Ipitnah penentang kita i sekolah ras bas inganta erdahin gelah segat ate kalak ngidah kita. Bas piga-piga negri, penentang arah kalangen agama nuduh kita ngajarken kebiasan-kebiasan si la banci ialoken penduduk setempat. Bas piga-piga ingan, turang seninata ipekpeki ras imasukken ku penjara. Tapi idah Jahwe kalak e.—1 Pet. 3:12.
“Mis Ia Iperidiken” (Perb. 16:25-34)
13. Engkai maka sungkun penjaga penjara e, “Kai si arus kulakoken gelah aku selamat?”
13 Paulus ras Silas pasti perlu waktu gelah lanai akap kalak e mesui kel janah tenang ukur kalak e, perban bas wari e enggo ipekpeki kalak e. Tapi sanga tengah berngi, enggo lit gegeh kalak e, emaka banci kalak e ‘ertoto ras rende muji Dibata.’ Jenari terjadi me gempa si megegeh. Medak me penjaga penjara janah idahna pintu-pintu enggo talang. Emaka mbiar kel ia perban akapna enggo kiamen tahanen e. Mbiar ia ihukum, emaka “buatna pedangna janah bunuhna atena bana.” Tapi serko Paulus, nina, “Ula bunuh bandu, sebap jenda denga nge kami kerina!” Nungkun me penjaga penjara si kuatir e, nina, “Kai si arus kulakoken gelah aku selamat?” Paulus ras Silas labo banci nelamatken ia, Jesus ngenca si banci ngelakokenca. Emaka ning kalak e, “Teklah man Tuan Jesus, gelah kam . . . iselamatken.”—Perb. 16:25-31.
14. (a) Uga Paulus ras Silas nampati penjaga penjara? (b) Pasu-pasu kai si aloken Paulus ras Silas perban megenggeng ngadapi penindasen?
14 Tutus nge ate dilaki e nungkun man Paulus? Sitik pe Paulus la ragu maka tutus ate dilaki e nungkun. Penjaga penjara e labo kalak Jahudi, emaka labo tandaina Kitap-Kitap si Badia. Gelah banci ia jadi kalak Kristen perlu ia erlajar lebe janah tek man kebenaren dasar bas Pustaka. Emaka, ban Paulus ras Silas waktuna ncakapken “kata Jahwe man bana.” Perban tutus ate Paulus ras Silas ngajarken Kitap-Kitap si Badia, banci saja lanai gejapna mesui luka-lukana ndai. Tapi perdiateken penjaga penjara e maka enggo meratahen gurung kalak e, emaka tambarina luka-luka kalak e. Kenca si e, “mis ia iperidiken” ras keluargana. Mbelin kel pasu-pasu si idat Paulus ras Silas perban megenggeng ngadapi penindasen!—Perb. 16:32-34.
15. (a) Uga Saksi Jahwe si gundari ngusih Paulus ras Silas? (b) Engkai maka arus mulih-ulih sidahi kalak bas daerahta?
15 Bali bagi Paulus ras Silas, enterem Saksi Jahwe si ipenjaraken gundari pe erberita bas penjara, janah mehuli hasilna. Contohna, bas sada negri si ngelarang pendahinta, pernah icatat maka hampir setengah Saksi Jahwe si tading i je erlajar kebenaren sanga i penjara. (Jes. 54:17) Selain si e, penjaga penjara ndai nggit mindo penampat kenca terjadi gempa. Bage ka pe, lit piga-piga kalak si gundari nggit ngaloken kebenaren kenca lit masalah bas geluhna, si bali bagi gempa. Adi mulih-ulih kita ndahi kalak e, siap kita nampati kalak e sanga perlu kalak e penampat.
“Gundari, Pedaratna Atena Kami alu Erbuni-buni?” (Perb. 16:35-40)
16. Kai si terjadi sada wari kenca Paulus ras Silas ipekpeki?
16 Sada wari kenca Paulus ras Silas ipekpeki, iperentahken pejabat pengadilen gelah kalak e ibebasken. Tapi nina Paulus, “Lenga pe kami adilina, enggo pekpekina kami i lebe-lebe jelma si enterem, padahal kami kalak Roma. Masukkenna ka kami ku penjara. Gundari, pedaratna atena kami alu erbuni-buni? Lang, la kami nggit! Suruh kalak e si mpedarat kami.” Sanga iteh pejabat pengadilen e maka duana dilaki e warga negara Roma, “mbiar kel” kalak e perban enggo langgar kalak e hak Paulus ras Silas. d Gundari kebalikenna me si terjadi. Paulus ras Silas enggo ipekpeki i lebe-lebe jelma si enterem, gundari pejabat pengadilen e arus mindo maap i lebe-lebe jelma si enterem. Mindo kel kalak e gelah Paulus ras Silas lawes arah Pilipi nari. Nggit Paulus ras Silas, tapi sope si e usahakenna mpegegehi murid-murid si mbaru si enggo reh teremna. Kenca si e maka kalak e lawes.
17. Pelajaren penting kai si idat murid-murid si mbaru arah kai si ilakoken Paulus ras Silas?
17 Adi mis kataken Paulus ras Silas maka kalak e warna negara Roma, banci saja labo sempat kalak e ipekpeki. (Perb. 22:25, 26) Tapi adi bage ban kalak e, banci saja akap murid-murid i Pilipi gunaken kalak e hakna selaku warga negara Roma gelah la ndatken tentangen. Si e banci la mehuli pengaruhna man murid-murid si labo warna negara Roma, perban kalak e la ilindungi undang-undang. Perban nggit itindas, cidahken Paulus ras Silas man murid-murid si mbaru e maka pengikut Kristus banci tetap paguh amin pe itindas. Selain si e, perban pindo Paulus ras Silas hakna selaku warga negara Roma, paksana gelah akui pejabat pengadilen e i lebe-lebe jelma si enterem maka si lakoken kalak e ngelanggar undang-undang. Alu bage, ku lebena lanai ate-ate pejabat pengadilen ndalanken undang-undang. Si e pe nampati gelah kai si terjadi man Paulus lanai terjadi man kalak Kristen.
18. (a) Uga pengawas-pengawas bas runggun Kristen si gundari ngusih Paulus? (b) Uga kita make “undang-undang guna mbela berita si meriah”?
18 Gundari, pengawas-pengawas bas runggun pe labo mereken petunjuk saja, kalak e pe jadi usihen bas ndalankenca. Kerina si isuruh kalak e gelah ilakoken turang seninana, kalak e pe nggit ngelakokenca. Bali bagi Paulus, banci ka siukuri uga carana ras ndigan kita nggunaken hak-hakta gelah ilindungi undang-undang. Adi memang perlu, banci simanpaatken pengadilen setempat, pengadilen nasional, ntah pe pengadilen internasional gelah banci kita tetap nembah Jahwe. Tujunta labo ngubah undang-undang. Tapi “sipake undang-undang guna mbela berita si meriah,” bali bagi si itulisken Paulus man runggun i Pilipi kira-kira sepuluh tahun kenca ia ipenjaraken i je. (Pil. 1:7) La soal uga keputusen pengadilen, bali bagi Paulus ras teman-temanna, ertekad kita guna terus “mberitaken berita si meriah” ku ja pe kita isuruh kesah si badia.—Perb. 16:10.
a Nen kotak “ Lukas—Penulis Perbahanen Rasul-Rasul.”
b Banci saja kalak Jahudi ilarang mbangun ingan pulung kalak Jahudi i Pilipi perban pensiunen tentera Roma tading i je. Selain si e, banci saja kalak Jahudi si dilaki bas kota e la seh sepuluh kalak, padahal silang-langna arus lit sepuluh dilaki gelah banci ibangun kalak e ingan pulung kalak Jahudi.
c Nen kotak “ Lidia—Perbinaga Uis si Warna Ungu.”
d Menurut undang-undang Roma, warga negara Roma lit hakna iadili alu cara si tepat janah la ia banci ihukum i lebe-lebe jelma si enterem adi lenga terbukti ia ersalah.