1-3. (a) Ise teman Paulus si mbaru bas perdalanenna, janah uga ia kalakna? (b) Kai si nandangi sipelajari bas pasal enda?

 ERDALAN me Paulus bas dalan si erbatu-batu si ngubungken kota-kota. Tatap Paulus anak muda si erdalan i sampingna, janah ukurina kai nge kari si terjadi man anak muda e. Gelar anak muda e Timotius. Umurna kira-kira 20 tahun. Ia semangat kel. Tiap langkahken Paulus ras Timotius nahena, reh dauhna me kalak e arah Listera ras Ikoni. Kai si nandangi terjadi bas perdalanen kalak e? Adi Paulus, enggo banci bayangkenna kai si nandangi terjadi, sebap enda perdalanen utusen injilna si peduaken. Tehna maka ugapa pe mbue bahaya ras masalah si man adapen kalak e. Banci saja ukuri Paulus uga nge kari tanggapen Timotius man kerina si man adapen kalak e.

² Timotius si meteruk ukur e kurang percaya diri, tapi tek kel Paulus man bana. Kejadin si mbaru-mbaru enda terjadi erban iteh Paulus maka perlu ia teman si tepat bas perdalanenna. Dahin kalak e eme ndahi ras mpegegehi turang senina bas runggun. Emaka perlu kalak e seperukuren ras tekad si paguh. Engkai maka bage? Salah sada alasenna banci saja perban mbaru denga Paulus ras Barnabas la sicocoken.

³ Bas pasal enda sipelajari kari kerna uga nge cara si mehulina bas ndungi persoalenta ras kalak si deban. Siteh ka kari engkai maka pilih Paulus Timotius nemani ia bas perdalanenna. Selain si e, siangkai ka kari maka penting kel tugas pertua keliling gundari enda.

4. Kai tujun perdalanen utusen injil Paulus si peduaken?

⁴ Bas pasal sebelumna enggo siteh maka Paulus, Barnabas, Judas, ras Silas mpegegehi turang senina i Antiokia alu mpeseh keputusen badan pinpinen kerna sunat. Kenca si e, kai si ilakoken Paulus? Turikenna man Barnabas kai rencanana. Nina, “Ota sidahi mulihi turang seninata bas tiap kota si enggo pernah siberitaken kerna kata Jahwe guna ngenen uga keadan kalak e.” (Perb. 15:36) Maksud Paulus labo meriah-riah saja kalak e bas ndahi turang senina e. Bas buku Perbahanen Rasul-Rasul, jelas kel ituriken kai tujun perdalanen utusen  injil Paulus si peduaken. Si pertama, mpeseh keputusen si enggo iban badan pinpinen. (Perb. 16:4) Si peduaken, selaku pertua keliling, ertekad Paulus mpegegehi kiniteken turang senina. (Rom. 1:11, 12) Uga Saksi-Saksi Jahwe si gundari ngusih kai si ilakoken badan pinpinen abad pertama guna mpegegehi runggun?

5. Uga Badan Pinpinen si gundari mereken petunjuk ras mpegegehi runggun-runggun?

⁵ Gundari, igunaken Kristus Badan Pinpinen Saksi-Saksi Jahwe guna ngaturken runggun-runggun. Gunaken Badan Pinpinen me surat, baca-bacan tercetak ntah pe elektronik, perpulungen, ras si debanna, guna mpeseh petunjuk bage pe guna mpegegehi kerina turang senina i sebelang doni. Selain si e, iutus Badan Pinpinen ka pertua keliling gelah Badan Pinpinen banci ndeher ras kerina runggun. I sebelang doni, lit ribun pertua si ncukupi syarat si ilantik Badan Pinpinen jadi pertua keliling. Kalak e langsung ilantik Badan Pinpinen.

6, 7. Kai saja tanggung jawap pertua keliling?

⁶ Pertua keliling si gundari, perdiatekenna kel kerina turang senina bas runggun si idahina, janah pegegehina kiniteken kalak e. Selain si e, berekenna kata pergegeh arah Pustaka nari. Uga carana? Usih kalak e kai si ilakoken pertua keliling si deban, contohna Paulus. Bagenda nina Paulus man Timotius, “Beritakenlah berita si meriah alu semangat, bas waktu si senang bage pe bas waktu si susah. Berekenlah penginget, persinget, ras nasehat alu dem kesabaren janah bagi guru si beluh ngajar. . . . Lakokenlah dahin selaku perberita.”​—2 Tim. 4:2, 5.

⁷ Bage ka me si ilakoken pertua keliling. Pertua keliling ras ndeharana, adi ia enggo erjabu, kerja sama bas pelayanen ras perberita si lit bas runggun si idahina. Pertua keliling ras ndeharana semangat erberita janah beluh ngajar. Enda mejile pengaruhna man anggota runggun. (Rom. 12:11; 2 Tim. 2:15) Pertua keliling ras ndeharana ncidahken kekelengen si nggit erkorban. Meriah akap kalak e nggunaken waktu ras gegehna guna ngelayani kalak si deban. Nggit kalak e ndahi ingan si kurang kapna tabehna cuacana, termasuk ingan si berbahaya. (Pil. 2:3, 4) Pertua keliling pe mpegegehi, ngajar, ras mpersingeti tiap runggun arah khotbah-khotbah si erpalasken Pustaka si Badia. Melala kel manpaat si banci sidat adi siperdiateken janah siusih kalak e.​—Heb. 13:7.

8. Uga tanggapen Barnabas man saran Paulus?

⁸ Barnabas setuju man saran Paulus guna ‘ndahi mulihi turang senina.’ (Perb. 15:36) Sebelumna, kalak e duana enggo kerja sama alu mehuli, janah enggo tandai kalak e turang senina bas runggun-runggun e. (Perb. 13:2–14:28) Emaka masuk akal nge ajak Paulus ka Barnabas bas tugas e. Tapi lit masalah. Bas Perbahanen Rasul-Rasul 15:37 ikataken, “Merhat kel  Barnabas maba Johanes si igelari Markus.” Barnabas labo mpeseh saran saja, tapi “merhat kel” ia gelah seninana Markus ikut bas perdalanen utusen injil e.

9. Engkai maka Paulus la setuju man Barnabas?

⁹ Tapi Paulus la setuju. Engkai? Menurut Pustaka, “Paulus la nggit maba Johanes [Markus], sebap pernah tadingken Johanes kalak e i Pampilia janah la ia ikut erdahin ras kalak e.” (Perb. 15:38) Markus pernah ikut ras Paulus bage pe Barnabas bas perdalanen utusen injil kalak e si pertama, tapi la ngasa dung. (Perb. 12:25; 13:13) Bas awal perdalanen, sanga kalak e i Pampilia denga, tadingken Markus tugasna janah mulih ia ku Jerusalem. Bas Pustaka la lit ituriken engkai maka lawes ia. Tapi kepeken, anggap Paulus perbahanenna e la ertanggung jawap. Banci saja, anggap Paulus maka Markus e la terpenalem.

10. Kai si terjadi perban Paulus ras Barnabas la sicocoken, janah kai si dungna ilakoken kalak e?

¹⁰ Barnabas tetap atena maba Markus. Paulus pe tetap la setuju. Emaka, nina Perbahanen Rasul-Rasul 15:39, “Rubat mbelin kalak e, dungna sirang ia.” Barnabas erlayar ku Kiprus, kuta kemulihenna, janah babana Markus. Tapi Paulus, teruskenna rencanana. Menurut Pustaka, “Paulus, pilihna Silas. Kenca totoken senina-senina gelah ibereken Jahwe kiniulinNa si luar biasa man Paulus, lawes me kalak e duana.” (Perb. 15:40) Ras-ras kalak e lawes “ku Siria ras Kiliki, pegegehina runggun-runggun si lit i je.”​—Perb. 15:41.

11. Sipat kai saja nge si iperluken gelah tetap mehuli hubungenta amin pe sempat la sicocoken?

¹¹ Kejadin enda pe ngingetken kita maka kita la sempurna. Paulus ras Barnabas enggo ilantik jadi utusen badan pinpinen. Mbelin kemungkinenna, bas pudi wari, Paulus pe jadi anggota badan pinpinen. Tapi bas kesempaten enda, kalak e ikuasai kelemahenna selaku manusia si la sempurna. Lanai nge terpehuli hubungen kalak e? Labo bage. Amin pe Paulus ras Barnabas la sempurna, kalak e meteruk ukur. Usahaken kalak e ngusih Jesus. Dungna sialem-alemen kalak e janah rembak ka mulihi. (Ep. 4:1-3) Bas pudi wari, Paulus ras Markus pe kerja sama ka mulihi. a—Kol. 4:10.

12. Sipat kai nge si perlu icidahken pengawas-pengawas si gundari?

¹² Paksa kejadin e, merawa kel Paulus ras Barnabas. Tapi, kalak e duana labo itandai selaku kalak si menukah merawa. Barnabas e perkeleng ras nggit nampati, piah dungna labo lebuh rasul-rasul ia alu gelar aslina eme Jusup, tapi lebuh kalak e ia Barnabas, si ertina “Kalak si Nggit Nampati.” (Perb. 4:36) Paulus pe mehuli ras ermediate. (1 Tes. 2:7, 8) Pertua-pertua si gundari pe, termasuk pertua keliling, arus ngusih Paulus ras Barnabas. Kalak e arus meteruk ukur ras mehuli man pertua si debanna bage pe man kerina turang senina bas runggun.​—1 Pet. 5:2, 3.

13, 14. (a) Ise nge Timotius e, janah uga Paulus jumpa ras ia? (b) Engkai maka takjup Paulus ngidah Timotius? (c) Tugas kai si idat Timotius?

¹³ Bas perdalanen utusen injilna si peduaken, lawes Paulus ku Galati, eme salah sada propinsi Roma. I je enggo lit piga-piga runggun. Menurut Pustaka, dungna “seh Paulus i Derbe ras i Listera. I je lit sekalak murid gelarna Timotius. Mamakna kalak Jahudi janah enggo jadi murid. Tapi bapakna kalak Junani.”​—Perb. 16:1. b

¹⁴ Kepeken, sanga tangtangna Paulus reh ku daerah e kira-kira tahun 47 M, enggo pernah Paulus jumpa ras keluarga Timotius. Gundari, kira-kira dua ntah telu tahun kenca si e, reh ka Paulus ku je. Takjup kel Paulus ngidah Timotius si nguda denga. Engkai? Perban ‘turang senina ngataken maka Timotius e kalak si mehuli.’ Labo turang senina bas runggunna saja si ngataken Timotius e kalak si mehuli. Turang senina arah runggun-runggun si deban pe bage kang pengakapna. Bas Pustaka, lit ituriken maka turang senina i Listera bage pe Ikoni muji ia, padahal Ikoni jarakna kira-kira 30 kilometer arah Listera nari. (Perb. 16:2) Sesuai petunjuk kesah si badia, bereken pertua-pertua tanggung jawap si mbelin man Timotius. Tugasna eme nampati Paulus ras Silas bas dahin keliling.​—Perb. 16:3.

15, 16. Engkai maka Timotius e ikataken turang senina kalak si mehuli?

¹⁵ Kai nge si erban Timotius e ikataken turang senina kalak si mehuli amin pe ia nguda denga? Perban beluh nge ia, mejile rupana, janah lit bakatna? Adi manusia, memang si e si perdiatekenna. Nabi Samuel pe pernah bage. Tapi persingeti Jahwe ia, nina, “Cara manusia ngenen la seri ras cara Dibata ngenen. Adi manusia, nenna kai si teridah, tapi Jahwe nenNa isi pusuh kalak.” (1 Sam. 16:7) Ikataken turang senina maka Timotius e mehuli, labo perban bakatna, tapi perban mejile sipat-sipatna.

¹⁶ Ertahun-tahun kenca si e, ituriken Paulus me sipat-sipat Timotius si mejile. Katakenna maka Timotius e mehuli, nggit erkorban, janah rajin ndalanken tugas-tugasna. (Pil. 2:20-22) Banci ka idah kalak maka ‘kiniteken Timotius la munapik.’​—2 Tim. 1:5.

17. Uga anak muda si gundari banci ngusih Timotius?

¹⁷ Gundari, enterem anak muda si ngusih Timotius. Usahaken kalak e ncidahken sipat-sipat si mehuli. Alu bage, merim gelar kalak e akap Jahwe bage pe turang senina, amin pe kalak e nguda denga. (Kua. 22:1; 1 Tim. 4:15) Usahaken kalak e ka ncidahken kiniteken si la munapik. Labo tempa-tempa layani kalak e Jahwe, tapi lakokenna ka si la mehuli. (Ms. 26:4) Hasilna, enterem anak muda, bali bagi Timotius, meherga akap runggun. Sanga lit anak muda si jadi perberita janah dungna iperidiken, meriah kel ukur turang senina.

18. (a) Kai si ilakoken Paulus ras Timotius guna nampati badan pinpinen? (b) Kai hasilna man runggun-runggun?

¹⁸ Ertahun-tahun dekahna Paulus ras Timotius kerja sama. Perban kalak e pertua keliling, dalanken kalak e erbage-bage tugas arah badan pinpinen. Nina Pustaka, “Sanga kalak e lawes arah kota ku kota, peseh kalak e kai si enggo tentuken rasul-rasul ras pertua-pertua i Jerusalem gelah dalanken turang senina.” (Perb. 16:4) Kepeken tutus ate runggun-runggun ngikutken petunjuk arah rasul-rasul ras pertua-pertua i Jerusalem. Perban patuh kalak e, “reh paguhna kiniteken runggun-runggun janah tiap wari reh teremna jumlah kalak e.”​—Perb. 16:5.

19, 20. Engkai maka kalak Kristen arus patuh man “kalak si minpin” kalak e?

¹⁹ Saksi-Saksi Jahwe si gundari pe ndatken melala pasu-pasu perban patuh kalak e man petunjuk arah “kalak si minpin” kalak e. (Heb. 13:17) Lanai ndekah doni enda ikernepken. Emaka kalak Kristen arus terus mperdiateken ras ngikutken petunjuk arah “budak si setia ras pentar.” (Mat. 24:45; 1 Kor. 7:29-31) Alu bage, tetap paguh kinitekenta janah banci sijaga dirita gelah la icedai doni enda.​—Jak. 1:27.

²⁰ Memang, pengawas Kristen si gundari, termasuk Badan Pinpinen, labo sempurna. Paulus, Barnabas, Markus, ras pertua si deban bas abad pertama pe labo sempurna amin pe kalak e erpengarapen guna nggeluh i surga. (Rom. 5:12; Jak. 3:2) Tapi, banci kita tek man Badan Pinpinen perban tuhu-tuhu ikutken kalak e Kata Dibata janah usihna kai si ilakoken rasul-rasul. (2 Tim. 1:13, 14) Hasilna, reh paguhna kiniteken runggun-runggun.