PASAL 17
“Sampatina Kalak e Ngangkai Kitap si Badia”
Guna jadi guru si mehuli, dasar pengajarenta arus arah Pustaka si Badia
Arah Perbahanen Rasul-Rasul 17:1-15
1, 2. Ise nge si berkat Pilipi nari ku Tesalonika, kai nge kira-kira si ukuri kalak e?
PAULUS, Silas, ras Timotius lawes arah Pilipi nari ku Tesalonika. Perdalanen e dauhna 130 kilometer ngelewati gunung-gunung. Erdalan kalak e bas dalan si erlapis batu si ibangun kalak Roma. Enterem kalak si mbentasi dalan e, contohna prajurit, perbinaga, ras tukang si ahli. Gejek kel bas dalan e, lit sora kalak ngerana-ngerana, sora roda gereta, bage pe sora kelede. Labo nukah akap kalak e ngelakoken perdalanen e, khususna man Paulus ras Silas. Mesui denga akap kalak e dagingna perban ipekpeki i Pilipi.—Perb. 16:22, 23.
2 Ndauh kel perdalanen kalak e, gelah ula kapna latihsa, ngerana-ngerana kalak e. Inget kalak e denga uga riahna ukurna sanga penjaga penjara ras keluargana i Pilipi jadi kalak Kristen. Pengalamen e pasti erban reh semangatna kalak e guna terus erberita. Tapi, sanga enggo nandangi seh kalak e bas kota Tesalonika, banci saja tersungkun-sungkun kalak e uga nge kari tanggapen kalak Jahudi bas kota e man kalak e. Iserang ntah ipekpeki nge kari kalak e bali bagi i Pilipi?
3. Uga kita banci ngusih Paulus si tetap pang erberita?
3 Bas pudi wari, turiken Paulus perasanna bas surat si tulisna man kalak Kristen i Tesalonika. Nina, “Bagi si enggo teh kena, enggo nanami kami kiniseran janah ihina i Pilipi, tapi ban Dibata kami jadi pang guna mpeseh berita si meriah kerna Dibata man kena amin pe melala tentangen.” (1 Tes. 2:2) Arah kai si kataken Paulus e, siteh maka kuatir ka nge ia sope masuk ku kota Tesalonika perban kai si mbaru denga terjadi i Pilipi. Banci nge gejapkenndu uga perasan Paulus e? Pernah nge mesera kapndu mberitaken berita si meriah? Andalken Paulus Jahwe gelah banci ia pang sanga erberita. Adi siusih Paulus, kita pe banci pang.—1 Kor. 4:16.
Perb. 17:1-3)
“Sampatina . . . Ngangkai Kitap si Badia” (4. Engkai maka banci saja lebih telu minggu Paulus tading i Tesalonika?
4 Menurut cataten Pustaka, sanga i Tesalonika, lit telu kali wari Sabat Paulus erberita bas ingan pulung kalak Jahudi. Tapi enda labo ertina telu minggu saja Paulus tading bas kota e. Banci saja kenca Paulus seh i Tesalonika labo ia banci mis lawes ku ingan pulung kalak Jahudi. Selain si e, arah surat-surat Paulus, banci siteh maka sanga i Tesalonika, erdahin ia ras teman-temanna guna ncukupi keperlunna. (1 Tes. 2:9; 2 Tes. 3:7, 8) Janah, sanga i Tesalonika, dua kali Paulus ndatken penampat arah turang seninana i Pilipi. (Pil. 4:16) Emaka, banci saja, lebih telu minggu Paulus i Tesalonika.
5. Kai si ilakoken Paulus gelah tek kalak man kai si ajarkenna?
5 Kenca usahaken Paulus gelah pang ia erberita, ngerana ia man kalak si pulung bas ingan pulung kalak Jahudi. Bali bagi kebiasanna sedekah enda, “sampatina kalak e ngangkai Kitap si Badia. Jelaskenna ras buktikenna alu ayat-ayat maka arus adapi Kristus kiniseran janah ipekeke arah si mate nari. Nina Paulus, ‘Jesus si kuberitaken man kena eme Kristus.’” (Perb. 17:2, 3) Jadi, labo pengaruhi Paulus kalak si megiken ia gelah mis tek man bana, tapi banna kalak e rukur. Teh Paulus maka kalak si reh ku ingan pulung kalak Jahudi e enggo nandai ras ngergai Kitap si Badia. Tapi lenga tuhu-tuhu angkai kalak e isina, emaka sampati Paulus kalak e. Jelaskenna ras buktikenna arah Kitap si Badia maka Jesus arah Nasaret eme Mesias ntah pe Kristus si ijanjiken.
6. Uga Jesus nampati kalak ngangkai Kitap si Badia, ras kai hasilna?
6 Usih Paulus kai si ilakoken Jesus. Gunaken Jesus Kitap si Badia jadi dasar ajarenna. Contohna, mulih-ulih kataken Jesus man pengikutna maka menurut Kitap si Badia, Anak manusia arus ngenanami kiniseran, mate, ras ipekeke. (Mat. 16:21) Kenca Jesus ipekeke, cidahkenna bana man murid-muridna. Sanga idah kalak e Jesus, enggom terbukti maka kai si ikataken Jesus e tuhu. Tapi, bereken Jesus terbuen bukti man kalak e. Bas Pustaka lit ituriken kerna kai si ikataken Jesus man piga-piga muridna, “Mulai ceritakenna kerina kerna dirina si itulis bas Kitap si Badia, mulai tulisen Musa ras kerina Ajaren Nabi-Nabi.” Kai hasilna? Takjup murid-murid e, nina kalak e, “Balosam malem kel ateta ngerana ras ia bas dalan ndai sanga jelaskenna Kitap si Badia man banta!”—Luk. 24:13, 27, 32.
7. Engkai maka penting nggunaken Pustaka si Badia jadi dasar pengajarenta?
7 Kata Dibata lit kuasana. (Heb. 4:12) Emaka, kalak Kristen si gundari nggunaken Kata Dibata jadi dasar pengajarenna, bali bagi si ilakoken Jesus, Paulus, ras rasul si debanna. Selain si e, sisampati kalak erban kesimpulen si benar, sijelasken erti ayat-ayat bas Pustaka, janah sibuka Pustaka guna mbuktiken maka pengajarenta memang arah Pustaka. Adi rusur sigunaken Pustaka, sisampati kalak ngangkai maka kai sipeseh e labo pendapatta tapi ajaren arah Dibata. Selain si e, kita pe lalap dungna siinget maka dasar beritata eme Kata Dibata. Perban siteh beritata e terteki, pang kita mpesehsa bali bagi Paulus.
“Enterem . . . Jadi Kalak si Tek” (Perb. 17:4-9)
8-10. (a) Uga nge tanggapen kalak i Tesalonika man berita si meriah? (b) Engkai maka piga-piga kalak Jahudi cian atena Paulus? (c) Kai nge si lakoken penentang-penentang e?
8 Perban Paulus enggo isiksa, tehna maka tuhu kel kata-kata Jesus sanga nina, “Sekalak budak labo belinen asangken tuanna. Adi aku pe siksa kalak e, kena pe siksana ka nge. Adi kata-kataku patuhi kalak e, kata-kata kena pe patuhina ka.” (Joh. 15:20) Bas Tesalonika, erbage-bage tanggapen kalak nandangi berita si meriah, pas bagi si ikataken Jesus. Lit si nggit ngaloken Kata Dibata, lit ka si nentang. Kerna kalak si nggit ngaloken berita si meriah, nina Lukas, “Enterem [kalak Jahudi] jadi kalak si tek [kalak Kristen] janah nggabungken diri ras Paulus bage pe Silas, termasuk ka enterem kalak Junani si nembah Dibata bage pe diberu-diberu si terpandang.” (Perb. 17:4) Murid-murid si mbaru enda pasti meriah kel ukurna perban enggo isampati ia ngangkai Kitap si Badia.
9 Memang lit si ngergai kata-kata Paulus, tapi lit ka si ngilas atena ngidah Paulus. Piga-piga kalak Jahudi i Tesalonika, cian atena ngidah Paulus perban “enterem kalak Junani” nggit ngaloken berita Paulus. Pengaruhi kalak e atena kalak Junani gelah ngikutken agama Jahudi. Emaka, ajarken kalak e Kitap-Kitap Heber, janah jangna kapna kalak Junani e. Tapi reh Paulus ku ingan pulung kalak e janah banna kalak Junani tek man kai si ajarkenna, dungna lanai kalak e nggit ngikutken agama Jahudi. Emaka, naik me dareh kalak Jahudi e.
‘Serbu kalak e rumah Jason guna nangkap Paulus ras Silas gelah ibaba ku lebe-lebe kalak si gutul e.’—Perbahanen Rasul-Rasul 17:5
10 Ceritaken Lukas man banta kai si terjadi selanjutna, nina, “Ngidah si e, cian ate kalak Jahudi. Emaka pepulungna kalak gutul si lit i pajak, si ku jah ku je ras la lit tujunna. Banna sada kelompok guna ngguntari kota e. Serbuna rumah Jason guna nangkap Paulus ras Silas gelah ibaba ku lebe-lebe kalak si gutul e. Tapi perban la datna Paulus ras Silas, sarenna Jason ras piga-piga senina ku penguasa-penguasa kota janah nina alu sora si megang, ‘Kalak si erban guntar doni sangana i jenda, aloken Jason ia i rumahna. Kalak enda kerina enggo ngelawan undang-undang Kaisar alu ngataken lit raja si deban, eme Jesus.’” (Perb. 17:5-7) Kai nge akibatna man Paulus ras teman-temanna perban ngamuk jelma si enterem e?
11. Kai saja nge tuduhen penentang man Paulus ras teman-temanna, janah larangen si apai nge si banci saja akap penentang e ilanggar utusen injil e? (Nen cataten i teruh.)
11 Memang seh kel ngerina adi jelma si enterem enggo ngamuk. Biasana ate-ate kalak e ngelakoken kekerasen, janah lanai kalak e terkendali, bali bagi banjir si galang si lanai terambati. Massa e me si igunaken kalak Jahudi guna nyerang Paulus ras Silas. Janah, kenca kalak Jahudi e “ngguntari kota” Tesalonika, usahaken kalak e gelah tek penguasa-penguasa maka Paulus ras teman-temanna enggo ngelakoken kejahaten. Si pertama, ituduh kalak e Paulus ras teman-temanna “erban guntar doni,” padahal situhuna kalak e nge si ngguntari Tesalonika! Tuduhen si peduaken terparahen ka, Paulus ras teman-temanna ituduh mberitaken maka lit Raja si deban, eme Jesus. Alu bage langgar kalak e larangen si iban kerajan Roma. a
12. Ja nari siteh maka tuduhen man kalak Tesalonika banci parah kel akibatna?
12 Mbarenda pe bage ka nge tuduhen peminpin agama man Jesus. Nina kalak e man Pilatus, “Dilaki enda enggo terdat nipu bangsa kami, . . . katakenna ka ia Kristus, sekalak raja.” (Luk. 23:2) Banci saja, mbiar Pilatus anggap kaisar kari ia ikut mberontak guna nggantiken kaisar. Emaka, ibanna keputusen gelah Jesus ihukum mate. Tuduhen man kalak Kristen i Tesalonika pe banci parah kel akibatna. Bas buku si mbahas kerna buku Perbahanen Rasul-Rasul ikataken, “Bahaya si adapi kalak e la main-main, sebap ‘kalak si iduga denga pe ikut mberontak guna nggantiken kaisar, biasana ihukum mate.’” Berhasil nge serangen jahat kalak e?
13, 14. (a) Engkai maka jelma si enterem si ngamuk e la banci mpengadi dahin erberita? (b) Uga Paulus hati-hati bagi Jesus, janah uga kita banci ngusih ia?
13 Jelma si enterem si ngamuk e la banci mpengadi pendahin erberita. Engkai? Salah sada alasenna, perban la dat kalak e Paulus ras Silas. Selain si e, penguasa-penguasa kota pe banci jadi la tek man tuduhen e. Kenca dat kalak e “sen jaminen,” lepasken kalak e Jason ras senina-senina si deban si enggo ibaba kulebe-lebe kalak e. (Perb. 17:8, 9) Ikutken Paulus nasehat Jesus gelah ‘hati-hati bagi nipe tapi polos bagi merpati,’ emaka la ia kena bahaya. Dungna banci ia terus erberita bas ingan si deban. (Mat. 10:16) Jelas me, Paulus e perpang tapi tetap hati-hati, labo ia nekat. Uga kalak Kristen si gundari banci ngusih Paulus?
14 Bali bagi bas jaman Paulus, peminpin-peminpin agama si ngaku Kristen gundari pe, cian atena kita perban reh teremna kalak si jadi Saksi Jahwe. Emaka rusur kel iahken kalak e jelma si enterem guna nyerang Saksi Jahwe. Tuduh kalak e kita ngelawan pemerentah janah la nggit mbela negara. Alu bage itindas pemerentah me dungna kita. Uga tanggapenta? La kita nggit ndarami masalah. Asa bancina, la kita nggit erdebat ras kalak si merawa ras si la masuk akal. Tapi sebalikna, siusahaken gelah banci terus ndalanken pendahin erberita alu dame. Mungkin, banci ka kita mulihken erberita man kalak e bas kesempaten si deban sanga situasina enggo tenang.
‘Semangaten Kalak e Erlajar’ (Perb. 17:10-15)
15. Uga tanggapen kalak i Berea man berita si meriah?
15 Ipindoken turang senina gelah Paulus ras Silas lawes ku Berea, kira-kira 65 kilometer dauhna, guna keselamaten kalak e. Kenca seh i je, lawes Paulus ku ingan pulung kalak Jahudi janah ngerana ia man kalak si reh ku je. Seh kel riahna ukur Paulus perban lit si megiken berita si meriah! Itulis Lukas maka “semangaten kalak i Berea erlajar asangken kalak i Tesalonika, sebap aloken kalak e kata Dibata alu bulat ukur. Pereksana Kitap si Badia alu tutus tiap wari guna mastiken kebenarenna.” (Perb. 17:10, 11) Enda labo maksudna kalak i Berea ulin asangken kalak i Tesalonika. Bas pudi wari, itulis Paulus man turang senina i Tesalonika, “La kami erngadi-ngadi ngata bujur man Dibata, perban sanga begi kena kata Dibata arah kami nari, aloken kena kata e labo bagi kata si rehna arah manusia nari, tapi bagi si arusna eme arah Dibata nari. Kata e erdahin bas diri kena, kalak si tek man Tuan.” (1 Tes. 2:13) Jadi, kai nge si erban kalak Jahudi i Berea e semangat kel erlajar?
16. Engkai maka kalak i Berea ikataken ‘semangat kel erlajar’?
16 Sanga begi kalak i Berea informasi si mbaru, labo kalak e mis curiga, labo ka kalak e asal tek saja. Tangtangna, tutus ate kalak e megiken kai si ikataken Paulus. Kenca si e, pastiken kalak e kai si jelasken Paulus alu mereksa Kitap si Badia. Kalak e pe rajin mpelajari Kata Dibata, labo bas wari Sabat saja tapi tiap wari. Janah lakokenna si e alu “bulat ukur.” Usahaken kalak e ndarami bukti-bukti maka ajaren si mbaru e cocok ras Pustaka. Kenca si e, nggit kalak e robah perban kalak e meteruk rukur. Emaka “enterem arah kalak e nari jadi kalak si tek.” (Perb. 17:12) Jadi, la ateta mamang, kataken Lukas kalak e ‘semangat kel erlajar.’
17. Engkai maka perlu siusih kalak Berea, janah uga carata ngusih kalak e amin pe enggo ndekah kita bas kebenaren?
17 Labo isangka kalak Berea e maka cara kalak e ngaloken berita si meriah icatat bas Kata Dibata janah jadi usihen man banta. Lakoken kalak e bagi siarapken Paulus bage pe bagi si ngena ate Jahwe. Kita pe, siiahken ka ateta kalak gelah pereksana Pustaka alu tutus. Alu bage, paguh me kinitekenna perban dasarna Kata Dibata. Tapi, kenca siteh kebenaren, perlu denga kita semangat erlajar bagi kalak Berea. Arusna, reh riahna siakap erlajar kerna Jahwe janah mis silakoken kai si ajarkenNa. Adi bage siban, sipediat me Jahwe si mbentuk kita ras ngelatih kita sesuai ras sura-suraNa. (Jes. 64:8) Banci ka kita tetap igunaken Bapakta si i surga, janah meriah siban ukurNa.
18, 19. (a) Engkai maka Paulus lawes nadingken Berea? Kai si terus lakoken Paulus janah uga carata ngusih ia? (b) Man ise nge berikutna Paulus erberita, janah i ja?
18 Paulus la banci ndekah bas Berea. Bas Pustaka sibaca, “Sanga begi kalak Jahudi i Tesalonika maka enggo beritaken Paulus kata Dibata i Berea, dahi kalak e ku je guna mpengaruhi ras nggejeki jelma si enterem. Emaka mis taruhken senina-senina me Paulus lawes ku daerah tepi laut. Tapi Silas ras Timotius tetap tading i Berea. Kenca taruhken senina-senina e Paulus seh ku Aten, mulih kalak e alu maba pesan arah Paulus gelah Silas ras Timotius mis reh ndahi Paulus.” (Perb. 17:13-15) Musuh-musuh berita si meriah la erlatih-latih nentang kalak Kristen. La kalak e puas mpelawes Paulus arah Tesalonika. Lawes ka kalak e ku Berea gelah nggejeki ka i je, tapi la berhasil. Iteh Paulus daerahna mbelang denga. Emaka, lawes ka ia ku ingan si deban guna erberita. Gundari pe, la sipediat ise pe mpengadi kita erberita!
19 Kenca erberita Paulus man kalak Jahudi i Tesalonika ras i Berea, pasti enggo melala pelajarina kerna pentingna sipat si perpang ras nampati kalak erban kesimpulen si benar arah Pustaka. Kita pe bage. Bas perdalanen Paulus berikutna, erberita ia man kalak si labo Jahudi bas Aten. Kiniteken kalak e beda kel ras kiniteken kalak Kristen. Uga nge tanggapen kalak e? Siteh kari jawapenna bas pasal berikutna.
a Menurut sekalak peneliti Pustaka, sanga si e lit iban kerajan Roma larangen guna ncakapken kerna raja berikutna ntah pe kerajan berikutna, apai ka adi katakenna maka raja ntah pe kerajan e banci naluken kerajan Roma. Banci saja berita si ipeseh Paulus isalahgunaken musuh, janah katakenna berita e ngelanggar larangen enda. Nen kotak “ Kaisar-Kaisar bas Buku Perbahanen Rasul-Rasul.”