1-3. (a) Engkai maka merawa ate Paulus sanga i Aten? (b) Kai si banci sipelajari arah usihen Paulus?

 MERAWA ate Paulus. Ia sangana bas Aten, Junani, eme pusat pendidiken. Bas ingan e, ahli-ahli filsafat bagi Sokrates, Plato, ras Aristoteles pernah ngajar. Kalak bas Aten tutus kel erdibata. Mbue kel dewa-dewi kalak e, emaka ku japa pe Paulus lawes, idahna berhala. Lit berhala i kuil-kuil, i lapangen, ras i dalan-dalan. Iteh Paulus uga perasan Jahwe, Dibata si benar, kerna nembah berhala. (Kel. 20:4, 5) Bali bagi Jahwe, rasul si setia e pe ciga kel atena berhala!

² Sanga masuk Paulus ku agora, ntah pe pajak, sengget kel ia. Melala kel patung alat kelamin dewa Hermes si erjejer i sudut barat laut, i deher dalan masuk utama. Melala kel ingan nembah berhala bas pajak e. Uga nge Paulus erberita man kalak si nembah melala berhala? Banci nge kendalikenna emosina janah daramina persaman si banci bahasna ras kalak si megiken ia? Berhasil nge ia nampati kalak guna ndarami ras nembah Dibata si benar?

³ Bas Perbahanen Rasul-Rasul 17:22-31, banci sibaca kata-kata Paulus man kalak si meganjang sekolahna i Aten. Paulus ngerana alu yakin, bijaksana, ras lit ka pengertinna. Alu mpelajari usihen Paulus, banci siteh uga carana ndarami persaman si banci sibahas ras kalak si deban bage pe nampati kalak e rukur.

4, 5. Sanga Paulus i Aten, i ja ia erberita janah uga nge kalakna i je?

⁴ Paulus sangana i Aten bas perdalanen utusen injilna si peduaken, kira-kira tahun 50 M. a Janahna nimai kerehen Silas ras Timotius arah Berea nari, bagi biasa, “sampatina kalak Jahudi . . . bas ingan pulung kalak Jahudi guna ngangkai Kitap si Badia.” Lawes ka ia ku “pajak” ntah pe agora gelah banci jumpa ras kalak Aten si labo kalak Jahudi. (Perb. 17:17) Pajak si lit i Aten seh kel galangna, janah ndeher ku bukit si igelari Akropolis. Pajak e labo jadi ingan binaga saja ngenca.  Pajak e pe jadi ingan si pentingna bas kota e, perban i je me kalak arih-arih. Menurut sada buku, pajak e eme pusat ekonomi, politik, bage pe adat istiadat. Meriah akap kalak Aten pulung ras tukar pikiren i je.

⁵ Labo menukah akap Paulus tukar pikiren ras kalak bas pajak e. I je, lit pengikut Epikurea ras Setoa. b Duana ajaren e ersaing. Pengikut Epikurea tek maka kegeluhen lit bage-bage saja. Bagenda me kiniteken kalak e: “Labo perlu mbiar man Dibata. Kalak mate lanai gejapna kai pe. Kiniulin banci idat. Kejahaten banci igengken.” Pengikut Setoa tek maka perlu ia terus erlajar gelah tambah pemetehna. Kalak e la tek maka Dibata e sada Pribadi. Pengikut Epikurea bage pe Setoa la tek maka kalak mate banci ipekeke, bagi si iajarken murid-murid Kristus. Jelas me, duana ajaren e ndai beda kel ras kebenaren si ipercayai kalak Kristen ntah pe kebenaren si iberitaken Paulus.

6, 7. Uga nge tanggapen piga-piga kalak Junani si meganjang sekolahna man kai si iajarken Paulus, janah uga nge tanggapen piga-piga kalak man beritata?

⁶ Uga nge tanggapen piga-piga kalak Junani si meganjang sekolahna man kai si iajarken Paulus? Lit si ngelebuh Paulus alu istilah Junani si ertina “tukang koyok.” (Nen keterangen tambahen nwtsty-IN man Perb. 17:18.) Kerna istilah Junani e, lit sekalak pakar si ngataken, “Tangtangna kata e maksudna perik si kitik si lawes ku jah ku je guna mpepulung biji-bijin. Tapi bas pudi wari e ertina kalak si mpepulung rimah-rimah pangan ras sampah si debanna i pajak. Kenca si e, kata e igunaken man kalak si mpepulung potongen informasi, khususna kalak si la tehna mpersada informasi e alu cara si benar.” Jadi situhuna kalak si meganjang sekolahna ndai ngataken maka Paulus e kalak si motu, si ngusih kata-kata kalak ngenca tehna. Tapi labo kitik ukur Paulus, tetap ia pang.

⁷ Gundari pe bage. Rusur kita itokoh-tokohi alu penggelaren si la mehuli perban kita Saksi Jahwe janah tek kita man Pustaka. Misalna, lit guru-guru si ngajarken maka evolusi e tuhu, janah ikatakenna maka kalak si beluh ngenca si tek man evolusi. Kalak si la tek man evolusi anggap kalak e kalak motu. Ate kalak si meganjang sekolahna e, ianggap kalak min kita kalak motu perban siajarken Pustaka janah sibuktiken maka lit Pencipta. Tapi la kitik ukurta, tetap kita pang mbela kinitekenta. Tek kita maka kegeluhen bas doni enda lit perban iciptaken Dibata Jahwe.​—Ket. 4:11.

8. (a) Uga nge tanggapen piga-piga kalak si megiken Paulus? (b) Paulus ibaba ku Areopagus. Menurut piga-piga kalak, kai nge Areopagus e? (Nen cataten i teruh.)

⁸ Tapi, lit piga-piga kalak bas pajak e si beda tanggapenna. Nina kalak e, “Kuakap si beritakenna kerna dewa-dewa si deban.” (Perb. 17:18) Tuhu nge ipetandaken Paulus dibata-dibata si mbaru man kalak Aten? Adi tuhu, e labo masalah si sepele, sebap tuduhen e mirip ras salah sada tuduhen si erban Sokrates iadili ras ihukum mate piga-piga abad sope si e. Emaka, ibaba me  Paulus ku Areopagus janah isuruh ia njelasken ajaren si la biasa begi kalak Aten. c Uga Paulus erberita man kalak si la nandai Kitap-Kitap si Badia?

9-11. (a) Kai si tangtangna ibahas Paulus sanga erberita? (b) Uga carata ngusih Paulus bas pelayanen?

⁹ Perlu siinget maka merawa kel ate Paulus sanga idahna berhala bas kota e. Tapi labo mis serangna ibadah si palsu e, sebalikna tetap ia tenang. Alu hati-hati, usahakenna kel ndarami persaman ras kalak e gelah banci buatna ukur kalak e. Mulai me ia ngerana, nina, “O kalak Aten, adi kuperdiateken, bas kai pe biaren kena man dewa-dewa lebihen asangken kalak si deban.” (Perb. 17:22) Tempa-tempa bagenda nina Paulus, ‘Kuperdiateken tutus kel ate kena erdibata.’ Bijaksana kel Paulus, ipujina semangat kalak e. Itehna maka banci jadi lit piga-piga arah kalak e si nggit megiken berita si meriah.  Selain si e, inget Paulus ka maka ia pe mbarenda ‘la lit pemetehna ras kinitekenna.’​—1 Tim. 1:13.

¹⁰ Kenca si e, ikataken Paulus maka lit idahna bukti si ncidahken maka tutus kel ate kalak Aten erdibata. Bukti e eme ingan nutung persembahen si igunaken “Man Dibata si La Itandai.” Menurut sada buku, “Kalak Junani ras bangsa si debanna enggo biasa erban ingan-ingan nutung persembahen man ‘dibata-dibata si la itandai.’ Tujunna gelah adi lit dibata si la isembah kalak e perban la tandaina, dibata e la merawa.” Arah ingan nutung persembahen si iban kalak Aten, jelas kel teridah maka iakui kalak Aten lit Dibata si la itandai kalak e. Igunaken Paulus me ingan nutung persembahen e jadi kata pengantarna guna mpeseh berita si meriah. Nina, “Kupetandaken man kena Dibata si sembah kena e si la tandai kena e.” (Perb. 17:23) Mantap kel cara Paulus erban kalak tertarik megi berita si nandangi ipesehna. Labo lit iberitaken Paulus kerna dibata si mbaru ntah pe dibata si deban, bagi tuduhen piga-piga kalak. Tapi, si ijelaskenna eme kerna Dibata si benar si la itandai kalak e.

¹¹ Uga carata ngusih Paulus bas pelayanen? Adi megermet kita, banci jadi lit siidah tanda-tanda si ncidahken maka tutus ate sekalak jelma erdibata. Banci jadi lit benda-benda si lit hubungenna ras agama si ipakena, si ipajangna i rumah, ntah pe lit bas halamenna. Banci sikataken, ‘Kuidah, tutus kel atendu erdibata. Meriah kuakap ngerana-ngerana ras kalak si bagi kam.’ Adi siteh kiniteken sekalak jelma, banci sidarami topik si cocok guna sibahas ras-ras. Perlu siinget maka la banci sihakimi kiniteken kalak. Enterem turang seninata pe mbarenda tek man ajaren agama palsu.

12. Isesuaiken Paulus carana erberita man kalak si megiken ia. Uga banna carana?

¹² Enggo dat Paulus persaman si banci bahasna ras kalak Aten, tapi banci nge terus ia erberita man kalak e? Iteh Paulus maka angkai kalak Aten filsafat Junani tapi la angkai kalak e Kitap-Kitap si Badia. Emaka isesuaikenna carana erberita alu piga-piga cara. Si pertama, ipesehna ajaren Pustaka tapi la langsung ikutipna ayat arah Kitap-Kitap si Badia. Si peduaken, usahakenna gelah igejapken kalak si megiken ia maka angkaina perasan kalak e. Emaka, mon-mon igunakenna kata “kita.” Si peteluken, ikutipna karya sastra Junani guna ncidahken maka piga-piga kebenaren si iajarkenna lit ka nge bas tulisen kalak Junani. Gundari, mari sinen maka luar biasa kel cara Paulus mpeseh berita si meriah. Kebenaren penting kai nge si pesehna man kalak Aten kerna Dibata si la tandai kalak e?

13. Kai si ijelasken Paulus kerna uga tangtangna alam semesta lit, janah berita kai si ipesehna?

¹³ Dibata si nciptaken alam semesta. Nina Paulus, “Dibata si erban doni ras isina, Ia me Tuhan nandangi langit ras doni. Ia labo tading bas ingan  sembah-sembahen si iban manusia.” d (Perb. 17:24) Alam semesta labo lit bage-bage saja. Dibata si benar me si nciptaken kerinana. (Ms. 146:6) Ia me Dibata Si Meganjangna i langit ras doni. Dibata e labo tading bas ingan sembah-sembahen si iban manusia. Ia pe labo bagi Dewi Aten ntah pe dewa-dewi si debanna, si merluken ingan sembah-sembahen ras ingan nutung persembahen. (1 Raj. 8:27) Jelas kel berita si ipeseh Paulus enda: Dibata si benar hebaten asangken kerina berhala si lit bas ingan sembah-sembahen si iban manusia.​—Jes. 40:18-26.

14. Uga Paulus ncidahken maka Dibata labo bergantung man manusia?

¹⁴ Dibata la bergantung man manusia. Kalak si nembah berhala rusur makeken baju-baju si mewah, mereken hadiah-hadiah si merga, ntah pe mereken pangan ras inemen man berhala-berhala kalak e. Akap kalak e perlu patung-patung e si e kerina! Tapi banci jadi, lit ahli filsafat Junani si megiken Paulus si tek maka Dibata labo merluken kai pe arah manusia. Banci jadi, kalak e setuju sanga kataken Paulus maka Dibata “labo perlu layani manusia.” Janah perban Dibata e Pencipta, labo Ia perlu kai pe arah manusia. Sebalikna, Ia me si mereken kerina si iperluken manusia. Ia si mereken “kegeluhen, kesah, ras kerinana,” termasuk matawari, udan, ras taneh si subur. (Perb. 17:25; Kej. 2:7) Jadi, perban Dibata si mereken kerina keperlunta, labo Ia perlu kai pe arah kita.

15. Uga nge cara Paulus mpekena cara rukur kalak Aten si hebaten kapna bana asangken kalak si labo Junani, janah pelajaren penting kai si banci sidat arah usihen Paulus?

¹⁵ Dibata nciptaken manusia. Anggap kalak Aten hebaten kalak e asangken kalak si labo Junani. Tapi bas Pustaka ikataken maka ula min siakap sukuta ntah pe bangsata si hebatna. (Ul. 10:17) Beluh kel Paulus janah hati-hati kel ia mbahas masalah e. Nina Paulus, “Ban Dibata kerina bangsa si ngiani  doni enda arah sekalak jelma.” Kata-katana e pasti erban kalak si megiken ia rukur. (Perb. 17:26) Keterangen e ibuatna arah buku Kejadin kerna Adam, nini bulang kerina manusia. (Kej. 1:26-28) Emaka la lit suku ntah pe bangsa si hebaten asangken si debanna, perban kerina manusia sada ngenca nini bulangna. Kerina kalak si megiken Paulus pasti ngangkai kai maksud Paulus e. Lit pelajaren si penting si banci sidat arah Paulus. Amin pe hati-hati ateta janah masuk akal sanga erberita, tapi la kita nggit ngubah kebenaren Pustaka gelah meriah akap kalak megiken beritata.

16. Engkai maka ciptaken Dibata manusia?

¹⁶ Sura-sura Dibata eme gelah manusia ndeher ras Ia. Amin pe enggo ndekah ibahas ahli filsafat si megiken Paulus kerna kai tujunna lit manusia, tetap la banci bereken kalak e penjelasen si masuk akal. Tapi alu jelas icidahken Paulus kai tujun Pencipta man manusia eme “gelah darami kalak e Dibata. Adi tutus atena ndaramisa, pasti datna. Situhuna, Ia labo ndauh arah kita nari sekalak-sekalak.” (Perb. 17:27) Dibata si la itandai kalak Aten labo Dibata si la banci itandai. Sebalikna, Ia labo ndauh arah kalak si merhat kel ndarami Ia ras erlajar kerna Ia. (Ms. 145:18) Perdiateken maka igunaken Paulus kata “kita.” Jadi, ikutkenna bana bas kalak si perlu ‘ndarami’ bage pe ‘tutus ndarami’ Dibata.

17, 18. Engkai maka arusna manusia merhat ndeher ras Dibata, janah kai si banci sipelajari arah kai si ilakoken Paulus gelah tertarik kalak man beritana?

¹⁷ Arusna manusia merhat ndeher ras Dibata. Nina Paulus, “Perban Ia kap maka kita nggeluh, muit, janah lit.” Piga-piga ahli ngataken maka si ikataken Paulus enda ibuatna arah kata-kata Epimenides. Ia sekalak penyair arah  Kreta bas abad peenemken SM, janah “ia kalak si penting bas kiniteken kalak Aten.” Ikataken Paulus ka alasen si deban engkai manusia arusna merhat ndeher ras Dibata, “Bagi si kataken piga-piga penyair i tengah-tengah kena, nina, ‘Kita pe anak-anakNa kap.’” (Perb. 17:28) Arusna manusia merhat ndeher ras Dibata perban Dibata eme Bapak manusia pertama, si jadi nini bulang kerina manusia. Gelah tertarik kalak man beritana, ikutip Paulus tulisen-tulisen Junani si mbelin kemungkinenna iergai kalak si megiken ia. e Bagi Paulus, mon-mon banci ka sigunaken kutipen arah cataten ahli-ahli sejarah, arah ensiklopedia, ntah pe karya referensi si debanna si biasa igunaken kalak. Misalna, sanga njelasken kerna asal usul sada kebiasan ntah pe perayan agama palsu man sekalak jelma, banci sipake kutipen arah sumber si iergaina. Alu bage reh nukahna akapna ngaloken penjelasen e.

¹⁸ Seh ngayak jenda, enggo peseh Paulus kebenaren-kebenaren penting kerna Dibata. Beluh kel ia milih kata-kata si cocok ras kalak si megiken ia. Kenca begi kalak Aten kebenaren-kebenaren e, kai nge si arapken Paulus gelah ilakoken kalak e? Paulus la tertaren-taren, mis pebetehkenna man kalak e.

19, 20. (a) Uga Paulus alu bijaksana njelasken maka labo masuk akal nembah berhala? (b) Kai nge si arus ilakoken kalak si megiken Paulus?

¹⁹ Enggo siap Paulus ngataken kerna kai si arus ilakoken kalak si megiken ia. Ibelaskenna ka mulihi kutipen arah tulisen Junani ndai. Nina, “Emaka, perban kita anak-anakNa, ula min siakap Dibata e bagi emas, ntah pirak, ntah batu, ntah pe patung si iban manusia menurut kai si bayangkenna.” (Perb. 17:29) Adi manusia pe Dibata si nciptakenca, me labo mungkin Dibata e berhala si iban manusia. Penjelasen Paulus si bijaksana e ncidahken maka labo masuk akal nembah berhala si iban manusia. (Ms. 115:4-8; Jes. 44:9-20) Sanga kataken Paulus “ula min siakap,” usahaken Paulus gelah nasehatna e la kerassa kel iakap kalak si megikenca.

²⁰ Jelas kel icidahken Rasul Paulus maka kalak e perlu erban tindaken. Nina Paulus, “Mbarenda pediat Dibata la tandai kalak Ia [akap kalak meriah ukur Dibata adi manusia nembah berhala], tapi gundari katakenNa man kerina kalak i japa pe gelah ertobat.” (Perb. 17:30) Banci jadi, lit piga-piga kalak si megiken Paulus si sengget megi nasehat Paulus guna ertobat. Tapi kata-kata Paulus si tegas e ncidahken maka kalak e rutang kegeluhen man Dibata. Emaka arus ipertanggung jawapken kalak e man Dibata carana nggunaken geluhna. Kalak e perlu ndarami Dibata, pelajarina kebenaren kerna Ia, janah dalankenna kebenaren e bas kegeluhenna. Adi man kalak Aten, kata-kata  Paulus e ertina kalak e arus sadar maka nembah berhala e eme dosa, janah arus tadingken kalak e dosa e.

21, 22. Kata-kata tegas kai si igunaken Paulus guna ndungi penjelasenna, janah kai ertina e man banta gundari?

²¹ Idungi Paulus penjelasenna alu kata-kata si tegas. Nina, “Enggo tentuken [Dibata] sada wari guna ngakimi kerina manusia i doni alu adil. HakimiNa arah sekalak dilaki si enggo pilihNa. Dilaki e enggo ipekeke arah si mate nari guna jadi jaminen man kerina kalak.” (Perb. 17:31) Enggo teh kalak e maka nandangi reh Wari Penghakimen Dibata. Enda arusna ngiahken kalak e guna ndarami Dibata si benar seh ngasa tandai kalak e ise Ia. La ipebetehken Paulus ise Hakim si enggo itetapken e. Tapi enda me si ikataken Paulus kerna Hakim e: Ia pernah jadi manusia, mate, kenca si e ipekeke Dibata!

²² Kata penutup Paulus e penting denga man banta gundari. Siteh maka Hakim si enggo ipilih Dibata eme Jesus Kristus si enggo ipekeke. (Joh. 5:22) Siteh ka maka Wari Penghakimen e seribu tahun dekahna janah wari e enggo seh kel deherna. (Ket. 20:4, 6) La kita mbiar man Wari Penghakimen sebap siteh wari e maba pasu-pasu si seh kel belinna man kalak si setia. Masa depan si luar biasa e pasti terjadi, janah e ijamin alu mukjizat si mbelinna kel, eme kekeken Jesus Kristus!

23. Uga nge tanggapen kalak megi penjelasen Paulus?

²³ Erbage-bage tanggapen kalak megi penjelasen Paulus. “Lit si mulai nokohi ia” sanga begina kerna kekeken. Lit ka si alu sopan nulak Paulus, nina, “Enggo me, ndigan-ndigan saja begiken kami kerna si e.” (Perb. 17:32) Tapi lit si nggit megiken. Nina Pustaka, “Lit piga-piga kalak si nggabungken diri ras Paulus janah jadi kalak si tek. Piga-piga eme Dionisius sekalak hakim bas pengadilen Areopagus nari, sekalak diberu si gelarna Damaris, ras piga-piga kalak si debanna.” (Perb. 17:34) Gundari pe, erbage-bage tanggapen kalak megi beritata. Piga-piga kalak mungkin nokohi kita, lit ka si alu sopan nulak beritata. Tapi, pasti meriah kel ukurta sanga lit kalak si nggit megiken berita Kerajan janah jadi kalak si erkiniteken.

24. Kai si banci sipelajari arah penjelasen Paulus i Areopagus?

²⁴ Adi siukuri penjelasen Paulus, banci siteh carana njelasken sada topik alu cara si menarik akap kalak ras erban ia tek maka beritata eme kebenaren. Selain si e, siteh ka maka perlu kel kita sabar ras bijaksana sanga ngerana ras kalak si akapna ajaren agama palsu e si benar. Sidat ka pelajaren penting enda: Ula siubah kebenaren Pustaka gelah meriah akap kalak megiken kita. Janah, adi siusih Rasul Paulus, banci kita jadi pengajar si reh beluhna bas pelayanen. Selain si e, pengawas-pengawas pe banci reh beluhna sanga ngajar bas runggun. Hasilna, enggo ersikap kita nampati kalak guna ‘ndarami ras ndatken Dibata.’​—Perb. 17:27.