1-3. Engkai maka reh Paulus ku Korinti, janah kai saja si ikuatirkenna?

 PAKSA si e enggo nandangi pendungi tahun 50 M. Rasul Paulus sangana i Korinti, pusat perdagangen. Bas Korinti enterem kalak Junani, Romawi, ras Jahudi. a Paulus labo reh ku je guna ndayaken barang, nukur barang, ntah pe ndarami dahin. Reh ia ku je perban alasen si ndauh lebih penting, eme mberitaken Kerajan Dibata. Tapi Paulus perlu ingan tading, janah la ia nggit nyusahi kalak si deban secara ekonomi. Atena ula min wajip akap kalak mereken sen man bana perban ajarkenna Kata Dibata. Emaka, kai si ilakokenna?

² Paulus beluh erban kemah. Pendahin e labo menukah, tapi nggit ia erdahin guna ncukupi keperlunna. Banci nge kari datna pendahin bas kota si sibuk e? Banci nge kari datna ingan tading si cocok? Gia kuatir Paulus, tetap lakokenna pendahinna si utama, eme erberita.

³ Banci jadi, agak ndekah Paulus tading i Korinti, janah berhasil pelayanenna i je. Mari siperdiateken kai saja si ilakoken Paulus i Korinti si banci nampati kita terus mberitaken Kerajan Dibata bas daerahta.

4, 5. (a) Sanga i Korinti, i ja nge Paulus tading, janah kai dahinna? (b) Uga maka banci beluh Paulus erban kemah?

⁴ La ndekah kenca seh i Korinti, jumpa Paulus ras kalak Jahudi si gelarna Akuila. Diberu Akuila gelarna Persila ntah pe Priska. Meriah akap kalak e ngalo-ngalo tamu. Kalak e duana pindah ku Korinti perban lit perentah Kaisar Klaudius gelah “kerina kalak Jahudi nadingken Roma.” (Perb. 18:1, 2) Ajak kalak e Paulus tading bas rumahna, janah ajakna ka Paulus erdahin. Ikataken bas Pustaka, “Tading ia [Paulus] i rumahna janah radu ras ia erdahin perban seri pendahinna,  eme erban kemah.” (Perb. 18:3) Sedekah pelayanenna i Korinti, Paulus tading bas rumah pasangen si mehuli enda. Sanga tading ia ras kalak e, banci saja lit piga-piga surat si itulis Paulus si dungna jadi bagin Pustaka. b

⁵ Amin pe Paulus “bekas murid Gamaliel,” beluh ka ia erban kemah. Engkai maka bage? (Perb. 22:3) Mbelin kemungkinenna, kalak Jahudi bas abad pertama la mela ngajarken sada keterampilen man anak-anakna amin pe anak-anakna e ndatken pendidiken tambahen. Mbelin kemungkinenna, pelajari Paulus keterampilen e sanga ia nguda denga perban asalna arah Tarsus i Kiliki nari. Daerah e terkenal alu kain si igelari cilicium si igunaken erban kemah. Erban kemah labo pendahin si menukah. Guna erbanca, kain kemah arus itenun ntah pe ipotong janah ijait. Ngelakoken si e labo menukah perban bahanna kaku ras kasar.

6, 7. (a) Uga perukuren Paulus kerna pendahinna erban kemah, janah kai buktina maka Akuila ras Persila pe bage ka nge perukurenna? (b) Uga kalak Kristen si gundari ngusih Paulus, Akuila, ras Persila?

⁶ Labo anggap Paulus pendahinna erban kemah e si pentingna. Erdahin ia guna ncukupi keperlunna. Alu bage banci terus beritakenna berita si meriah janah “la iupahi.” (2 Kor. 11:7) Adi Akuila ras Persila, uga nge anggapna pendahinna? Perban kalak e pe kalak Kristen, pasti seri perukurenna bagi Paulus. Malahen, sanga tadingken Paulus Korinti bas tahun 52 M, Akuila ras Persila pe ikut pindah ras ia ku Epesus, janah rumah kalak e igunaken jadi ingan perpulungen i je. (1 Kor. 16:19) Bas pudi wari,  mulih kalak e ku Roma, kenca si e mulihken ka ku Epesus. Pasangen si semangat enda ngutamaken Kerajan, janah nggit kalak e erkorban guna ngelayani kalak si deban. Emaka “kerina runggun arah bangsa-bangsa si deban pe ngata bujur man kalak e.”​—Rom. 16:3-5; 2 Tim. 4:19.

⁷ Kalak Kristen si gundari pe usihna Paulus, Akuila, ras Persila. Perberita si semangat gundari pe kerja keras gelah la “jadi tanggungen” ise pe. (1 Tes. 2:9) Pasti sipujiken kel enterem perberita sepenuh waktu si erdahin setengah wari ntah pe erdahin piga-piga bulan bas sada tahun guna ncukupi keperlunna. Tapi si pentingna akap kalak e eme erberita. Bali bagi Akuila ras Persila, enterem umat Jahwe si gundari pe nggit ngundang pertua keliling tading bas rumahna. Turang senina si nggit ‘ngalo-ngalo’ e pasti terpegegehi janah ermeriah ukur.​—Rom. 12:13.

8, 9. Uga tanggapen Paulus sanga lit tentangen arah kalak Jahudi, kenca si e ku ja ia erberita?

⁸ Labo anggap Paulus pendahinna erban kemah e pendahin si utama. Si e banci siidah sanga reh Silas ras Timotius arah Makedoni maba mbue pemere arah turang senina. (2 Kor. 11:9) Sanga dat Paulus pemere e, mis ia “sibuk mberitaken kata Dibata [“meritaken Berita Si Meriah nari ngenca dahin Paulus,” Pustaka si Badia ras Ende-enden Edisi ke-4 © LAI 2003].” (Perb. 18:5) Amin pe semangat Paulus erberita man kalak Jahudi, mbue tentangen si adapina. Kalak Jahudi la nggit ngaloken berita kerna Kristus si banci nelamatken kegeluhen kalak e. Emaka, kisamken Paulus uisna si jadi tanda maka lanai ia ertanggung jawap man keputusen kalak e. Nina Paulus man penentangna, “Kena si ertanggung jawap man dareh kena. Aku bersih. Mulai gundari nari lawes aku ku bangsa-bangsa si deban.”​—Perb. 18:6; Esek. 3:18, 19.

⁹ Kenca si e, ku ja Paulus erberita? Lit sekalak dilaki si gelarna Titus Justus si rumahna lit i sebelah ingan pulung kalak Jahudi. Banci saja ia kalak si ngikutken agama Jahudi. Nggit ia ngalo-ngalo Paulus bas rumahna. Emaka lanai Paulus erberita bas ingan pulung kalak Jahudi tapi i rumah Justus. (Perb. 18:7) Rumahna e me si dungna jadi ingan Paulus erberita. Tapi tetap Paulus tading bas rumah Akuila ras Persila sedekah ia i Korinti.

10. Ja nari siteh labo putusken Paulus guna erberita man kalak arah bangsa-bangsa si deban saja?

¹⁰ Sanga kataken Paulus maka lawes ia ku bangsa-bangsa si deban, kai nge maksudna? Lanai nge ia nggit erberita man kalak Jahudi ras man kalak si ngikutken agama Jahudi? Labo bage maksudna. Contohna, “Krispus, kepala ingan pulung kalak Jahudi ras kerina kalak si lit bas rumahna jadi kalak si tek man Tuan.” Mbelin kemungkinenna, enterem anggota ingan pulung kalak Jahudi si i je dungna jadi kalak Kristen. Nina Pustaka, “Enterem ka kalak Korinti si megi berita si meriah dungna jadi tek ras iperidiken.” (Perb. 18:8) Rumah Titus Justus pe iban jadi ingan perpulungen man runggun si mbaru denga ibentuk i Korinti. Adi cataten Perbahanen Rasul-Rasul enda ipeseh bagi gaya Lukas sedekah enda, eme sesuai uruten kejadinna, e ertina kalak Jahudi ras kalak si ngikutken agama Jahudi e ertobat kenca kisamken Paulus uisna. Jelas me, Paulus e labo kaku janah nggit ia erberita man ise pe si nggit megiken beritana.

11. Uga Saksi-Saksi Jahwe gundari ngusih Paulus sanga erberita man kalak si ngaku Kristen?

¹¹ Bas melala negri, enterem kalak si ngaku Kristen. Mbelin kel pengaruh ajaren gereja man kalak e. Bas piga-piga ingan i sebelang doni, utusen injil arah gereja-gereja rusaha gelah reh teremna kalak si jadi anggota gerejana. Tapi kalak si ngaku Kristen e pentingen kapna ngikutken kebiasan  bas gerejana asangken hubungenna ras Dibata. Enda bali bagi kalak Jahudi i Korinti bas abad pertama. Tapi bali bagi Paulus, Saksi-Saksi Jahwe semangat nampati kalak si bage gelah angkaina Pustaka. Amin pe itentang kalak e kita ntah pe itindas peminpin agamana kita, la kita nggit nyerah erberita. Banci saja, lit kalak si meteruk ukur arah kalak si “tuhu-tuhu semangat nembah Dibata, tapi semangatna e la sesuai ras pemeteh si benar.” Emaka, perlu sidarami kalak e.​—Rom. 10:2.

12. Kai si ikataken Jesus guna mpegegehi Paulus?

¹² Banci jadi sempat Paulus ragu, perlu nge teruskenna erberita i Korinti ntah lang. Tapi tehna kai si arus lakokenna kenca cidahken Jesus dirina. Nina Jesus, “Ula kam mbiar, teruslah kam ngerana, ula kam sinik, sebap aku kap ras kam. Labo ise pe banci nyerang ras ncilakai kam, sebap enterem kalak bas kota enda tek kari man bangku.” (Perb. 18:9, 10) Pasti terpegegehi kel Paulus megi kata-kata Jesus e! Ipetetap Jesus ukur Paulus maka pasti nge lindungi Jesus ia arah musuh-musuhna, janah enterem kari kalak si tek man Jesus bas kota e. Kai si ilakoken Paulus kenca begina kata-kata Jesus e? Ikataken Pustaka, “Tading Paulus i je sada setengah tahun dekahna. Ajarkenna kata Dibata man kalak e.”​—Perb. 18:11.

13. Kai si mungkin ukuri Paulus sanga enggo reh deherna ia ku pengadilen? Ja nari tehna maka labo kari ia mate bagi Stepanus?

¹³ Kenca kira-kira sada tahun Paulus i Korinti, idahna ka bukti si deban maka idukung Tuan ia. “Ersada arih kalak Jahudi ngelawan Paulus ras maba ia ku pengadilen,” si igelari ka bema. (Perb. 18:12) Menurut piga-piga kalak, bema eme panggung si iban arah marmar warna biru ras mbentar janah melala ukirenna. Posisi bema e banci saja i deher pusat pajak Korinti. I lebe-lebe bema lit ingan si lumayan mbelang si banci enterem kalak pulung  i je. Menurut piga-piga ahli sejarah, banci saja pengadilen e ndeher ras ingan pulung kalak Jahudi si lit i deher rumah Justus. Sanga enggo reh deherna Paulus ku bema, banci saja ingetna Stepanus si ibenteri alu batu. Stepanus eme kalak Kristen si pertama si ibunuh perban ersaksi kerna Jesus. Sange, Paulus si itandai ka Saul, “setuju kerna pembunuhen Stepanus.” (Perb. 8:1) Bage ka nge kari si terjadi man Paulus? Lang, sebap enggo alokenna janji, “Labo ise pe banci . . . ncilakai kam.”​—Perb. 18:10.

14, 15. (a) Tuduhen kai nge si banci iban kalak Jahudi man Paulus, janah uga Galio nutup kasus e? (b) Kai nge si terjadi man Sostenes, janah engkai maka lit si erpengakap maka dungna ia jadi kalak Kristen?

¹⁴ Kai nge si terjadi kenca seh Paulus i lebe-lebe pengadilen e? Pejabat pengadilen e eme gubernur Akaya, si gelarna Galio. Adekna eme ahli filsafat Romawi si gelarna Seneka. Bagenda tuduhen kalak Jahudi man Paulus, “Pengaruhi dilaki e kalak si deban nembah Dibata alu cara si la cocok ras undang-undang.” (Perb. 18:13) Tempa-tempa kataken kalak e maka ilanggar Paulus undang-undang perban iahkenna piga-piga kalak Jahudi gelah jadi kalak Kristen. Tapi, labo lit idah Galio “kesalahen” Paulus, janah labo lit lakoken Paulus “kejahaten.” (Perb. 18:14) Galio la nggit ikut campur bas persoalen kalak Jahudi. Emaka, Paulus la perlu ngerana guna mbela dirina. Mis tutup Galio kasus e. Naik me dareh kalak si nuduh Paulus. Merawa kalak e man Sostenes si banci saja enggo nggantiken Krispus jadi ketua bas ingan pulung kalak Jahudi. Tangkap kalak e Sostenes “janah pekpeki kalak e ia i lebe-lebe pengadilen.”​—Perb. 18:17.

¹⁵ Engkai maka pediat Galio pekpeki jelma si enterem e Sostenes? Banci saja menurut Galio, Sostenes me peminpin jelma si enterem e. Emaka, wajar saja pekpeki kalak e ia. Tapi, bicara la pe ia si minpinsa, banci saja lit hasil si mehuli arah kejadin e. Bas suratna si pertama man runggun Korinti, si itulis Paulus piga-piga tahun kenca si e, lit turikenna kerna sekalak turang senina si gelarna Sostenes. (1 Kor. 1:1, 2) Ia nge Sostenes si ipekpeki i Korinti? Adi memang ue, pengalamenna si la mehuli e banci saja enggo nampati ia jadi kalak Kristen.

16. Uga kata-kata Jesus, “teruslah kam ngerana, ula kam sinik,” erban kita tetap semangat erberita?

¹⁶ Ingetlah maka kenca itulak kalak Jahudi berita Paulus, nina Jesus, “Ula kam mbiar, teruslah kam ngerana, ula kam sinik, sebap aku kap ras kam.” (Perb. 18:9, 10) Kita pe perlu siinget kata-kata e, khususna adi itulak kalak beritata. Ula pernah kita lupa maka banci iteh Jahwe isi pusuh kalak, janah tarikna kalak si meteruk ukur jadi umatNa. (1 Sam. 16:7; Joh. 6:44) Enda ngiahken kita gelah terus erberita! Tiap tahun lit kira-kira 300.000 kalak si iperidiken. Adi irata-rataken, 800 kalak sada wari. Adi sidalanken perentah Jesus guna ‘erban kalak arah kerina bangsa jadi murid,’ erjanji Jesus, “Lalap pagi aku ras kena seh ku kedungen jaman enda.”​—Mat. 28:19, 20.

17, 18. Kai nge si mungkin ukuri Paulus sanga erlayar ia Kenkerea nari?

¹⁷ Banci saja perbahanen Galio man kalak si nuduh Paulus erban runggun Kristen si mbaru ibentuk i Korinti ndatken kedamen. Tapi, tading denga Paulus “piga-piga wari” nari sope belaskenna kata-kata perpisahen man turang senina i Korinti. Bas musim semi tahun 52 M, iputuskenna erlayar ku Siria arah pelabuhen Kenkerea. Pelabuhen e kira-kira 11 kilometer i sebelah timur Korinti. Tapi, sope berkat arah Kenkerea nari, “gendek potong Paulus bukna tandana ia enggo erjanji man Dibata.” c (Perb. 18:18) Kenca si e, erlayar me ia nyebrangi Laut Aegea ku Epesus i Asia Kecil, janah Akuila ras Persila ikut ras ia.

¹⁸ Sanga Paulus erlayar arah Kenkerea nari, mungkin ukurina pengalamenna i Korinti. Enggo melala datna kenangen si erban meriah ukurna, janah melala ka alasen si erban puas akapna. Enggo melala datna hasil arah pelayanenna sedekah sada setengah tahun ia i je. Runggun si pertama i Korinti enggo terbentuk. Rumah Justus me ipake jadi ingan perpulungen. Piga-piga kalak si enggo erkiniteken eme Justus, Krispus ras kerina kalak si lit bas rumahna, bage pe enterem denga si debanna. Keleng kel ate Paulus kalak e kerina, perban enggo sampatina kalak e jadi kalak Kristen. Bas pudi wari, tulisna surat man kalak e janah katakenna maka kalak e eme “surat-surat pujin” si itulis bas pusuhna. Kita pe, pasti ndeher siakap kita ras kalak si enggo sisampati nembah Jahwe. Pasti puas kel siakap ngidah “surat-surat pujin” si bage!​—2 Kor. 3:1-3.

19, 20. Kai nge si lakoken Paulus kenca seh i Epesus, janah kai si banci siusih arah ia bas ngelakoken terbuen man Jahwe?

¹⁹ Kenca seh i Epesus, mis Paulus erberita. Ia “masuk ku ingan pulung kalak Jahudi janah ercakap-cakap ras kalak Jahudi.” (Perb. 18:19) Bas kesempaten enda, kentisik ngenca Paulus singgah i Epesus. Amin pe ipindoken turang senina man bana gelah terdekahen ia tading i je, “la ia nggit.” Kenca ngata lawes Paulus, katakenna man turang senina i Epesus, “Reh nge pagi aku mulihi ndahi kena, adi bage kin ate Jahwe.” (Perb. 18:20, 21) Pasti iteh Paulus maka berita si meriah perlu denga ipeseh man enterem kalak i Epesus. Merhat denga nge ia mulihken ku Epesus, tapi pediatna sura-sura Jahwe si terjadi. Enda jadi usihen si mejile man banta. Memang, arus siban rencana gelah banci silakoken terbuen man Jahwe. Tapi, arus terus siikutken petunjuk Jahwe janah siusahaken ngelakoken kai si sesuai ras sura-suraNa.​—Jak. 4:15.

²⁰ Akuila ras Persila tetap tading i Epesus. Tapi Paulus erlayar ka janah seh i Kesarea. Banci saja “lawes” ia ku Jerusalem janah singgah ku runggun si lit i je. (Nen keterangen tambahen nwtsty-IN man Perb. 18:22.) Kenca si e, berkat ka Paulus ku posna eme Antiokia Siria. Enggo dung perdalanen utusen injilna si peduaken, janah sukses perdalanenna e. Mari sinen kai si terjadi bas perdalanen utusen injilna si terakhir.