1, 2. Engkai maka Paulus reh ku Jerusalem, janah tentangen kai si man adapenna i je?

 PAULUS sangana erdalan bas dalan si sempit i Jerusalem. Enterem kalak si lewat arah dalan e. Enggo ratusen tahun dekahna Jerusalem jadi pusat ingan nembah Jahwe. Enterem kalak si tading i Jerusalem bangga kel man sejarah kota e bage pe sejarah bangsana. Iteh Paulus enterem kalak Kristen si lit i je iandalkenna kel Undang-Undang Musa janah mesera akapna ngikutken perkembangen bas cara nembah Jahwe. Emaka sanga Paulus i Epesus, merhat kel ia reh ku Jerusalem guna nampati turang senina i je. Kerehenna labo saja guna mereken sumbangen, tapi termasuk ka mpekena cara rukur kalak e. (Perb. 19:21) Amin pe teh Paulus maka lit bahaya si nimai ia i Jerusalem, tetap ia reh ku je.

² Melala kesuliten si nandangi adapi Paulus i Jerusalem. I je, lit turang senina si tek man bual si ituriken kalak kerna Paulus. Musuh-musuh Kristus pe erban mbue tentangen si arus adapi Paulus. Ban kalak e tuduhen palsu man Paulus, pekpeki kalak e ia, janah usahaken kalak e munuh ia. Kerina situasi e erban lit kesempaten Paulus guna mbela kinitekenna. Tetap Paulus erkiniteken, cidahkenna sipat meteruk ukur, janah perpang ia. Kita pe siusih ateta ia.

3-5. (a) Ras ise Paulus jumpa i Jerusalem janah kai si icakapken kalak e? (b) Pelajaren kai si banci sidat arah perjumpan Paulus ras pertua-pertua i Jerusalem?

³ Sada wari kenca seh Paulus i Jerusalem, lawes me Paulus ras teman-temanna ndahi pertua-pertua si ertanggung jawap bas runggun. La lit sada pe rasul si ituriken bas kejadin e. Banci saja paksa si e kalak e enggo lawes ku ingan-ingan si deban guna erberita. Tapi, Jakup adek Jesus tetap denga i Jerusalem. (Gal. 2:9) Mbelin kemungkinenna, Jakup me si jadi ketua bas perjumpan e, janah “kerina pertua pe lit i je.”​—Perb. 21:18.

⁴ Kataken Paulus mejuah-juah man kalak e. Kenca si e, “jelaskenna kerna kai si lakoken Dibata i tengah-tengah bangsa-bangsa arah  pelayanenna.” (Perb. 21:19) Pasti terpegegehi kel turang senina e megi pengalamen Paulus e. Gundari pe, meriah ukurta sanga sibegi perkembangen dahin erberita bas negri si deban.​—Kua. 25:25.

⁵ Sanga cerita Paulus, turikenna ka kerna sumbangen si babana arah Eropa nari. Pasti meriah ukur turang senina perban turang senina bas ingan-ingan si deban pe ermediate man kalak e. Kenca begi kalak e pengalamen Paulus, “Muliaken kalak e [pertua-pertua e] Dibata.” (Perb. 21:20a) Gundari pe, turang senina si kena bencana alam ntah pe si sakit ngata bujur kel perban penampat ras pengapul si ibereken turang senina.

6. Masalah kai si ituriken man Paulus?

⁶ Ikataken pertua-pertua e man Paulus maka ibegi kalak e berita si la tuhu kerna ia. Nina kalak e, “O Senina, bagi si idahndu, enggo ribun kalak Jahudi jadi kalak si tek janah semangat kel kalak e ndalanken Undang-Undang Musa. Tapi begi kalak e berita kerna kam, ajarindu kerina kalak Jahudi si tading bas bangsa si deban guna nadingken Undang-Undang Musa. Suruhndu ka gelah ula sunat kalak e anak-anakna janah ula ngikutken adat kalak Jahudi.” a—Perb. 21:20b, 21.

7, 8. (a) Uga nge cara rukur kalak Kristen i Judea? (b) Engkai maka kalak e la ikataken kalak murtad amin pe salah cara rukurna?

⁷ Engkai maka enterem kalak Kristen si semangat kel ndalanken Undang-Undang Musa amin pe enggo lebih 20 tahun Undang-Undang e lanai berlaku?  (Kol. 2:14) Bas tahun 49 M, rapat me rasul-rasul ras pertua-pertua i Jerusalem. Ikirim kalak e surat man runggun-runggun. Bas surat e, ijelasken maka kalak Kristen si labo Jahudi la perlu isunat janah la perlu ndalanken Undang-Undang Musa. (Perb. 15:23-29) Tapi, bas surat e la lit ituriken kerna kalak Kristen Jahudi. Enterem arah kalak e la tehna maka lanai perlu dalankenna Undang-Undang Musa.

⁸ Amin pe pengangkan kalak Kristen Jahudi e salah, situhuna kalak e kalak Kristen si setia. Sope kalak e jadi kalak Kristen, labo sembah kalak e berhala, janah kenca jadi kalak Kristen, labo ikutken kalak e kebiasan agama palsu. Undang-Undang Musa e Jahwe si merekenca. Emaka labo lit si salah bas Undang-Undang e, janah labo lit pengaruhna si la mehuli. Tapi, Undang-Undang e lit arah perjanjin si ndekah. Padahal, kalak Kristen enggo lit bas perjanjin si mbaru. Kalak Kristen Jahudi si maksaken gelah Undang-Undang Musa terus idalanken la tek man pengaturen Jahwe si mbaru. Emaka, perlu sesuaiken kalak e cara rukurna gelah sesuai ras perkembangen si mbaru. b—Jer. 31:31-34; Luk. 22:20.

9. Kai si ajarken Paulus kerna Undang-Undang Musa?

⁹ Uga kerna berita si ngataken maka iajari Paulus kalak Jahudi si tading  bas bangsa si deban “gelah ula sunat kalak e anak-anakna janah ula ngikutken adat kalak Jahudi”? Paulus erberita man kalak si labo Jahudi. Jelaskenna man kalak e keputusen kerna labo perlu dalanken kalak e Undang-Undang Musa. Ijelaskenna maka salah kap kalak si ngajuk-ngajuk kalak Kristen si labo Jahudi gelah isunat ras matuhi Undang-Undang Musa. (Gal. 5:1-7) Paulus pe erberita man kalak Jahudi bas kota-kota si idahina. Pasti jelaskenna man kalak e maka kematen Jesus erban Undang-Undang Musa lanai berlaku. Turikenna ka maka amin pe lanai ilakoken kalak e Undang-Undang Musa, tetap nge kalak e benar iakap Dibata.​—Rom. 2:28, 29; 3:21-26.

10. Kai buktina seimbang perukuren Paulus kerna Undang-Undang Musa bage pe sunat?

¹⁰ Tapi, labo pandangi Paulus kalak si atena ndalanken piga-piga kebiasan Jahudi. Contohna, labo pandangi Paulus kalak si ndalanken Sabat bage pe si la nggit man pangan tertentu. (Rom. 14:1-6) Selain si e, labo lit iban Paulus aturen kerna sunat. Malahen, suruh Paulus gelah Timotius isunat. Tujunna eme gelah ula min kalak Jahudi curiga man Timotius perban teh kalak e bapakna kalak Junani. (Perb. 16:3) Sunat e keputusen pribadi. Nina Paulus man kalak Galati, ‘si pentingna labo isunat ntah lang, tapi kiniteken si ibuktiken alu kekelengen.’ (Gal. 5:6) Tapi, adi sekalak jelma isunat guna mpertahanken Undang-Undang Musa, ntah pe gelah ngena ate Jahwe man bana, e labo cocok. E ncidahken maka kurang denga kinitekenna.

11. Petunjuk kai nge si bereken pertua-pertua man Paulus, tapi kai si la nggit Paulus ngelakokenca? (Nen cataten i teruh bas halamen 185.)

¹¹ Amin pe berita kerna Paulus e la tuhu, berita e erban terganggu pusuh kalak Kristen Jahudi. Emaka, ikataken  pertua-pertua e man Paulus, “I jenda lit empat dilaki si enggo erjanji man Dibata. Babalah kalak e janah ras-ras kena ngelakoken acara pembersihen diri. Galarilah kerina uang keluarna gelah banci pangkas kalak e bukna. Alu bage, kerina kalak meteh maka berita si begina kerna kam labo tuhu, perban mehuli perbahanenndu janah patuhindu Undang-Undang Musa.” c—Perb. 21:23, 24.

12. Kai buktina Paulus nggit erban penyesuaien janah nggit kerja sama ras pertua?

¹² Banci saja ikataken Paulus maka masalahna labo berita kerna ia, si jadi masalah eme semangat kalak Kristen Jahudi ndalanken Undang-Undang Musa. Tapi, nggit Paulus erban penyesuaien janah lakokenna kerina si ikataken pertua-pertua adi e la ngelanggar prinsip. Nggit Paulus kerja sama ras pertua-pertua i Jerusalem. Sebelumna, pernah itulis Paulus, “Man kalak si patuh man undang-undang, aku pe bagi kalak si patuh man undang-undang gelah banci kusampati kalak e, amin pe aku labo i teruh undang-undang.” (1 Kor. 9:20) Nggit Paulus kerja sama ras pertua-pertua i Jerusalem, janah nggit ia “bagi kalak si patuh man undang-undang.” Kita pe, siusih ateta Paulus. Nggit kita kerja sama ras pertua-pertua janah la sipaksaken pendapatta.​—Heb. 13:17.

13. (a) Engkai maka iban piga-piga kalak Jahudi guntar rumah pertoton? (b) Uga maka Paulus banci selamat?

¹³ Sanga janji empat dilaki e nandangi dung, lit kalak Jahudi arah Asia si ngidah Paulus. Ituduh kalak e maka ibaba Paulus kalak si labo Jahudi ku rumah pertoton. Ban kalak e ka guntar rumah pertoton. Adi la reh pasuken Roma, enggo min ndai Paulus mate ipekpeki. Amin gia bage, isuruh komandan pasuken Roma e gelah Paulus itahan. Empat tahun kenca si e maka Paulus ibebasken. Tapi, kenca bebas pe, lit denga bahaya si arus iadapi Paulus. Sanga sungkun komandan e engkai maka iserang kalak e Paulus, serko kalak e janah erbage-bage tuduhenna. Emaka la iangkai komandan e kai maksudna. Dungna, ibaba me Paulus lawes arah ingan e nari. Sanga Paulus ras prajurit Roma nandangi seh ku markas prajurit, nina Paulus man komandan e, “Mindo aku man bandu, pediat min aku ngerana man jelma si enterem e.” (Perb. 21:39) Setuju komandan e, emaka ibela Paulus kinitekenna alu perpang.

14, 15. (a) Kai si ijelasken Paulus man kalak Jahudi? (b) Kai saja nge si ilakoken komandan pasuken Roma guna meteh engkai maka kalak Jahudi merawa man Paulus?

 ¹⁴ Nina Paulus, “Begikenlah pembelanku.” (Perb. 22:1) Ngerana Paulus man jelma si enterem e alu bahasa Heber, emaka tenang kalak e. Jelaskenna man kalak e engkai maka ia jadi pengikut Kristus. Bas penjelasenna, turikenna pokok-pokok si banci ipastiken kalak Jahudi e. Paulus pernah iajari guru si hebat, eme Gamaliel. Pernah ka itindasna murid Kristus. Piga-piga kalak si lit i je pe mungkin tehna kerna si e. Tapi, bas perdalanenna ku Damaskus, datna pengenehenen kerna Jesus si enggo ipekeke. Ngerana Kristus man bana. Kalak si ras Paulus pe idahna sinar si terang janah begina sora, tapi la angkaina kai nina sora e. (Nen keterangen tambahen nwtsty-IN man Perb. 9:7; 22:9.) Kenca si e, itegu-tegu temanna me Paulus ku Damaskus. Paulus pentang perban pengenehenen e. Bas Damaskus, ipepalem Ananias me Paulus alu mukjizat. Melala kalak Jahudi bas daerah e si nandai Ananias.

¹⁵ Kenca si e, iceritaken Paulus maka kenca mulih ia ku Jerusalem, cidahken Jesus dirina man Paulus i rumah pertoton. Megi si e, merawa kel kalak Jahudi janah nina, “Bunuh ia! Labo ia patut nggeluh bas doni enda!” (Perb. 22:22) Guna nelamatken Paulus, ibaba komandan e ia lawes ku markas prajurit. Merhat kel komandan e meteh engkai maka merawa kel kalak Jahudi man Paulus. Emaka, perentahkenna man prajuritna gelah Paulus icambuk. Tapi, sope icambuk ikataken Paulus man kalak e maka ia warga negara Roma. Sungkunna kalak e banci kin warga negara Roma icambuk adi lenga iadili. Gundari pe umat Jahwe nggunaken undang-undang guna mbela  kiniteken kalak e. (Nen kotak “ Undang-Undang Roma ras Warga Negara Roma,” bas halamen 184, ras “ Kasus Hukum bas Jaman Modern,” bas halamen 186.) Sanga begi komandan e maka Paulus warga negara Roma, gunakenna cara si deban gelah datna terbuen keterangen. Paginna, perentahkenna gelah Paulus ibaba ku Pengadilen Agama Jahudi.

16, 17. (a) Kai si terjadi sanga ibela Paulus kinitekenna i lebe-lebe Pengadilen Agama Jahudi? (b) Kai buktina Paulus meteruk ukur?

¹⁶ Ibela Paulus dirina i lebe-lebe Pengadilen Agama Jahudi. Nina, “O senina-senina, seh ngasa wari enda enggo kulakoken kai pe alu pusuh peraten si bersih i lebe-lebe Dibata.” (Perb. 23:1) Tapi, la banci iteruskenna pembelanna. Bas Pustaka ikataken, “Megi si e, imam si mbelin si lit i je eme Ananias, suruhna kalak si tedis deher Paulus marap babah Paulus.” (Perb. 23:2) Enda penghinan man Paulus! E ncidahken maka segat ate kalak e man Paulus. Anggap kalak e maka erbual Paulus, padahal lenga lit bukti kai pe. Emaka nina Paulus, “Dibata nge pagi si marap kam, o kalak munapik! Kundul kam i jenda ngadili aku menurut Undang-Undang Musa, tapi engkai maka ilanggarndu Undang-Undang e alu nuruh kalak marap aku?”​—Perb. 23:3.

¹⁷ Sengget me kalak si lit i je. Kalak e sengget labo perban kai si terjadi man Paulus, tapi perban kai si ikataken Paulus. Nina kalak e, “Imam si mbelin Dibata kap si ihinandu e!” Ijawap Paulus me kalak e. Arah jawapenna teridah maka ia meteruk ukur janah ergaina Undang-Undang Musa. Nina Paulus, “O senina-senina, la kap kuteh ia imam si mbelin. Lit kap tertulis, ‘Ula hina kena penguasa bangsa kena.’” d (Perb. 23:4, 5; Kel. 22:28) Kenca si e, igunaken Paulus ka cara si deban. Inget Paulus maka bas Pengadilen Agama Jahudi lit kalak Parisi janah lit ka kalak Saduki. Ikatakenna me, “O senina-senina, aku kalak Parisi, nini-niniku pe kalak Parisi. Gundari, aku iadili perban tek aku maka kalak si mate banci nggeluh mulihi.”​—Perb. 23:6.

18. Engkai maka ikataken Paulus maka ia kalak Parisi, janah uga kita banci ngusih ia?

 ¹⁸ Ikataken Paulus maka ia kalak Parisi perban ‘nini-ninina pe kalak Parisi.’ Emaka, banci saja ianggap kalak ia kalak Parisi. e Tapi engkai maka kataken Paulus ia kalak Parisi padahal lit kiniteken kalak Parisi si salah kerna kekeken? Contohna, lit laporen si ngataken maka iakap kalak Parisi, kenca sekalak jelma mate, lit denga bagin arah dirina si tetap nggeluh. Kalak e pe tek maka tendi kalak si benar banci nggeluh mulihi jadi manusia. Paulus la tek man ajaren e, ia tek man kekeken si iajarken Jesus. (Joh. 5:25-29) Tapi Paulus setuju man kalak Parisi, perban la bagi kalak Saduki, kalak Parisi tek maka kalak mate banci nggeluh mulihi. Kita pe perlu sidarami persamanta ras kalak si ijumpai kita sanga erberita. Memang, kalak e tek man Dibata si Telu Sada, tapi kita tek man Dibata Jahwe. Amin gia bage, radu tek nge kita maka Dibata e lit.

19. Engkai maka guntar dungna Pengadilen Agama Jahudi?

¹⁹ Kai si ikataken Paulus e erban anggota Pengadilen Agama Jahudi e terbagi. Nina Pustaka, “Terjadi perubaten si mbelin. Piga-piga ahli Undang-Undang Musa arah sekte Parisi merawa, nina, ‘La lit dat kami sitik pe salah dilaki enda! Banci jadi tuhu-tuhu lit mahluk si la teridah ntah pe malekat si ngerana man bana.’” (Perb. 23:9) Megi kata-kata e, merawa me kalak Saduki perban kalak e la tek maka lit malekat! (Nen kotak “ Kalak Saduki ras Kalak Parisi.”) Reh guntarna me kalak si lit i je. Emaka, iselamatken komandan militer Roma me Paulus sekali nari. (Perb. 23:10) Amin pe bage, lit denga bahaya si arus ihadapi Paulus. Kai e? Sibahas kari kerna si e bas pasal seterusna.